Δημοφιλή Βιβλικά εδάφια από Romanos 8

Κοινοποίηση

Y roj ri ndiqajoꞌ ri Dios, qetaman chi nojel ri ngebꞌanatej pa qakꞌaslen, rijaꞌ ndubꞌen chare chi kꞌo utz ndukꞌen pe chaqe. Keriꞌ ndubꞌen chaqe roj ri roj royon, porque keriꞌ wi rubꞌanun pe ruwech pa qawiꞌ.

Porque kin kuqul nukꞌuꞌx chi nixta ri kamik y ri kꞌaslen, nixta ri ángeles y ri itzel teq espíritu, nixta ri ndiqaqꞌasaj pa qakꞌaslen wokami y ri ndiqaqꞌasaj pa qakꞌaslen más chiqawech apu, nixta ri espíritus kꞌo uchuqꞌaꞌ pa kiqꞌaꞌ, nixta ri kꞌo e chikaj y ri kꞌo qa chuxeꞌ ri rochꞌulew, nixta jun ri ebꞌanun roma ri Dios ngetiker ngojkelesaj e chupan ri rajowabꞌel ri Dios, y riꞌ roma xe jun qabꞌanun rikꞌin ri Qajaw Cristo Jesús.

Y keriꞌ chuqaꞌ ri Espíritu Santo ngojrutoꞌ roma maneq ok ruchuqꞌaꞌ qánima, porque ma qetaman ta achike ri qitz méra ndikꞌatzin ndiqakꞌutuj pa qa-oración, pero ri Espíritu ndichꞌaꞌa pa qakꞌexel chare ri Dios, y hasta ndijila rikꞌin tzij maneq rubꞌixik chochꞌulew atoq ndichꞌaꞌa pa qakꞌexel.

¿Achike ndiqabꞌij pa ruwiꞌ nojel reꞌ? Nojel reꞌ ndukꞌut chiqawech chi ri Dios kꞌo qikꞌin chin ngojrutoꞌ, romariꞌ ma jun ndubꞌen si kꞌo ndiyakatej pe chiqij.

Wokami, roj ri xe jun qabꞌanun rikꞌin ri Cristo Jesús, ma jun castigo ndiqaqa pa qawiꞌ.

Ri bꞌaneq kánima chirij ri itzel teq rayinik, kamik ndukꞌen pe chake, jakꞌa ri bꞌaneq kánima chirij ri ndirajoꞌ ri Espíritu Santo, uxlanen ndukꞌen pe pa kánima y ndukꞌen pe chuqaꞌ ri kꞌaslen ma ndikꞌis ta.

Pero pa ruwiꞌ nojel ri kꞌayew ndiqaqꞌasaj pa qakꞌaslen, roj más quchuqꞌaꞌ ndiqil chin ngojjel chuwech roma ri qatoꞌik nduyaꞌ ri Cristo ri ndojowan qichin.

Porque riyin nukꞌoxoman chi ri kꞌayew ri ngeqaqꞌasaj chupan re tiempo rojkꞌo, ma jubꞌaꞌ junan rikꞌin ri nimalej ruqꞌij ri Dios ri kꞌo jun qꞌij xtiqꞌalajrisex chiqawech.

¿Kꞌo kami jun achike ngojelesan pa ruqꞌaꞌ ri Cristo ri tzꞌan ngojrajoꞌ? Nixta jun. Nixta ri kꞌayew, nixta ri qꞌaxomal, nixta ri ngojtzeqlebꞌex chin ndibꞌan itzel chaqe, nixta ri wayijal, nixta ri maneq ok qachajin, nixta ri jubꞌama ngojkamisex, nixta ri ngojkamisex ta rikꞌin espada. Ma jun chikiwech nojel reꞌ nditiker ngojrelesaj e.

Y ri Dios ri ndinikꞌon kánima ri wineq, kin retaman ri ndirajoꞌ ndubꞌij ri Espíritu Santo pa qakꞌexel, porque kin ja ri rurayibꞌel ri Dios ri ndukꞌutuj pa qawiꞌ roj ri loqꞌolej rutinamit ri Dios.

Porque konojel ri eꞌukꞌuan roma ri Espíritu chin ri Dios, kin eralkꞌuaꞌl ri Dios.

Porque ri wineq ri eꞌukꞌuan roma ri itzel teq rayinik chin ri ki-cuerpo, xa kin bꞌaneq kánima chirij ri itzel teq rayinik riꞌ, jakꞌa ri eꞌukꞌuan roma ri Espíritu Santo, kin ja ri ndirajoꞌ ri Espíritu ri bꞌaneq kánima chirij chin ndikibꞌen.

Ri Dios hasta ri Rukꞌajol ma xupoqonaj ta xuteq pe chochꞌulew chin xken chujoyowaxik qawech roj ri qataqin rijaꞌ. Y si xuteq yan pe ri Rukꞌajol, ¿ruyon kꞌa ma xtuyaꞌ ta pe ri chꞌaqa chik ru-favor chaqe?

Y ja ri Espíritu Santo ri ndiyoꞌon pa qánima chi ndiqanaꞌ chi qetzij roj ralkꞌuaꞌl ri Dios. Y roma roj ralkꞌuaꞌl chik ri Dios, kin nduyaꞌ chaqe ri rusujun kan, y kꞌo ri ruyoꞌon chik chare ri Cristo ri ndiyoꞌox chuqaꞌ chaqe roj. Pero ndikꞌatzin ndiqaqꞌasaj kꞌayew achel rijaꞌ, chin keriꞌ ndikꞌojeꞌ qaqꞌij rikꞌin, chupan ri nimalej ruqꞌij rijaꞌ.

Porque ri bꞌaneq kánima chirij ri itzel teq rayinik chin ri ki-cuerpo, eyakatajneq chirij ri Dios, porque ma ndikibꞌen ta ri ndubꞌij ri ley ruyoꞌon pe ri Dios, nixta ngetiker ndikinimaj ri ley riꞌ.

Nojel ri ebꞌanun roma ri Dios bꞌaneq kánima chiroyobꞌexik ri qꞌij riꞌ, atoq ndiqꞌalajrisex achike ri eqetzij ralkꞌuaꞌl ri Dios.

Keriꞌ nibꞌij chiwa porque qetaman chi nojel ri ebꞌanun roma ri Dios, konojel junan ngejila xe jampeꞌ ojer hasta re qꞌij reꞌ y ndikiqꞌasaj qꞌaxomal achel jun ixaq ri yaméra ndalan qa.