These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᐊᑎ ᐅᑕᑯᓯᔨᒡ ᑲ ᓂᓯᒡ ᐊᓐᒋᓐᒡ ᒋ ᐅᑎᑕᒧᒡ ᓱᑕᒻ ᐅᑕᓇᔪᐤ, ᓗᑦ ᒋ ᐊᐳᐤ ᐊᓐᑕ ᐛᒋ ᐱᒐᓄᐎᒡ ᐅᑕᓇᔪᐤ᙮ ᐃᔅᐱ ᐎᔭᐱᒪᑦ ᐊ ᓂᓯᔨᒋ ᐊᓐᒋᓇ, ᒋ ᐱᓯᑯᓯᐸᑕᐤ, ᒋ ᓇᑕᐤ ᒐᒋ ᓂᒋᔅᑯᐛᑦ ᑭᔭ ᒂ ᓂᐱᔅᑯᐱᔅᑐᐛᑦ ᐊ ᒋᔅᑕᔨᒪᑦ᙮ ᒂ ᐃᑕᑦ, “ᓂᑎᐸᔨᒋᒐᓯᒥᒡ, ᐸᑐᑕᒃ ᓂᒋᒡ ᐊᑯ ᒐᒋ ᐃᑐᑕᑎᑯᒡ᙮ ᒐ ᒋᔅᑕᐸᐅᒋᓯᑕᔭᒄ ᑭᔭ ᒐ ᑕᔭᒄ ᒐ ᑎᐱᔅᑲᒡ᙮ ᐊᑯ ᒐ ᒪᒋᔭᒄ ᐎᐱᒡ ᒐᒋᓴᐸᔭᒐ᙮”
ᒥᒄ ᒂ ᐃᑎᑯᑦ, “ᓇᒪ, ᐎᐎᑎᒥᒡ ᐊᑐᐛᒡ ᓂᑭ ᓂᐸᓇᓐ ᐊᓐᑕ ᒪᒧᐤ ᓇᒋᔅᑲᑐᒡ ᐃᔪᒡ᙮”
ᒥᒄ ᒋ ᐱᑯᓴᔨᒪᐤ, ᐊᑯ ᑲ ᐎᒐᐅᑯᑦ ᑭᔭ ᒂ ᐃᑐᑕᒡ ᐎᒋᒡ᙮ ᒋ ᐱᒥᓄᑕᐤ ᓗᑦ ᑭᔭ ᒋ ᐸᒂᓯᑭᓂᒐᐤ ᐊ ᐊᑲ ᐊᐱᒋᐊᑦ ᓯᐅᔅᑎᒪᑭᓇ᙮ ᐃᔅᐱ ᑲ ᔭᔅᑯᔅᑕᔨᒡ ᒥᒋᒥᔪᐤ, ᒂ ᐅᑕᑯᓯᐅᒥᒋᓱᒡ᙮
ᐊᒺᔭ ᐅᐛᐃᓯᓂᒡ ᒪᓐᑕᐅᒡ᙮ ᒥᓯᐛ ᓱᑕᒻ ᓇᐸᐅᒡ ᑕᐱᔅᑯᓐ ᐊ ᒋᓴᐃᔪᐅᒡ ᑭᔭ ᐊᐛᓯᐅᒡ ᒋ ᒪᒧᐎᐅᒡ ᐊᓐᑕ ᓗᑕ ᐎᒋᔨᒡ᙮ ᓗᑕ ᒋ ᑕᑈᑕᐅᒡ ᐊ ᐃᑕᒡ᙮ “ᓂ ᒋᔅᒐᔨᒪᓇᓐᒡ ᓂᓱ ᒪᓐᑕᐅᒡ ᐊ ᑕᒡ ᐊᓐᑕ ᒋᒋᒡ᙮ ᐸᒋ ᐎᐎᑎᓯᓂᒧᐅᓇᓐ, ᓂ ᐎ ᐎᐸᒪᓇᓐᒡ ᐊᓐᒡ ᐊ ᓂᓯᒡ, ᓂ ᐎ ᐃᑐᑐᐛᓇᓐᒡ ᒧᔭᒻ ᓇᐸᐤ ᐊ ᐃᑐᑐᐛᑦ ᐃᔎᐛ᙮”
ᓗᑦ ᒋ ᐎᐎᔪᐤ ᑭᔭ ᒂ ᒋᐸᐛᑦ ᔅᑐᐧᑭᓇ᙮ ᒂ ᐃᑕᑦ, “ᓇᒪ, ᓂᐎᒐᐛᑭᓂᑐᒄ, ᐊᑲ ᐃᑐᑎᒥᒄ ᐅ ᒥᒋᒐᒂᓐ᙮ ᓂᑐᑐᐅᒄ, ᓂᓱᔎᐅᒡ ᓂᑕᓂᓯᒡ ᐊ ᐊᑲ ᓂᑕ ᐎᐸᒪᒡ ᓇᐸᐛ, ᒋᑭ ᐸᒋ ᐎᐎᑐᐛᑎᓇᐛᐤ ᑭᔭ ᒋᑭ ᒋ ᐃᑐᑐᐛᐛᐅᒡ ᒥᒄ ᐛᑐᑐᐛᑯᒡ᙮ ᒥᒄ ᐅᒡ ᐊ ᓂᓯᒡ ᒪᓐᑕᐅᒡ, ᒐ ᐊᑲ ᒐᒂᔪᐤ ᐃᑐᑐᐛᑯᒡ᙮ ᐛᔅ ᐅᒡ ᑲ ᓂᓯᒡ ᒪᓐᑕᐅᒡ ᒋ ᑎᑯᓯᓄᐅᒡ ᓂᒋᒡ ᒐᒋ ᓂᐸᒡ ᑭᔭ ᓂᔾ ᓂᑭ ᐎ ᒥᔪ ᑭᓄᐛᔨᒪᐅᒡ᙮”
ᒥᒄ ᒂ ᐃᔅᒋᔄᒡ, “ᐃᔨᒐᑲᐳᐎ !” ᑭᔭ ᒂ ᐃᑎᑐᒡ, “ᔅᒋ ᒥᔭᓄᐤ ᓗᑦ ᒐᒋ ᐎᒋᒥᑕᐧᒄ ᒐᒂᔪᐤ ᒐ ᐃᑐᑎᒺᐧᒄ !” ᐊᑯ ᒂ ᐃᑕᒡ ᓗᑕ, “ᒋᔾ ᒋᑭ ᐊᒂᑐᑕᑎᓇᓐ ᐃᔅᐱᔅ ᐎᔨᐛᐤ᙮” ᐊᑯ ᒂ ᓴᐛᐱᔅᑯᐛᒡ ᓗᑕ ᑭᔭ ᓂᑲᓐ ᒂ ᐃᔅᐱᔪᐅᒡ ᒐᒋ ᐱᑯᔅᑯᐛᒡ ᔅᑐᐧᑭᓇ᙮
ᒥᒄ ᑲ ᓂᓯᒡ ᐊᓐᒋᓐᒡ ᐱᑎᑭᒥᒡ ᑲ ᑕᒡ ᒋ ᐱᑕᐱᑕᐅᒡ ᓗᑕ ᑭᔭ ᒂ ᒋᐸᐛᒡ ᔅᑐᐧᑭᓇ᙮ ᐊᑯ ᒂ ᐃᑐᑐᐛᒡ ᒥᓯᐛ ᓱᑕᒻ ᓇᐸᐛ ᒐ ᐊᑲ ᐛᐸᑎᒥᔨᒋ ᒪᒃ ᒐ ᐊᑲ ᒋ ᒥᔅᑯᐛᔨᒋ ᔅᑐᐧᑭᓇ᙮

ᐊ ᓂᓯᒡ ᐊᓐᒋᓐᒡ ᒋ ᑯᒂᒋᒪᐅᒡ ᓗᑕ, “ᒪᑕᐅᒡ ᐅᑕ ᑯᑎᑭᒡ ᒋᐧᑲᓂᓯᒡ, ᒋᓇᐊᒋᒥᒡ, ᒋᑯᓯᒡ, ᒋᑕᓂᓯᒡ ᑭᔭ ᒪᒃ ᑯᑎᑭᒡ ᑕᐱᔨᐛᐅᓯᔨᓐ ᐅᑕ ᐅᑕᓇᒡ ? ᒐ ᐃᑲᑕᐃᑥᐤ ᐅᑕ, ᐛᔅ ᓂᑭ ᓂᓱᐅᓇᒋᑕᓇᓐ ᐅ ᐅᑕᓇᐤ᙮ ᐛᔅ ᑎᐸᔨᒋᒐᓱᐤ ᒋᔅᒐᔨᒪᐤ ᓱᑕᒻ ᐃᔪᐛ ᑲ ᐃᓯ ᐃᑐᑎᒥᔨᒋ ᒐᒂᔪᐤ ᐊ ᒪᔭᑎᓂᔨᒡ᙮ ᐊᓄᒡ ᑎᐸᔨᒋᒐᓱᐤ ᓂᒋ ᐃᑎᓴᐅᑯᓇᓐ ᒐᒋ ᓂᓱᐅᓇᒋᑕᐅᒋᒡ ᐅᑕᓇᔪᐤ᙮”
ᓗᑦ ᒂ ᓂᑐᐛᐱᒪᑦ ᐊᓂᔭ ᓇᐸᐛ ᑲ ᐎᐎᒋᒪᔨᒋ ᐅᑕᓂᓴ, ᒂ ᐃᑕᑦ, “ᐃᔭᓯᒋᒄ, ᓂᑭᑎᒥᒄ ᐅ ᐅᑕᓇᐤ, ᐛᔅ ᑎᐸᔨᒋᒐᓱᐤ ᒋᑭ ᓂᓱᐅᓇᒋᑕᐤ ᐅᔭ ᐅᑕᓇᔪᐤ᙮” ᒥᒄ ᐅᐎᑥᐤ ᒋ ᐃᑕᔨᒥᑯᐤ ᐅᓇᒋᒪ ᑭᔭ ᓇᒪ ᐅᒋ ᑕᑈᑕᑯᐤ᙮
ᐃᔅᐱ ᐛᑎᒋᐱᔨᒡ ᒋᔭᒋᓴᐸᔭᔨᒡ, ᐊᓐᒋᓐᒡ ᒋ ᐅᔅᑯᐎᔅᑐᐛᐅᒡ ᓗᑕ ᒐᒋ ᔅᑐᑕᔨᒋ ᐊ ᐃᑕᒡ, “ᐃᔭᓯᒋ, ᐅᑎᓂᒡ ᒋᐅ ᑭᔭ ᐊ ᓂᓯᒡ ᒋᑕᓂᓯᒡ ᑭᔭ ᒐ ᒪᒋᔭᒄ ᐊᑯ ᒐ ᐊᑲ ᐳᓂᐱᑎᓯᔭᒄ ᐃᔅᐱ ᓂᓱᐅᓇᒋᑕᒐ ᑎᐸᔨᒋᒐᓱᐤ ᐅᔭᔪᐤ ᐅᑕᓇᔪᐤ᙮”
ᐃᔅᐱ ᑲ ᑯᐃᑐᐛᔨᑕᐧᒃ ᓗᑦ, ᒂ ᐅᑎᓂᒥᔨᒋ ᐅᑎᒋᐛᐛ ᐊᓐᒋᓇ ᐎᔾ ᑭᔭ ᐎᐛ ᑭᔭ ᐊ ᓂᓯᔨᒋ ᐅᑕᓂᓴ, ᒐᔅᒋᓄᑕᐃᑯᒡ ᐅᑕᓇᒡ ᐛᔪᐎᑕᐃᑯᒡ᙮ ᐛᔅ ᑎᐸᔨᒋᒐᓱᐛ ᐎᔭᐸᑎᔨᑯᒡ ᒋᓴᐛᑎᓯᐅᓂᔪᐤ᙮ ᐃᔅᐱ ᑲᒋ ᓂᑭᑕᒡ ᐅᑕᓇᔪᐤ, ᐸᐃᒄ ᐊᓐᒋᓐ ᒂ ᐃᑕᑦ, “ᒋᔅᑎᑉ ᒋᑎᓯᒧᒄ ᐅᑕ, ᒐ ᐊᑲ ᐊᐱᓴᐱᔭᒄ ᑭᔭ ᒐ ᐊᑲ ᓂᑲᐎᔭᒄ ᓂᑎᒥᒄ ᐅᑕ ᐊ ᐱᓴᒡ᙮ ᐱᔅᑯᑎᓇᒡ ᒐ ᐃᔅᐸᔨᑐᔭᒄ ᐛᐱᒪᑎᓯᐛᒂ᙮”
ᒥᒄ ᓗᑦ ᒂ ᐃᑕᑦ, “ᒪᐛᒡ, ᓇᒪᔭᐤ ᐅᑕ ᐱᔅᑯᑎᓇᒡ, ᓂᑎᐸᔨᒋᒐᓯᒻ᙮ ᒋ ᒥᔪ ᐃᑕᔨᒥᓇᐛᐤ ᑭᔭ ᒋ ᐛᐸᑎᔨᓇᐛᐤ ᐊ ᒥᓴᒡ ᒋᓴᐛᑎᓯᐅᓐ ᐊ ᐱᒪᒋᐃᔭᒄ᙮ ᒥᒄ ᓇᒪ ᓂᒋ ᒋᐃᑎᓯᒧᓐ ᐱᔅᑯᑎᓇᒡ, ᓂᑭ ᐅᓇᒋᐅᓐ ᐊᒺᔭ ᓇᑕ ᑎᑯᓯᐸᑕᔭᓐ᙮ ᒋ ᐛᐸᑕᓐ ᐊ ᐊᓐ ᑲᐱᓴᓱᐛ ᐅᑕᓇᐤ ? ᐸᓱᓇᑯᓐ᙮ ᐸᒋ ᒥᔨᓇᓐ ᓇᑕ ᒐᒋ ᐃᔅᐸᔨᑐᔭᒡ, ᒋ ᐛᐸᑕᓐ ᐊᐱᓴᓯᒡ ᐊᓐ ᐃᑕᐅᓐ ᐊᑯ ᒪᒃ ᑭᔭ ᒐ ᐱᒪᑎᓯᐅᔭᒡ᙮”
ᐊᑯ ᐊᓐᒋᓇ ᐊᑎᑯᑦ, “ᐊᑯᓐ ᒧᔭᒻ, ᒋᑭ ᒥᔨᑎᓐ ᐊ ᐃᓯ ᓂᑐᐛᔨᑎᒥᓐ, ᓇᒪ ᓂᑭ ᒋ ᓂᓱᐅᓇᒋᑕᓐ ᐊᓐ ᐅᑕᓇᐤ ᐃᔭᔨᒧᑎᒥᓐ᙮ ᐃᔭᓯᒋᒄ ᑭᔭ ᐃᔅᐸᔨᑐᒄ ᓇᑕ, ᐛᔅ ᓇᒪ ᓂᑭ ᒋ ᑐᑕᓐ ᒐᒂᓐ ᐸᑐᔅ ᑎᑯᓯᓂᔭᒂ ᓇᑕ᙮” (ᐅᓴᒻ “ᐊᐱᓴᓱᐤ” ᑲ ᐃᓯ ᐎᑕᐧᒃ ᓗᑦ ᐊᓂᔭ ᐅᑕᓇᔪᐤ, ᓱᐊᕐ ᐊᓄᒡ ᐃᓯᓂᐧᑲᑕᐤ ᐊ ᐃᑉᕈᐅ-ᐃᔨᒥᓇᓄᐅᒡ ᐊᓐ ᐅᑕᓇᐤ᙮)

ᑲᒋ ᓴᑲᔅᑐᐛᔨᒋ ᐱᓯᒺ, ᓗᑦ ᑭᔭ ᐊ ᐸᐃᑯᔅᑲᓇᓯᑦ ᒋ ᐅᑎᑕᒧᒡ ᓱᐊᕐ ᐅᑕᓇᔪᐤ᙮ ᐊᑯ ᑎᐸᔨᒋᒐᓱᐤ ᒋ ᐃᑐᑎᒻ ᐃᔅᑯᑕᔪᐤ ᒐᒋ ᐸᒋᑎᓂᔨᒡ ᐊᓐᑕ ᓱᑕᒻ ᑭᔭ ᑯᒧᕋ, ᒋᒋᒋᓯᑯᒡ ᐅᒡ ᒋ ᐅᒋ ᐳᐅᓂᒻ᙮ ᒋ ᓂᓱᐅᓇᒋᑕᐤ ᐊᓂᔭ ᐅᑕᓇᐛ ᑭᔭ ᒥᓯᐛ ᐃᔪᐛ ᑭᔭ ᒋ ᓂᓱᐅᓇᒋᑕᐤ ᒥᓯᐛ ᒐᒂᓂᔪᐤ ᑲ ᓂᑕᐅᒋᓂᔨᒡ ᐊᓐᑕ ᓄᑎᒻ ᐊ ᐱᓴᔨᒡ᙮ ᒥᒄ ᓗᑦ ᐎᐛ ᐅᑕᒡ ᑲ ᐅᒋ ᓇᓴᐅᑯᑦ, ᒋ ᐊᐱᓴᐸᑎᒻ ᐅᑕᓇᔪᐤ ᑭᔭ ᓯᐅᑕᑭᓐ ᐃᔨᒐᐛᓇ ᒂ ᐃᓯᓇᑯᐃᑯᑦ ᑎᐸᔨᒋᒐᓱᐛ᙮

ᐎᐱᒡ ᒋᔭᒋᓴᐸᔭᔨᒡ, ᐊᑉᕋᐊᒻ ᒋ ᐃᑐᑕᐤ ᐊᓐᑕ ᑲ ᐃᔨᒪᐊᑦ ᑭᔭ ᑲ ᐎᒋ ᑲᐳᔅᑐᐛᑦ ᑎᐸᔨᒋᒐᓱᐛ᙮ ᐃᔅᐱ ᑲᒋ ᑕᐸᑕᐧᒃ ᓱᑕᒻ ᑭᔭ ᑯᒧᕋ ᐅᑕᓇᐛ ᑭᔭ ᐊᓐᑕ ᒥᓯᐛ ᑲ ᐱᓴᔨᒡ ᐊᔅᒋᔪᐤ᙮ ᒋ ᐛᐸᑎᒻ ᐊ ᒧᔅᑲᐸᑕᔨᒡ᙮ ᒧᔭᒻ ᐊ ᑕᐸᑕᒋ ᒪᔅᑎ ᐃᔎᑕᒋ᙮
ᐃᔅᐱ ᒋᓴᒪᓂᑐᐤ ᑲ ᓂᓱᐅᓇᒋᑕᑦ ᐅᑕᓇᐛ ᐊᓐᑕ ᐊ ᐱᓴᔨᒡ, ᒋ ᒋᔅᒋᑎᒺᐤ ᑲ ᑯᒂᒋᒥᑯᑦ ᐊᑉᕋᐊᒪ᙮ ᒋ ᐱᒪᒋᐊᐤ ᓗᑕ ᒐ ᐊᑲ ᒋ ᓂᓱᐅᓇᒋᐅᔨᒋ ᐃᔅᐱ ᑲ ᓂᓱᐅᓇᒋᑕᑦ ᐅᑕᓇᐛ ᐊᓐᑕ ᑲ ᐎᒋᔨᒋ᙮

ᓇᓇᒐ, ᓗᑦ ᑭᔭ ᐊ ᓂᓯᔨᒋ ᐅᑕᓂᓴ ᒋ ᓂᑭᑎᒧᒡ ᓱᐊᕐ ᑭᔭ ᒂ ᐃᑐᑕᒡ ᐱᔅᑯᑎᓇᒡ᙮ ᐛᔅ ᒋ ᑯᔅᑕᒍᐤ ᒐᒋ ᐎᒋᑦ ᐊᓐᑕ ᓱᐊᕐ᙮ ᐎᔾ ᑭᔭ ᐊ ᓂᓯᔨᒋ ᐅᑕᓂᓴ ᐊ ᐱᑯᓇᓴᑲᔨᒡ ᒋ ᐎᒍᐅᒡ᙮ ᐸᐃᒂᐤ ᒐᓯᑲᔨᒡ, ᒐᓴᐃᔎᐅᑦ ᐅᑕᓂᓯᒪᐤ ᒋ ᐃᑕᐤ ᐅᓯᒪ, “ᒍᑕᐎᓄᐤ ᓴᔅ ᒋᓴᐃᔪᐤ ᑭᔭ ᓇᒪ ᑕᐤ ᐅᑕ ᓇᐸᐤ ᒐ ᐎᒋᒥᑕᐧᒄ ᒧᔭᒻ ᐊᑎᓇᓄᐅᒡ ᒥᓯᐛ ᐊᔅᒋᒡ᙮ ᐃᑐᑐᐛᑕᐤ ᒍᑕᐎᓄᐤ ᒐᒋ ᒥᓂᑦ ᑲ ᒥᒂᑭᒥᔨᒡ ᐃᔅᐱᔅ ᒋᔎᐸᒐ, ᐊᑯ ᒐ ᐎᐸᒪᐧᒄ ᒐᒋ ᐅᑦ ᐊᐛᓯᒥᔭᐧᒄ ᒍᑕᐎᓄᐤ ᐅᒡ᙮”
ᐊᓂᔭ ᑕᐱᔅᑲᔨᒡ ᒋ ᒋᔎᐸᐅᒡ ᐅᑕᐎᐛᐛ ᑭᔭ ᒐᓴᐃᔎᐅᑦ ᐅᑕᓂᓯᒪᐤ ᒋ ᐎᐸᒪᐤ᙮ ᒋᒋᐛ ᒋ ᒋᔎᐸᐤ ᓗᑦ ᑭᔭ ᓇᒪ ᐅᒋ ᒋᔅᒐᔨᒪᐤ ᒐᒂᓂᔪᐤ ᑲ ᐃᑐᑎᒥᔨᒋ᙮
ᒥᓐ ᐎᔭᐱᓂᔨᒡ ᒂ ᐃᑕᑦ ᐅᓯᒪ, “ᑕᐱᔅᑲᔨᒡ ᓂᒋ ᐎᐸᒪᐤ ᒍᑕᐎᓄᐤ᙮ ᒐ ᐃᑐᑐᐛᐧᒄ ᒥᓐ ᒐ ᑎᐱᔅᑲᔨᒡ ᒐᒋ ᒋᔎᐸᑦ ᒥᒄ ᐊᓄᒡ ᒋᔾ ᒐ ᐎᐸᒥᑦ ᐊᑯ ᒪᒃ ᒐᒋ ᐅᑦ ᐊᐛᓯᒥᔭᐧᒄ ᒍᑕᐎᓄᐤ ᐅᒡ᙮” ᐊᓂᔭ ᑕᐱᔅᑲᔨᒡ ᒋ ᐃᑐᑐᐛᐅᒡ ᒥᓐ ᒐᒋ ᒥᓂᔨᒋ ᑲ ᒥᒂᑭᒥᔨᒡ ᑭᔭ ᐊᐛᓯᐅᑦ ᐅᑕᓂᓯᒪᐤ ᒋ ᐎᐸᒪᐤ ᐅᑕᐎᐛᐛ᙮ ᒥᓐ ᑲ ᒋᔎᐸᑦ ᑭᔭ ᐛᐛᒡ ᓇᒪ ᐅᒋ ᒋᔅᒐᔨᒪᐤ ᒐᒂᓂᔪᐤ ᑲ ᐃᑐᑎᒥᔨᒋ ᐊᐛᓯᐎᔨᒋ ᐅᑕᓂᓴ᙮
ᐊᑯ ᐊ ᓂᓯᔨᒋ ᓗᑦ ᐅᑕᓂᓴ ᒋ ᐊᓱᐛᐱᒪᐅᓱᔪᐛ᙮ ᐊ ᒋᓴᐃᔎᐅᑦ ᐅᑕᓂᓯᒪᐤ ᒋ ᐅᑯᓱᐤ ᑭᔭ ᒧᐊᑉ ᒋ ᐃᓯᓂᐧᑲᑕᐤ᙮ ᐎᔾ ᐅᑕᐎᒪᐤ ᐊᓄᒡ ᒧᐊᑉ ᐊᓯᓂᐧᑲᑕᑭᓄᔨᒋ ᐃᔪᐛ᙮ ᒋ ᐅᑯᓱᐤ ᐃᔭᐱᒡ ᐊᐛᓯᐅᑦ ᐅᑕᓂᓯᒪᐤ ᑭᔭ ᐱᓐ-ᐊᒥ ᒋ ᐃᓯᓂᐧᑲᑕᐤ᙮ ᐎᔾ ᐅᑕᐎᒪᐤ ᐊᓄᒡ ᐊᒧᓐ ᐊᓯᓂᐧᑲᑕᑭᓄᔨᒋ ᐃᔪᐛ᙮

Ακρόαση ᒐᓂᓯᔅ 19