Ngiemboon - 2007 Edition (NT)

Ngiemboon - 2007 - BSCAM NT Drama

Nouveau Testament en Ngienboum © Alliance Biblique du Cameroun, 2007.

Yěsô gÿo ńtóŋ *ngàŋa kwò yé ntsɔ̀b pʉ́a nê legém, ńná metʉ̀ mbwó pɔ́b lélɔg ńjwoŋ *messé tepòŋ, mbɔɔ lélɔg ńgÿo meguɔ ntí ntí maga ná pʉ̀a, mbɔɔ légÿo *melɔ̌’ ntí ntí maga mbùm pʉ̀a. Mezíŋ megàŋ ntúm Yěsô ntsɔ̀b pʉ́a nê legém ŋwɛ́ é mɔ̀ɔn: Ànduŋ mvfò aa Símo gẅie mé gíŋe ńtóŋo yé lê Piɛ. Wetsɔ̌ gwɔ́ Ndeléya ńgwɔ́ fɛ́ Piɛ. Petsɔ́ gwɔ́ Jâg míŋ Zebede pɔ́ fɛ́ we Jâŋ, ńgÿo Filib pɔ́ Patelemî, ńgÿo Tomáse pɔ́ Matio, á nkẅè ncùb pà *Roma, ńgÿo Jâg míŋ Alfe pɔ́ Tadé, ńgÿo Símo múɔ ngwòŋ pɔ́ Jẅidas Iskariod gẅie à la gÿo sẅiŋe Yěsô


Yěsô gwaa túm megàŋ ntúm pɔɔn ntsɔ̀b pʉ́a nê legém, ńtsẅi né pɔ́b ngie: Tà pi gʉa tsɛ̀ɛ melá’ pʉ̀a pie é té pà Yuda wɔ́, tà pi kúu tsɛ̀ɛ metÿǒsoŋ pà Samalîɛ. Pi gʉa fa’ pɔ́ *menjʉ̀njÿò Ssé mie ée tsɛ̀ɛ mendá pà Israel, mbà é la pyé. Pi gʉa sá’ éshwóŋ pʉ̀a ngie: *Lefùɔ Ssé tsoté tà ne ḿbɔ́ɔnte. Pi gʉa ńgÿo megàŋa guɔ zeŋe, ńgÿo mepfó zím, ńgÿo megàŋ nkà’ pǎb zeŋe, ńjwoŋ *messé tepòŋ. Mé nǎ mbwó pi sẅɛɛ sẅɛɛ, pi gíŋe ńná gí sẅɛɛ sẅɛɛ. Tà pi néŋ nkáb pɔ̀ɔn, tà mbɔɔ pá’ e gwɔ́ pɔ́ láa wɔ́. Tà pi gwɔ́ cʉ́me mánzsè ńdyɛbe pɔ̀ɔn, tà pi píi kúbe nzsǒ, tà pi píi kúbe melɔ̌ɔn, tà pi tẅi’i tÿǒ. N gɔɔn pá’ɔɔn nue nyìŋ lɔɔn ne fa’a nzɔ̌ wɔ́, mbà mmó léjÿó yé ge fó jʉ’ó Pi lɔɔn ńgʉa tà ńkúu tsɛ̀ɛ tÿǒsoŋ ka tsɛ̀ɛ mbʉ̀a wɔ́, pi túŋte lézsé ka nyìŋ gẅie à ge kúe gẅi ge kẅɛɛ jʉ’ó wɔ́, ńgwɔ́ tà ńgyá yé, pi ńnéŋe pɔ́ mbʉ̀a yé tà ńdá’ fó yɛ̌ lá’ ńgʉa. Pi gʉa tà ńkúu ndá nyìŋ, pi gɔɔn ngie: E Ssé néŋ mbʉ́lè tsɛ̀ɛ yɔ̀ɔn ndá. Pʉ̀a pie ee tsɛ̀ɛ yɛ̌ ndá lɔɔn ńkúe gẅí, mbà Ssé ge néŋ mbʉ́lè ná pɔ́b! Tá ńgwɔ́ gie pɔ́ lɔɔn tè gẅi kúe, mbà mbʉ́lè gi ge piŋe ná pi. Pi kúu mbʉ̀a nyìŋ ka pɔ́ tsɔ́ tÿǒsoŋ wɔ́, mé lʉ’ʉ lékúe gẅí, ńdʉ’ʉ lé jú’u shwóŋó gí, pi fó wó ńgʉa, ńgwaa gʉa ḿbú’u pfepfɔ́b nà mekwò mí ńgwá’ Mèŋ n ge shwóŋó gẅí, kwà’ nénʉ́, àlyɛ̌’ gie Ssé ge lá’ ne tsɔ́’te mentsaŋ pʉ̀a mesoŋ, ngʉ̀ngʉ̀ pɛ̌ pʉ̀a gyɔ́ɔn ńcʉa yé pʉ̀a Sodom pâ yé pʉ̀a Gomor


Mèŋ n túmo gẅi pé pá’ à lɔɔn ńgwɔ́ mé túm mvfó tsetsɛ̀ɛ menɔ̀ɔn ngẅi, pi ké ńgwaa giŋ ńdÿɔ́’ pá’ nnú, ḿbiŋ ńgwɔ́ pàteŋag ntsaŋ pá’ kàpʉŋ la Pi laga twó gí, mélà’mie pʉ̀a mesoŋ ge gÿo sẅiŋe gẅi mé ŋaga gẅí, ńdɔ́g mengwɔ̀ɔn ńcuɔ gẅi á tsɛ̀ɛ *mendá cú’tè mɔ́b Mé ge lá’ ŋaga gẅi á mvfò pà ngumnɔ́ɔn lâ mefùɔ melá’ mɔ̀ɔn. Pi lɔg ńgẅiin shÿó lélɔg shwóŋó wɔ́b mbɔɔ pàte zsě Ssé, á nyìŋ gẅie méŋ n gee wɛ̌. Mé gÿo ńgwɔ́ tà ne ńdɔgɔ gẅi ńgee, tà pi pú’ mbùm gi ngie pi ge tóo wó gɔɔn ngie kɔ́ wɔ́? Aa gÿo gwɔ́ fʉ̀’ó, e Ssé náa gẅi shwóŋó, mélà’mie pi zɔ tě ge zɔɔn lá’ gɔɔn nò wɔ. Àzẅìge Tá gẅi zɔ̌ ge lá’ lɔgɔ gẅi gɔɔn nò. Nyìŋ ge gwoon fɛ́ we ńná mé zẅé, tá múɔ gwoon míŋ we ńná mé zẅé, gubé ge lá’ lu ssé cʉ́’ megàŋ mbù metá pɔ́b, e gÿo mé zẅé wɔ́b. Pʉ̀a metsèm ge lá’ pú pʉ̀a gẅi mélà’ mɔ́ɔn, tá’ nyìŋ gẅíe à shÿɔ̌g shÿɔg tè kʉ́a zɔ ge gÿo tsẅɛ́ Mé lɔɔn ne ńkʉe gẅi a tsɛ̀ɛ yɔ̀ɔn tÿǒsoŋ, pi kÿo ńgee tsɛ̀ɛ yetsɔ́. Mèŋ n ge shwóŋó gẅí, kwà’ nénʉ́, pi tè lá’ kú metÿǒsoŋ Israel tà ḿmag té gwɔ́ gie *Míŋ Nyìŋ tǒ wɔ́. Nzì’i mmó tè tsítsà we cʉa, nkwɔɔn piŋ ńké tè tá we cʉa. Mé lɔɔn ḿvɔg ńtóŋo ngàŋ ndá ngie: Bɛlzebùl, mbà mé ge kúu nà pʉ̀a ndá pé, tá nyé té tóŋo wɔ́b pú’u, keen? Á lɔɔn ńgwɔ́ gie kɔ́ la gÿo tsítsà wɔ́, mbà yɛ̌ mmó ge lá’ gÿo nyìŋ gẅie à ne ńzí’i nò yé, ńgwɔ́ gie kɔ́ la gÿo tá pà nkwɔɔn wɔ́, mbà yɛ̌ mmó ge gíŋe lá’ gÿo nkwɔɔn yé.


Pú’u, tà pi pɔ́g pʉ̀a pie é nyɛɛ gẅi ngɔ́’, mélà’mie ànò gie aa lyɛ̌’ɔɔn ńgwɔ́ lelyěen, á gẅiin le lá’ ńkẅɛɛ mángyɛ̌, tsɔ́ nò té gwɔ́ gie à lɔɔn ńgwɔ́ á lyeen tà mé lá’ le zsé wɔ́ Ànò gie mèŋ n gɔ̌ɔn mbwó pi á tsɛ̀ɛ nzěm, ejʉ’ lɔɔn ńgÿo fɔ́g pi gɔɔn. Ànò gie n demté pɔ́ letuŋó pi, pi gÿo ńkwɔ́’ɔ gyɛ̌ tá sá’a yɛ̌ nò. Tà pi pɔ́g pʉ̀a mesoŋ, pɔ́ ku’ pɔ́ ndà’ lézẅé nyìŋ, ḿbiŋ ńké tè ku’u légÿo tà ńtɔ́g pú’u wɔ́. Pi pɔ́g pɔ́ ndà’ Ssé, á nue ńgwɔ́ á zẅé nyìŋ, ḿbiŋ ńku’u léma’a yé tsɛ̀ɛ mmɔ̌g. Mé ée lá’ɔɔn, ésẅiŋ mejʉŋé mémbʉ́a é té ku’u tsɔ́ mmó wɔ́. Tà mbɔɔ pú’u, ńgwɔ́ tsɔ̌ tà’ á le gwe ssé té gwɔ́ gie Tá gẅi Ssé à zẅǐŋ wɔ́. Á gʉa nà pi, mbà Ssé ne ńzsé nzẅìŋ menoŋo twó mí. Pú’u la, pi pɔ́ɔn légíŋe ḿbɔ́g, pi ee mbwó Ssé ńgwɔ́ mmó tʉ̀ nzẅìŋ ńcʉa mejʉŋé tà ńgyɔ́ɔn. Nyìŋ lɔɔn ńgɔɔn mvfò lá’ ngie: Mèŋ n ge nyìŋ Yěsô. Mbà mèŋ n ge lá’ gɔɔn yɔ́ɔn mvfò Tá wɔ̀ɔn gẅie aa tÿǒ lepwó ngie: Nyìŋ wɛ̂ aa wɔ̀ɔn nyìŋ. Tá nyìŋ piŋ ńgɔɔn mvfò lá’ ngie: Mèŋ n tè nyìŋ Yěsô wɔ́, mbà mèŋ *Míŋ Nyìŋ ge lá’ gɔɔn yɔ́ɔn mvfò Tá wɔ̀ɔn mie aa tÿǒ lepwó ngie: Nyìŋ wɛ̂ tè wɔ̀ɔn nyìŋ wɔ́
Tà pi kwaŋ ngie mèŋ n ka lɔg mbʉ́lè ńtóo ndùmo ssé tsetsá’. Mèŋ n ka tè lɔg mbʉ́lè ńtó wɔ́, ńka lɔg pɔ́ fagte ńtó. Mèŋ n ka to ḿma’a fagte tsetsɛ̀ɛ nyìŋ pɔ́ tá we, á tsetsɛ̀ɛ múɔ manzwě pɔ́ má we, á tsetsɛ̀ɛ nzwě múɔ pɔ́ má ndǔm we. Megàŋ mbù nyìŋ ge kẅɛ pɔ́ tsɛ̀ɛ tsìŋe ndá yɔ́b


Nyìŋ kwoŋo tá we ka pɔ́ má we wɔ́, tà ńtɔ́gɔ wɔ̀ɔn, mbà ngàŋ tè ku’u légwɔ́ wɔ̀ɔn nyìŋ wɔ́. Nyìŋ kwoŋo míŋ we we mbàŋa ka we manzwě wɔ́ tà ńtɔ́gɔ wɔ̀ɔn, mbà à tè ku’u légwɔ́ wɔ̀ɔn nyìŋ wɔ́. Nyìŋ lɔɔn tè kaa yé tÿǒ nkǐ, ńdɔg ńzẅíŋe lékwé tá ńcʉ́me nzèm mèŋ wɔ́, mbà ńgwɔ́ á le ku’u légwɔ́ *ngàŋa kwò wɔ̀ɔn mɔ́ Nyìŋ lɔɔn ngie à ge pɔ́ɔn we légwɔ́ wó, mbà à ge pyé, tá nyìŋ gẅie à pǐŋ ńzẅíŋe lépyé mélà’ mɔ́ɔn zɔ gÿó ńgwɔ́ wó.


Nyìŋ lɔɔn ńkúe gẅí, mbà à kúe pɔ́ wɔ̀ɔn, nyìŋ piŋ ńkúe wɔ̀ɔn, mbà à kúe pɔ́ nyìŋ gẅie à la túmo wɔ̀ɔn Nyìŋ lɔɔn ńkúe tà’ *ntsẅì nkʉ̀ Ssé pá’ *ntsẅì nkʉ̀ Ssé, mbà mé ge lá’ ńná wé ńtsɔ’ɔ́ fà’ pá’ we *ntsẅì nkʉ̀ Ssé. Nyìŋ piŋ ńkúe nyìŋ gẅie à kú’te *lepʉ̌ Ssé pá’ nyìŋ gẅie à kú’te *lepʉ̌ Ssé, mbà mé ge lá’ ná ntsɔ’ɔ́ fà’ wé pá’ we nyìŋ gẅie á kú’te *lepʉ̌ Ssé. Mèŋ n ge shwóŋó gẅí, kwà’ nénʉ́, nyìŋ lɔɔn ńná pɔ́ ndà’ galase ntse gẅie é ne sẅéte á mbwó múɔ mémúɔ, ńdɔgɔ pá’ wɛ̌ muɔ aa *ngàŋa kwò wɔ̀ɔn ńnáa, mbà wé ntsɔ’ɔ́ fà’ téen ńdá’a ḿbyé wɔ́.

Ακρόαση Matio 10