 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

يَا تٜيٛڢِلُسْ تٜدُّطٛ‏: يِمْࢡٜ طُوطْࢡٜ کَࢡْدِ وِنْدُغٛ کُبَرُوٛلْ کُوجٜ لَاتِيطٜ شَکَ مٜىٰطٜنْ؞ ࢡٜمبِنْدِ کٛ مِنْ نَنِ حَا يِعْࢡٜ کُوجٜ طٜعٜ بٜى غِتٜ مُوطُمْعٜنْ دِغَ ڢُطَّمْ، حَلْڢِتِنَاࢡٜ کُوغَلْ عَنْدِنْغٛ کُبَرُوٛلْ مَنْ؞ نغَمْ مَاجُمْ ندٜ مِحُمْݠِتِ لَاࢡْکَ کُوجٜ طٜعٜ ڢُو دِغَ ڢُطّٛودٜ مَاجٜ، طُمْ حَانْدَنِ يَمْ حَا مِوِنْدَنٜ طُمْ بٜى تٛکِّنْدِرْکِ، يَا تٜيٛڢِلُسْ تٜدُّطٛ؞ مِوَطِ طُمْ نغَمْ حَا عَڢَامَ حٛولْطِنَارٜ عٜکِّتِنٛلْجِ طِ کٜࢡْطَ؞

ندٜرْ زَمَنُ حِرُدُسْ طٛنّٛ لَامَنِ لٜسْدِ يَحُدِيَ، وٛودِنٛ غٛطّٛ لِمَنْجٛ، مٛ عِنْدٜ مُوطُمْ زَکَرِيَا، غٛنْطٛ ندٜرْ يٜࢡْرٜ لِمَنْعٜنْ عَبِيَ؞ عِنْدٜ دٜبّٛ مَاکٛ عٜلِزَبٜتْ، مٛ دَࢩْغٛلْ هَـٰرُونَ، حٛورٜىٰجٛ لِمَنْعٜنْ؞ ࢡٜ طِطٛ ڢُو ࢡٜ عَدِلِعٜنْ يٜىٰسٛ اَللَّه، ࢡٜطٛنْ طٛوْتَنٛ عُمْرٛوجٜ جَوْمِرَاوٛ عٜ ڢَرِلَّاجِ مُوطُمْ ڢُو بٜى بٛوطُّمْ؞ عَمَّا ࢡٜنغَلَانٛ ࢡِنغٜلْ، نغَمْ عٜلِزَبٜتْ لَاتِنٛ دِمَرٛ عٜ نٛنْ بٛو ࢡٜ طِطٛ ڢُو ࢡٜ نَيْوِ؞
ࢩَنْدٜ ڢٜىٰرٜ زَکَرِيَا طٛنْ حُووَ کُوغَلْ لِمَنْکُ مُوطُمْ يٜىٰسٛ اَللَّه، نغَمْ طُمْ وَکَّتِ کُوغَلْ يٜࢡْرٜ مَاکٛ؞ لِمَنْعٜنْ مبٛووِ سٜنْدُغٛ کُوطٜ حَکُّندٜ مُوطُمْعٜنْ بٜى وَطُغٛ کُرْعُ؞ ࢩَلَادٜ مَنْ، زَکَرِيَا سُࢡَامَ، عٛحٜࢡِ نَسْتُغٛ ندٜرْ حَيْکَلِيرُ نغَمْ وُلُغٛ عُورْلٜ يٜىٰسٛ جَوْمِرَاوٛ؞ سَاعِ عٛطٛنْ وُلَ عُورْلٜ، مٛوࢡْرٜ عُمَّاتٛورٜ ڢُو طٛنْ وَطَ دٛعَ حَا يَاسِ؞ طٛنْ نِي، زَکَرِيَا يِعِ مَلَاعِکَاجٛ طٛنْ دَرِ حَا وَکٜىٰرٜ غُلْدُطُمْ عُورْلٜ ࢩَامْرٜ؞ ندٜ عٛيِعِمٛ، عٛحُلْتٛرِ، عٛسَکْلِ؞ عَمَّا مَلَاعِکَاجٛ وِعِمٛ‏: «تَا حُلْتٛرْ، زَکَرِيَا، نغَمْ اَللَّه نَنِ دٛعَارٜ مَاطَ؞ دٜبّٛ مَاطَ عٜلِزَبٜتْ دَࢩَنْتٜ ࢡِنغٜلْ، عَعِنْدَ نغٜلْ يُحَنَّ؞ عَسٜيٛتٛ مَسِنْ، يِمْࢡٜ طُوطْࢡٜ شٜيٛدٛتٛ بٜى مَاطَ نغَمْ دَࢩٜىٰکِ مَاغٜلْ؞ نغَمْ عٛلَاتٛتٛ مَوْطٛ يٜىٰسٛ جَوْمِرَاوٛ؞ عٛيَرَتَا عِنَبٛوجَمْ مَلَّ نغُيْکِنٛوجَمْ کٛو طَمٜ؞ عٛ کٜبِّنْتٜىٰطٛ بٜى رُوحُ شٜنِيطٛ دِغَ ندٜرْ رٜىٰدُ دَادَ مَاکٛ؞ عٛلٛرْنَنْ إِسْرَاءِيلَعٜنْ طُوطْࢡٜ حَا جَوْمِرَاوٛ اَللَّه مَࢡّٜ؞ عٛعَارْتَنْ جَوْمِرَاوٛ وَرْغٛ ندٜرْ رُوحُ عٜ بَاوْطٜ طٜ اَلنَّبِي إِلْيَاسُ حٜࢡْنٛ، نغَمْ عٛلٛرْتِنَ ࢡٜرْطٜ بَابِرَاࢡٜ حَا ࢡِکّٛيْ مُوطُمْعٜنْ، عٛوَرْتِرَ ࢡٜرْطٜ تُورْتٛوࢡٜ حَا حِکْمَ کَ عَدِلِعٜنْ، عٛتَاسْکِتِنَ عُمَّاتٛورٜ نغَمْ جَوْمِرَاوٛ؞»
عَمَّا زَکَرِيَا وِعِ مَلَاعِکَاجٛ‏: «نٛيْ عَنْدِرَنْمِ طُمْ غٛونغَ؟ نغَمْ مِنْ مِ نَيْوِ، دٜبّٛ عَمْ بٛو دُوࢡِ مُوطُمْ طُوطِ؞» مَلَاعِکَاجٛ جَابِمٛ‏: «مِنْ مِ جِبْرِيلَ، مِطٛنْ دَرٛ يٜىٰسٛ اَللَّه نغَمْ حُووَنْغٛ مٛ؞ کَنغْکٛ نٜلِ يَمْ مِوٛلْوَنٜ، مِعَنْدِنٜ کُبَرُوٛلْ بٜلْنغٛلْ نغٛعٛلْ؞ عَمَّا عَنُطِّنَايْ بٛلّٜ عَمْ تَمِّيطٜ غٛونغْطُغٛ تٛ وَکَّتِ مَنْ وَطِ؞ نغَمْ مَاجُمْ عَلَاتٛتٛ مُوکَاجٛ، عَوَاوَتَا وٛلْوُغٛ حَا تٛ کُوجٜ طٜعٜ لَاتَکٜ؞»
سَاعِ مَنْ يِمْࢡٜ طٛنْ ندٜىٰنَ زَکَرِيَا؞ ࢡٜکَيْطِنِ نغَمْ عٛنٜىٰࢡِ ندٜرْ حَيْکَلِيرُ؞ ندٜ عٛوُرْتِ، عٛوَاوَايْ وٛلْوَنْغٛ ࢡٜ، ࢡٜݠَامِ عٛيِعِ کَايٜىٰڢِ ندٜرْ حَيْکَلِيرُ؞ عٛطٛنّٛ وَطَنَ ࢡٜ عَلَامَاجِ بٜى جُوطٜ، نغَمْ عٛوَاوَايْ وٛلْوُغٛ؞
ندٜ وَکَّتِ کُوغَلْ زَکَرِيَا ندٜرْ حَيْکَلِيرُ تِمِّ، عٛحٛوتِ سَارٜ مَاکٛ؞ ࢩَلْطٜ سٜطَّ ࢡَاوٛطٛنْ، دٜبّٛ مَاکٛ عٜلِزَبٜتْ رٜىٰدِ، عٛسُوطِ بَاکِنْ لٜبِّ جٛوِ؞ عٛوِعِ‏: «ندَا کٛ جَوْمِرَاوٛ وَطَنِ يَمْ‏: عٛعِتَّنِ يَمْ سٜمْتٜىٰندٜ ندِمَرَاکُ عَمْ شَکَ يِمْࢡٜ ڢُو؞»

ندٜ عٜلِزَبٜتْ رٜىٰدِ، وَطِ لٜبِّ جٛوٜىٰغٛ، اَللَّه نٜلِ مَلَاعِکَاجٛ جِبْرِيلَ حَا بٜرْنِوٛلْ بِعٜتٜىٰنغٛلْ نَسَرَتُ ندٜرْ لٜسْدِ غَلِيلِ؞ عٛنٜلِمٛ حَا ݠَاࢩٛ دٜبّٛ، کَࢡَّنَاطٛ غٛرْکٛ بِعٜتٜىٰطٛ يُوسُڢُ، مٛ دَࢩْغٛلْ دَاوُدَ؞ عِنْدٜ ݠَاࢩٛ دٜبّٛ بٛو مَرِيَمَ؞ مَلَاعِکَاجٛ وَرِ حَا مَاکٛ، وِعِمٛ‏: «سٜيَ، عَنْ کٜࢡْطٛ مٛعّٜرٜ اَللَّه‏! جَوْمِرَاوٛ طٛنْ وٛنْدِ بٜى مَاطَ‏!» بٛلّٜ طٜعٜ شَکْلِ مَرِيَمَ مَسِنْ، عٛنُمِ کٛ طُمْ يِطِ وِعْغٛ؞ مَلَاعِکَاجٛ وِعِمٛ‏: «تَا حُلْتٛرْ، مَرِيَمَ، نغَمْ عَحٜࢡِ مٛعّٜرٜ اَللَّه؞ عَتَمِّ رٜىٰدُغٛ، عَدَࢩَنْ ࢡِطّٛ غٛرْکٛ، عَعِنْدَنْ مٛ عِيسَى؞ عٛلَاتٛتٛ مَوْطٛ، ࢡٜعٜوْنٛتٛ مٛ ࢡِطّٛ اَللَّه ࢡَنغِيطٛ؞ جَوْمِرَاوٛ اَللَّه حٛکَّنْ مٛ لَامُ کَاکَ مَاکٛ دَاوُدَ؞ عٛلَامَنْتٛ عُمَّاتٛورٜ إِسْرَاءِيلَ حَا ڢٛرٛيْ، لَامُ مَاکٛ تِمَّتَا سَمْ؞»
مَرِيَمَ وِعِ مَلَاعِکَاجٛ‏: «نٛيْ طُمْ لَاتٛرْتٛ، ندٜ مِنْ مِعَنْدَا غٛرْکٛ سَمْ؟»
مَلَاعِکَاجٛ وِعِمٛ‏: «رُوحُ شٜنِيطٛ وَرَنْ دٛوْ مَاطَ، بَاوْطٜ اَللَّه ࢡَنغِيطٛ سُدّٜتٜ بَنَ طٛوْدِ؞ نغَمْ مَاجُمْ ࢡِطّٛ مٛ عَتَمِّ دَࢩُغٛ، لَاتٛتٛ شٜنِيطٛ عٜ ࢡٜعٜوْنٛتٛ مٛ ࢡِطّٛ اَللَّه ؞ عٜلِزَبٜتْ، بَنْدِرَاوٛ مَاطَ طٛنْ بٜى رٜىٰدُ، عٛدَࢩَنْ ࢡِنغٜلْ غٛرْغٜلْ، کٛو ندٜ عٛ نَيْوِ، ࢡٜمبِعْنٛ مٛ عٛ دِمَرٛ بٛو، عَمَّا جٛنْتَ عٛطٛنْ بٜى رٜىٰدُ لٜبِّ جٛوٜىٰغٛ؞ نغَمْ وَلَا کٛ سَطَنِ اَللَّه؞»
مَرِيَمَ وِعِ‏: «مِنْ مِ کٛرْطٛ جَوْمِرَاوٛ، طُمْ لَاتَنٛ يَمْ بَنَ مبِعْطَ؞» ندٜنْ مَلَاعِکَاجٛ دِلِّ، عَشِّمٛ؞

ندٜرْ بَلْطٜ مَنْ مَرِيَمَ عُمِّ، دِلِّ بٜى جَاوَلْ حَا وُرٛ وٛطْنغٛ، ندٜرْ کٛوسٜىٰجٜ لٜسْدِ يَحُدِيَ؞ عٛنَسْتِ سَارٜ زَکَرِيَا، عٛحٛوڢْنِ عٜلِزَبٜتْ؞ سَاعِ عٜلِزَبٜتْ نَنِ کٛوڢْنغٛلْ مَرِيَمَ، ࢡِنغٜلْ ڢُطِّ دِمْبَاغٛ ندٜرْ رٜىٰدُ مَاکٛ؞ ندٜنْ عٜلِزَبٜتْ حٜىٰوِ رُوحُ شٜنِيطٛ، وِعِ بٜى سَوْتُ‏: «عَ بَرْکِطِنَاطٛ شَکَ رٜوْࢡٜ ڢُو، ࢡِنغٜلْ نغٜلْ عَتَمِّ دَࢩُغٛ بٛو بَرْکِطِنَانغٜلْ‏! مِنْ مِ مٛيٜ حَا دَادَ جَوْمِرَاوٛ عَمْ وَرَ حَا عَمْ؟ نغَمْ ندَا، سَاعِ مِنَنِ کٛوڢْنغٛلْ مَ، ࢡِنغٜلْ دِمْبِ ندٜرْ رٜىٰدُ عَمْ نغَمْ سٜيٛ؞ بَرْکَ لَاتَنِ مَ نغَمْ عَنُطِّنِ کٛ جَوْمِرَاوٛ وِعِ مَ، طُمْ لَاتٛتٛ؞»

ندٜنْ مَرِيَمَ وِعِ‏:
«نَڢْسُ عَمْ طٛنْ مَنغْتَ جَوْمِرَاوٛ،
ࢡٜرْندٜ عَمْ طٛنْ حٜىٰوِ سٜيٛ نغَمْ اَللَّه عَمْ، کِسْنٛووٛ يَمْ‏!
نغَمْ عٛيٜرْدِ لَارُغٛ کٛرْطٛ مَاکٛ لٜىٰسْطٛ؞
ڢَکَتْ، دِغَ جٛنْتَ يِمْࢡٜ غِدٜ ڢُو مبِعَنْ مِ بَرْکِطِنَاطٛ،
نغَمْ اَللَّه بَاوْطٛ وَطَنِ يَمْ کُوجٜ مَوْطٜ‏!
عِنْدٜ مَاکٛ وٛنِ شٜنِيطٛ،
عٜنْطَمْ مَاکٛ طٛنْ دٛوْ حُلْࢡٜ مٛ دِغَ يِدٜرٜ حَا يِدٜرٜ؞
عٛحُووِ کُوطٜ مَوْطٜ بٜى جُنغٛ مَاکٛ سٜمْبِطْنغٛ،
عٛسَنغْکِتِ مَوْنِتِيࢡٜ ندٜرْ نُمٛوجِ مُوطُمْعٜنْ؞
عٛجِݠِّنِ سٜمْبِطْࢡٜ دِغَ لٜىٰسٜ لَامُ مُوطُمْعٜنْ،
عٛࢡَنغْتِ لٜىٰسْࢡٜ؞
عٛحَارْنِ دٛلْࢡٜ بٜى کُوجٜ بٛوطّٜ،
رِسْکُࢡٜ بٛو، عٛرِيوِ ࢡٜ جُوطٜ مٜىٰرٜ؞
عٛوَلِّ إِسْرَاءِيلَ، جَغَّنِيطٛ مٛ،
عٛسِڢْتٛرِ عٜنْطَمْ مَاکٛ،
بَنَ عٛوِعْنٛ کَاکِرَاࢡٜ مٜىٰطٜنْ، وَاتٛ إِبْرَاهِيمَ عٜ دَࢩْغٛلْ مُوطُمْ حَا ڢٛرٛيْ؞»
مَرِيَمَ جٛوطٛدِ بٜى عٜلِزَبٜتْ کٛ دِلَّنِ لٜبِّ تَتِ، ندٜنْ عٛحٛوتِ سَارٜ مَاکٛ؞

ندٜ سَاعِ عٜلِزَبٜتْ دَࢩَتَ يٛتِّ، عٛدَࢩِ ࢡِطّٛ غٛرْکٛ؞ حٜىٰدِّطِّرَاࢡٜ مَاکٛ عٜ بَنْدِرَاࢡٜ مَاکٛ نَنِ جَوْمِرَاوٛ وَطَنِمٛ عٜنْطَمْ طُوطَّمْ، ࢡٜشٜيٛدِ بٜى مَاکٛ؞ ندٜ ࢩَلَادٜ جٛوٜىٰتَتَࢡْرٜ وَطِ، ࢡٜنغَرِ نغَمْ جُولْنُغٛ ࢡِنغٜلْ غٛ، ࢡٜنغِطْنٛ عِنْدُغٛ نغٜلْ زَکَرِيَا، بَنَ عِنْدٜ بَابَ مَاغٜلْ؞ عَمَّا دَادَ مَاغٜلْ وِعِ‏: «عَاعَ، نَا نٛنْ، نغٜلْ عِنْدٜتٜ يُحَنَّ؞» ࢡٜمبِعِمٛ‏: «وَلَا کٛو غٛوتٛ ندٜرْ بَنْدِرَاࢡٜ مَ مَرِ عِنْدٜ ندٜعٜ؞»
ندٜنْ ࢡٜمبَطَنِ بَابَ مَاغٜلْ عَلَامَ بٛلّٜ بٜى جُوطٜ، نغَمْ حَا ࢡٜࢨَمَ مٛ عِنْدٜ ندٜيٜ عٛيِطِ عِنْدُغٛ نغٜلْ؞ زَکَرِيَا عَنْدِنِ ࢡٜ، ࢡٜندٛکَّ مٛ عَلُّحَ؞ ندٜنْ عٛوِنْدِ‏: «عِنْدٜ مَاغٜلْ يُحَنَّ؞» يِمْࢡٜ ڢُو کَيْطِنِ؞ سَاعِ مَنْ ندٜنْ حُنْدُکٛ زَکَرِيَا مَࢡِّتِ، طٜمْنغَلْ مَاکٛ ڢِيسْتِ، عٛڢُطِّ وٛلْوُغٛ، عٛمَنغْتِ اَللَّه بٜى سَوْتُ؞ حٜىٰدِّطِّرَاࢡٜ مَاکٛ ڢُو کُلْتٛرِ مَسِنْ؞ حَا لٜسْدِ کٛوسٜىٰجٜ يَحُدِيَ ڢُو ࢡٜمبٛلْوِ حَالَ کُوجٜ طٜعٜ؞ نَنْࢡٜ طُمْ ڢُو تٛکِّ نُمُغٛ‏: «طُمٜ ࢡِنغٜلْ نغٜعٜلْ تَمِّ لَاتَاغٛ؟» نغَمْ ڢَکَتْ، بَاوْطٜ جَوْمِرَاوٛ طٛنْ نغٛنْدِ بٜى مَاغٜلْ؞

زَکَرِيَا، بَابَ ࢡِنغٜلْ غٛ حٜىٰوِ رُوحُ شٜنِيطٛ، عٛوَطِ عَنَّبَاکُ، عٛوِعِ‏:
«يٜتّٛورٜ لَاتَنٛ اَللَّه، جَوْمِرَاوٛ إِسْرَاءِيلَ،
نغَمْ عٛحَکِّلَنِ عُمَّاتٛورٜ مَاکٛ، عٛرِمْطِنِ ندٜ؞
عٛدَرْنَنِ عٜنْ کِسْنٛووٛ شٜمْبِطّٛ،
ندٜرْ دَࢩْغٛلْ دَاوُدَ، جَغِّيطٛ مَاکٛ؞
کَنْجُمْ وٛنِ کٛ عٛعَنْدِنّٛ دِغَ ࢡٛويْمَ
بٜى کُنْدُطٜ اَلنَّبِعٜنْ مَاکٛ سٜنِيࢡٜ،
عٛوِعْنٛ عٛرِمْطِنَنْ عٜنْ دِغَ جُوطٜ کٛنّٜعٜنْ مٜىٰطٜنْ،
عٜ بَاوْطٜ وَࢩْࢡٜ عٜنْ ڢُو؞
عٛوَنغِنَنِ کَاکِرَاࢡٜ مٜىٰطٜنْ عٜنْطَمْ مَاکٛ،
عٛسِڢْتٛرِ عَلْکَوَلْ مَاکٛ شٜنِينغَلْ؞
نغَمْ اَللَّه حُنَنِ کَاکِرَاوٛ مٜىٰطٜنْ إِبْرَاهِيمَ،
عٛحِسْنَنْ عٜنْ بَاوْطٜ کٛنّٜعٜنْ مٜىٰطٜنْ،
حَا عٜنْ نجَغَّنٛ مٛ بِلَا کُلٛلْ،
نغَمْ حَا عٜنْ لَاتٛ يِمْࢡٜ مَاکٛ سٜنِيࢡٜ عٜ عَدِلِعٜنْ ندٜرْ بَلْطٜ نغٜىٰندَمْ مٜىٰطٜنْ ڢُو؞
عَنْ بٛو، ࢡِنغٜلْ ݠَمَرٜلْ، ࢡٜعٜوْنٛتٛ مَ اَلنَّبِيجٛ اَللَّه ࢡَنغِيطٛ،
نغَمْ عَعَارْتَنْ جَوْمِرَاوٛ نغَمْ حَا عَمٛعِّنَنَ مٛ لَاوٛلْ؞
عَعَنْدِنَنْ يِمْࢡٜ مَاکٛ عٛحِسْنَنْ ࢡٜ،
بٜى يَاڢَنغٛ ࢡٜ حَکّٜىٰجِ مَࢡّٜ؞
اَللَّه مٜىٰطٜنْ عٛ کٜىٰوْطٛ عٜنْطَمْ،
دَلِيلَ عٜنْطَمْ طَعَمْ، عٛيَيْنَنْ دٛوْ مٜىٰطٜنْ بَنَ نَانغٜ ݠُطَنْنغٜ،
نغَمْ يَيْنَنْغٛ وٛنْࢡٜ ندٜرْ ࢩِࢡْرٜ عٜ لٜسْ طٛوْدِ مَايْدٜ
عٜ طٛوُغٛ کٛسْطٜ مٜىٰطٜنْ دٛوْ لَاوٛلْ سَلَامَنْ؞»
يُحَنَّ مَوْنِ، عٛسٜمْبِطِ بٛو ندٜرْ رُوحُ؞ عٛجٛوطِ ندٜرْ لَدّٜ حَا يٛتِّ وَکَّتِ عٛوَنغِ حَا عُمَّاتٛورٜ إِسْرَاءِيلَ؞

Ακρόαση لُکَ 1