Δημοφιλή Βιβλικά εδάφια από Jowãw 6

Κοινοποίηση

Mã me cumã: — He ipê ri ihhêj rũm côjkwa pĩn Pahpãm jõ intuwti ata, na wa ha me to ihtĩr rohnỳtti mã. Quê ha jũm ty, ne ihtyc jirô pê hacpỹa mã ihtĩr, ne nee hipêr jũ caxuw ihtyc nare. Quê ha prãm na jũm te apu ipa na, quê ha apà ne hacpỹa mã ihtỳj, ne cumã amji kĩn, ne harte pyrên hakry. Ne quê ha hanea ne jũm kôr na apu ipa ne ikõ, ne hacpỹa mã ihtỳj ne cumã amji kĩn. Jĩkjê na, quê ha jũm te Pahpãm jahkre pej ne cumã amji jõr, ne ahna mehkwỳ mã hàr to prãm na, quê ha iwỳr apkjê ne ito amji mã ihhimpej, ne Pahpãm jahkre pej, ne ahna mehkwỳ mã hàr pyrên hakry.

Ne Pahpãm Carõ Pejti ata ri cahê na me ato ipijapar rohnỳtti mã. Ne jũ wỳr ca me anõ amjia kôt amji mã hamã ne ca amji to ajpa, ne me ca ajpẽn to me ajpa. Ne ca ha ate me icakôc xà ita na ikam me gapac na, quê ha Pahpãm Carõ Pejti me amã acjêj, ne me ato ipijapar rohnỳtti mã. Hõhõ, ita pê ri ate me ijĩ kur xà ata, pom wa me amã harẽ ita. Ne wa ampeaj kam me amã ampo itajê jarẽn cakrô, ca ajte nee me akwỳ ito amji mã me ahimpej nare — hajỹr.

He ame hajỹr nare! Nee ca pjê ita kam, ate amji to me apijapar prãmte, me gàpàn to pit mã ame amji kam gapac nare. Ne quêt Pahpãm cahê na ate amji to me apijapar rohnỳtti mã xà ata to, ca ha me amji kampa. Ampo na? He ate me to amji kam me gapac ata pê ihhêj rũm me gõ te me ato me atĩr rohnỳtti mã xà. He ipê me Ahàkà, na wa ite me axũmrea na amji ton, ne me amã Inxũ Cati to hahkre, ca ate cahê na amji to me apijapar rohnỳtti mã xà caxuw. Mã ihtỳj Inxũ pê Pahpãm te, ite to ijàpên xà caxuw imã carôt jõr. Ampo na? He cumã ipej na ri — hajỹr.

Ita na ri Inxũ ito prãm he. Quê ha ihtỳj ipê Pahpãm kra te hajỹr romã mã iwỳr me apkjê. Ne por quê ha ito amji mã mehhimpej atajê, wa ha jũ caxuw, pjê jamre xà ata kam, hacpỹa mã me to ihtĩr. Quê ha me to ipicokjêr xà jirô pê Inxũ cahê na mehtĩr rohnỳtti mã na ame ipa — hajỹr.

Mã Jeju te me cumã harkwa to: — Ate ito amji mã me ahimpej na ri, Pahpãm mã me ato prãm, cwỳrjapê ri cute me awỳr ikujahêc — hajỹr.

Ne por Inxũ te ijũhkra mã me hacjên xà atajê, quê ha ihtỳj ijũhkra mã me acjêj, wa ha itỳj amji mã me huwahi, ne jũ caxuw põ mã, amji pê, jũm to ijũcapêr, quê ha ipictor nare.

Mã Ximãw Petrô te cumã harkwa to: — Jũm wa ha ajte me hũnã? Me ijõ Pahhiti, pom acakôc xà itajêa ri quêt me imã ite amji to me ipijapar rohnỳtti mã xà to hahkre.

Ne ipêa ri côjkwa pĩn me cumã me hõ tĩar wrỳc ata. Ne ipêa ri me to ihtĩr rohnỳtti mã xà. Wa ha pa, pjê kam mehcunea mã amji gõ. Na quê ha jũm te ihhêj ne ikwỳ krẽr na, quê ha Pahpãm cahê na ihtĩr ita na apu ipa rohnỳtti mã — hajỹr.

Jũ wỳr quê jũm amjia kôt amji to ikôt ipa catê. Nãmri quê ha Inxũ te jũm pê ikôt ipa catê na ton na, quê ha ihtỳj cupê ikôt ipa catê. Na wa ha itỳj hacpỹa mã to ihtĩr, ampo cunea jamre xà ata kam.

Mã Jeju me cumã: — Ỹhỹ, ampeaj kam wa ha me amã côjkwa jõ ata kôt harẽ. Pê rỳ pêa mã Mojxe xwỳ jõ caku kam, cute pjê kam amji to me ipijapar xà caxuw pit mã, pê Pahpãm me cumã me hõ japrỳ te mana ata gõ. Ne nee mã pê Mojxe me cumã hõ ata jõr nare, Pahpãm pê me cumã cugõ. Ne pom curmã côjkwa pĩn Pahpãm jõ intuwti cator ita pê ri côjkwa kam Pahpãm cahê na ate amji to me apijapar rohnỳtti mã xà caxuw impej — hane.

Na ri ipê me gõ te me ato atĩr rohnỳtti mã xà ata.

Mã Jeju te pãw kryjre atajê incwỳr ne hũrên hakryti na Hũm pê Pahpãm mã to amji jarẽn. Ne cute ihcokjêr ne me imã hõr, wa ite me cumã hõr par, mã cute tep pijakrut atajê to hajỹar. Mã ajte me hõ pãw kryjre itajê to mehcunea jarte partu. Ne cute me hàpàn tohhi jirô pê mã ri, Jeju te me imã harkwa to: — Cute ame cahhur tohhi itajê to kàhà kam me cuprõ, quê nee ihnõ ipictor nare — hajỹr.

Wa ramã ite me imõr jũwry to me rec pyxit, cô kam, ne ma me to cakrỳn to mõ. Ne me ite amji wỳr ajpên cô jipy Jeju te mõr na me hõmpun, ne ampeaj kam me imã hũpa. Mã pea me ina hàhtêp, ne cute me imã harkwa to: — Ame icupa nare, pa wa mõ, nee mã ipê me carõ nare — hajỹr.