Surgujia -WBT (NT) Drama

Surgujia -WBT (NT) Non Drama

ओही दिन मन में बतिस्मा देवईया यूहन्ना हर एहूदिया परदेस कर सुनसान जघा में आईस अऊ एकस परचार करे लागीस: “पाप कर छमा मिले बर, अपन मन ला परमेस्वर कती फिरावा, काबरकि सरग कर राएज हर ढेरेच ठांवे आए गईसे।” यसायाह अगमजानी हर एही यूहन्ना कर बारे में ए कहे रहीस:
“सुनसान जघा में एक ठन चिकरोईया कर गोएठ हर सुनाथे,
कि परभू कर डगर ला तियार करा,
अऊ ओकर बर सोज डगर बनावा।”
ए यूहन्ना हर ऊंट कर रांवा ले बनल ओढ़ना पहिरे रहीस अऊ अपन कनिहां में चाम कर बनल पटा बांधे रहीस, ओहर फंफा अऊ जंगली मधुरस खात रहीस। ते घनी यरूसलेम अऊ जमेच एहूदिया जिला कर अऊ एरदन नदी कर आस-पास कर सबेच जघा ले, मईनसे मन ओकर जग आईन। ओमन अपन-अपन पाप ला माएन के, एरदन नदी में यूहन्ना जग ले बतिस्मा लेहीन।
बकिन जब बतिस्मा देवईया यूहन्ना हर देखीस कि, ढेरेच फरीसी अऊ सदूकी मन ओकर ठन बतिस्मा लेहे बर आवथें, तब ओहर ओमन ला कहीस, “ए करेत सांप कर लईका मन, तुमन ला कोन हर चेताए देहीस कि तुमन परमेस्वर कर अवईया दंड ले भागा? तुमन अपन जिनगी ले एला साबित कएर देआ कि सहीच में तुमन अपन पाप ला छोंएड़ देहे हवा, अऊ परमेस्वर कती अपन मन ला फिराए हवा! एकस डींग झईन मारा कि हमर पूरखा तो अबराहम लागे, काबरकि मंए तुमन जग कहत हों, परमेस्वर हर ए पखनोच ले तो अबराहम बर लईका बनाए सकथे। अझरो ले रूख कर जएर में परमेस्वर कर कोरोध कर टांगी मड़हाल हवे, एकरे बर जे-जे रूख हर सुघर फर नई फरही, ओला काएट के आगी में डाएल देहल जाही।”
“मंए तो तुमन ला अपन पाप ले मन फिराए बर पानी ले बतिस्मा देहथों, बकिन जेहर अवईया हवे, ओहर मोरो ले ढेरेच सामर्थी हवे, मंए तो ओकर पनही ला उठईया एगोट गुलाम बने कर लाएक नई हों, ओहर तुमन ला पबितर आत्मा, अऊ आगी ले बतिस्मा देही। ओकर सुपा ओकर हाथ में हवे अऊ ओहर अपन कोठार ला बढ़िहां ले सफा करही अऊ गंहू ला अपन कोठी में राखही, बकिन बूसा ला ओ आगी में लेस देही, जे आगी हर कभों नई बिताए।”


तेकर ईसू हर, गलील जिला ले एरदन नदी में यूहन्ना जग बतिस्मा लेहे बर गईस। बकिन यूहन्ना हर एकस कहिके ओके रोके कर कोसिस करीस, “मोके तो तोर ठन ले बतिस्मा लेहे कर जरूरत हवे, अऊ तंए मोर ठन काबर आए हस?” बकिन ईसू हर ओके ए जबाब देहीस, “अझेर तो एही कस होए दे, काबरकि परमेस्वर जेकस चाहत हे; ओही कस सब जाएत ला करे बर हमके ला जरूरी हवे।” तेकर यूहन्ना हर ईसू कर बात ला माएन लेहीस।
बतिस्मा लेहे कर पाछू ईसू हर पानी ले बाहरी निकलीस। ओहीच घनी अगास हर उघेर गईस, अऊ ओहर परमेस्वर कर आत्मा ला परेंवा कस अपन ऊपरे उतरत देखीस। अऊ अगास ले ए अवाज आईस, “एहर मोर दुलरुवा बेटा लागे, जेकर ले मंए ढेरेच खुस हवों।”

Ακρόαση मत्ती 3