Luki 7
7
Yesuʼa ati vayaʼaiteʼmo yagaino neʼapateya vekamo aliʼyaʼamo neʼaliya vekamo kaitaʼamo alino hageno ateʼniya gemae
(Mt 8:5-13)
1Yesuʼa mani muki geʼamo vayaʼaifeʼmo aeno hakalo huno hapa paino hano huteno ataleno Kapeneyamu taonifiʼmo uʼniye. 2Mago Lomu gamani vekamoʼmo ati vayaʼaiteʼmo yagaino neʼapateya vekamo aliʼyaʼamo neʼaliya vekaeʼmo hauʼniya vekamo kaita hauʼnigeno faligefeʼmo huʼniye. 3Yagaino neʼapateya vekamoʼmo Yesufeʼmo ava gemo afitenoʼaeʼmo Yu vayatama vayaʼaifeʼmo hapa painoʼaeʼmo, uta Yesufeʼmo hutapaeʼmo, eka aliʼyaʼnimo neʼaliya vekamo kaitaʼamo alika hageka ato, huta ha paiyo, huno hapa paiteno alino apateʼnigeʼa Yesutegamo uʼnae. 4Uʼapaeʼmo, Kahao ke honanagi alagi ha maesana agufa kava huno maiʼniye. 5Yu vayaʼmogitaeʼmo hauʼnigeno mono noʼmo kino lateʼniyaʼmofeʼmo eka ha mao, huʼa Yesufeʼmo ha paiʼnae. 6Inagi Yesuʼeʼmo magokepi lokaeʼa uʼa no haopaleʼmo avaʼyi huʼnagenoʼaeʼmo yagaino neʼapateya vekamoʼmo ao vayaʼmo alino apateʼnigeʼa Yesutega uʼapaeʼmo, Agaemo hunoʼaeʼmo, Ala kava nene, huno, Nagaemo noʼnifiʼmo eka haikeka maisana agufa kava huʼna oʼmaiʼnove. 7Kagaetegamo visuva agufa kava huʼna oʼmaiʼnove. Afaʼa maiʼneka geʼageʼmo nehugenoʼao aliʼyaʼnimo neʼaliya vekamo kaitaʼamo hagesigeno maino. 8Neʼyagaiya kavaʼmo ago ageʼnove. Nagaemo mago vayaʼai apaiyafiʼmo maiʼnogeʼa ati vayaʼnimogi naiyafiʼmo maiʼnae. Inagi nagaemo mago ati vekaeʼmo, uvo, huʼna nehugenoʼaeʼmo neʼviye. Mago ati vekaeʼmo, eno, huʼna nehugenoʼaeʼmo neʼe. Aliʼyaʼnimo neʼaliya vekaeʼmo huʼnaeʼmo, ani kavaʼmo huvo, huʼna nehugenoʼaeʼmo ani aliʼyaʼmo neʼaliye, huno laha paiʼniye, huʼa Yesufeʼmo ha paiʼnae.
9Yesuʼa ani gemo afitenoʼaeʼmo hau aiteno aino afe leno muki akame huʼa eʼnaya vayaʼaifeʼmo hunoʼaeʼmo, lapa nepauve, huno, nagaefeʼmo agesamo afino fatago nehiya agufa kavaʼmo Isaleli vayaʼmogi apaipafiʼmo afole aiʼnigeʼna oʼageʼnova agufa kavaʼmo afole aiʼniye, huno hapa paiʼniye. 10Alino apateʼnigeʼa uʼnaya vayaʼmo aiʼa atagi neʼeʼa noʼaleʼmo avaʼyi huteʼapaeʼmo agayana aliʼyaʼamo neʼaliya vekamo kaitaʼamo ago hageʼnigeʼa ageʼnae.
Yesuʼa mago neya vekamo faliʼnigeno alino he tino ateʼniya gemae
11Mago afinaʼmo utegeʼa Yesuʼagi geʼamo neʼafiya vayanagi asole vayanagi huʼa Neni taonifiʼmo uʼnae. 12Yesuʼa uno taonimo lafi kipa haopaleʼmo neʼvigeʼapaeʼmo mago kogu a kanomoʼa magokeʼageʼmo alino ateʼniya mafaʼneʼamo faliʼnigeʼa hiʼyopa maleʼa aliniʼa eʼnae. Kogu aʼne anagaʼe asole vayaʼmo ani taonifiʼmo maiʼnaya vayaʼeʼmo magokepi lokaeʼa eʼnae. 13#Lu 8:52Ala kava neʼmoʼa kogu a kanomo agetenoʼaeʼmo hau huno ateteno, aviʼyaʼmo osuvo, huno ha paiteno 14#Lu 8:54uno hiʼyopaleʼmo ayaʼmo maleʼnigeʼapaeʼmo aliniʼa eʼnaya vayaʼmo anile he tiʼa maiʼnae. Agaemo ge hunoʼaeʼmo, neya vekae, huno, kaha paiʼnaeʼmo he tiyo, huʼna kaha nepauve, huno nehigenoʼaeʼmo 15#1 Kin 17:23; 2 Kin 4:36faliʼniya vekamo he tino fai maiʼneno aepa faino age aiʼniye. Yesuʼa avaleno itaʼamoʼmo amiʼniye. 16#Lu 1:68; 19:44Muki vayaʼmogi koli huteʼa Goti agiʼaleʼmo aliʼa asaga huʼa ateteʼa, ala vekamo Gotitegati gemo alinineno aeno hakalo huno hapa nepaiya vekamo lagaetegamo ago afole aiʼniye. Gotiʼa vayaʼamo emineno hapa maeʼniye, huʼa huʼnae. 17Ani kavafeʼmo ava gemo huli u eʼa huʼnageno aino atagu faeno muki Yutiya kotegaʼe muki haopalegaʼeʼmo uneno huʼniye.
Yoniʼa lole vekalaʼmo alino anateʼnigeʼana Yesutegamo uʼnaʼa gemae
(Mt 11:12-19)
18Yoni geʼamo neʼafiya vayaʼmogi ani huʼniya kavafeʼmo ava gemo afiteʼapaeʼmo ani gemo Yonifeʼmo ha paiʼnae. 19#Sam 40:7; Mal 3:1; Le 1:8Yoniʼa geʼamo neʼafiʼa vekalaʼanifeʼmo ge huʼnigeʼana eʼnaʼageno Yesutegamo utanaeʼmo, afole aigiye, huʼa huʼnaya vekamo maiʼnapi alu vekaeʼmo agava maisune, hutana ge hutana afi geʼao, huno hana paiteno alino anateʼnigeʼana Yesutegamo uʼnaʼae.
20Lole vekalaʼmoganimo uʼana Yesufeʼmo huʼanaeʼmo, Yoniʼa aniʼmo faleno neʼapateya vekamoʼmo alino laʼateʼnigetaʼa eʼnoʼae. Agaemo hunoʼaeʼmo, agaetegamo utanaeʼmo, afole aigiye, huʼa huʼnaya vekamo maiʼnapi alu vekaeʼmo agava maisune, hutana ge hutana afi geʼao, huno laʼaha paiʼniye, huʼana ha paiʼnaʼae. 21Ani afinaʼmo Yesuʼa muki vayaʼmo alu kaita alu kaitaʼmo hapauʼniya vayaʼmo alino hapageno apatege hosu apaune vayaʼmo vayaʼai apaipafatiʼmo alino hapa faino apatalege apaulagamo ali huʼniya vayaʼmo apaulagamo alino ayakeno apatege huno maiʼniye. 22#Aiy 35:5-6Yesuʼa geʼanileʼmo aeno atagaina huno hana painoʼaeʼmo, Yonitegamo utanaeʼmo ageʼna kavaʼe afiʼna geʼeʼmo ava gemo hutana ha paiʼao. Apaulagamo ali huʼniya vayaʼmo aliʼna ayakeʼna apatege apaiyamo hosuʼniya vayaʼmo aliʼna alagepa huʼna apatege lepolosi yaʼmo hapauʼniya vayaʼmo aliʼna apakufalafaʼmo hamaleʼna apatege apakesamo akaniʼniya vayaʼmo aliʼna halo aiʼna apatege faliʼnaya vayaʼmo aliʼna he tiʼna apatege kagemi yaʼapimo ohaneʼniya vayaʼaifeʼmo alagepa faigoko gemo aeʼna hakalo huʼna hapa paige nehuve. 23#Aiy 61:1; Lu 4:18Nagaefeʼmo lole apakesamo noʼafiya vayaʼmogi Goti aulena vayaʼamo maiʼnae, huno hana paiʼnigeʼana uʼnaʼae.
Yesuʼa Yonifeʼmo ava gemo huʼniya gemae
24Yoniʼa alino anateʼnigeʼana uʼnaʼa vekalaʼmo etaʼagenoʼaeʼmo Yesuʼa Yonifeʼmo ava gemo huno hapa painoʼaeʼmo, kaʼme kotega na agufa yaʼmo uta agesayafeʼmo uʼnae. Mago hopaleʼmo yasimo aliʼnigenoʼaeʼmo havaeno ape nehiya hopamo agesayafeʼmo uʼnafiye. 25Lapakaemo na agufa yaʼmo agesayafeʼmo uʼnae. Alagepa kukenamo vaino aliʼniya vekamo agesayafeʼmo uʼnafiye. Haʼao, alagepa kukenamo vaiʼa neʼaliya vayaʼmogimo alaʼapimo yagaiʼa neʼapataya vayaʼmogi noʼapifikeʼmo neʼmaiye. 26#Lu 1:76Na agufa yaʼmo agesayafeʼmo uʼnae. Gotitegati gemo alinineno aeno hakalo huno hapa nepaiya vekamo agesayafeʼmo uʼnafiye. He, nagaemo lapa paiʼnaeʼmo agaemo Gotitegati gemo alinineno aeno hakalo huno hapa nepaiya vekageʼmo oʼmaiʼnifa 27#Mal 3:1Goti mukufi gemoʼmo ava gemo hunoʼaeʼmo,
afiyo, huno, nagaemo apa vekaʼnimo aliʼna atesugeno uno hogoteteno kaʼmo valino kategaiye, huno huʼniya vekamo maiʼniye,
huno hapa paiʼniye. 28Lapa nepauve, huno, Yoniʼa muki ma mopafi maiʼnaya vayaʼmo ago aeno apaka seʼniyaʼmonanafa Gotiʼa yagaino neʼapateya kegiʼyafiʼmo maiʼniya vekamo henaga vekamoʼmo Yoniʼmo ago aeno aga seʼniye. 29#Lu 3:12Muki afa vayaʼmogiʼe takesi moni neʼaliya vayaʼmogiʼeʼmo Yoniʼa huʼniya gemo afiteʼapaeʼmo, Gotiʼa alagepa vekamo fatago vekae, huʼa huʼnageno Yoniʼa aniʼmo faleno apateʼniyaʼmonanafa 30#Mt 21:32Falasi vayaʼe keʼaepa gemo aliʼa apaya neʼmalaya vayaʼmogiʼeʼmo Yoniʼa aniʼmo faleno apatesiyafeʼmo ohapauʼnigeʼapaeʼmo, haʼao, huʼa huʼnayaʼmofeʼmo Gotiʼa hapa maesiya gemo hapa paiyo, huno hapa paiʼniya gemo ago amagiʼa ataleʼnae. 31Ala kava neʼmoʼa hunoʼaeʼmo, hemeni afinaʼmo maiʼnaya vayaʼmogi na agufa vayakana huʼa maiʼnafi huʼna lapa paiguve. 32Apakaemo mago mafaʼne anagakana huʼa maiʼnae. Mago mafaʼne anagaʼmogimo maketi kumateʼmo maiʼneʼapaeʼmo, lagaemo yaveʼyamo neʼamagunagetapaeʼmo lapakaemo oaeʼnae. Yulagefaʼmo aiʼnonana aviʼyaʼmo osuʼnae, huʼa huʼnae. 33Ani kavaʼmo hutapa Yoniʼa aniʼmo faleno neʼapateya vekamoʼmo neʼyaʼmo mo sino maiʼneno nofi alagafati aniʼmo oʼneʼnigetapaeʼmo, hosu aune vekamo aipafiʼmo maiʼniye, hutapa nehae. 34#Lu 15:2Vemo mafaʼnemoʼmo emineno neʼyaʼmo mo osino nege nofi alagafati aniʼmo nege huʼnigetapaeʼmo, ageyo, hutapa, neʼyafeʼmo lusi kava huno hauʼnigeno lusi neʼyaʼmo neteno nofi alagafati aniʼefeʼmo lusi kava huno hauʼnigeno neʼneya vekamae. Takesi moni neʼaliya vayaʼe hosu vayaʼeʼmo apao vekamo maiʼniye, hutapa nehae. 35Lapakaemo ani gemo nehayaʼmonanafa Goti vayaʼamogi afiteʼa ageʼnaya vayaʼmogi Gotiʼa afiteno ageʼniya kavafeʼmo huʼapaeʼmo, Goti kavaʼamo alagepa fatago kavaʼmo haneʼniye, huʼa nehae, huno hapa paiʼniye.
Yesuʼa Falasi vekamo nopiʼmo uno haino maiʼniya gemae
36 #
Lu 11:37
Mago Falasi vekamoʼmo eno Yesufeʼmo hunoʼaeʼmo, eno, huno, nagae nopiʼmo utaʼa neʼyaʼmo negauʼae, huno ge huʼnigeno Yesuʼa noʼafiʼmo uno haino hiʼyalamuteʼmo maiʼniye. 37#Mt 26:7; Mk 14:3; Yo 12:3Ani taonifiʼmo maiʼniya hosu a kanomoʼmo afiʼniyana Yesuʼmo eno haino Falasi vekamo nopiʼmo hiʼyalamuteʼmo maiʼniye, huʼa huʼnaya gemo afitenoʼaeʼmo yafa kepi uvelimo alagepa atumo neʼaiya uvelimo alinineno 38Yesu akamelegamo he tino maiʼneno aiyaleʼmo aviʼyaʼmo huʼniye. Aviʼyaʼmo nehigenoʼaeʼmo aunumoʼmo kalo kalo huno aiya agotofuleʼmo asagauno aiʼnigeno ayokatetiʼmo alino kalopaeno ateteno aiyaleʼmo haeno neteno uvelimo faleno ateʼniye.
39Yesufeʼmo hunoʼaeʼmo, eno, huno ge huʼniya Falasi vekamoʼmo agetenoʼaeʼmo, ani vekamo Gotitegati gemo alinineno aeno hakalo huno hapa nepaiya vekamo maiʼniyesinana haiya agufa a kanomoʼmo eno name neʼalifi huno ageteno hosu kavaʼmo nehiya a kanomo maiʼniye, huno ageʼniyesine, huno aipafiʼmo agesamo afiʼniye. 40Yesuʼa aipafiʼmo agesamo afiʼniya ageleʼmo aeno atagaina huno ha painoʼaeʼmo, Saimoniyo, huno, mago gemo kaha paigesuve, huno ha paiʼnigeno, Tisao, huno, afaʼa naha paiyo, huno ha paiʼniye. 41Yesuʼa hunoʼaeʼmo, lole vekalaʼmoganimo anonaʼanimo haneʼniyana mago vekamo vani hataleti kina anonaʼamo haneʼnigeno mago vekamo teni kina anonaʼamo haneʼniye. 42Ani anonaʼanilefeʼmo moniʼanimo alagi ohaneʼnigeno anamiʼniya vekamoʼmo hunoʼaeʼmo, afaʼa ateʼao, huno hana paiʼniye. Lole vekalapatiʼmo haiya vekamoʼmo anonaʼanilefeʼmo afaʼa ataleʼniya vekaeʼmo lusi kava huno hauʼnigeno alu vekamo aeno aga seʼniye, huno ge huno afi geʼnigenoʼaeʼmo, 43Nagesamo afuvana alopa anonaʼamo haneʼnigeno afaʼa ataleʼniya vekamae, huno ha paiʼnigeno, he lama gemo nehane, huno ha paiteno 44#Aep 18:4ani a kanomo aino afe leno aulu haeʼniye. Saimonifeʼmo hunoʼaeʼmo, mani a kanomo ageʼnapiye. Nokafiʼmo eʼna hai neʼnogekaeʼmo naiyamo sese hisuvafeʼmo aniʼmo he fika oʼnamiʼnanaʼmonanafa mani a kanomoʼmo aunuletiʼmo naiyamo sese huno nateteno ayokatetiʼmo alino kalopaeno nateʼniye. 45Eʼna hai neʼnogekaeʼmo nahaeka oʼneʼnanaʼmonanafa eʼna haiʼneʼna maiʼnova afinatetiʼmo naiyaleʼmo haeno nege nege huno maiʼniye. 46#Sam 23:5Afa uvelimo nagenopafiʼmo lakika oʼnateʼnanaʼmonanafa mani a kanomoʼmo naiyaleʼmo alagepa atumo neʼaiya uveliletiʼmo faleno nateʼniye. 47#1 Ti 1:14Ani kavaʼmo huʼniyaʼmofeʼmo kaha paiʼnaeʼmo, ani a kanomoʼmo nagaefeʼmo lusi kava huno hau ayamopafiʼmo hauʼniya kavaʼaletiʼmo hunoʼaeʼmo, alopa hosu kavaʼnimo anonaʼnimo ago alino ataleʼniye, huno alino lapave neliye. Aise hosu kavaʼnimo alino ataleʼniye, huno agesamo afiʼnisiya vekamoʼmo aiseʼatoʼamo hau ayamopafiʼmo nehaiye, huno ha paiteno 48#Lu 5:20-21ani afeʼmo hunoʼaeʼmo, hosu kavakamo aliʼna ataleʼnove, huno ha paiʼnigeʼapaeʼmo 49agaeʼeʼmo magokepi lokaeʼa maiʼnaya vayaʼmogimo apakaiʼapimo apaipafiʼmo apakesamo afiʼapaeʼmo, mani vekamo ina laʼmo maiʼnenoʼaeʼmo hosu kavaʼamo alino ataleʼniye, huʼa apakesamo afiʼnae. 50#Lu 8:48; 17:19; 18:42Agaemo ani afeʼmo hunoʼaeʼmo, kagesamo afika fatago huʼnana kavakamoʼmo kagufamo alino katino kateʼniyanagi kaipamoʼmo falu huʼninageka afaʼa uvo, huno ha paiʼniye.
Επιλέχθηκαν προς το παρόν:
Luki 7: kyg2013
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2013, Wycliffe Bible Translators, Inc. All rights reserved.