Efesus 1
1
1Ae' Pol okom Godi atona nandandepe ataga aposel Jisas Kraisi ma anda' maol ananinai awalapa basef ananimi. Ae' anda' basef amama mafe'mago ipe' epes Godi pape Efesusi, ipe' pembale'efa Krais Jisas andeande' pape la'ifipa palomana. 2Ae' a'i God ahalomapa ape'inai noloma Dembinai ape'inai Jisas Krais migiambamepa na'a monda'epa petaga la'ifipa pepe opalef awanem.
Ape' mape la'ifipa maloma Jisas Krais, God nase'apa amamaga hiami bu'wami ilifami
3Ape' ata' minifela Ahalomapa God, ahalomana Dembinai ape'inai Jisas Krais! Ama Krais atona anan nase'apa amamaga hiami bu'wami atom mape otaga ilifi magiambamapa ukup maloma ambagof ape'imi ma fe' pe ki ape'inai mope andeande'. 4Dei' main, fowa' God ina dei' nanda' etap anae', ata' owa', nemaf anama nosahe'apa ea' mape la'ifipa maloma Jisas Krais. Mape amam nematawa Godi ma waf aonai ofagema a'apa. 5Anan okom nainailapa endilisi. Amama atom Anan nali' okom na'i nosahe'apa nofa'apa numafiapa mataga si'i awasi ananipai. Anan naila okom Ananinai atona nanda'ama lagel Jisas Kraisi atona. 6God nanda'am na'ama ma ape' mefela agel Ananinai minifelona ma waf bu'unai Anan nanda'anai nagiambamapa na'a. Waf anama nawalapa pepel nafifili Ananinai. Anan nagiambamapa na'a nase'apa nogalomana okom Ananinai nainailana endilisi, ea' mape la'ifipa malomana.
7Krais atona naga' natagahepa ma waf aonai natalepa esimbel Ananimi. Ea' nakwaha waf aonai ape' manda'anai. Anan nanda'am na'ama si'i okom Godi nainailapa endilisi ma waf nagiambamapa na'a. 8Waf anama nase'apana si'ina endilisi. Nase'apana naloma gawa hianai naloma gawa mogawa maina waf bu'unai o aonai. 9-10Okom ananinai atona na'i nigiambamapa ea' nihi'ambapa basef ananimi mali' mandambaho' mape okom Ananinai atona. Basef amama mape na'ama. Anan nali' okom na'i Krais nope Dembinai ma amamaga hiami mape ilif etapi hi'ilam maloma epes wapoti'. Nogota anama anan atona okom na'ianai notaga, God nose'ana amamaga amama mofe' lagel Kraisi atona ma Anan atona nope Dembinai ma amamaga amama hi'ilam maloma epes wapoti'.
11God nanda' amamaga amama hi'alam naila fowa' damba damba Anan okom na'iam. Ea' nosahe'apa mape la'ifipa maloma Jisas Krais. Dei' main, Anan naila okom ananinai si'i fowa' damba damba okom na'iam. 12Ape' Juda atepa mogawa endilisi mape mohafa Krais, God nandandepapa na'ama ma monda' epes hiesi sefela agel Ananinai lu'una. Agel anama ananinai bu'unai endilisi.
13Ea' dei' ipe' wapoti', nemaf anama peme' basef endilisimi bu'wami Godi, nofa'epa petanimani pembale'efa Krais pape la'ifipama anan. Nogota anama ipe' pembale'efa Krais, God nase'epa Ambal Bu'unai Ananinai nosahe'epa. Ambal Bu'unai anama si'i anona ikwaf God nanda'mepanai ma nihi'ambepa na'ama. 14Nihi'ambepa ape' mogawa endilisi la'ela'ef mopoma anona nemaf nose'apa amamaga bu'wami ape' epes ananipai. Anan nose'apam nemaf anama notagahepa nofa'apa mofe' mope molomana. God nanda'am na'ama ma ape' monda' epes hiesi sefela agel ananinai lu'una, agel anama bu'unai endilisi.
Pol nanda' betena Goda nose'asa gawa bu'unai ma esis Efesus
15-16Basef do'okimi endilisimi atom. Amama atom dei' la'ela'ef anda'mepa beten ipe'. Nemaf anama nali'i ame' basefa waf ipe'inai pembale'efa Dembinai Jisasa ukup bo'om ea' maimaila amam nematawa hiesi Godi. Ae' anda'am nemaf anama afi'i afi'i ataga dei', ae' ina akwahipa ma beten, owa'etin. Ae' okom na'i ipe' anda' beten anifela Goda ipe'. 17Jisas Krais anan Dembinai ape'inai. Ae' anda' beten la'ela'ef nimeguf hiami ahali' God, Anan Dembinai Jisas Kraisi, Anan Ahalomapa ape'inai nafifili pepel napainai. Anda' beten ahali'ana ma nose'epa gawa bu'unai ukup ipe'imi pegawa basef Godi ofagema mandawalap alihima ipe'. Ama pegawa God andeande'. 18Ae' anda' beten ahali'ana ma nonda' ukup ipe'imi pegawa waf bu'unai ma amamaga bu'wami Anan nofalepa pape pehafami. Ma pegawa ambal namunai mape la'ela'ef noloma wambel Godi nahopagoma howalagon endilisima. Amama God nandondomba ma anona nemaf na'i nose'apa moloma epes ananisi endilisi. 19Anda' beten ahali'ana ma ipe' pegawa pepel ananinai la'ela'ef nanda' maola opalef nomon ape' epes mombale'efanai. Amama lu'um endilisi. Amama na'ama etin si'i pepel ananinai lu'unai 20nanda'ama nafela Jisas nohafel nakwaha ga' ananinai. La'ifimi amama atom God nanda'ana nape wa'ol lagel ananinai da'isinai gani heven. 21Ea' Krais dei' nape Dembinai ilif endilisi ma dembemi agufumi hiami maloma pepel hianai. Anan nikila' agof lu'wami hi'alam epes dei' sape nogota anae', ea' isima sope nogota nigi' neatagai wapoti'. 22God nanda' amamaga hiami mape owina Anan atona. Ea' nanda'ana nape dembinai ilif endilisi ma epes hiesi saloma amamaga hiami ma nagiambama esis sios hiesi sembale'efanai. 23Esis sembale'efanai si'i alop si'ina Kraisi. Anan nape anama hiagoma numafi amamaga hiami hi'alam nape nomona esis sembale'efanai hiesi si'isa Anan atona endilisi.
Zur Zeit ausgewählt:
Efesus 1: aojF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2013, Wycliffe Bible Translators, Inc. All rights reserved.