Ja̰ 2
2
Ɓaar tɨ Kana
1Ɗa̰y tɨ tedi tɨ plaa, a ka ɓaar tɨ Kana, tɨ lɔr nəgri sul tɨ Galile. Jesu na na̰ kaw wo tɨ ɓaar un la. 2A hom Jesu la ər bi tɨ wa̰y edɨ la, tɨ ɓaar un. 3Na lula sul paa gɨna, ham tɨ ɓaar tong. Jesu na̰ ja gɨ ər ɓə: «A ham tɨ ɓaar tong.» 4Jesu duga gɨ ər na̰ ɓə: «Ii, kəyjo əm taam tɨ ən ndɔ a? Ən lula sul lɛm ɗang lo.» 5Jesu na na̰ ja gɨ bi tɨ mum ɓaan ɓə: «Yḭ ka mum gun ne ər ɓla gɨ i tɨ kar.» 6Tɨ un ɗay, Juyb-a na baylɔr mika tɨ ndula ugu ne a kaw na kura wo tɨ nin. Baylɔr ɓudu lɛm ndu sula damsal#2.6 Damsal ɓudu so ndu litɨr ul ndidi. mika. 7Jesu ja gɨ bi tɨ mum ɓaan: «I sir baylɔr ton na ndu.» A ka ndu par baylɔr mu tɨ ndal. 8Gɨna Jesu ja gɨ a: «Yḭ ka ɓa̰ ndḛni i naa gɨ wo ne so ɓaar sul.» Bi tɨ mum ɓaan kaw a ka kuna ər ja gɨ a la. 9Wo ne so ɓaar sul lang ndu gɨna, ndu duga tɨ ham. Lɛ ər una un ne ham ne wag tɨ nin lo. Bi tɨ mum ɓaan ne cebɨn ndu tɨ baylɔr hul gɨna, a una wa̰y ne ka paa ɓari. Gɨna wo ne so ɓaar sul soon wo tɨ ii 10ər ja gɨ ər: «Hiina yḭ ɓə ham larmani ɓaan toni barita gorne ham ka bi ji ta ɓə ne laar lo lɔ ɓaan tɨ pla, lɛ ka wa ta yim ɓaw ham ndinimani marway na lula sul ne a!»
11Ne tɨ wa̰y ne ɓɔrji ne toni mani ne Jesu ka tɨ Kana, tɨ lɔr nəgri sul tɨ Galile. Jesu ka wa̰y ne tɨ gɨ a ər dwari ɓla la ka ər bi tɨ wa̰y edɨ ko ər hul la. 12Lɔ tɨ plaa, ər si tɨ Kapɛrnom na ər na̰ la ər ɓungɨ la, ta ər bi tɨ wa̰y edɨ la. A ti tɨ un ɗay ɗa̰y dɨbla lo.
Jesu kun bi tɨ cingɨ kar tɨ Ndɨla li hul
Mat 21.12-13; Mrk 11.15-17; Luk 19.45-46
13Juyb-a pya̰ tɨ Pak#2.13 Juyb-a na pya̰ tɨ kar. tɨ ndog, Jesu si tɨ Jerusalɛm. 14Ər ten bi tɨ yḛ cingɨ kar la, bi tɨ həm cingɨ kar la, bi tɨ gugoli cingɨ kar la, ta bi tɨ gursu yɛr la tɨ Ndɨla li jal hul. 15Gɨna Jesu ka ngaar suwal ər kun na a gun tɨ Ndɨla li jaal hul. Ər bra bi tɨ gursu yɛr na gursu la a ko̰ygɨ tɨ gursu yɛr la. 16Ər ja gɨ bi tɨ gugoli cingɨ kar ɓə: «Yḭ to mum ne gun tɨ un ne! I ka ən Ba na li kar kuna un tɨ cingɨ kar lo!» 17La ər bi tɨ wa̰y edɨ jani ho̰ni tɨ jaa ne a ja tɨ Ndɨla maktub hul toni ɓə: «Ndɨla, ən ka əm li hul kum dɨbla nari. Kumkar ne ko ən bləm-bləm kuna laa no̰.#2.17 Psa 69.10»
18Gɨna Juyb-a na woom ɓiri ər: «Kəy wa̰y ne ɓɔrji jo əm ɓə kar tɨ gɨ i ɓla ɓə yim na ul mu tɨ wa̰y ne kar a?» 19Jesu duga gɨ a: «I yuga Ndɨla li ne, la na ɗa̰y tɨ tedi hul ən ɓə duga kaaw.» 20Gɨna Juyb-a ja gɨ ər ɓə: «Yini kaw li ne an duk so kar mika, ta yim ja ɓə əm ɓə duga kaaw na ɗa̰y tɨ tedi hul ngoy a?» 21Lɛ Jesu ja jaa tuna Ndɨla li sul lo lɛ, ər ja jaa tuna ər ndula ya̰m sul. 22Nejo, gorne Jesu duga wag tɨ bi tɨ ulu daan gɨna, ər bi tɨ wa̰y edɨ ho̰ni jani ɓə ər ja jaa ne toni teni. A ko Ndɨla maktub hul la, a ko Jesu na jaa ne ər ja hul la.
Jesu una bi nirimu
23Gorne Jesu wo tɨ Jerusalɛm na ɗa̰y tɨ pya̰ tɨ Pak kar, bi dɨbla ko a hul na ər ndil kəysul, a ləg mum ne ɓɔrji dɨbla ne ər ka. 24Lɛ Jesu ko a hul lo kəysul ər una a gun. 25Ər taam ɓə wo ka gɨ ər jaa ja tuna wo sul lo, yḭr mar, una wa̰y ne wo tɨ wo ɓari nirimu.
Zur Zeit ausgewählt:
Ja̰ 2: nie
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, ATALTRAB
