Northern Zazaki, Dersim - WBT (Luke) Non Drama

Northern Zazaki, Dersim - WBT (Luke) Drama

İ rocan de, İmparatorê Roma, Sezar Agustosi, ferman vet kı mıleto kı herdê hukumdariya Roma dero pêro bımoriyo. No mordeyiş, mordeyişo sıfteyın bi, na waxt de Kirinius waliyê Suriye bi. Her kes şi suka pi u khalıkê xo kı xo qeyd kero.
Usıv a waxt Celile de suka Nasıra de mandenê. Usıv ezbeta Qıral Dawudi ra amenê; Dawud ki suka Beytlehemı de amay bi dina. Ay ra Usıv şi Welatê Yahudiyan suka Beytlehemı. Usıvi bı waştiya xo Meyrem'a pia şi uca kı xo qeyd kerê. A waxt Meyremı dıcani biye. Key kı ni suka Beytlehemı de bi, waxtê rakutena Meyremı ama. Meyremı domanê xowo sıfteyın, jü lacek, ard dina, o pist paçıkan ra. Xan de ca çini bi, ay ra Meyremı layıkê xo wertê ara alefi de kerd hewn.

Şüanan peşew, nejdiyê suka Beytlehemı de mergan de mandenê, uca de verê malê xo de pitenê. Jü meleka Heqi inan rê aşiyê, roştia Heqi dormê şüanan bereqnê. Şüani tersan ra vışiyay pêro. Melekı, şüanan rê vat: “Metersê! Mın sıma rê mijdani ardı, na mijdani sarê sıma pêroyini zaf sa kena. Eyro owo kı sıma bıxelesno ra, suka Dawudi de ama dina. O Mesiho, o Wayirê sımawo. Sıma i domani wertê paçıkan de, wertê ara alefi de vênenê; va no ki sıma rê bıbo alametı.”
Xafılde lê na melekı de, tonê meleki aşiyay. Ni melekan Heqi rê şukır kerd, inan nia vat:

“Cor de, Heqi rê şukır bo,
Herdê dina sero, mordemê kı Heq cı ra rajiyo,
Sılametı inan sero bo!”

Meleki lê şüanan ra anciyay şi asmên, bado ki şüanan jübini rê vat: “Bêrê ma şimım Beytlehem, xebera kı Heqi resna ma, ay bıvênım.” Şüani vasti şi uca. İnan Usıv, Meyremı, jü ki doman di. Doman wertê ara alefi de rakutayi bi. Şüanan kı ni di, qeseyê kı melekı saba domani vati bi, i qesi inan rê qeşi kerdi. İyê kı şüanan ra na xeberı eşiyay pê, pêro sas bi mandi. Meyremı ni gıroti zerria xo de dardi we, serê ninan de xeylê fıkıriyê. Şüanan owo kı di bi, eşiyay bi pê saba inan pêronan Heqi rê şukır kerd u peyser şi. Qeseyê kı melekı vati bi, pêro rast veciyay bi.

Doman kı bi heşt roci, inan o sunet kerd u namê niy İsa na pıra. No namı, hona kı Meyremı dıcani nêbiye, hetê melekı ra amay bi vatenı.
Gorê Qanunê Pêxember Musay, waxto kı saba pakbiyayişê Meyremı lazımo bi bi pırr. Nay dıma, Usıv u Meyremı layıkê xo berd suka Yeruşalimi kı teqdimê Heqi kerê. Qanunê Heqi de na ama vatenı: “Ekı jü cinıkı laceko sıfteyın ard dina, o lacek saba Heqi bımbarek say beno.” Ancia Qanunê Heqi de nia emır beno: “Çutê qumriyan ya ki dı tenan çhêlıkanê gorgoçinan qurbanı kerê.” Usıvi bı Meyrem'a şi Yeruşalim kı ni emran biyarê hurindi.
A waxt Yeruşalim de jü mêrık esti bi, namê niy Şimon bi. No mêrık Heqê xo de rast bi, itıqatın bi. Ni mêrıki pitenê kı Mesih bêro u İsraili bıresno retiye. Rowo Bımbarek serê niy de bi. Rowo Bımbareki Şimoni rê vati bi: “Tı hata kı Mesihê Heqi mevênerê, nêmırenay.” Nay ra, Rowo Bımbareki Şimon çarna hetê Mabedı. Gorê Qanunê Heqi, ma u piyê İsayê qıckeki o ard Mabedı kı cı kerê raya Heqi. Şimoni lacek gırot qucia xo, Heqi rê şukır kerd, vat:

“Heqo, wado kı to day bi mın, to ard hurindi.
Nıka ki ezo, qulê to şikinan wertê zerrêweşiyê de bımıri.
Mın xelesnayena kı to hazır kerda, bı çımanê xo'a diye.
Mıletê dina pêro ki nay vênenê.
A roştia kı mıletê bini bereqnena
Saba sarê to İsraili ki şeref bena.”

Ma u piyê layıki verê qesanê Şimoni de sas bi mandi. Şimoni inan rê düaê xêri kerdi. Bado mua layıki Meyremı rê vat: “İsrail de zafini rüyê ni layıki ra gınê waro, zafini ki benê berc. O bıxo beno alametı, dısmenê xo bı qesanê xo'a vera na alametı de fındenê. Ni pêro benê kı zerria kami de kı çı fıkır esto, va o bıveciyo teber. Ê to ki tı vanê kardi sanina zerria to.”
Mabed de jü cinıka pêxemberı esti biye, namê nay Hanna bi. Aşira Aşêr ra, kêna Fanueli biye, zaf kokım biye. Na kı zeweciyay bi, hawt serri tepia mêrıkê xo merdi bi, viya mandi bi. Nıka heştay u çar serriya. Mabed ra qe nêveciyenê. Rocı gırotenê pê, peşew peroc düay kerdenê, Heqi rê ibadet kerdenê. Key kı Usıv u Meyremı ki Mabed de bi, Hanna ame lê inan. Hannay Heqi rê şukır kerd, kamo kı pitenê Heq Yeruşalimi bıxelesno ra, xebera İsay da inan.
Usıv u Meyremı çiyê kı Qanunê Heqi de amê vatenı, ni pêro kı ardi hurindi, i a waxt peyser şi Celile, suka xo Nasıra. A waxt doman İsa biyenê pil u qewetın, bı hekmeta Heqi'a biyenê pırr. Rama Heqi serê iy de biye.

Ma u piyê layıki her serrı saba Roca Fısıxi şiyenê Yeruşalim. Key kı İsa bi des u dı serri, i ancia şi Yeruşalim kı Roca Fısıxi bımbarek kerê. Fısıx kı qediya, peyser gêray ya kı sêrê kê xo. Doman İsa Yeruşalim de mandi bi, xebera ma u pi nay ra çini biye. İnan qa vatenê kı İsa bı mıleti'a pia ray dero. Jü rocı kı ray ra şi, Meyremı bı Usıvi'a wertê mordemanê xo u havalanê xo de İsay feteliyay. İnan İsa nêdi, ay ra peyser gêray ya, şi Yeruşalim kı İsay bıvênerê. Hirê roci tepia İsa Mabed de wertê ilimdaranê itıqati de roniştayi di. İsay gos denê qesanê ilimdaran ser, inan ra persi pers kerdenê. Kam kı İsay eşiya pê, verê baqıliya iy bı verê cüabanê iy de sas bi mand. Meyremı bı Usıvi'a kı İsa hini di, bi husk u kol mandi. Meyremı vat: “Ne lacê mın, to çay ma rê nia kerd? Mın u piyê to, saba to zaf tersayım, ma her ca de to feteliyayım.”
İsay ki inan rê vat: “Sıma çay bı mın'a fetelinê, sıma nêzanê hurindia mın kê Piyê mına?” Na vatena İsay ra, Meyremı bı Usıvi'a thaba fam nêkerd.
İsa bı inan'a pia kut ray, peyser şi Nasıra. İy qesa ma u piyê xo say kerdenê. Mua xo çiyê kı di bi, pêro zerria xo de dardi we. İsay hetê ra lesı estenê, hetê ra ki bı hekmet'a biyenê pırr. Taqdirê Heqi bı ê mıleti'a gırotenê.

Ακρόαση Luka 2