Yohana 12
12
Yesu kobakigwa mavuta ako Betania
(Matayo 26:6-13; Maluko 14:3-9)
1Zing'hali siku sita kuvika nyimwilinyimwili ya Pasaka, Yesu kachola Betania, ukae kumwake Lazalo, ayo iyamzilibule kulawa kwa wafile. 2Wanhu wamtandila ndiya ya ichungulo baho, Mata ayo yakalile yomtaza kugola. Lazalo kakala imoja mna iwanhu wakalile oja na Yesu. 3Abaho Malia kasola nusu lita ya mavuta gonung'hila goya ga bei ng'hulu ng'hani, kambakaza Yesu mmagulu, kagahangusa kwa mvili zake. Ng'anda yose ikala bwiki bwiki mbuli ya gaja gamavuta gonung'hila goya. 4Yuda Isikaliote imoja wa wanahina zake Yesu, ayo yonda yamuhinduke Yesu, kalonga, 5“Vino habali mavuta gano hagauzigwe kwa sente magana madatu, na sente azo wagweleligwe wanhu wakiwa?” 6Kalonga vino siyo kwavija kakala yowatonga wakiwa, lakini kwavija kakala mbavi. Kakala mpapaji wa mkoba wa zisente, na miyanza mingi kakala yosola sente.
7Lakini Yesu kalonga, “Sikumumgaze! Mulekeni yatende vivo mbuli ya siku yangu ya kuzikigwa. 8Wanhu wakiwa mokala nao siku zose, lakini hamkala na niye siku zose.”
Kiseto cha kumkoma Lazalo
9Wayahudi wengi wahulika kamba Yesu kakala Betania, avo wachola kuko, siyo mbuli ya Yesu yaiyeka lakini vivija kumona Lazalo, ayo iyamzilibule. 10Avo wakulu wa walava nhosa wakala kiseto cha kumkoma Lazalo vivija, 11kwavija mbuli ya Lazalo Wayahudi wengi wakala owalema na kumtogola Yesu.
Yesu kokwingila Yelusalemu kwa ng'henze
(Matayo 21:1-11; Maluko 11:1-11; Luka 19:28-40)
12Imitondo yake lunhu mkulu lwizile kuna inyimwilinyimwili ya Pasaka luhulika kamba Yesu kakala yokwiza Yelusalemu. 13Avo wabena mibunho ya biki da mtende na wachola kumbokela, wakemelela,
“Imulungu yatogolwe!
Imulungu yamtambikile munhu ayo yokwiza kwa twaga da Mndewa!
Imulungu yamtambikile Mndewa wa Izilaeli!”
14Yesu kamona mwana wa kihongwe, kamkwela mumgongo, kamba Maandiko Gang'alile vigalonga,
15“Sikuudumbe, isi ya Sayuni!
Hano kokwiza Mndewa wako,
yakwelile mumgongo wa mwana wa kihongwe.”
16Kipindi acho wanahina zake hawaijuwile mbuli ino. Lakini Yesu viyenuligwe muukulu, wakumbuka kamba Maandiko Gang'alile galonga mbuli ino na wamtendela kamba vivo.
17Wanhu wakalile na Yesu kipindi viyamkemile Lazalo kulawa mdipanga na kumzilibula kulawa kwa wafile, wakala ogabwililisa gaja galawilile. 18Lekaavo lunhu lwa wanhu luchola kumbokela, kwavija luhulika unzonza uno uyatendile. 19Abaho Mafalisayo wailongela, “Mona, hatudaha kutenda chochose! Loleni wanhu wose wa mwiisi omkweleleza!”
Wagiliki olonda kulonga na Yesu
20Wagiliki wayagwe wakala mumo mna iwanhu wacholile Yelusalemu kutambika mna ikipindi cha nyimwilinyimwili ya Pasaka. 21Wachola kwa Filipo mwenekae wa Betisaida mwiisi ya Galilaya walonga, “Go mkulu, tolonda tumone Yesu.”
22Filipo kachola na kumulongela Andeleya, abaho wose wabili wachola kumulongela Yesu. 23Yesu kawedika, “Sambi kipindi kivika cha Mwana wa Munhu kubokela ukulu. 24Nowalongeleni ukweli, mhule ya uhemba yosigala imoja siku zose mbaka ilagale hasi ife. Ila yahafa baho yolela na kuwa mhule nyingi. 25Munhu yoyose younogela ugima wake kowagiza, lakini munhu yoyose yowihila ugima wake mwiisi ino kowika kwa ugima wa milele. 26Munhu yoyose yolonda kuwa msang'hanaji wangu kolondigwa yanikweleleze, avo msang'hanaji wangu kokuwa na niye aho honda niwe. Tatangu komgwaa nhogolwa munhu yoyose yonisang'hanila.
Yesu kolonga mbuli ya ifa yake
27“Sambi loho yangu yoluma, vino nongeze? Nonge, ‘Tata, sambiutende kipindi kino kivike kumwangu’? Lakini lekaavo niza ili nibite kipindi kino cha madununzo. 28Tata, uditogole twaga jako!”
Abaho sauti ihulikigwa kulawa kuulanga, “Niditogola, na notenda vivo kabili.”
29Lunhu lwimile aho luihulika sauti ayo, na wanhu wayagwe walonga, “Imulungu kaduma.” Kuno wayagwe walonga, “Msenga wa kuulanga kalonga nayo!”
30Lakini Yesu kawalongela, “Sauti ino haihulikigwe mbuli ya niye, lakini mbuli yenu. 31Sambi acho kipindi cha wanhu wa mwiisi ino kutagusigwa, na Mwenembago mkulu wa mwiisi ino kokwasigwa. 32Kipindi nahenuligwa uchanha kulawa hasi, nomkwega kila munhu kumwangu.” 33Kwa ulonzi uno Yesu kalagusa ifa yonda yafe.
34Lunhu lwa wanhu lumwidika, “Malagizo getu gotulongela kamba Kilisito Mkombola kokuwa mgima siku zose. Habali kabili gweye kolonga Mwana wa Munhu kolondigwa yenuligwe uchanha? Vino ino Mwana wa Munhu ayo nani?”
35Yesu kawedika, “Mulenge okala na mweye kwa kipindi kidodo. Gendeleleni na mwanza kung'hali na mulenge ili ziza sikudiwezile, kwavija munhu yotembela mdiziza hajuwa kuja kuyochola. 36Utogoleni mulenge baho mulinao ili muwe wanhu wa mulenge.”
Wanhu olema kumtogola Yesu
Yesu viyamambukize kulonga avo, kasegela, wanhu hawamonile. 37Hamoja Yesu kasang'hana unzonza mgameso gao, lakini hawamtogole bule. 38Avo kiyalongile mtula ndagu wa Imulungu Isaya kilawilile.
“Mndewa, nani yatogole usenga wetu utulongile?
Vino Imulungu kalagusa udahi wake kwa nani?”
39Avo hawadahile kutogola, kwavija Isaya vivija kalonga,
40“Imulungu kagafumba meso gao
kazifunga nzewele zao,
ili meso gao sikugadahe kulola,
na nzewele zao sikuzidahe kujuwa.
Sikuwanibwelele niye, Imulungu kolonga,
na niye nidahe kuwahonya.”
41Isaya kalonga vino kwavija kawona ukulu wa Yesu na kalonga mbuli yake.
42Avo wakulu wengi wa Wayahudi wamtogola Yesu, lakini mbuli ya Mafalisayo hawadahile kulonga mbuli zake kunze kunze, kwavija wadumba kuwingigwa mna ing'anda ya kumpula Imulungu. 43Kwavija walonda nhogolwa za wanhu kubanza nhogolwa za Imulungu.
Mbuli ya Yesu yotagusa wanhu
44Yesu kakemelela, “Munhu yoyose yonhogola niye, hanhogola niye niiyeka lakini vivija komtogola ija yanhumile. 45Yoyose yonyona niye vivija komona ija yanhumile. 46Niye niza mwiisi niwe mulenge, ili munhu yoyose yonhogola sikuyasigale mdiziza. 47Munhu yoyose youhulika usenga wangu na halonda kuutogola, niye simtagusa bule, kwavija sizile kuwatagusa wanhu wa mwiisi, ila kuwakombola. 48Wose onilema niye na kuulema usenga wangu kabaho imoja yonda yawataguse. Mbuli zinongile zowatagusa mwiisiku ya uhelelo! 49Kwavija silongile kwa udahi wangu, lakini Tata yanhumile kanilagiza vinondeka kulonga. 50Na niye nojuwa kamba lagizo jake dogala ugima wa milele. Avo nolonga gaja gayanilongele Tata nonge.”
Επιλέχθηκαν προς το παρόν:
Yohana 12: King'hutu
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
NT: © 2014 Pioneer Bible Translators and The Word for the World
OT: © 2019 Pioneer Bible Translators