 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

اَللَّه بَرْکِطِنِ نُوحُ عٜ ࢡِيُمْعٜنْ، عٛوِعِ ࢡٜ‏: «ندَࢩٜ، طُوطٜ، کٜبِّنٜ لٜسْدِ‏! عٛنْ لَاتٛتٛ دَلِيلَ کُلْتٛرٜىٰنغٛلْ مَنغٛلْ حَا دَبَّاجِ عٜ شٛلِّ، کٛ دُࢡَتَ دٛوْ لٜسْدِ عٜ لِطِّ ڢُو؞ مِحٛکِّ طُمْ ڢُو حَا جُوطٜ مٛوطٛنْ؞ لَدٛوجُمْ عٜ مَرْطُمْ ݠٛوڢْطٜ ڢُو لَاتَنٛ عٛنْ ࢩَامْدُ؞ مِحٛکِّ عٛنْ طُمْ ڢُو بَنَ نَانٜ ندٛکِّرْمِ عٛنْ حَاکٛ حٜشّٛ؞ عَمَّا تَا ࢩَامٜ کُسٜلْ بٜى يٛنغْکِ مُوطُمْ، وَاتٛ بٜى ࢨِيࢨَمْ مُوطُمْ؞ ࢨِيࢨَمْ مٛوطٛنْ طُمْ يٛنغْکِ مٛوطٛنْ؞ مِࢨَمَنْ طَمْ حَا ندَبَّاوَ مبَرْنغَ نٜطّٛ، بَنَ مِࢨَمِرْتَ حَا نٜطّٛ مبَرْطٛ تَنُمْ؞ مِࢨَمْتَنْ يٛنغْکِ نٜطّٛ حَا مبَرْطٛ طُمْ؞ کٛو مٛيْ رُڢِ ࢨِيࢨَمْ نٜطّٛ، ࢨِيࢨَمْ مُوطُمْ رُڢٜ بٛو بٜى جُنغٛ نٜطّٛ، نغَمْ اَللَّه تَغِ نٜطّٛ دٛوْ جَاتِ مُوطُمْ؞ عٛنٛنْ کَمْ، ندَࢩٜ، طُوطٜ مَسِنْ دٛوْ لٜسْدِ، ࢡٜسْدٜ دٛوْ مَارِ‏!»
ندٜنْ اَللَّه وِعِ نُوحُ عٜ ࢡِيُمْعٜنْ وٛنْدُࢡٜ بٜى مَاکٛ‏: «ندَا، مِحَࢡَّنْ عَلْکَوَلْ بٜى مٛوطٛنْ عٜ دَࢩْغٛلْ مٛنْ ࢡَاوٛ مٛوطٛنْ عٜ مَرْطُمْ يٛنغْکِ غٛندُطُمْ بٜى مٛوطٛنْ ڢُو، شٛلِّ عٜ دَبَّاجِ سَارٜ مَلَّ طِ لَدّٜ، کٛ وُرْتِ کٛومْبٛوَلْ بٜى مٛوطٛنْ ڢُو عٜ دَبَّاجِ غٛنْطِ دٛوْ لٜسْدِ ڢُو؞ مِطٛنْ حَࢡَّ عَلْکَوَلْ بٜى مٛوطٛنْ‏: مَرْطُمْ ࢡَنْدُ ڢُو مٜىٰتَتَا نَتِّنٜىٰغٛ بٜى ندِيَمْ تُوڢَانَ؞ عِلَمْ نغٛطَّمْ مٜىٰتَتَا نَتِّنْغٛ لٜسْدِ ڢَحِنْ؞» اَللَّه ࢡٜسْدِ وِعُغٛ‏: «ندَا عَلَامَ عَلْکَوَلْ نغَلْ دَرْنَنْمِ حَکُّندٜ عَمْ بٜى مٛوطٛنْ، نٛنْ بٛو حَکُّندٜ عَمْ بٜى يٛنغْکِيجِ غٜىٰتِ نغٛندُطِ بٜى مٛوطٛنْ ڢُو، نغَمْ زَمَنُوجِ غَرَنْطِ ڢُو‏: مِوَطَنْ تِمٛتِمٛونغَلْ عَمْ ندٜرْ دُولٜ؞ کَنغَلْ لَاتٛتٛ عَلَامَ عَلْکَوَلْ حَکُّندٜ عَمْ بٜى دُنِيَارُ؞ ندٜ مٛوࢡْتَنْمِ دُولٜ دٛوْ لٜسْدِ ڢُو عٜ تٛ تِمٛتِمٛونغَلْ وَنغِ ندٜرْ مَاجٜ، مِسِڢْتٛرَنْ عَلْکَوَلْ عَمْ بٜى مٛوطٛنْ، بٜى دَبَّاجِ عٜ بٜى کٛ مَرِ ࢡَنْدُ ڢُو؞ ندِيَمْجِ مٜىٰتَتَا لَاتَاغٛ عِلَمْ تُوڢَانَ نغَمْ نَتِّنْغٛ مَرْطُمْ ࢡَنْدُ ڢُو؞ تِمٛتِمٛونغَلْ وَنغَنْ ندٜرْ دُولٜ؞ مِلَارَنْ نغَلْ عٜ مِسِڢْتٛرَنْ دٛوْ عَلْکَوَلْ دُومِينغَلْ نغَلْ کَࢡُّمِ نغَمْ ڢٛرٛيْ حَکُّندٜ عَمْ عٜ مَرْطُمْ يٛنغْکِ ڢُو دٛوْ لٜسْدِ؞» اَللَّه وِعِ نُوحُ‏: «کَنْجُمْ وٛنِ عَلَامَ عَلْکَوَلْ نغَلْ کَࢡُّمِ حَکُّندٜ عَمْ بٜى مَرْطُمْ يٛنغْکِ ڢُو دٛوْ لٜسْدِ ڢُو؞»

ࢡِࢡّٜ نُوحُ وُرْتِيࢡٜ کٛومْبٛوَلْ نغٛنِ‏: سٜمْ عٜ حَامُ عٜ يَڢٜتْ؞ حَامُ وٛنِ بَابَ کَنَانَ؞ دِغَ ࢡِࢡّٜ نُوحُ تَتٛ ࢡٜعٜ، جٛوطِيࢡٜ دٛوْ لٜسْدِ ڢُو عِوِ؞
نُوحُ وٛنِ عَارْتُطٛ ڢُطُّغٛ ندٜمْرِ؞ عٛجُبِ لٜطّٜ عِنَبٛوجٜ؞ عٛيَرِ عِنَبٛوجَمْ، عٛوُيْکِ، عٛسُورِتِ ندٜرْ سُودُ مَاکٛ؞ حَامُ، بَابَ کَنَانَ يِعِ تٜمْبُ بَابَ مُوطُمْ، عٛيٜحِ يَاسِ، عٛعَنْدِنِ طُمْ دٜىٰرْطُمْعٜنْ طِطٛ غٛ؞ ندٜنْ سٜمْ عٜ يَڢٜتْ کٛوعِ نغَݠَلٜىٰوٛلْ، ࢡٜنغَطِ نغٛلْ دٛوْ بَلْبٜ مَࢡّٜ؞ ࢡٜنجٜحِ ࢡَاوٛ ࢡَاوٛ، ࢡٜشُدِّ تٜمْبُ بَابَ مَࢡّٜ، ࢡٜندَارَايْ غَلْ بَابَ مَࢡّٜ، نٛنْ ࢡٜنغِعَايْ تٜمْبُ بَابَ مَࢡّٜ؞ ندٜ نُوحُ ڢِنِ عٜ وُيْکٜرٜ مُمْ، عٛنَنِ کٛ ࢡِيِيکٛ مِࢩِرَاوٛ وَطِ؞
ندٜنْ عٛوِعِ‏: «کَنَانَ عٛ نَالَاطٛ‏! عٛلَاتَنٛ دٜىٰرْطِيکٛعٜنْ مَشُّطٛ ࢡَاوٛوجٛ؞» عٛوِعِ بٛو‏: «تٜدُّنغَلْ لَاتَنٛ جَوْمِرَاوٛ، اَللَّه مٛ سٜمْ‏! کَنَانَ لَاتٛ مَشُّطٛ مَاکٛ؞ اَللَّه مَوْنِنَ يَڢٜتْ، عَمَّا جٛوندٜ مَاکٛ لَاتٛ ندٜرْ شُوطِ لَيْمَاجِ سٜمْ؞ کَنَانَ بٛو لَاتَنٛ مٛ مَشُّطٛ؞»
ࢡَاوٛ عِلَمْ تُوڢَانَ، نُوحُ يٜىٰطِ ڢَحِنْ دُوࢡِ تٜىٰمٜطّٜ تَتِ عٜ شَݠَّنْطٜ جٛوِ (350)؞ دُوࢡِ نُوحُ ڢُو نغَطِ، تٜىٰمٜطّٜ جٛوٜىٰنَيِ عٜ شَݠَّنْطٜ جٛوِ (950)، ندٜنْ عٛمَايِ؞

Ακρόαση لَاتَانٛوجِ 9