Nau Ntơm 14
14
Nau tâm lơh phung hađăch ndrăng hađăch
1Tâm rnôk Y-Amraphel ƀư hađăch n'gor Sinar,#14:1 Sinar jêng Babilôn. Y-Ariôk ƀư hađăch ƀon Êlasar, Y-Kêdôr-lômer ƀư hađăch ƀon Êlam, jêh ri Y-Tidal ƀư hađăch ƀon Gôim, 2khân păng tâm lăp băl ŭch tâm lơh đah Y-Bêra hađăch ƀon Sôdôm, Y-Birsa hađăch ƀon Gômôrơ, Y-Sinap hađăch ƀon Adma, Y-Sêmêber hađăch ƀon Sêbôim, jêh ri hađăch ƀon Bêla, jêng Sôar. 3Prăm hađăch lĕ nkoch jêh khân păng rgum băl ta rlŭng Siđim, jêng Dak Mƀŭt Khĭt.#14:3 Nrn: Dak Mƀŭt Boh. 4Khân păng hŏ tông bâr hađăch Kêdôr-lômer tâm jât ma bar năm, ƀiălah tât năm jât mpe, khân păng ƀư nau tâm rdâng. 5Tât năm jât mpuăn, Y-Kêdôr-lômer jêh ri phung hađăch mpeh băl păng djôt leo tahan hăn tâm lơh đah phung Rêphaim ta Astarôt-Karnam, phung Susim ta ntŭk Ham, phung Êmim ta neh lâng Savê-Kiriathaim, 6jêh ri phung Hôrit tâm n'gor dor yôk Sêir, n'hot tât ta Êl-Paran, êp ta n'har bri đah bri rdah. 7Jêh nây khân păng plơ̆ sĭt ta Dak N'hor Phat Dôih,#14:7 Nrn: Ênmispat. jêng Kadês, hăn pit lĕ n'gor phung Amalek jêh ri phung Amôrit dôl gŭ ta Hasasôn Tamar. 8Phung hađăch ƀon Sôdôm, Gômôrơ, Adma, Sêbôim jêh ri Bêla, jêng ƀon Sôar, tâm rnglăp ndrel nau dơi jêh ri dăp tahan khân păng ta rlŭng Siđim 9gay tâm rdâng đah hađăch Kêdôr-lômer ƀon Êlam, hađăch Tidal ƀon Gôim, hađăch Amraphel ƀon Sinar, jêh ri hađăch Ariôk ƀon Êlasar; tâm puăn nuyh hađăch dơi lơn tâm lơh đah prăm nuyh hađăch. 10Tâm rlŭng Siđim geh âk ntu dâng dak chai blĭt; nôk tâm lơh dơi bu du nchuăt, hađăch ƀon Sôdôm jêh ri hađăch ƀon Gômôrơ tŭp tâm ntu nây, phung hôm e nchuăt du hao klơ yôk. 11Puăn hađăch nây sŏk lĕ drăp ndơ jêh ri ndơ sông sa Sôdôm jêh ri Gômôrơ, jêh nây hăn sĭt. 12Khân păng nhŭp đŏng Y-Lot, mon Y-abram, dôl gŭ ta Sôdôm, djôt leo nđâp ma drăp ndơ păng.
Y-Abram rklaih Y-Lot
13Geh du huê nơm dơi klaih văch mbơh ma Y-Abram, bunuyh Hêbrơ. Y-Abram dôl gŭ rêh dăch ndru tơm guyh ta Mamrê, bunuyh Amôrit, nâu Y-Êskôl jêh ri Y-Aner; lĕ pe nuyh aơ khân păng tâm rnglăp jêh đah Y-Abram. 14Tơlah Y-Abram tăng lư bu nhŭp jêh mon păng, Y-Abram rgum lĕ phung pah kan hŏ nti jêh, geh pe rhiăng jât pham bunuyh, jêh ri hăn tĭng rgot phung hađăch nây tât ta ƀon Dan. 15Y-Abram tâm pă tahan, nôk măng ăn phung oh mon hăn lơh jêh ri hăn tĭng lơh phung rlăng tât ta ƀon Hôba, gŭ mpeh bơh lơ ƀon Damas. 16Păng sŏk sĭt lĕ rngôch drăp ndơ, jêh ri njŭn Y-Lot mon păng nđâp ma drăp ndơ, phung bu ur jêh ri phung ƀon lan plơ̆ sĭt.
Y-Mêlkisedek
17Jêh Y-Abram dơi tâm lơh đah Y-Kêdôr-lômer jêh ri lĕ phung hađăch ndrel ma păng plơ̆ sĭt, hađăch ƀon Sôdôm luh hăn vơt Y-Abram ta rlŭng Savê, jêng rlŭng Hađăch.
18Mêlkisedek, hađăch ƀon Salem, ăt jêng kôranh ƀư brah ma Brah Ndu Dŭt Prêh, djôt leo piăng let jêh ri ndrănh hăn vơt,#Hêb 7:1-10. 19jêh ri ăn nau ueh uĭn ma Y-Abram. Păng lah:
“Dăn ma Brah Ndu Dŭt Prêh, Nơm rhăk njêng trôk jêh ri neh ntu,
Ăn nau ueh uĭn ma Y-Abram!
20Tâm rnê ma Brah Ndu Dŭt Prêh
Nơm hŏ jao phung rlăng tâm ti may!”
Y-Abram nhhơr ma hađăch du kô̆ tâm jât lĕ ndơ sŏk jêh. 21Hađăch ƀon Sôdôm lah ma Y-Abram: “May knŏng jao tay bunuyh ma gâp, bi ma drăp ndơ may djôt prăp.” 22Ƀiălah Y-Abram lah ma hađăch ƀon Sôdôm: “Gâp hŏ yơr ti tanăp măt Yêhôva Brah Ndu Dŭt Prêh, Nơm rhăk jêng trôk jêh ri neh ntu, jêh ri ton pô aơ 23gâp mâu geh sŏk ôh moh ntil ndơ bơh hađăch, mâu lah du njăr rse brai, mâu lah du njăr rse kât ntâu jot kađôi, klach lah hađăch lah: ‘Gâp n'hao drŏng ma Y-Abram’. 24Gâp mâu dơn du ntil ndơ ôh knŏng moh ndơ phung ndăm gâp lĕ sa, jêh ri ndơ pă ma phung hăn ndrel ma gâp, jêng Y-Aner, Y-Êskôl jêh ri Y-Mamrê; ăn hom ma khân păng dơn ndơ khân păng nơm.”
Zur Zeit ausgewählt:
Nau Ntơm 14: CMO2023
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023 United Bible Societies. All rights reserved.
