Perjanjian Baru terjemahan Bahasa Melayu Maluku Utara

Melayu Maluku Utara

Perjanjian Baru Bahasa Melayu Maluku Utara @ Lembaga Alkitab Indonesia 2020

Satu kali bagini, Yesus nae di parau kong pigi di talaga Galilea pe sabla. Talaga Galilea itu pe nama laeng, talaga Tiberias. Banya skali orang yang iko-iko pa Yesus, karna dong so lia mujizat-mujizat yang Dia biking pa orang-orang saki. Kong Yesus nae di gunung satu, turus Dia dudu deng Dia pe murit-murit di situ. Waktu itu, agama Yahudi pe hari raya Paska so dekat, dorang mo inga waktu Tuhan Allah kase bebas pa dorang pe orang tua dulu-dulu yang dapa jaja dari bangsa Mesir. Waktu Yesus angka muka, Dia lia banya skali orang babadatang pa Dia. Kong Dia bilang pa Filipus, “Di mana torang bole bili makanang, supaya dorang samua ini bole makang?” Yesus bilang bagitu, cuma mo lia, Filipus itu butul percaya pa Dia ka tarada. Barang, sebenarnya Yesus sandiri so tau apa yang Dia akan biking.
Filipus jawab pa Dia, “Biar lagi torang karja deng bulan-bulan, tetap tara cukup mo bili makanang untuk dorang samua, biar lagi dong cuma makang sadiki saja.”
Kong di situ lagi ada Yesus pe murit satu, dia pe nama Andreas. Dia itu Simon Petrus pe sudara. Kong dia bilang pa Yesus bagini, “Di sini ada ana laki-laki satu yang bawa roti lima deng ikang dua ekor. Tapi itu pasti tara mungkin cukup untuk orang banya bagini.”
Kong Yesus bilang, “Suru orang-orang itu dudu.” Di situ banya rumpu yang batumbu, kong orang banya itu dudu di rumpu itu. Dorang itu pe jumla kira-kira ada lima ribu orang laki-laki, tara tahitung parampuang deng ana-ana.
Kong Yesus ambe roti itu, Dia bilang tarimakasi pa Tuhan Allah, turus Dia kase bage-bage pa dorang yang dudu di situ. Bagitu lagi yang Yesus biking deng ikang-ikang. Kong dorang samua makang sampe puas.
Waktu dorang samua so kanyang, Yesus bilang pa Dia pe murit-murit, “Kumpul dulu makanang yang talebe itu, supaya tara ada yang tabuang.” Jadi, dorang kumpul makanang yang talebe itu. Dari roti lima itu saja, orang banya makang tara abis-abis sampe ada dia pe sisa dua blas karanjang.
Waktu orang-orang lia mujizat yang Yesus biking itu, dorang bilang, “Dia ini suda, Nabi yang Tuhan Allah perna janji mo datang di dunia ini.” Yesus tau dorang so mo datang la mo paksa pa Dia untuk jadi dong pe raja. Jadi, Dia pigi basandiri lagi di gunung.


Waktu so mo malam, Yesus pe murit-murit turung di talaga. Dorang di situ sampe malam, tapi Yesus bolong datang-datang pa dorang. Karna itu, dorang nae di parau, turus menyebrang mo pigi di kota Kapernaum. Kong tara lama, angin kancang, sampe talaga baomba basar. Waktu dorang so bapanggayung kira-kira lima atau anam kilo, dong lia Yesus bajalang di atas aer badekat di parau. Tapi waktu dorang lia pa Dia, dong bolong tau Dia itu Yesus, kong dorang jadi tako skali. Tapi Yesus bilang pa dorang, “Jang tako! Ini Kita!” Pe dengar Yesus pe bicara itu, dorang sanang skali, kong kase nae Dia di parau. Tara sangka-sangka, parau itu so sampe di pinggir pante di dorang pe tampa tujuan.

Dia pe beso bagini, orang banya yang masi ada di talaga pe sabla, cari-cari pa Yesus. Dorang cari pa Dia karna dong tau kalamaring cuma ada satu parau di talaga pe pinggir kong Yesus pe murit-murit so nae di situ, tapi Yesus sandiri tara nae di parau itu. Sementara itu, ada orang-orang laeng yang datang deng dorang pe parau-parau dari kota Tiberias. Dorang sampe di dekat tampa yang orang banya ada makang roti kalamaring, waktu Yesus abis bilang tarimakasi pa Tuhan Allah. Jadi waktu orang banya yang cari pa Yesus lia Yesus deng Dia pe murit-murit tarada, dorang nae di parau-parau yang baru datang di situ kong dong pigi di kota Kapernaum untuk cari pa Yesus.

Waktu orang banya sampe di talaga pe sabla di kota Kapernaum kong baku dapa deng Yesus, dorang tanya pa Dia, “Guru, tempo apa Guru sampe di sini?”
Yesus jawab pa dorang, “Dengar bae-bae yang Kita mo bilang ini. Ngoni ini ada cari pa Kita, bukang karna ngoni lia mujizat-mujizat kong mangarti sapa Kita, tapi ngoni cari pa Kita karna Kita so kase makang pa ngoni sampe kanyang. Jang ngoni cuma cari-cari makanang yang biasa torang jaga makang di dunia ini, karna makanang itu capat mo abis deng mo busu. Tapi ngoni musti berusaha karas supaya dapa makanang dari sorga yang tara akan busu, kong bole biking ngoni hidup deng Tuhan Allah slama-lamanya. Makanang itu yang Anak Manusia mo kase pa ngoni, barang Tuhan Allah so kase kuasa itu pa Anak Manusia.”
Kong dorang batanya pa Yesus, “Kalu bagitu, apa yang torang musti biking supaya torang bisa iko Tuhan Allah pe mau?”
Yesus jawab pa orang banya itu, “Dengar e! Yang Tuhan Allah mau ngoni biking itu, percaya pa Kita yang Dia utus.”
Pe dengar itu, dorang bilang pa Dia, “Kalu bagitu, coba Guru kase tunju mujizat satu pa torang supaya torang bole lia kong percaya Guru itu dari Tuhan Allah. Mujizat apa yang Guru mo biking? Barang, torang pe orang tua Israel dulu-dulu makang makanang yang dong bilang manna waktu dorang lama di padang gurun. Itu sama deng yang ada tatulis dulu di Kitab Suci, ‘Dia kase makang pa dorang makanang dari sorga.’ ”
Turus Yesus bilang pa dorang, “Dengar bae-bae yang Kita mo bilang pa ngoni ini. Bukang nabi Musa yang kase makanang dari sorga pa torang pe orang tua dulu-dulu, tapi Kita pe Bapa yang kase. Kong skarang Kita pe Bapa lagi yang kase pa ngoni makanang yang butul dari sorga. Barang, makanang yang butul itu makanang yang Tuhan Allah kase turung dari sorga kong biking manusia bole hidup deng Tuhan Allah slama-lamanya.”
Kong dorang bilang pa Dia, “Guru, kalu bagitu, kase makanang yang dari sorga itu pa torang turus-turus suda!”
Yesus bilang pa dorang, “Kita ini suda makanang yang biking orang bole mo dapa hidup deng Tuhan Allah slama-lamanya. Sapa saja yang datang pa Kita, dia itu tara akan lapar lagi, deng sapa saja yang percaya pa Kita, dia tara akan aus lagi. Tapi sama deng Kita so bilang pa ngoni, biar lagi ngoni so lia pa Kita, ngoni tara percaya pa Kita. Samua orang yang Kita pe Bapa kase percaya pa Kita, dorang itu mo datang pa Kita. Kong sapa saja yang datang pa Kita, Kita tara akan tolak pa dia. Barang, Kita so turung dari sorga bukang untuk biking Kita pe mau, tapi mo biking Kita pe Bapa pe mau. Dia yang utus pa Kita. Dia pe mau itu supaya samua orang yang Dia so kase pa Kita, tara akan mati slama-lamanya, tapi di hari kiamat, Kita mo kase hidup ulang pa dorang. Barang, ini yang Kita pe Bapa mau: Dia mau supaya tiap orang yang lia pa Dia pe Anak kong percaya pa Anak itu, dorang itu mo dapa hidup deng Tuhan Allah slama-lamanya, deng nanti di hari kiamat, Kita mo kase hidup ulang pa dorang.”
Kong orang-orang agama Yahudi bafeto tentang Yesus, barang Dia bilang Dia itu suda makanang yang so turung dari sorga. Dorang bilang, “Ee, Dia itu Yesus to? Yusuf pe ana laki-laki. Torang kanal Dia pe mama deng papa. Jadi bagimana bisa Dia bilang kata, Dia so turung dari sorga?”
Tapi Yesus babale bilang lagi pa dorang, “Jang ngoni bafeto bagitu. Tara ada orang yang bole datang iko pa Kita, kalu Bapa yang utus pa Kita tara pimpin orang itu datang pa Kita. Kong Kita mo kase hidup ulang pa orang itu di hari kiamat. Ada tatulis di nabi-nabi pe kitab bagini, ‘Tuhan Allah mo kase ajar pa dorang samua.’ Kong tiap orang yang so dengar deng tarima ajaran dari Kita pe Bapa, akan datang iko pa Kita. Tapi itu bukang pe arti, ada orang yang so lia pa Bapa. Cuma Kita saja yang Dia so utus datang di dunia ini yang so lia pa Bapa.
Dengar bae-bae yang Kita bilang ini. Sapa saja yang percaya pa Kita, dia itu so dapa hidup deng Tuhan Allah slama-lamanya.
Kita ini suda makanang yang bole biking orang hidup. Biar ngoni pe orang tua dulu-dulu makang makanang yang dong bilang manna di padang gurun, tapi dorang tetap mati. Tapi sebenarnya, pa ngoni pe muka ini ada makanang yang turung dari sorga, kong sapa saja yang makang makanang itu, dia tara akan mati. Kita ini suda makanang yang so turung dari sorga, yang bole kase hidup pa manusia. Sapa saja yang makang makanang ini, dia akan dapa hidup deng Tuhan Allah slama-lamanya. Kong makanang yang Kita mo kase itu, Kita pe badan suda, yang Kita mo kase pa samua orang di dunia ini supaya dorang bole hidup.”
Pe dengar itu, pemimpin-pemimpin agama Yahudi baku malawang kong bilang, “Ii, Dia so bicara apa lagi ini? Bagimana kong Dia bisa kase Dia pe badan untuk torang makang?”
Kong Yesus bilang pa dorang, “Dengar bae-bae yang Kita mo bilang ini. Kalu ngoni tara makang Kita Anak Manusia pe badan deng tara minum Kita pe dara, ngoni tara dapa hidup deng Tuhan Allah slama-lamanya. Sapa saja yang makang Kita pe badan deng minum Kita pe dara, dia mo dapa hidup deng Tuhan Allah slama-lamanya, kong Kita mo kase hidup ulang pa dia di hari kiamat. Barang, Kita pe badan itu makanang yang butul deng Kita pe dara itu minuman yang butul. Sapa saja yang makang Kita pe badan deng minum Kita pe dara, dia hidup satu hati deng Kita kong Kita lagi hidup satu hati deng dia. Kita pe Bapa yang utus pa Kita, Dia itu yang kase hidup pa samua yang hidup, deng Dia lagi yang kase hidup pa Kita. Jadi, sapa saja yang makang Kita pe badan, dia mo dapa hidup deng Tuhan Allah slama-lamanya karna dia percaya pa Kita. Kita ini suda makanang yang so turung dari sorga. Kita ini tara sama deng manna yang torang pe orang tua dulu-dulu makang di padang gurun, barang, biar dorang makang, dorang tetap mati. Tapi sapa saja yang makang makanang yang dari sorga ini, dia akan hidup deng Tuhan Allah slama-lamanya.”
Yesus bilang samua ini di kota Kapernaum waktu Dia mangajar di ruma ibada agama Yahudi.

Waktu orang yang jaga iko pa Yesus dengar apa yang Yesus bilang itu, banya dari dorang baku bilang, “Ajaran itu talalu barát. Tara mungkin orang bisa tarima ajaran itu.”
Tapi Yesus tau orang-orang yang jaga iko pa Dia itu ada bafeto, jadi Dia bilang pa dorang, “Bikiapa? Ngoni tara sanang deng Kita pe ajaran ini? Kalu ngoni tara sanang deng Kita pe ajaran ini, bagimana lagi kalu ngoni lia Anak Manusia taangka di sorga, bale pa Dia pe tampa yang dulu? Manusia tara mungkin mo dapa hidup deng Tuhan Allah slama-lamanya pake dia pe usaha sandiri, cuma Roh Kudus yang bole biking manusia hidup deng Tuhan Allah slama-lamanya. Samua kata-kata yang Kita bilang pa ngoni, pe asal dari Roh Kudus, kong kata-kata itu lagi yang kase hidup deng Tuhan Allah slama-lamanya. Tapi ada dari ngoni yang tara percaya.” (Yesus bilang bagitu, karna Dia tau dari dulu, sapa yang tara mo percaya deng sapa yang mo bahianat pa Dia). Turus Yesus bilang, “Karna ada dari ngoni yang tara percaya, itu Kita pe maksut waktu Kita so bilang pa ngoni, tara ada orang biar cuma satu lagi yang bole mo datang iko pa Kita, kalu Bapa tara biking sampe dia bisa datang.”
Mulai dari waktu itu, banya dari orang-orang yang jaga iko pa Yesus, kase tinggal pa Dia, kong tara mau mo iko lagi pa Dia. Karna itu, Yesus tanya pa Dia pe murit dua blas orang itu, “Ngoni lagi mo kase tinggal pa Kita?”
Tapi Simon Petrus bilang pa Dia, “Guru, torang mo pigi pa sapa lagi? Cuma Guru pe ajaran yang kase tau bagimana torang bole dapa hidup deng Tuhan Allah slama-lamanya. Torang ini so percaya deng tau, Guru suda Yang Kudus yang Tuhan Allah utus.”
Yesus bilang pa dorang, “Kita sandiri yang so pili pa ngoni dua blas ini, tapi ada satu dari ngoni yang nanti mo iko pa Iblis, setang-setang pe raja, pe mau.” Yang Yesus pe maksut itu, Yudas, Simon Iskariot pe ana. Yudas itu satu dari Yesus pe murit yang dua blas orang, tapi dia itu nanti yang mo bahianat pa Yesus.

Ακρόαση Yohanes 6