Urarina - 2006 Edition (NT)

Niritiin jetaote, satiin nimichucutaain coineteein mucuhin jetao, Filato rene Jesoso amaaure. Ecu turuaain jetaote, Filato acatiha teein Jesoso colurujueeure:
“Caa cachane eruhacaanu, caa cana atane que nenacaauru cachaauru suujua rerohecaain, cana curuaanaa Romanocuru curuaanaa enferadoro rai coriqui tihacachene caohateein, ‘Aca jete nii canaacha cohajei Reey Mesihasi ne’, naain cachaauru suujua auhacaane jana”, naain jetao colurujueeure.
Niritiin colurujueeuruhane jaun jetaote:
“Iina chuhisi Jorioocuru Curuaanaa Reey ineein”, naain caje bajaa Filatone jaun jetaote:
“Esinae rauhijiriin acanichaaunne quete aitohicha”, nae jetao rai Jesoso.
Niritohane jaun jetaote, saseredotecuru curuaanaacuru, chaaen ecu neein aonajeeurera cachaauru, naaonjoainuri rai jetao:
“Coatiha chatohaneein baaso ichaa caa cachane coarahaaun canuta”, naa acaauru rai Filatone jaun jetaote:
“Nete cachaauru relaane aina cuaain satiin cachaauru suujua auhacae. Nitohaneeinte Calileea batane caje nunuheteein, caa Jodea batane netonai que jerichanejeein ichana jerera”, naain jetao jataain acaauru esenetaa Filatone jereein conujeeure.

Niritocuruhane aonaain jetaote: “Calileea cajena nenaana caa cachate”, naain jetao acaauru caje bajae Filato. Niritiin acaauru caje bajaane jana, “Aca chujianra”, naauruhane jaun jetaote, Calileea coberenadoroneein bana niha Erodesine jaun rene letoae Filato, nii bana nii Jerosaleeun turuhin niha nii Erodesine jaun. Nitohaneein Jesoso letoaa Filatone jana coaraain jetaote, jataain rachoojoe Erodesi, cojoelanaacojoai ichaane coitucuhin, acaaentonai Jesoso coarana jeretohane jana rene letoaauruhane jaun. Nii jaun jetaote, araai saain niqui, “Chatohaneein nenaa neein”, naain caje bajae Erodesi. Nejetaote, nere tonorana jerene Jesoso. Nii nainiha jetaote, ecu neeure saseredotecuru curuaanaacuru, chaaen Cana Coaunera aitoonjoa que cacha relaaureraauru, naaonjoainuri, jataain acaauru esenetaain, Jesoso cairichaa Erodesine coina counujueein colurujiha neeure. Nitohaneein nere tonorana jereniha Jesosone jaun jetaote, coetaain rai soondarooru aina jiniiquiin nocoeje chanuhin jetao cairichaain, necoreteeuruha reey churune jaan tocoanai cajione que jetao Jesoso cajione corerate Erodesi. Nitohaneein teein jetaote, nacoaauneein Filato rene letoae Erodesi. Nitohaneein Jesoso cairichaauruhane bana caje coaauneein jetaote, ita que nejerateeriin neeuruhane baiha jetao, ita belaichaneein neeure Filato aina Erodesihuru.


Nitohaneein Filato rene letoaa Erodesine jana jetaote, saseredotecuru curuaanaacuru, chaaen cocoainacaihuru, satiin ecu nenacaauru cachaauru, naaonjoainuri taojiaain jetao:
“Inarate canu rene caa cacha turuaa uhiche, ‘Cachaauru suujua rerohecaain jete, cachaauru suujua auhacae’, naain colurujueein. Nena caraajenihane inara acatiha teein caje bajaanune janate, nii chatohaneein cotainacai ichaain, nii colurujeeichene jaa lera coitucueneeun. Niheichu caa cana rene jelaiha letoaera Erodesi nihanatiin, nii chatoanai ichaane jaa lera coitucuhi. Aihane jaun inae coaraquiche inara, nihei nii chatohaneein cairichaain ateinaacachene jaan lera. Raujiaainchane casetecaain nii baiha jianereeunni, Fasocoa beseta naineein niha colurujuenojoine, nirijieein jianenajaaoncaaunne rijijieein”, naa acaauru rai Filatone jana jetaote, satiin ita rijitiin jachaatorohaain jetao:
“Jiaohine. Jiaonriha nii Jesoso jianeeinera. Nii Barabasi jianeeujian laaenra”, naaure jetao Filato rai Jorioocuru.
Nii Barabasi jetaote, caresero cuhane enohaaure, nii neseu Romanocuru que nejerateein, acaauru aina sonaana que neein leinjiin cacha sohin jaohane coreniha. Nitohaneein nii chatohaneein Jesoso cairichanaa jerenihane jaun jetaote, nirijieein jianihane coina jetao niqui, nacoaauneein acaauru rai ere Filato. Nejetaote, jataain tonijiaain jeelai rutaain jachaatorohaain jetao:
“Letananocoriin coroso que teeute ecu neein ohinera”, naaure jetao ita rijitiin.
Niritocuruhane jaun jetaote:
“Chatoanai baasonajia ichae. Coatiha cairichaain atinaanune coina chatohaneein baaso ichaain nihane coarahaaun canuta. Raujiaainchane casetecaain, nii baiha nirijieein jianereeunnicha”, nae jetao acaauru rai Filato nichata saain.
Niritoha acaauru raine jana jetaote, jachaatorohaain ehequiin jetao, “Coroso que tihachaaura”, naauruha araai saaine cotabeniha jetaote, nii aitocuruhane rijijieein jetao ichae Filato. Nitohaneein jetaote, nii Romanocuru que nejerateein sonaana que neein sonajaain joaera caresero cuhane nenaa, acaauruacha jianeratei cacha mitaain jetao acaauruacha jerei rijijieein jetao, acaauru bijihu Jesoso te Filato.


Nii jaun jetaote, coroso que Jesoso teeuruhane coina, amaauruhane jana, situujiha cuha leinjiin cacha Sirene caje unaa Simoonne jaun jetaote, cotijiaain que nii Jesoso teeuruhane jaanu coroso baijiaeratecure. Nii jaun jetaote Jesoso caaijie, nii coroso teeuruhane jaanu amae. Nitohaneein amaauruhane jana jetaote, arajiin enecuru, quichaauru, naaonjoainuri jetao, caaijie cuure. Nii caaijie cunacaauru jana cunacaauru enecuru jetaote, cojioriin chanaaure Jesoso coinaderaa. Nii chanaauruhane jana acaauru coaraain jetaote:
“Jiaonriha cacoreniha chanaaichenera Jerosaleen benecuru. Inara bereecuru, inara jaberoco, naaonjoain coreniha chanaauchera. Inae nerichaain inara cairichaauruhane jaan cojoanonaa. Nii banate: ‘Caohatoriha canaanai sirilanaala nihacachene niqui’, nariquicheein. Nii banate ichatane ecuunooru rai, ‘Canacaanu ichoae neranuu’, naa cuurureein cachaauru. Jana atane rarororooru raite, ‘Canacaanu asihu’, naaurureein. Coaracuche nachuhinti chatoanai baaso ichaain nenihanune sainejeein catohaneein caetecuruhane. Nii jaun chatohaneein teeinti inara teeurureein inae amuhanune baiha”, nae jetao acaauru rai Jesoso.
Nii Jesoso jiniichaain jetaote, coroatajaain necha aansai baaso icharaauru cachaauru amaaure, sohin ateinanajaauruhane coina. Inae nii “Couturi Bejero”, neein acaauruacha curuhateihu turuhin jetaote, coroso que Jesoso aina jiniiquiin nii coroatajai necha aansai baaso icharaauru teeure. Leinjiin jetaote, Jesoso najaabiji nichajai que teeure. Jana leeocha jetaote, raotono nichajai que teeure. Nitohaneein coroso que teeuruhane jana jetaote:
“Caa catohaneein caetecuruhane coreniha, acaauru que ii suujua acateeura Ofa, cha coitucuurenihane jaunte aihurera”, nae jetao Jesoso. Nii jana jetaote, ecu nejesinajeein ita rai Jesoso cajione chaluure soondarooru. Nitohaneein teeuruhane jana jetaote, ecu neein coarajeeure cachaauru. Nii nainiha jetaote, cocoainanacaihuri netonai:
“Chajaain aihane ena esinae rauhijiriin Cana Coaunera tenojoi Mesihasineein niicha janijiineein nihane, raajenihane rai jaberoco ichoteratemiin leeochaauru ichoteratihane rijijieeinte coaracaachera”, naaure jetao nechu jataain cairichaain que ninichaajia.
Nii jana soondarooru netonai jetaote, Jesoso que ninichaajeein nechu jataain cairichaa rohan nichuuntaacoaain jetao, bino elorajiojoaain nenaa que jetao cocoaain:
“Aihane esinae rauhijiriin Jorioocuru rai Reey neeine, ichaajenihane ijiabereeo ichoterateeune coaracaanura”, naaure jetao rai.
Nitohaneein coroso que teein jetaote, rai bichoeniha teein jetao: “Caate Jorioocuru rai Reey neein ne”, naain laenacure.
Nii jana nii necha aansaineein coroso que nenaa cacha coroataja jetaote, nechu jataain cairichaa cotaiha jetao:
“Aihane esinae rauhijiriin Mesihasineeine, ichaajenihane ijiabereeo ichoterateeute coaracurumiin, chaaen canacaanune maajeein ichoterateeune coaracaanura”, naane jana jetaote: “Coa niritoha. Tana ichasetecarichaain Cana Coaunerane coasiine. Iitonai rijijieein caseteconeein neeinatiinachura aitohite. Canatejian esinae rauhijiriin itolereneein baaso ichacaane coreniha necairichaecaa cau. Jana caa cacha, nii chatoanai baaso ichaain nihane coreniha caa aihei”, naane baiha jetao:
“Canu coaucuhin ii Cojoanonaa que neeine banara Jesoso”, naa nii baaso icharaauru coroso que nenaa leeochane jana jetaote:
“Enenete esinae rauhijiriin raotojoeein ichaonaane jaun caniha neriquiincha”, nae jetao rai Jesoso.


Nitohaneein inae ohane rai niha Jesosone jana jetaote, enoto chujutora caje coaauneein jetao, caohachanainejeein nocohenaneein nedae satiin chauratane, nuna macohi ichoae teejia enotonereetiaain.
Nitohanihane jana jetaote, neleruhin nesoaihacoae nii Teenforo leruera cajione, ecu bujuaneein nenaa.
Nii jana jetaote, jataain tonijiaain auhaquiin jetao:
“Ii bijihune canu suujue teeunra Ofa”, naain jetao inae ohe Jesoso.
Nii jana ecu beraiha nenacaauru Roma rai sondarooru cafitaan jetaote, Cana Coaunera coroajeein jetao:
“Esinae rauhijiriinte, nii chatoanai baaso ichaain nenecaiha caa cachara”, nae jetao.
Nitohanihane jana ecu satiin neein coarajeeurera cachaauru jetaote, nesoone caaun rai nelarijia faojoaain jelai caje cauhacoaaure. Nejetaote, satiin nii Jesoso coitucuureraauru, chaaen Calileea caje coaauneein sacuurera enecuru, naaonjoainuri jetao ecu neein coarajeeure jelai caje amuelanaala nita netiin.


Nii jana jetaote, ecu ne leinjiin cacha Jodea batane que nenaa Arimatea cocoaichaneein nenaa Jose. Aca jetaote, caohacha cachaneein, satiin Jorioocuru rai nelateein Jorioocuru coaaraneein nenacaauru Junta Suprema tabaneein nihane sainejeein, turuha uha Cana Coaunerane Cojoanonaane corajihane jaun jetao, nitohaneein nii Jesoso teeuruha nii rai leeochaauru Junta Suprema curune rautaain coaraene. Nii Jose jetaote, Filato caje Jesoso jaberoco bajaa cue, rucuhecane coina. Nitohaneein bajaain jetaote, coroso caje fauhin jetao, shojoera que conajaain jetao, jaiti chuni onaa teeurenihane jaan ichatane ramara que nenaa ajeri jachu cuhane jetao rucuheca cuure. Nitohaneein jetaote, inae nunuheneelalajiha nebetacanaa cojoanonaane jaun, inae niicha ichanenu ichana nainecuruhane nainejeein jetao, luhecaain nii Jesoso rucuhecure.
Nitohaneein Jesoso jaberoco rucuheca cuuruhane jana jetaote, acaauru aina cuure Calileea caje coaauneein jiniichaain unacaauru enecuru. Nitohaneein cuhin jetaote, caohachaain rai jaberoco rucuhecuruha ajeri jachu cuhanene coaracure. Nitohaneein ajeri jachu cuhane rai jaberoco rucuhecuruhane jana caohachaain coaracuruhane baiha jetaote, nenajaun cauhin jetao, meetoon rijijieein jujuaain nenaa ichacuruhane nainaain jetao, Quiricha inoaensi cuhane aitoha Cana Coaunerane rijijieein, nebetacanaa cojoanonaa bana nebetacaaure nii enecuru.

Ακρόαση Locasiicha Laenai 23