Ñwaè' Ruêm 3
3
1Banɛ mbǒŋtu ce Jus a tʉr a caa bèe mò' yu kɛ? Wà' bʉ̀ ce ŋwɛ̀ à gèe e tʉr sɛ' mò' nè ŋgàŋ a? 2Jus a tʉr sɛ' gòr sê. Yuu entombì yi yu enɛ Jus a bèe ce Nyʉ̀ à m fa vi blàa mba wǎp mmbò. 3Ka' bèe mo' efa wowèe a m tɛɛ njep blǎa Nyʉ̀ anà ka' wa'a, wà' yi yu enɛ Nyʉ̀ à m buu efa rtɛɛ njep yuu ce e m làa a? 4Àde' yi ba wa' ka' koo mʉcàr. Ŋwɛ̀ wɛɛwɛ à ka' ba ŋwɛ̀ mnde', Nyʉ̀ ku ba yi yu ŋwɛ̌ mini. Yi ku ba àmbò a saŋ mbe Ŋwǎ' Nyʉ̀ enɛ̂,
“Tɛ bèe a yɛ enɛ wɛ̌ ke làa, ku gee àmbò wɛ̀ làa.
Wɛ̌ ke sa' wo mnsa', ku so.”
5Yi ka' ba enɛ buu bbebep ce sèe ce gèe, ce gèe bèe a ce yɛ enɛ Nyʉ̀ yu ŋwɛ̌ nyɛɛnì, sèe ka' laa seenɛ kɛ? Wà' àde' sèe laa enɛ Nyʉ̀ à ka' fa sèe ŋgɛ' njo' buu bbebep ce sèe à gèe banɛ e gèe yuu yɛɛnì ka' a? (M ce làa ba àmbò ŋwɛ̀.) 6Àde' yi ba wa' ka' koo mʉcàr. Yi ka' ba ba wa'a, e ka' sa' ŋgòŋ à njɛ̌ɛ kɛ? 7Yi ka' ba enɛ m ce nya' mnde', bèe a yɛ ghup enɛ Nyʉ̀ yu ŋwɛ̌ mini, ce kù'si ye, Nyʉ̀ ker taa mɛ̀ enɛ m yu ŋwɛ̌ ŋgèe buu bbebep à njɛ̌ɛ kɛ? 8Banɛ sèe gee buu bbebep tɛ rbòŋ li bo fʉʉ enjo a? Bèe mò' a ce bepsi la rlii, a ce làa enɛ mɛ̀ làa lɛ wa'a. Nyʉ̀ be fa njɛ̀ɛ bèe ca ŋgɛ' ce e be ghɛɛte à yuu ce wowèe a làa.
9Sèe be ka' làa seekɛ sè'ni à? Wà' sèe yu jɛɛ efa bèe mò' a? Yi yu wa' ka' koo mʉcàr. Mɛ̀ làa wɛɛ enɛ buu bbebep tʉr ŋger mbendù bèe wɛɛwɛ, kɛ̀ yu Jus ɛ̀, kɛ̀ yu bèe enje jɛɛ ɛ̀. 10Yi ku ba àmbò a saŋ mbe Ŋwǎ' Nyʉ̀ enɛ̂,
“Ŋwɛ̀ mò' yu ŋwɛ̌ nyɛɛnì à bsii Nyʉ̀ ka', ka' ŋwɛ̀ mò'sir.
11Ŋwɛ̀ mò' yu ce e rìŋ buu Nyʉ̀ ka'.
Ŋwɛ̀ mò' yu ce e ce kòŋ à rrìŋ Nyʉ̀ ka'.
12Ŋwɛ̀ wɛɛwɛ à bèesi njì nè Nyʉ̀.
Wowèe wɛɛwɛ a kʉti buu bcicì.
Ŋwɛ̀ mò' yu ce e ce gèe yuu bòŋboŋ ka', ka' ŋwɛ̀ mò'sir.
13Blàa ce vi ce fʉʉ eku wǎp bcùu vi ce vʉ̀ nè rkwe nè bèe ce a yu' blàa anà.
Wap blàa vi yu àmbò nli' nyo ce yi ke yʉ ŋwɛ̀ nà.
14Blǎa bcece' vi fʉʉ eku wǎp bcùu.
15Wowèe a ke càasi nfè' à ryʉ ŋwɛ̀ ka'.
16Wowèe a ce bepsi buu, a ce vʉ̀ nè ŋgɛ' àndù bèe à bdì' wɛɛwɛ ce wowèe a ka' ce dù.
17Wowèe a rìŋ à rcu a bèe wèe nè cumʉnyaŋ-ŋwɛ̀ ka'.
18Wowèe a ce gèe yàp buu, a ce wɛp Nyʉ̀ ka'.”
19Sèe rìŋ seenɛ yuu ce mncir Nyʉ̀ vi ce làa, vi ce làa ba nè bèe ce Nyʉ̀ à m fa mncir anà nè wowèe. Yi yu wa'a tɛ ŋwɛ̀ mò' bo làa enɛ e yu yi jɛɛ ka', tɛ bèe wɛɛwɛ enjep ŋgòŋ na a bo kè tɛɛ kùntombì nè Nyʉ̀, taŋshi yàp nsa' nè ye. 20Ŋwɛ̀ mò' yu ce e lɛ̀ mncir wɛɛwɛ tɛ Nyʉ̀ bo làa enɛ ŋgàŋ yu ŋwɛ̌ nyɛɛnì ka'. Yuu ce mncir vi gèe yi yu enɛ vi gèe bèe a riŋ buu bbebep.
21À ka' ba sè'ni na, Nyʉ̀ à gèe bèe a riŋ njɛ̀ɛ njì ce àde' ŋwɛ̀ ba yɛɛnì a yě bsii. Njì anà tʉr yuu mo' à rgèe nè mncir ka'. Ŋwà' mncir Nyʉ̀ ba ŋgǎa ncep ntuu Nyʉ̀ a m làa àmbò njì anà. 22Njɛ̀ɛ njì ce Nyʉ̀ ce gèe bèe a ba byɛɛnì yu ba à rbyemi nè Jisos Krâis. Njɛ̀ɛ njì ca yu nè bèe wɛɛwɛ ce a ka' byemi, ŋwɛ̀ mò' ker ba jɛɛ ka', 23njobè' bèe wɛɛwɛ a gèe buu bbebep, a sɛ efa fòo ce yi lò ese Nyʉ̀. 24Nyʉ̀ à tʉr wowèe à ntee bòŋboŋ, a gee wowèe à ba byɛɛnì a yě bsii. E m gèe wa'a nè wowèe à cicì. Jisòs Krǎis a ŋwɛ̀ ce e m gèe enɛ yi ba wa'a, a tee sèe efa ŋgɛ'. 25Nyʉ̀ à m fa ye tɛ e bo ba àmbò mbʉ taŋshì wa'a, tɛ li rkwe li bo gèe tɛ Nyʉ̀ foosi bèe ce a byemi nè ye. Nyʉ̀ à m gèe wa'a, tɛ e bo dùŋshi nè bèe enɛ e yu ŋwɛ̌ nyɛɛnì, njobè' à m ba entombì, e kur ntee a fuse efa buu bbebep ce bèe a m ce gèe. 26À ka' ba sè'ni na e duŋshì bèe enɛ e ce gèe buu à njǐ yɛɛnì tɛ bèe a bo rìŋ enɛ e yu ŋwɛ̌ nyɛɛnì, a ker gee bèe ce a byemi nè Jisos Krǎis a ba byɛɛnì foŋ.
27Banɛ àde' sèe ker naatu a? Njì mò' yu ka'. Njokɛ? Njobè' Nyʉ̀ à gèe sèe à ba běe byɛɛnì à ke' ba ba njo' mncir ka', yu ba njo' rbyemì. 28Wèr à làa wernɛ ŋwɛ̀ yu yɛɛnì à bsii Nyʉ̀ ce ŋgàŋ ka' byemi; ca yi tʉr yuu mo' à rgèe nè mncir ka'. 29Wà' Nyʉ̀ ku ba ba Nyʉ̀ Jus cà'cà' a? Àmbò e yu Nyʉ̀ bèe enje jɛɛ foŋ a? Ɛ̀no, e yu Nyʉ̀ bèe enje jɛɛ foŋ, 30njobè' Nyʉ̀ ku ba mò'sir cà'cà'. E be gèe Jus ce a ke gèe bʉ̀ nà àmbò běe byɛɛnì, ce wowèe a ka' byemi nè Jisos Krâis. Yi ku ba wa' foŋ nè bèe ce a ke gèe bʉ̀ ka' nà. Nyʉ̀ be gèe wowèe tɛ a ba byɛɛnì ce wowèe à ka' byemi nè Jisos Krâis. 31Wà' cena yi yu sè'ni enɛ sèe lor mncir à yuu cicì njo' rbyemì a? Àde' yi ba wa' ka' koo mʉcàr. Yi yu ba enɛ sèe tapsi mncir.
Επιλέχθηκαν προς το παρόν:
Ñwaè' Ruêm 3: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.