Ñwaè' Mfaè' Ñgaâa Ntuu Jisoès 28
28
1Wèr à ka' bà' nje waa ŋkʉ̀, lùŋ efa ŋgɛ', a yu' enɛ rlii rla' ce rdip li m sìr a tarte anà li yu enɛ Mɛlità. 2Běe à rla' anà a m gèe ŋgěe bòŋboŋ nè wèr, a caa embe dì' ce wèr à m ce kwà'shi. Wowèe a m koni wèr, a too mor njobè' mbèŋ à m ce gwè, mbɛp à ce fʉte. 3Pol à baashì ŋguu a byɛ' mbe rkoo, a ka' ce tòo, nyo à fʉʉ enjo njobè' mor yi m lùu gòr, a luu ye à bò, a barni àgho. 4Běe à rla' anà a ka' yɛ àmbò nyo ce lɛŋlɛŋ ye à bò, wowèe a laa fa wǎp mʉ enɛ̂, “Ŋwɛ̀ anà ku ba ŋwɛ̀ ce e yʉ ŋwɛ̀. Ka' e lùŋ efa rkwe enjep rò wa'a, e ku bii nyàa rkwe.” 5Pol à kar nyo ca efa bò, e gwe njep mor, yuu mo' yi gee ye ka'. 6Wowèe a m ce kè' enɛ bo yi ka' tɛ kù ko' ye mbe dì' ka', banɛ e be kù lò co'ti gwè à nshè, kwe. Wowèe a cu nfè' njìsàp sê, a yɛ yuu mo' yi gee ye ka', wowèe a kupsè map mkwà'shì a laa enɛ̂, “E yu nyʉ̀ mò'.”
7Ŋwɛ̌ ŋgǒr à rla' anà à m tʉr ŋkʉ̀ àtʉtʉ. A m ce too ye enɛ Pùbilìyòs. E m koni wèr, a nyaŋ wèr bòŋboŋ se à mnǒŋ btaar. 8Yì ta à m nòŋ a ce yaŋ. Mbɛp à m ce fʉte ye, e ker ce to' a ce fìŋshi. Pol à niŋ mbe dì' e m nòŋ, a gee rloo, a lɛ mmbo mbe yě ndù, e ke'sè. 9Ca yi ka' koni wa'a, bɛr ŋgǎa byaŋ ce a m ba à rla' anà a vʉsè, Pol à gee wowèe a ke'sè. 10Wowèe a m nàa wèr à mnduunjǐ jɛɛ jɛ̀ɛ jɛɛ. Wèr à ka' niŋ mbe keŋ tɛ wèr bo ce dù, wowèe a fa wèr buu ce vi bo jà' wèr.
11Wèr à m cu à rla' ca à mŋwɛɛ btaar a ka' co'ti a ce dù mbe keŋ yǐ à rla' Àlɛ̀ksandà ce a m ce too enɛ Mfar Mnyʉ̀. E m tɛɛ à rla' ca njep mʉ̀ rò kɛ̌' à cùu saa caar saa à mî. 12Wèr à du a ba' à rla' Sìrakusà a cu àfo mnǒŋ btaar. 13Wèr à ka' lǒ àfo a kaari a ba' à rla' Rɛgìyòm. Tʉ̀' à ka' raa, fu' yi kɛ' a ce vʉ̀ embà mbùuŋgòŋ. Tʉ̀' mò' à ka' raa, wèr à ba' à rla' Pùtolì. 14Wèr à m yɛ bfʉr mo' àfo, wowèe a laa enɛ wèr wowèe cu àfo à mnòŋ sàambâ. Awɛ wèr à du a ba' à rla' Rûm. 15Tɛ wèr ka' bà' à rla' Rûm, bfʉr ce à rla' anà a m banì yu' enɛ wèr yu à nduunjì. Wowèe a vʉ caar a ba' à ntaa yǐ à rla' Àpiyò, bèe mo' a ba' fàdì' bhòtɛl vi m ba vi btaar, tɛ a bo koni wèr. Pol à ka' yɛ wowèe, a yoŋshi Nyʉ̀, ŋger yi vʉ ye nje nyòr. 16Wèr à ka' bà' à rla' Rûm, a ma'shi Pôl, e ce cu nè yi tu, ŋwɛ̀ soogɛ̀ mò' à ce kè'ni ye.
17Mnòŋ vi ka' cǎa btaar, e kɛ' běe bgòrgòr efa mʉ̀ Jus ce à rla' Rûm. Wowèe a ka' vʉ̀, e laa nè wowèe enɛ̂, “Yà bèe, ka' mɛ̀ m gèe fàa mò' nè yìsèe bèe kɛ̀ ma' ndèe to' ce visèe btarkʉ a m lɛ̀ nè sèe nà ka' wa'a, a ku koo mɛ̀ à rla' Jɛ̀rusalɛ̀m, a fa mbe mmbo bèe ŋkwe Rûm. 18Bèe ŋkwe Rum ca a m bipshi buu nè mɛ̀, a koŋ à rmà'shi mɛ̀ njobè' mɛ̀ m gèe yuu mo' ce a m ba yʉ mɛ̀ àtu mo ka'. 19Geewa'a, Jus a ka' kani enɛ a fa mà'shi mɛ̀ ka', mɛ̀ boŋlàr a laa mɛnɛ wa mnsa' be sa' ŋkwe Rûm. Mɛ̀ m làa wa'a, a ke' tʉr yuu bebep mo' à rlàa kuu yà bèe ka'. 20A mbùu ce mɛ̀ làa mɛnɛ wèe vʉ̂, tɛ m yɛ wèe, tɛ sèe de'. Kwàŋ yu mɛ̀ kù rkoo sè'ni na ba àtu ŋwɛ̀ ce bèe Isrɛ̀l a m cu a ce kè'.” 21Wowèe a beesì enɛ̂, “Wèr à be koo mŋwà' mǒ' à ŋgǒŋ Jùdiyà ce a saŋ a kuu wɛ̀ ka'. Nfʉr yìsèe mò' à be vʉ̌ àfo nè nsuŋ mǒ' mbembep kɛ̀ a laa yuu bebep mo' kuu wɛ̀ ka'. 22Ka' yi yu wa'a, wèr ce kòŋ à rrìŋ yuu ce à ce kwà'shi njobè' wèr rìŋ wernɛ bèe wɛɛwɛ a ce làa bebep kuu njɛ̀ɛ nduunjì ce à yu njo na.” 23A Pol wèe a seesì a lɛ nòŋ ce wowèe a be vʉ̀ yɛ ye.
Nòŋ anà yi ka' ghɛɛ, wowèe a vʉ sê, a caa àmbò wowèe a m ba nà, a yɛ Pol mbe dì' ce e m ce cu. E m suŋ wowèe àmbò kʉʉ Nyʉ̀, a nashi buu ca nè wowèe kɛ̌' à ŋgàptʉ' du ba' à mbùuŋkùr. E m ghèter à rgèe tɛ wowèe a byemi nè Jisòs, a ce fyɛ' mbe mŋwǎ' mncir Musìs, ba mŋwǎ' ŋgǎa ncep ntuu Nyʉ̀ à rdùŋshi enɛ Jisòs yu Krǎis anà. 24Bèe mo' a m byemi yuu ce e m làa, bèe mo' a byemi yap yu ka'. 25Wowèe a m tʉr mŋgàpni fa wǎp mʉ kuu yuu ce Pol à m làa, a ka' nàti ce dù, Pol à laa mbʉ̀ làa nè wowèe. E m làa enɛ̂, “Yʉ' Rara yi m làa yuu yɛɛnì nè wêe btarkʉ mbe nfè' ce e m tuu Àsayà ce e m ba ŋwɛ̀ ncep ntuu Nyʉ̀, e vʉ a laa enɛ̂,
26‘Dù yɛ bèe ca laa nè wowèe enɛ̂,
“Wèe be yu' kèr yu', yu' ka'.
Wèe be kè' kèr kè', yɛ ka'.
27Yi yu wa'a njobè' mntee bèe ca vi tap sê.
Btù' vi lo' wowèe,
wowèe a ker kaashi map mmir,
buwa'làr wowèe a ba yɛ buu nè map mmir, yu' buu nè wap btù',
bèeŋger, vʉ̀ à mbèp yà,
tɛ m gee wowèe a lûŋ.”’
28Banɛ m ce kòŋ mɛnɛ wèe riŋ enɛ nsuŋ Nyʉ̀ ce kuu rlùŋ à dù nè bèe enje jɛɛ. Wowèe a be yu'shi bòŋboŋ.”
29[Pol à ka' làa wa'a, Jus a natì a dû, a ce sɛr mnsɛr a wǎp mʉ tatap sê.] 30Pol à m cu mbe ndàp à bfě' bbaa a ce là' ndap anà. E m ce koni bèe wɛɛwɛ ce a m ce vʉ̀ à ryɛ ye. 31E m ce fè'shi àmbò kʉʉ Nyʉ̀, a ce yɛ'ni bèe buu kuu Tata Jisos Krâis. E m gèe wa'a nè ŋger-ŋwɛ̀, ŋwɛ̀ à ce jepsi ye ka'.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 28: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.