Luk 3
3
Sion Baptis pol kokot ni polien nan tengan vahithiten longeongen hos na Hi mi moletin xil
1E melele xa Taeberias tehe Sisa#3:1 Suv toto na moletin xil labe holu, e Sisa tehe eilep e xil vus e melele nen ak. Mol‑Rom xil latenem latehit tehe hi tei vengan xa xeihen nan mahulong pupu. te hal Rom huram lim e le tei (15), moletin hat (4) iaxa di latetutou ni lelaxatien nan: Herod Antipas tehe suv toto te hal Kaleli; tunali Pilip, tehe suv toto te hal Ituria tetel Trakonaetas; Lisanias tehe suv toto te hal Abilin; e Pontias Paelet tehe vat te kavmen te hal Sudea.#Mat 3:1-12; Mak 1:1-8; Sion 1:19-28 2E melele nen ak, Anas xal Kaeafas lunggur polien te vatixar na pris xil.#Luk 1:80
E melele ak, Hi misa sepinien tei mi Sion, nat Sakaraea, e uruvuol. 3Ma Sion mikakao e ut xil ngasen xa ladi sangas visal Oeisal Sodan e di bithiten sepinien na Hi mi moletin xil bit, “!Muhiles ra tesaen namim xil! Ti, mumei minou e nibaptaes ni xamim tengan vapisen ni xa Hi di miketeh bos rilomun mi xamim.”#Pol 13:24; 19:4 4Provet Aesea tetis usil Sion tetiamu tehit,#Aes 40:3-5
“Lalong rae tei xa di mikei e uruvuol xa bit,
‘!Musak mesen suse na Hi Suv!
!Mupol ni suse nan imal!
5 Mutihin sesale xil,
e muhil lelen hu xil mei lihe motan.
Suse xil xa lakavui, mupol ni mei limal tevi,
e mutihin suse xil xa misa.
6 Ti, moletin xil vus lipusi
xa Hi ti iteh meulien e xil itep.’” (Aes 40:3-5)#Luk 2:30-31; Pol 28:28; Taet 2:11
7Vanut moletin xil holu lamei tengan Sion vabaptaes ni xil. E Sion mea e misepin nggeih mi vat xil na Siu xil xa lamei mini bit, “!Ei, xamim mube vanut tetal tesa xil xa di langas vin moletin xil ni vulongomim! ?Visi iaxa tesel xat xamim tengan mulesae ra pangasien xa Hi isa ni mi xamim?#Mat 12:34; 23:33 8Ihos mak mu xa, itiamu, mupol ni sexien xil xa ipisen ni xa mubiles ra tesaen namim xil reitin. E munahiteni ti munahit, ‘Xamem munahur ti pangasien vengan xa Ebraham be avu namem e Hi tehosei xamem mabe nan.’ E nabiteni mi xamim xa ngan ak tave reitin ti, vengan xa Hi mikila vahosei hat xil ak tengan mei lave havneli xil e mei lave moletin nan xil xati.#Sion 8:39 9Taxeak tang, Hi bue xat akis nan ngamu tengan itei vatiei xil ngasen xa latataxao ni ti huite xil xa bos. Reitin, itei xoteh xil e iso xil lihe upang.”#Mat 7:19; Sion 15:6
10E vanut moletin xil ak lasis Sion labit, “?Ma xamem mupol ni naha vari?”
11Sion biteni mi xil bit, “Xosxa tei e xamim, eising nan lu, ma isa tei mi mosav xa nan tovuol. Xosxa anien amim di, ma musa rute mi mosav xa an tovuol.”
12Di, moletin xil te takis lamei tengan Sion vabaptaes ni xil, e xil lasisi labit, “?Titsa, xamem mupol ni naha vari tengan mei mumal pe met Hi?”#Luk 7:29
13Ma Sion biteni mi xil bit, “Munaleh mani te takis ti nali naha xa rae te kavmen di biteni.”
14E moletin xil te vaeen mun lamei lasisi labit, “?E itep mi xamem? ?Xamem mupol ni naha tengan mei mumal pe met Hi?”
Ma Sion biteni mi xil bit, “Munaxeih xat moletin xil ti tengan lasa mani mi xamim. E munahur ti mani naxo suse xa muluvos mosav e kot en. Mulonge ihos tang ve mani xa di mungguri.”
15Melele xa moletin xil lalong naha xa Sion di biteni, lanem holu usili del sien e labiteni mi xil mun tang labit, “Xos Sion vari iaxa be Mesaea xa Hi tehit xati tehit isa ni imei.”
16Melele xa Sion milonge mak, bit rilomun ni mi xil bit, “Inou natave Mesaea ti. Inou di nabaptaes ni xamim ni oei tang. E tei xa imei itutou ni nou, xi iaxa ihe eilep mak mu ili nou, e inou natapin ti tengan nalal rat sandel nan. Xi vari ibaptaes ni xamim ni Ninin Eo e ni upang.#3:16 Upang ak ia moten ngan xil xa langgusil xat Iesu, e ia len ngan xil xa latahusili ti. #Pol 13:25 17Xi bue xat xi tengan vaseti moletin xil ngasen ixoni moletin xa di po savel tengan vaseti utut uit ra valite. Utut uit xa bos, ileh xati ha ihe nim man; e valite xil teni, iso ni ihe upang xa misakras vamat.” 18E sexien nen tak, Sion misel xat moletin xil e bithiten longeongen hos na Hi mi xil.
19E melele xa Sion di pol ni polien nan, di misepin nggeih ba xat suv toto Herod vengan xa tehur atou na tunali tehe atou nan, hisen Herodias. E Sion di misepin ba xat Herod mun ve holesok xil vus xa di pol ni xa tamal ti.#Mat 14:3-4; Mak 6:17-18 20Misak ni, Herod pol ni neta tei xa misa pupu mili sexien sav nan xil. Xi misemae ni tengan moletin te vaeen nan xil iha ital xat Sion e liso ni ihe nim te xeih.
Sion baptaes ni Iesu
Mat 3:13-17; Mak 1:9-11
21 Melele xa Sion di tamu tebaptaes ni moletin xil, Iesu mun temei mini tengan Sion vabaptaes ni. E melele xa Iesu di tesis, tilang hat tesaha 22e Ninin Eo temei e tan texoni mae e mei tetotan en. E rae tei tekei texo ut nesao tehit, “Xouk obe natuxoli reitin xa eheien navan di e xouk, e nabesi nou pupu ve xouk.”#Sion 1:32; Sen 22:2; Sam 2:7; Aes 42:1; Mat 12:18; 17:5; Mak 9:7; Luk 9:35; 2Pit 1:17
Vatimol na Iesu
Mat 1:1-17
23Melele xa Iesu tepol kokot ni polien nan, huram nan tehe hanutap tei e he xalu mun (30). Moletin xil vus lanemi labit xi be nat Siosep.#Luk 4:22; Sion 6:42 E avu na vatimol na Siosep xil, hisexil temak:
Siosep tehe nat Heli.
24E Heli tehe nat Matat,
xa tehe nat Livae,
xa tehe nat Melki,
xa tehe nat Sanae,
xa tehe nat Siosep.
25Siosep tehe nat Matataeas,
xa tehe nat Amos,
xa tehe nat Neham,
xa tehe nat Esli,
xa tehe nat Nanggae.
26Nanggae tehe nat Mahat,
xa tehe nat Matataeas,
xa tehe nat Semein,
xa tehe nat Sosek,
xa tehe nat Soda.
27Soda tehe nat Soanan,
xa tehe nat Resa,
xa tehe nat Serubabel,#Esra 3:2
xa tehe nat Seltiel,
xa tehe nat Neri.
28Neri tehe nat Melki,
xa tehe nat Adi,
xa tehe nat Kosam,
xa tehe nat Elmadam,
xa tehe nat Er.
29Er tehe nat Sosua,
xa tehe nat Eliesar,
xa tehe nat Sorim,
xa tehe nat Matat,
xa tehe nat Livae.
30Livae tehe nat Simeon,
xa tehe nat Sudah,
xa tehe nat Siosep,
xa tehe nat Sonam,
xa tehe nat Eliakim.
31Eliakim tehe nat Melea,
xa tehe nat Mena,
xa tehe nat Matataha,
xa tehe nat Netan,
xa tehe nat Deved.#1Saml 16:1,13
32E Deved tehe nat Tiese,#Rut 4:17-22
xa tehe nat Obed,
xa tehe nat Boas,
xa tehe nat Salmon,
xa tehe nat Nason.
33Nason tehe nat Aminatap,
xa tehe nat Atmin,
xa tehe nat Ani,
xa tehe nat Hesron,
xa tehe nat Peres,
xa tehe nat Sudah.#Sen 35:23
34Sudah tehe nat Siekob,#Sen 25:26
xa tehe nat Aesak,#Sen 21:3
xa tehe nat Ebraham,
xa tehe nat Terah,
xa tehe nat Nahor.
35Nahor tehe nat Seruk,
xa tehe nat Rehu,
xa tehe nat Pelek,
xa tehe nat Eber,
xa tehe nat Sela.
36Sela tehe nat Kenan,#Sen 4:25–5:32
xa tehe nat Arpaksat,
xa tehe nat Sem,
xa tehe nat Noah,
xa tehe nat Lamek.
37Lamek tehe nat Metuselah,
xa tehe nat Inok,
xa tehe nat Saret,
xa tehe nat Mahalalil,
xa tehe nat Kenan.
38Kenan tehe nat Inos,
xa tehe nat Set,#Sen 4:25
xa tehe nat Adam.
E Adam tehe nat Hi.
Επιλέχθηκαν προς το παρόν:
Luk 3: tvk
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2015, Wycliffe Bible Translators, Inc. All rights reserved.