Génesis 8
8
Osacoroncantajari incani
1Ari iquenqueshireacotajiri Tasorentsi NoÉ aisati icarajeitaqueri itejeitaca pitotsiqui. Itiancajiro tampea, irosati intantanaja oshirincaatanaja incajare. 2Te osotoaajatanaje nija ishaavinijiri quipatsi aisati jenoquiniri opeanaja incani. 3Irosati intantanaja oshirincaatanaja, jentsiquero ocantanaja. Ari ocarataque 150 quitaiteri aiquero ojatatii oshirincaatanaja. 4Ari ishoncapaaja cashiri caratatsiri 7 iro 17 quitaiteri, irosati otimantapaaca pitotsi otishiqui pajitachari Ararat. 5Aiquero ojatatiini incajare oshirincaatasanotanaja. Ari ishoncapaaja aisati cashiri caratatsiri 10 iro quitaiteri intanajarori, irosati oconijatantayetanaja ochoviinaquitapaaque antearoyetatsiri otishipee.
6Ari avisanaque 40 quitaiteri irosati yashitareantacaro NoÉ omoro yamenacotantari. 7Ari yaaque aparoni coonti, yoaraaqueri iriotanteari pirijatanajirica quipatsi. Yarayetaque jaocapeerica, te impiajeji. 8-9Impoiji yaaque aparoni sampaquiti, yoaraaqueri. Iro cantaincha ipiajaro irinti. Tecatsi iraatanteari iriori, tequeratsita ajaasanotajeji. Ari yaavajiri yoiminqueavajiri.
10Ari ocarataji 7 quitaiteri, irosati yoarantajari aisati sampaquiti. 11Ishaavijiiteanaji catsirincaiteri irotaintsi ontsitenijencaiteaje ipiapaajaro, yamaquero itsoviqui ojempequijaniqui orivo. Ari iotanaque NoÉ irotajantsi oshirincaatasanotaje. 12Impoiji ocarataji aisati 7 quitaiteri, irosati yoarantajari aisati sampaquiti. Iro cantaincha te impiajeji.
13Ari ocaratanaque NoÉ 601 irosarentsite opirijatantajari quipatsi. Iro intanajarori osarentsi, aparoquera ini cashiri aisati aparoquera quitaiteri, irosati yashitareantajaro ovancotacari ivito jenoqui, ineajiro incajare ajaanaji oni.
14Ari ishoncapaaja pashini cashiri apitetatsiri iro 27 quitaiteri, pirijaiteasanotanaji oni quipatsi.
15-16Irosati icantantajari Tasorentsi NoÉ: “Meeca pisoquijanaje aisati maaroni pitomipee, pijina jero paniropee. 17Aisati poimisoquijajeitajeri maaroni poshiniripee pitejeitaqueri: vanquiyetachari, virantsipee aisati noshicayetachari irijayetanajeta jaocapeerica irishequiasanojeitantanajeari catsini, intsoteanajero maaroni quipatsi.”
18Irosati isoquijantanaja NoÉ, ijina, itomipee jero iraniropee, 19aisati ivirayeetari, coquiyetatsiri, noshicayetachari jeri vanquiyetachari. 20Impoiji ipiotaquero mapipee, yovetsicaquero icanteetiro altar. Ari yaaque aparopee virantsi aisati vanquiyetachari cameetsayetatsiri yoyeetari, inashiyetaca aparopeeni; itaaqueneri Tasorentsi impincatsatanteariri. 21Ari ineacameetsajencatavaqueri Tasorentsi ijencaare yora itaaqueneriri. Icantanaque: “Eiro catsini napiitajirotsi noasanquetaajero quipatsi, tempa irio cantacaacarori atiripee. Ainiro yevancaritapai icantani iquenqueshiretapinijeitiro caari cameetsatatsi irantapinijeitero. Aisati eiro notsoncajeitajiritsi maaroni poshiniripee timantajeitarori.”
22“Ainiroquera otimi quipatsi,
impanquiyeeteta aisati iraviiyeetantearota.
Ontimeta masavirentsi aisati catsincaiteri,
osarentsipee jero quimojantsipee,
aisati quitaiteripee jero tsiteniripee.”
Zur Zeit ausgewählt:
Génesis 8: cni
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2008, 2015, Wycliffe Bible Translators, Inc. All rights reserved.
