تكوين 11
11
بُنى قصِر بَابِل
1زَمَانْ، كُلَّ النَّاسْ قَاعِدِينْ يِحَجُّوا بِلُغَّةْ وَاحِدَةْ وَ بِلِسَانْ وَاحِدْ. 2وَ النَّاسْ حَوَّلَوْا مِنْ صَبَاحْ وَ لِقَوْا سَهَلَةْ وَسِيعَةْ فِي بَلَدْ شِنْعَارْ وَ سَكَنَوْا فَوْقهَا. 3وَ قَالَوْا أَمْبَيْنَاتْهُمْ: «تَعَالُوا! نَخْدُمُوا وَ نِسَلُّلُوا دِرِنْقَيْل وَ نُتُشُّوهُمْ.»
وَ خَلَاصْ، فِي بَدَلْ الْحَجَرْ أَسْتَعْمَلَوْا الدِّرِنْقَيْل وَ أَمْبَيْنَاتْ الدِّرِنْقَيْل صَبَّوْا الزِّفْت بَدَلْ الطِّينَةْ. 4خَلَاصْ قَالَوْا: «تَعَالُوا نِسَوُّوا لَيْنَا مَدِينَةْ وَ نَبْنُوا قَصِرْ طَوِيلْ الرَّاسَهْ يَلْحَقْ السَّمَاءْ أَشَانْ أُسُمْنَا يَبْقَى طَالِعْ وَ مَا نِشِتُّوا فِي الْأَرْض.»
5وَ وَكِتْ النَّاسْ يِدَوْرُوا يَلْحَقَوْا السَّمَاءْ، مِنْ فَوْق اللّٰهْ شَافَاهُمْ وَ شَافْ الْمَدِينَةْ وَ الْقَصِرْ الْبَنِي آدَم قَاعِدِينْ يَبْنُوهْ. 6وَ اللّٰهْ قَالْ: «دَاهُو هُمَّنْ شَعَبْ وَاحِدْ وَ لُغِّتْهُمْ كُلَ وَاحِدَةْ. وَ دِي بِدَايَةْ خِدْمِتْهُمْ. كَنْ دَوَّرَوْا يِسَوُّوا خِدْمَةْ آخَرَةْ كُلَ، مَا فِي شَيّءْ يَدْحَرْهُمْ! 7خَلِّي نِبَرْجُلُوا لُغِّتْهُمْ أَشَانْ مَا يِلْفَاهَمَوْا أَمْبَيْنَاتْهُمْ.»
8بِمِثِلْ دَا، اللّٰهْ شَتَّتَاهُمْ فِي كُلَّ الْأَرْض وَ هُمَّنْ خَلَّوْا مِنْهُمْ بُنَى هَنَا الْمَدِينَةْ. 9وَ بَيْدَا بَسْ، الْمَدِينَةْ سَمَّوْهَا بَابِلْ (مَعَنَاتَهْ بَرْجَلَةْ) أَشَانْ اللّٰهْ بَرْجَلْ لُغَّةْ كُلَّ النَّاسْ وَ شَتَّتَاهُمْ فِي كُلَّ الْأَرْض.
الذُرّية من سَام لأَبْرَام
10دَاهُو ذُرِّيَّةْ سَامْ.
وَكِتْ سَامْ عِنْدَهْ 100 سَنَةْ، هُو وِلِدْ أَرْفَكْشَادْ بِسَنْتَيْن بَعَدْ الْغَرَقْ. 11وَ بَعَدْ وَالُودَةْ أَرْفَكْشَادْ، سَامْ عَاشْ بَتَّانْ 500 سَنَةْ وَ وِلِدْ أَوْلَادْ وَ بَنَاتْ آخَرِينْ.
12وَكِتْ أَرْفَكْشَادْ عِنْدَهْ 35 سَنَةْ، هُو وِلِدْ شَالَحْ. 13وَ بَعَدْ وَالُودَةْ شَالَحْ، أَرْفَكْشَادْ عَاشْ بَتَّانْ 403 سَنَةْ وَ وِلِدْ أَوْلَادْ وَ بَنَاتْ آخَرِينْ.
14وَكِتْ شَالَحْ عِنْدَهْ 30 سَنَةْ، هُو وِلِدْ عِبَارْ. 15وَ بَعَدْ وَالُودَةْ عِبَارْ، شَالَحْ عَاشْ بَتَّانْ 403 سَنَةْ وَ وِلِدْ أَوْلَادْ وَ بَنَاتْ آخَرِينْ.
16وَكِتْ عِبَارْ عِنْدَهْ 34 سَنَةْ، هُو وِلِدْ فَالَقْ. 17وَ بَعَدْ وَالُودَةْ فَالَقْ، عِبَارْ عَاشْ بَتَّانْ 430 سَنَةْ وَ وِلِدْ أَوْلَادْ وَ بَنَاتْ آخَرِينْ.
18وَكِتْ فَالَقْ عِنْدَهْ 30 سَنَةْ، هُو وِلِدْ رَعُوْ. 19وَ بَعَدْ وَالُودَةْ رَعُوْ، فَالَقْ عَاشْ بَتَّانْ 209 سَنَةْ وَ وِلِدْ أَوْلَادْ وَ بَنَاتْ آخَرِينْ.
20وَكِتْ رَعُوْ عِنْدَهْ 32 سَنَةْ، هُو وِلِدْ سَرُوقْ. 21وَ بَعَدْ وَالُودَةْ سَرُوقْ، رَعُوْ عَاشْ بَتَّانْ 207 سَنَةْ وَ وِلِدْ أَوْلَادْ وَ بَنَاتْ آخَرِينْ.
22وَكِتْ سَرُوقْ عِنْدَهْ 30 سَنَةْ، هُو وِلِدْ نَاحُورْ. 23وَ بَعَدْ وَالُودَةْ نَاحُورْ، سَرُوقْ عَاشْ بَتَّانْ 200 سَنَةْ وَ وِلِدْ أَوْلَادْ وَ بَنَاتْ آخَرِينْ.
24وَكِتْ نَاحُورْ عِنْدَهْ 29 سَنَةْ، هُو وِلِدْ تَارَحْ. 25وَ بَعَدْ وَالُودَةْ تَارَحْ، نَاحُورْ عَاشْ 119 سَنَةْ وَ وِلِدْ أَوْلَادْ وَ بَنَاتْ آخَرِينْ.
26وَكِتْ تَارَحْ عِنْدَهْ 70 سَنَةْ، هُو وِلِدْ أَبْرَامْ وَ نَاحُورْ وَ هَرَّانْ.
ذُرّية تَارَح
27دَاهُو ذُرِّيَّةْ تَارَحْ. تَارَحْ وِلِدْ أَبْرَامْ وَ نَاحُورْ وَ هَرَّانْ. وَ هَرَّانْ وِلِدْ لُوطْ. 28وَ هَرَّانْ مَاتْ فِي الْبَلَدْ الْوِلْدَوْه فَوْقهَا فِي أُورْ الْكَلْدَانِيِّينْ وَكِتْ أَبُوهْ لِسَّاعْ قَاعِدْ حَيّ.
29أَبْرَامْ وَ نَاحُورْ أَخَدَوْا. مَرِةْ أَبْرَامْ أُسُمْهَا سَارَايْ وَ مَرِةْ نَاحُورْ أُسُمْهَا مِلْكَةْ بِنَيَّةْ هَرَّانْ. وَ هَرَّانْ دَا، هُو أَبُو مِلْكَةْ وَ أَبُو يِسْكَةْ كُلَ. 30وَ سَارَايْ هِي عَاقْرَةْ مَا وِلْدَتْ.
31وَ فِي الْوَكِتْ دَا، تَارَحْ شَالْ مَعَايَهْ وِلَيْدَهْ أَبْرَامْ وَ لُوطْ وِلَيْد وِلَيْدَهْ هَرَّانْ وَ سَارَايْ مَرِةْ وِلَيْدَهْ أَبْرَامْ. وَ مَرَقَوْا سَوَا مِنْ أُورْ الْكَلْدَانِيِّينْ وَ مَشَوْا عَلَيْ دَارْ كَنْعَانْ. وَ وَصَّلَوْا فِي حِلَّةْ حَارَانْ الْقَاعِدَةْ فِي دَرِبْ كَنْعَانْ وَ سَكَنَوْا فَوْقهَا. 32وَ فِي الْبَكَانْ دَا، تَارَحْ مَاتْ فِي حِلَّةْ حَارَانْ وَ عِنْدَهْ 205 سَنَةْ.
Zur Zeit ausgewählt:
تكوين 11: ع.د.ت19
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en arabe tchadien © Alliance biblique du Tchad, 2019
