Matthew 26

Jesu tha tikwat ma tathin

(Mark 14:1,2; Luke 22:1,2; John 11:45–53)

1Jesu aa iri raaq tang raa jin bat jio, piq aa ujiphantey tang ma batta, 2“Nim aa samtol eq inn mal, saalni jio Ulit kut aa kan etho Miqna Sa tha bólq sho bot rangma thalo na.”

3Etho ajong tingwa tang etho miqlang tang eq, Caiaphas himthal na rong thajoq ta. Piq ajong tingwa tang solwa angta. 4Etho Jesu raa dipkup thalo eq tik wat chakma, ning jaktung shina rong wan ta. 5Etharin ning rong raaq ta, “Ulit kut aa kan rangham ro som ching ang moq, chammatakoi miqtang raa ringrak wang na.”

Jesu Bethany na

(Mark 14:3–9; John 12:1–8)

6Jesu Bethany na Simon himna angta, piq sha jakho angam tak angta. 7Eshi rangham tho, miqnu ashey eq thangchan atim angam chi tung tha som eq urelnáng kata etho piq til satma sey tong atho piq kho shina jik ta. 8Esha khi eq ujiphantey tang kha eq raaq ta, “Iri chamlang ma tashit chak aa? 9Ira ahan ngin o sang eq ngin tha tangshit tang ma jin phal kot eq wang ta.”

10Jesu aa ira sam eq ning ma batta, “Iri miqnu ri ma chamlang ma rong raaq inn? Piq aa i jamoq jaqhal somta. 11Tangshit miqtang sha nim jamna salwet tong na, etharin nga nim jamoq salwet tong mong ang náng. 12Piq aa ihanphung sho atim angam chi shat ta raa, ibung rangma kacha somta. 13Nga nim ma asing batphang, iri mingkang barina tungtang qhal phan ajo, piq aa som ta raaq sha tasik eq na.”

Judas aa Jesu tha thalot ma bat shing aa

(Mark 14:10,11; Luke 22:3–6)

14Ethi jio asi ani ujiphantey tang wang ashey Judas Iscariot sha ajong tingwa tang relnáng kata, 15etho piq aa pitta, “Nga Jesu raa nim jak eq thalo phang jo, nga ma chamlang kopha nin?” Ning aa roktom cha nginsa tha wet eq kota. 16Piq aa ethi jiwang Jesu thalot ma rangham sey bita.

Ujiphantey Tang Jamoq Uthun Ulit Phaksat

(Mark 14:12–21; Luke 22:7–13,21–23; John 13:21–30)

17Wung moq phan ban kut aa kan saalshey ang atho, ujiphantey tang Jesu relnáng ka eq pitta, “Í aa Ulit kut aa kan phaksat barina ban kacha shing ma nang aa tathin u?”

18Piq aa batta, “Ajong samhaq wang ashey miqwa relnáng ka eq piq ma bat inn, ‘Tatalteywa bat aa, i rangham arelna sey. Nga ni ijiphantey tang bahim na Ulit phaksat phaksa ma ta i.’”

19Ujiphantey tang aa Jesu aa batta thimal hun somta etho Ulit phaksat sha ban kacha ta.

20Rang sey ja atho, Jesu aa wa si wani ujiphantey tang jam tho phaksat ma tong ta. 21Ning aa phaksa chey atho, piq aa batta, “Nga nim ma asing batphang, nim jaktung wang ashey eq nga raa thalo phanáng.”

22Ning tin rapney shitta etho ning thaji aa piq ma pitta, “Teyhungwa, eshi nga i?”

23Piq aa thawel batta, “Utang eq iri khung wang i jamoq tim eq phak aa, piq aa nga raa thalo phanáng. 24Asang likwit na chamal bat aa, Miqna Sa irimal wang tina; etharin bari miq eq Miqna Sa thalo na, piq rangma chamtan tsamnang angna! Piq chang moq angta jo aqhal ang wang ta!”

25Piq thalot tey wa Judas aa batta, “Tatalteywa, eshi nga i?”

Jesu aa piq ma batta, “Nang aa battu.”

Teyhungwa phaksat

(Mark 14:22–26; Luke 22:14–20; 1 Corinthians 11:23–25)

26Ning aa rong phaksat chey atho Jesu aa banlo tha somta, etho kechu ajong kot eq pin ta, etho ujiphantey tang thima kot eq batta, “Iri som inn, ira ihanngam.”

27Ethi jio piq aa kok tha som eq kechu ajong kota etho ning ma ko eq batta, “Nim thaji aa iri wang ling inn. 28Chammatakoi ira i tahi etho ira Shkewa raaqkhak sha qhak aa, etho ira miqtang thaji ngarey tha tolchak ma tasal aa. 29Nga nim ma batphang, thang wang nim jamoq Iwa Mungtan na anal sutichi ling saal náng thula, nga iri suti chi raa ling mong ang náng.”

30Ning Shkewa tasapsey sungsey ta etho Mount Olive kan náng kata.

Jesu aa Peter ma raaqtóng aa

(Mark 14:27–31; Luke 22:31–34; John 13:36–38)

31Jesu aa ning ma batta, “Nim thaji thaney rangpal o nga raa shingchak eq jol chuwang nin, chammatakoi Asang likwit na thawit ang aa,

‘Nga kelwut rimtey sha tikwat náng,

etho kelwut tang sha rong pan jol chuwang na.’”

32 “Etharin nga wey jey jio, nim náng eq jakho Galilee náng kanáng.”

33Peter aa piq ma batta, “Miqtang thaji eq nang shingchak phu jo tho, nga baluk otho nang shingchak pha mong ang náng.”

34Jesu aa piq ma batta, “Nga nang ma asing batphang, thaney rangpal o wo wal wey moq jakho, nang aa nga raa sampha mong ta juktom hutdip nu.”

35Peter aa piq ma batta, “Nga ba jamoq utik ang jo tho, nga nang shingchak pha mong ang náng.”

Etho ujiphantey tang thaji aa eshimal hun batta.

Jesu aa Gethsemane na romtam chu aa

(Mark 14:32–42; Luke 22:39–46)

36Jesu ujiphantey tang jamoq Gethsemane náng kata, etho ning ma batta, “Nga romtam chu eq wel wey mong nángduk, iro hun tong inn.” 37Jesu aa Peter ni Zebedee sa ani tha ujam tho solkat ta etho utin rapney shit ta. 38Piq aa ning thima batta, “Utik mal, i tin rapney shit aa. Nim iro hun tong inn etho i jamoq rok thing phin.”

39Piq amaan sa alo náng wey ka eq usham anim náng eq haq sho bonta etho romtam chuta, “Iwa, jin hel eq u jo, iri tsamnang kok ri i relwang hel chak u. Etharin nga chammal tathin ang shimal ang moq, nang aa chammal tathin u shimal cham ang aa.”

40Piq ujiphantey tang jamnáng wel atho, ning ujib ang atha khita etho piq aa Peter ma batta, “Nang i jamoq chomrey sa tho jin thing pha mu i? 41Athing eq tong inn, etho nim tari o qhat moq angma ban eq romtam chu inn. Nim tsija tha kacha chol, etharin hanphung sha anung.”

42Jesu wey ka eq romtam chuta, “Iwa, nga ling hunga iri tsamnang kok raa jin tahel moq ang ajo, ba tinthin shimal cham ang aa.” 43Piq wey wel atho ujiphantey tang tha ujib kam chongta, chammatakoi ning tasil wang eq miik tha tho jin kal moq angta.

44Ning tha shingchak eq Jesu wey qhing ang chuwang ta, etho eshi raaq tha hun juktom romtam wey chuta. 45Ethi jio piq ujiphantey tang relnáng ka eq ning ma batta, “Jib ro sey ang inn i etho nángtong ang inn i? Etharin siin inn, rangham tha arelna sey etho Miqna Sa tha ngarey miqtang jaknáng kochak na. 46Shat inn, ka i. Siin inn, nga sangtey wa tha i relnáng sey ka pha.”

Jesu tha lo aa

(Mark 14:43–50; Luke 22:47–53; John 18:3–12)

47Jesu raaq chey atho, wasi wani ujiphantey tang wang ashey Judas tha thuta, etho ujam thina ajong tingwa tang etho miqlang tang aa takat miqtang jan ni kantha som eq thuta. 48Sangchak tey miq eq ethi miqtang thima bat shing ta, “Bari sham ro nga chep ang, esha lo inn.”

49Judas kalo Jesu relnáng ka eq batta, “Tatalteywa, nungmay cham ang aa.” Etho piq aa Jesu tha chep ta.

50Jesu aa piq ma batta, “I nokwa, bari jaksom rangma nang thuta phu, kalo som u.”

Ethi jio ning urelnáng ka eq Jesu tha lota etho achak eq khak ta. 51Jesu ujiphantey tang wang ashey eq ujak thalo eq jan tha lat ta etho ajong tingwa tang solwa sanga naq tha pit duk chakta. 52Jesu aa piq ma batta, “Ba jan ni uhi náng shingchak u, chammatakoi utang eq tho jan eq duk aa, ning tha jan eq hun tathun chak na. 53Nang aa sam mu i, nga Iwa jakwang nong jin chuk eq náng etho piq aa kalo asi ani rangkamwa tang waan sha i relnáng jin ta kat eq na. 54Etharin Asang likwit na eshimal ang ching ta taka ajo, eshimal hun cham tahom aa.”

55Eshi rangham tho Jesu aa miqtang thima batta, “Nim ahut apang lo aa thimal jan ni kantha som eq nga lot ma kata phin i? Nga salwet rangnuk himna tong eq tatal kotáng, etho nim aa lo pha min ang tin. 56Etharin eshi tang sha rangsamal tang raaq asing angma angta.”

Ethi jio ujiphantey tang thaji piq tha shingchak eq jol chuwang ta.

Jesu sha Jehudi rong miqtang jakho na

(Mark 14:53–65; Luke 22:54,55,63–71; John 18:13,14,19–24)

57Jesu lottey tang aa piq tha ajong tingwa tang solwa Caiaphas him relnáng solkat ta. Ethina thong tataltey tang nia miqlang tang rong thajoq ta. 58Peter alo o piq jiji ajong tingwa tang solwa himthal náng thula kata. Piq himthal mong thináng wáng eq chamal angna ta siin ma, him bantey tang jam tho rok tong ta. 59Ajong tingwa tang etho Jehudi rong miqtang they Jesu tha tikwat rangma alik manphan kap ma alik akuk miq bita. 60Alik akuk miqtang tat thuta etha otho tikwat ma alik manphan kap moq angta. Jio miq ani thuta. 61Etho ning aa batta, “Iri miq rey batta, ‘Nga Shkewa rangnuk him sha thak eq saltom o wey hun eq náng.’”

62Ajong tingwa tang solwa lang eq Jesu ma batta, “Ning aa ba tung aa raaq bara aja raaq bat aa, nang aa chamta tho thawel ko mu i?” 63Etharin Jesu shu shu tong ta. Req ajong tingwa tang solwa aa piq ma batta, “Nang Shkewa Miqwasa Khristo ang ujo, thang aa Atharang Shkewa miing o í ma bat ko phu.”

64Jesu aa piq ma batta, “Nang hun thang aa raaq tu, etharin nga nang ma ira tho bat eq phang, thang wang nang aa Miqna Sa sha Tarong wa jakqhak o tong atha kap khi nu, etho rangkan phun o kapha tha kap khi nu.”

65Eshi raaq tha kap tat eq ajong tingwa tang solwa aa ukhat tha ching eq batta, “Piq aa Shkewa tha junnam eq batta! Thanga hiqtang ma adak miikkhi tey ràa moq sey. Nim aa thanga Shkewa ngeng eq raaq ta tha tat tin. 66Nim aa chamta tathin inn?”

Ning aa thawel batta, “Piq raa ajat etho tatik eq ching hun.”

67Ethi jio ning aa usham tho thuk ta etho piq tha watta, etho miq dak eq bangwat ta, 68etho batta, “Khristo, raaqtóng eq bat u, utang eq bangwat ta phu.”

Peter Jesu raa sam mong ta bat aa

(Mark 14:66–72; Luke 22:56–62; John 18:15–18,25–27)

69Peter ajong tingwa tang solwa himthal kang na tong chey atho, ashey sanga miqnu urelnáng ka eq batta, “Nang tho Galilee na Jesu jamna ang tu.”

70Etharin Peter aa miq thaji rel tho lik eq batta, “Nang chamta raaq chey u, nga sam mong.” 71Etho piq himthal pal kalung relnáng ka atho, adak miqnu ashey eq piq tha khi eq batta, “Ira tho Nazareth wa Jesu jam na angta.”

72Piq rangtum eq wey lik ta, “Nga iri miq raa sam mong.”

73Chomrey jio eshina lang ta miqtang they Peter relnáng ka eq piq ma batta, “Asing eq nang tho piq jamwang, chammatakoi batung ba raaq rey nang raa jin tapu pha mu.”

74Ethi jio piq aa piq ni piq ma manthun ko eq ráng wey tum ta, “Nga iri miq raa sam mong.”

Etho kalo wo tha ley wal ta. 75Etho Jesu aa batta raaq tha Peter aa tasik ta, “Wo wal wey moq jakho nang aa nga rima juktom lik eq bat nu.” Etho piq ran náng ka eq rapney qhap ta.

Zur Zeit ausgewählt:

Matthew 26: Mmmm

Markierung

Kopieren