Ayore - 2018 GP (NT) NonDrama

Ayore - 2018 GP (NT) Drama

Ayoreo 1982 Misión Nuevas Tribus, Cochabamba, Bolivia

Uje Jesús chicáji Jericó ga chajuque ore idai iji gatócoro. Mu tṍraji jnanírique uje ataque. Enga ore angarádejnai iroque uté, uje ore asutépisedie jõra uje utaidé ore iplátadie to ome impuéstos. Enga i tu Zaquéo. Enga jnacari tuté potapísa ujeta chimo Jesús to. Mu que togome uje catadape Zaquéo gu. Ga ayorébui irágu ejode. Jecute Zaquéo edosare re ga jno ga chayóji ore iquei. Ga cheru pojnaque iji ore iquei ujeta chimo Jesús to uje a Jesús ajnai u dajei tuté jne gu. Uje Jesús chise Zaquéo tiógarei mu jĩrique chajire gaté mu chimósi iji. Enga Jesús chojningame Zaquéo:
–Zaquéo á, be jnumi to ga aguito iji jnumi yui. Uje yipotigádi u gu ujeta qué yiyáji baguíjnai to iji de deréjnai.–
Jecute Zaquéo edójnaringuéo ome jnumi uje doi. Ga nínapúsu Jesús ga dejéna aja daquigade aja daguíjnai. Mu uje ayorébui chimo uje Jesús dejéna Zaquéo aja daquigade enga jĩrique ore poja. Enga ore chojninga:
–Jé go uje Jesús pota nóna ayoré sijnanguipísi ujetiga chácariji iguíjnai.–
Mu jĩrique Zaquéo chague ga chojningame Jesús:
–Yocangaráni á, angarami yu to. Yirajapise uje sijnanguipise yu diríca. Mu a yẽramája ayoré jmatágode ore jne ome yajnepítique petique uje a yajuguína yugúchade ome ore jne. Ga ore gajnecho petígo. Mu jé isocai tu ome uñéngo, ujetiga yoria ore atique jeoga yaringaquéo. Mu ujetiga yaringaquérigo chojmára diríca mu a gagájni jne ujetiga yatire ore gáyode.–
Jecute Jesús catecã́ri ayorébui ore iji dejode ga chósi tome ore:
–E yipáñangopísiji uje jnani tuté úringai piquetaque chise iji de deréjnai. Ga a chisápo uté jogasui ore to jne rĩ. Uje ore gãrapi tu jnani bajai Abraham gu. Uje Dupade utocaidi tu yu ujetiga yucuebi udore ore uje ore cho bijnángone ome yu ome ore ipesudode dasijnaringuéo. Jecute yáyipie qui tu ujetiga yiqueta ore jnese.–

Ayorébui uje ore tangári Jesús acajnaquéode ore jos eti deréjnai e di ujetiga jĩraque Dupade chácariji dáringai eduguéjna cuchape ome darasade ore iji erámi tudé. Ore chiraja gu uje idógosi ujetiga Jesús chise Jerusalén. Mu que u ore áyipiedie quigode go. Jecute Jesús chacãra dacajnaquéode aja jnani uje chicáji punire idájai. Ga chósi tome ore:
–Jnanírique déji nanique uje ataque jogasui ore jnese. Diga eduguéjna cuchábi tibidi uté uje déji idáidatéi uñeque. Enga chojninga: "Acáji de ga yipésu ua ujetiga ese báringai eduguéjna to jne. Quigade enga a ajniápo aja bedai jne rĩ." Mu uje idógosi icoringai ga tibidi darótigo uje ore chejna yijmanáyone. Ga chisi ome daplátarigui ome ore ujetiga ore pésabu dẽrapáitigo cucha ome ga iplátadie quérãpe. Ga cho ore quique ga chojningame ore: "Ajnáño yiplátadie udaji. Mu yipotigádi u ujetiga yiplátadie quérã iji uacari, jé aja yiríringárique ujeta yisápo uaque rĩ." Mu urasade uñéngo chetaguipise uté ome úringai eduguéjna iji daniri. Jecute jno mu ore chamáta ñane ome dáguedatéraque ga ore chajna ujetiga ore chijócãre iji daniri ga ore chojninga: "Que yipótago uté ujetiga yoco yoqueduguéjna iji, iji yocuniri udé." Mu que ore áyipieraque tocade go ujetiga ore chijócãre. Jecute ore eduguéjna cuchábi doi ga pésu uté úringai eduguéjna. Mu udojo quigade ga chajnésaru daniri. Uje di ga tibidi daro casodica ore uje ore chejna yijmanáyone ica uje e chisi ome daplátadie ome ore ica. Uje ajegaidi tu gu ujetiga chiraja ore amátajarigui iji derané casidica daplátai iji ore gari, ujetiga quérã iji uñeque gari. Jecute bajai chingongara raja ga chósi tome: "Yocangarádejnai á, bapláta casidica quérãpísiji yari uje chojmára ica mu e chejna yijmanáyone iji quigade." Jecute eduguéjnai tuté chicotapise daroi uté ga chojningame: "Ueradipise bajmapié ome yu. Ga yiroque yimeserãi tu ua. Uje garósi yeranenie ome ua ica mu suépise ucácasidicá gai. Jecute a yijosi ua iji gaté jne ga gajnui tu ujetiga pidáidatérigo uje chejna yijmanáyone a ore cho dasuté iji ua jne." Enga jé u uje jõrai chingongara raja to ga chojningame: "Yangaráni á, bapláta casidica quérãpise to iji yari. Ga chejna yijmanai guejnanie iji iquei." Jecute eduguéjnai chajnai uté uruode to ga chósi tome: "Ueradipíso badode to. Jecute a ore idáningo ujeta chejna yijmanai, a ore chope dasuté iji ua to jne." Enga jé u uje ejogatei chingongara raja to ga chósi tome: Yocangaráni á, bapláta casidica de daji uje yañurupúsu guio ga yipocásu gai iji borapei. Yitodópisa bei gu uje jnani josipíerãquedaté ua. Uje bajegaidi tu ujetiga cuchade chise ua iji te bisideque, ujetiga ca bajuya ua ome bajac. Ga jé gajnui tu ujetiga ãra pacaque quedéjnaringo ujetiga bajnei orérigui." Jecute eduguéjnai tuté chojningame daroi: "Yiroque yeteguipísi tu ua ome baruode udore. A jé yi baru quigode udore, ga a yaguhéta baruode babai jne. Uje chiese jnani josipíerãquedaté yu ome ua, ga yajegaidi tu ujeta yajnei plátadie bisidec. Jeoga cucha pacatígo jeta yajné orérigui bisidec. Mu a araja cuchade udore quigode múñi, ¿gotique gu a uje a ca acha yipláta casidica aja plátadie iguíjnarique ica uje i tu bánco? Uje bamo múñi uje plátadie quérã iji uté. Ga atirerase yibai ujetiga quérã ga báringai yirasique jogadi urásu ujeta yise yiguíjnai ome." Jecute catecã́ri darógode uñane iji dejode ga chósi tome ore: "Ajnañoma yiplátadie iji uté gari ga asíñome uté uje irodedie quérãji gari ga chise chejna yijmanáyone que." Mu irógode ore chojningame: "Yocangaráni á, cachi baplátadie chejna yijmanáyone iji uté gari que. E jiépisiji gari." Mu ore eduguéjnai chajnai ore ga chósi tome ore: "Ujetiga e dérasi gosi mu ueradipise ujetiga ajóyo aja uje imoi u gu uje susípise cuchade guio, ga quérã iji gari. Jé basa ga uté gosi uje que suse cuchárique guio, qui tu ujeta ajnóso uté gosi ome gajnetígo cucha garósio ga asi ome uté gosi uje suse dagúchade guio." Jecute ore eduguéjnai áyipiedie chisõre ga áyipiedie déji damajosórone uje ore chetágome úringai eduguéjna. Ga chojningame darógode: "Beyoi udore ore ga ajnañoma ore aja de. Ga ajéyope ore iji yedominone jne."–


Uje Jesús chejna daruode udojo guesi ga jé u uje jnopome Jerusalén rĩ. Mu udojo quigade ga chirõre ore idáyode uje ore íode u Betfagé, Betánia ore uje ore idógosiji cucarãtique uje i u Olívos. Ga chiroque dacadique gárerigo aja dajei. Ga chósi tome ore:
–Boyo ga acayobíji ore idáyabi uje idógosiji yoque. Mu a eso ore gachitique búrro ujetiga ore chigaru uje cáma piyaripi uté to. Ga ejñúño gajneri ga ajnáño aja yu iji de. Ujetiga uñeque catecã́ri uaque enga chojninga: "¿Gotique gu a uje uaquejñúño búrro uaté?" Mu a ojnichome jne: "Yocangarádejnai potapísa gu."–
Jecute Jesús acadigode udore ore jno ga ore chicáji ojningai pidai. Enga Jesús uruode ucode ome ore tocade jnese iji guidai uté. Jecute gachisórone ore chimo udore ore uje ore chejñu ga ore chojningame ore:
–¿Gotique gu a uje uaquejñúño búrro uaté a?–
Mu ore chajnai gachisórone ga ore chojningame ore:
–Yocangaráni potapísa gu.–
Jecute ore chijnája Jesús. Ga ore pésu daguidedie ga ore chujé aja gai. Ga jé u uje ore chicha Jesús aja gai ujetiga cháji búrro uaté gai. Enga ajnasórone jorane ore chejñu daguidedie ujáningo ga ore chitẽra jnumi iji Jesús iquéode, ujetiga búrro ore diguiji gai iji dajei. Mu uje ore doi jnumi iji cucarani uté uje i tu Olívos, ga Jesús jõráringo ore changureta jnese to uje ore nóna ga ore nínapúsu raque. Ga ore chinguíra dabijnanone aja dejode. Uje ore chicota Dupade ome ujopié uje tocade ome Jesús ipesútedatéode uje ore chimópise to.
Jecute ore chósi tome:
–¡Picotaguipise opejã yoqueduguéjna cuchábi Jesús uje Dupade utocaite uté ome yoque! ¡Jé tiógarapísa ujetiga pitijabate Dupade iji gaté ome úringai pujnuéngaisṍre!–
Jecute fariséode uñéngo iji ore ujade ore chojningame Jesús:
–Pacadisṍri á, aquĩ́rape bajorane udore to ome ore icotaquédatéode udore ome ua.–
Mu Jesús chajnai ore uruode ga chósi tome ore:
–Ujetiga yaquĩrarase ore mu a jé basa ga cucaranenie chajnerarásome ore icotaquéode ome yu.–
Mu uje ore chirõre ore idai uje i tu Jerusalén, ga Jesús chimo ore idai uté, ga poji idaisórone ore ejode. Ga chósi tome ore:
–A arajayórase yu ga a amesechórase yu. Enga pajesereringai chacárasaja jerusaléngosode uaque to iji de deréjnai. Mu uaquetácho yu que, ga a ca togome uac ujetiga Dupade chingongara pajesereringai tome uaque to. Mu jé u uje uaquetácho yu que, ga a cucha dacate gajnaréngone chajopise raja uaque jne iji uaquedai Jerusalén. Uje a uacamajosórone ore gajnúone u pujuyaquérigo jne ujeta ore chaparu uacabai iji uaquedáidatéi tuté. Ga uacagachodi tu jne ujetiga ore chachẽre uáguiji uaquedai ujetiga ore cho dajocaningame uac. Ga a uacagachodi u jne ujeta ore chejna uágaja jnutique. Ujeta ore chejna uacarasade ore jnese ga a ore chajnangarase uacaguíjnane aja tijode to jne, uacajuyaquéode jnupe rĩ. Ga a ca pimópo cucaranéringui jogatique jne rĩ ujetiga chuguéja ñane gánique. A Dupade ujuyaquéode upúsu cucha gajnaréngone udore uje chajo raja uaque jne gu. Uje que ajuécho Dupade ome uaquedai ujetiga chacája to.


Jecute Jesús chacája Dupade iguíjna cuchábi iji Jerusalén mu chijócãre ayoréode ore iji uje ore tẽra cuchade iji ajei, jé aja udore ore uje ore doi oredie ome cuchade. Ga Jesús chósi tome ore:
–Ore urusarane Dupade urúo déji uje quigode chósi te: "Ujetiga gosi chacája yiguíjnai ga yiguíjnai gajnei tu ujetiga acatecãchoi yu iji." Mu oriechoquíode uaque, uacoyo uacacoyapídi iji Dupade iguíjna cuchábi udé, uje uacaráño uacojode ayoréo iji udé ome cuchade oredie udire.–
Iji udojo quigade ga Jesús que cho daja ome dacajnaquéode iji deréjnane údode iji Dupade iguíjna cuchábi ajei. Mu judíode ore asutedie, ore angarádejnane ore, jé aja Moisés urusarane atatasórone ore eduguéjnane, ore chucuepísi Jesús bárique ujetiga ore chise bárique ga ore chujé.
Mu que togome ore ujetiga ore chise Jesús bárique uje ayoréode ore jnese ore tangaripísi acajnaquéode iji deréjnane údode jnese enga ore tijapísa.

Ακρόαση Lúcas 19