Ñwaè' Ruêm 4
4
1Àde' sèe laa seekɛ àmbò Abràham ce e yu tar nè sèe ce sèe yu Jûs? 2Nyʉ̀ à m ka' ba gee Abràham ba yɛɛnì njobè' buu ce e m gèe, Abràham à m ba tʉr yuu ce àtà e m ba naa nyor àgho. Geewa'a, e m tʉr yuu mo' à rnàanyor àgho à bsii Nyʉ̀ ka', 3njobè' Ŋwǎ' Nyʉ̀ yi làa enɛ̂, “Abràham à m byemi nè Nyʉ̀, Nyʉ̀ à lor ye à ŋwɛ̌ nyɛɛnì njo' li rbyemì.” 4Ŋwɛ̀ à ka' gee rfà', a la' ye, banɛ mbàa ce a là' ye àgho anà yu yì ce a fa ye fa ka', njobè' e fà' a ka' koni. 5Ŋwɛ̀ à ka' tɛ fa' ka', byemi ba nè Nyʉ̀ enɛ Nyʉ̀ a ŋwɛ̀ ce e ke gèe bèe ce a gèe buu bbebep a ba byɛɛnì, banɛ Nyʉ̀ be lòr ŋwɛ̀ anà àmbò ŋwɛ̌ nyɛɛnì nè mini-ŋwɛ̀, njobè' e byemi nè ye. 6Dɛvìd ye ye à m làa foŋ wa'a, enɛ Nyʉ̀ à ka' lor ŋwɛ̀ àmbò ŋwɛ̌ nyɛɛnì ke' ba njobè' rfà' ce ŋgàŋ à gèe ka', banɛ ŋgàŋ yu ŋwɛ̀ rbǒŋtu sê. 7E m làa enɛ̂,
“Bèe ce Nyʉ̀ à fòosi wowèe efa wap bsàrbuu a ma' yàp buu bbebep anà,
a yu ŋgǎa mbǒŋtu.
8Ŋwɛ̀ ce Tata Nyʉ̀ be kèr ce bè' buu bbebep ce ŋgàŋ à m gèe ka',
yu ŋwɛ̌ rbǒŋtu.”
9Wà' bèe ce a yu ŋgǎa mbǒŋtu ca ku ba ba bèe ce a gèe bʉ̀ a? Bèe ce a gèe bʉ̀ ka' a be ba ŋgǎa mbǒŋtu foŋ. Kwà'shi ka nè àmbò Abràhâm. To sèe ce làa seenɛ Nyʉ̀ à m lòr Abràham à ŋwɛ̌ nyɛɛnì njo' li rbyemì. 10À m ba à nfè' ce Nyʉ̀ à m lòr Abràham àmbò ŋwɛ̌ nyɛɛnì nà, Abràham à m banì gèe bʉ̀ a? Yi yu wa' ka', à m ba à nfè' anà e be gee bʉ̀ ka'. 11A m gèe ye bʉ̀, e ba àmbò ncòo wa'a, ce e m ce dùŋshi enɛ e yu yɛɛnì à bsii Nyʉ̀ njo' li rbyemì, ka' a m be gee ye bʉ̀ à nfè' anà ka' wa'a. Yi ka' ba à njɛ̌ɛ wa'a, Abràham à ba sè'ni tàr bèe wɛɛwɛ ce a byemi, Nyʉ̀ à ce yɛ wowèe à běe byɛɛnì, ka' wowèe a gèe bʉ̀ ka' wa'a. 12Yìsèe ta Abràham ca yu tàr nè bèe wɛɛwɛ ce a gèe bʉ̀, a ke' ku gèe ba bʉ̀ cà'cà' ka', a ce jɛ̀r njep mi mkùu, a byemi àmbò e m byemi tɛ a ka' kè gèe ye bʉ̀ nà.
13Nyʉ̀ à m kà' Abràham ker ba ŋgʉ̀ Abràham enɛ e be fa ŋgòŋ nè wowèe. Nyʉ̀ à m kà' nè Abràham wa'a njobè' e m ce lɛ̀ mncir ka'. E m kà' wa'a njobè' Abràham à m byemi nè ye a ba yɛɛnì a yě bsii. 14Yi m ba ba enɛ bèe ce a ce lɛ̀ mncir a bèe ce a be koni buu ce Nyʉ̀ à m kà', yi ba ba enɛ rbyemì li tʉr sɛ' ka', tɛ mkà'ni anà mi ba foŋ à cicì. 15Geewa'a, mncir vi ce gèe yi, ntee yi ce bep Nyʉ̀ nè bèe bep. Mncir vi ka' tɛ ba ka', ŋwɛ̀ bʉ' mncir ka'.
16Banɛ mkà'ni anà mi yu ba nè bèe ce a byemi. Yi yu wa'a tɛ yi bo ba rara enɛ e ce fa buu ce e m kà' anà nè sèe njo' yi ntee bòŋboŋ, tɛ buu anà bo ba àgho nè ŋgʉ̀ Abràham wɛɛwɛ, kè' kù ba ba nè bèe ce a ce lɛ̀ mncir ka', vi bo ba àgho nè bèe ce a byemi nè Nyʉ̀ àmbò Abràham à m byemi nà foŋ. Abràham yu tàr nè sèe wɛɛwɛ. 17Yi ku ba àmbò a saŋ mbe Ŋwǎ' Nyʉ̀ enɛ̂, “Mɛ̀ gèe wɛ̀ ba tàr nè bto' magòr” nà. Banɛ à bsii Nyʉ̀, Abràham yu tàr nè sèe. Yu ye ce Abràham à m byemi nè ye nà. Yu ye Nyʉ̀ ce e ke gèe bèe ce a kweŋger, a kʉtì btèe. Yu ye ce e ke làa, yuu ce yi m be ba ka', yi ku ba. 18Abràham à m ku lɛ mi mmir mbendù Nyʉ̀, a byemi yuu ce e m kà', ka' yi m ce yɛɛti enɛ yuu ce Abràham à m lɛ̀ mmir mbendù mo nà yi be geeti ka' wa'a. Yi ka' ba wa'a, Abràham à lo a ba tàr nè bto' magòr. Yi ku ba àmbò a saŋ mbe Ŋwà' Nyʉ̀. A saŋ mbo enɛ̂, “Yo ŋgʉ̀ be ba gòr àmbò mkàŋsì wa'a.” 19Abràham à m ba à nfè' anà àmbò bfè' rjèe. E m rìŋ enɛ e yu gʉ̌ʉ ŋwɛ̀, a riŋ enɛ Sɛ̀ra yu kar. Ka' e m rìŋ wa'a, e m ku byemi a sɛ ka'. 20E m tarni ka', a ku byemi enɛ Nyʉ̀ be gèe yuu ce e m làa. E m ku tɛɛ tatap njo' li rbyemì, a ce kù'si Nyʉ̀. 21E m rìŋ nè mini-ŋwɛ̀ enɛ Nyʉ̀ tʉr ŋger à rgèe yuu ce e m kà' anà. 22A mbùu ce Nyʉ̀ à m yɛ ye à ŋwɛ̌ nyɛɛnì njo' li rbyemì. 23Blàa ce a saŋ enɛ̂, “A m yɛ ye à ŋwɛ̌ nyɛɛnì” nà, a m ku saŋ ba njo' Abràham cà'cà' ka', 24a m saŋ njo' sèe foŋ. Tata Nyʉ̀ be yɛ sèe àmbò běe byɛɛnì, ce sèe ka' byemi nè ye ce e m fʉr Jisos Krǎis efa rkwe. 25A m yʉ ye njo' yìsèe buu bbebep, Nyʉ̀ à fʉr ye efa rkwe tɛ sèe bo ba byɛɛnì a yě bsii.
Επιλέχθηκαν προς το παρόν:
Ñwaè' Ruêm 4: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.