ಮತ್ತಾಯ 5
5
ಪರ್ಬತ್‌ನಿ ಉಪದೇಶ್‌
1ಯೇಸುನೆ ಅದ್ಮಿನಿ ಝೂ಼ಂಡೆನ ದೇಖಿನ್‌, ಪಹಾಡ್‌ಪರ್ ಚ಼ಢೀನ್‌ ಬೆಶಿಗಯೊ. ತದೆ ಇನ ಶಿಷ್ಯರ್‌ ಆಯಿನ್, ಇನ ಅಶ್‌ಪಿಶ್‌ ಭರಾಯ, 2ತದೆ ಯೇಸುನೆ ಇವ್ಣುನ ಶಾತ್ ಬೋಲಿಶಿಕಾಡ್ಯೊಕತೊ,
ಖ್ಹಾಚಿ ಖ್ಹುಶಿ
(ಲೂಕ 6:20-23)
3“ಕೋಣ್ ಆತ್ಮಮ ಗರೀಬ್ ಹುಯಿರ‍್ಹವಾಳ, ಇವ್ಣೆ ಖ್ಹುಶಾಲಿವಾಳು ಹುಯಿರ್ಹುಸ್;
ಸೊರ್ಗ ರಾಜ್ಯ ಇವ್ಣುಸ್‌ ಹುಯಿರ್ಹುಸ್!
4ಕೋಣ್ ದುಖ್‌ಮ ಛಾ಼ಕಿ, ಇವ್ಣೆ ಧನ್ಯ ಹುಯಿರ್ಹುಸ್
ದೇವ್ ಇವ್ಣುನ ಸಮಾಧಾನ್ ದಿಶೆ.
5ಖ್ಹಮಾಳಿಲ್ಯವಾಳು ಧನ್ಯ, ಇವ್ಣೆ ಧರ್ತಿಪರ್ ಖ್ಹುಶಾಲಿವಾಳು ಹುಯಿರ್ಹುಸ್.
ದೇವ್ನೆ ಶಾತ್ ವಾತೆ ದೀರಾಖ್ಯೊಸ್ಕಿ, ಯೋ ಇವ್ಣುನ ಮಳ್‌ಶೆ.
6ಕೋಣ್ ದೇವ್ನಿ ಮರ್ಜಿನಿಘೋಣಿ ಕರಾನ ಘಣು ಆಖ್ಹ್ ಕರಾಸ್ಕಿ, ಇವ್ಣೆ ಧನ್ಯ ಹುಯಿರ್ಹಾಸ್;
ದೇವ್ ಇವ್ಣುನ ಹಕ್ಲಾಲ್‌ ಹುವಾನಿತರ ಕರ್ಶೆ.
7ಕೋಣ್ ಬಿಜಾ಼ನ ಗೋರ್‌ ಕರಾಸ್ಕಿ, ಇವ್ಣೆ ಖ್ಹುಶಾಲಿವಾಳು ಹುಯಿರ್ಹುಸ್.
ದೇವ್ ಇವ್ಣಾಪರ್ ಗೋರ್‌ ಕರ್ಶೆ!
8ಕೋಣ್ ದಿಲ್ಮ ಪಾಕ್‌ ರ‍್ಹೇಸ್ಕಿ, ಇವ್ಣೆ ಖ್ಹುಶಾಲಿವಾಳು ಹುಯಿರ್ಹುಸ್.
ಇವ್ಣೆ ದೇವ್ನ ದೇಕ್‌ಶೆ;
9ಕೋಣ್ ಸಮಾಧಾನ್ ಕರಾನ ಮ್ಹಿನತ್ ಕರಸ್ಕಿ, ಇವ್ಣೆ ಖ್ಹುಶಾಲಿವಾಳು ಹುಯಿರ್ಹುಸ್,
ಇವ್ಣೆ ದೇವ್ನ ಲಡ್ಕಕರಿ ಬೋಲೈಲಿಶೆ.
10ಕೋಣ್ ದೇವ್ನಿ ಮರ್ಜಿನಿಘೋಣಿ ರ‍್ಹವಾನಖ್ಹಾಜೆ ಖ್ಹತಾಪ್ಣಿನ ಖ್ಹಮಾಳಿಲೇಸ್ಕಿ, ಇವ್ಣೆ ಖ್ಹುಶಾಲಿವಾಳು ಹುಯಿರ್ಹುಸ್.
ಸೊರ್ಗ ರಾಜ್ಯ ಇವ್ಣುಸ್‌ ಹುಯಿರ್ಹುಸ್!
11“ಮಾರ ಖ್ಹಾಜೇಥಿ ಅದ್ಮಿಖ್ಹಾರು ತುಮೂನ ಖ್ಹರಮ್‌ ಕಾಡಿನ್, ಖ್ಹತೈನ್, ತುಮಾರಪರ್ ಖ್ಹಾರಿಸ್ ತರ‍್ಹಾನು ಖರಾಬ್ನ ಬೋಲಿನ್, ಝೂ಼ಟಿ ಲಗಾಡ್ಯುತೊ, ತುಮೆ ಧನ್ಯ ಹುಯಿರ್ಹಾಸ್. 12ಖ್ಹುಶಿ ಕರೊ ಅಜು಼ ಖೇಲ್‌ಕೂದ್ ಕರೊ, ಶನಕತೊ ಸೊರ್ಗಾಮ ತುಮೂನ ಘಣು ಇನಾಮ್ ಮಳ್‌ಶೆ. ತುಮಾರೇಥೀಬಿ ಅಗಾಡಿ ಥೂತೆ ಪ್ರವಾದಿಯೆನಾಬಿ ಅಮ್ಮಸ್ ಖ್ಹತಾಯುನಿ.
ಮೀಟ್‌ ಅಜು಼ ಉಜಾ಼ಳು
(ಮಾರ್ಕ 9:50; ಲೂಕ 14:34-35)
13ತುಮೆ ಧರ್ತಿನ#5:13 ಜ಼ಮೀನ್‌ಪರ್ ಛಾ಼ತೆ ಹರೇಕ್ ಅದ್ಮಿಕರಿ ಮತ್‌ಲಬ್. ಮೀಟ್‌ ಹುಯಿರ್ಹಾಸ್. ಮೀಟಸ್‌ ಫಿಕ್ಕು ಹುಯಿಗುತೊ, ಇನ ಬಿಜು಼ ಶನೇಥಿ ರುಚ಼್‍ ದ್ಯವಾನ ಉಶೆ? ಅದ್ಮಿಖ್ಹಾರು ಇನ ಭಾರ್‌ ನಾಖಿನ್ ವಾಟ್‌ಪರ್ ಚಾ಼ಲವಾಳು ಇನ ಖುಂದ್ಲಾನ ಲ್ಹಾಯಕ್‌ ಪಣ್ಕಿ ಬಿಜ಼ ಖೆವ ಕಾಮ್ನಾಬಿ ಕೋಆವಾನಿ.
14“ತುಮೆ ಹಿಡಿ ಜಗತ್ನ ಉಜಾ಼ಳು ಹುಯಿರ್ಹಾಸ್. ಪಹಾಡ್‌ಪರ್ ಭಂದೈರ‍್ಹುತೆ ಗಾಮ್‍ ಲಪಿರ‍್ಹೆಯಿಕೊಯ್ನಿ. 15ಅಜು಼ ಕೋಣ್‌ಬಿ ದೀವೊ ಲಗಾಡಿನ್, ಕೋಳ್ಗಾನಹೇಟ್ ಮ್ಹೇಲಾಕೊಯ್ನಿ; ಅನಬದಲ್ ಘರ್‌ಮ ಛಾ಼ತೆ ಹರೇಕ್ನ ಉಜಾ಼ಳು ದ್ಯವಾನಿತರ ದೀವೊ ಮ್ಹೇಲಾನಿ ಖಂಬಾಪರ್‌ ಮ್ಹೇಲಾಸ್. 16ಅಮ್ಮಸ್ ತುಮಾರು ಉಜಾ಼ಳು ಅದ್ಮಿನ ಖ್ಹಾಮ್ಣೆ ಉಜಾ಼ಖ್ಹ್‌ ಹುವಾದೆ, ಅನೇಥಿ ತುಮೆ ಕರಾತೆ ಅಛ್ಛು಼ಕಾಮ್ನ ಇವ್ಣೆ ದೇಖಿನ್‌, ಸೊರ್ಗಾಮ ಛಾ಼ತೆ ತುಮಾರ ಬಾನ ಖ್ಹರಾವ್‌ಶೆ.
ಖಾನುಲ್‍ನಿ ಬಾರೇಮ ಬೋಧನೆ
17ಮೋಶೇನು ಧರ್ಮಶಾಸ್ತ್ರನ ರ‍್ಹವೊ, ಪ್ರವಾದಿನು ಬೋಧನೆನ ರ‍್ಹವೊ, ಕಾಡಿನಾಖನಖ್ಹಾಜೆ ಮೇ ಆಯೋಕರಿ ನಕೊ ಸೋಚೊ. ಕಾಡಾನಖ್ಹಾಜೆ ಕಾಹೆ, ಇನ ಪೂರ ಕರಾನಖ್ಹಾಜೆ ಆಯೊ. 18ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಆಬ್ಬಿ ಧರ್ತಿ ಮಟಿಜಾ಼ಶೆ, ಧರ್ಮಶಾಸ್ತ್ರಮ ಛಾ಼ತೆ ಖ್ಹಾರುಸ್ ಚಾ಼ಲಾಲಗುಬಿ ಇನಮಾನು ಏಕ್ ನ್ಹಾನು ಲಿಖ್ಯೂಬಿ ರ‍್ಹವೊ, ನಾತೊ ಏಕ್ ಟಿಪ್‌ಕ್ಯುಬಿ ಮಟ್‌ಶೆ ಕೊಯ್ನಿ. 19ಇನಖ್ಹಾಜೇಸ್, ಆ ಹುಕುಮ್‌ನಿ ನ್ಹಾನಿಶಿ ಏಕ್ ವಾತ್ನಬಿ ಮ್ಹೇಲಿನ್ ಚಾ಼ಲವಾಳೊ ಅಜು಼ ಬಿಜಾ಼ನಾಬಿ ಇಮ್ಮಸ್ ಚಾ಼ಲಾನ ಶಿಕಾಡವಾಳೊ, ಸೊರ್ಗ ರಾಜ್ಯಮ ಖ್ಹಾರೇಥಿ ನ್ಹಾನೊ ಕರಿ ಬೋಲೈಲಿಶೆ. ಕತೋಬಿ ಯೋಸ್ ಯೋ ಹುಕುಮ್ನಿಮತ್ ಚಾ಼ಲಿನ್, ಬಿಜಾ಼ನಾಬಿ ಇಮ್ಮಸ್ ಚಾ಼ಲಾನ ಶಿಕಾಡವಾಳೊ, ಸೊರ್ಗ ರಾಜ್ಯಮ ಮಹಾನ್ ಕರಿ ಬೋಲೈಲಿಶೆ. 20ಮೇ ತುಮೂನ ಶಾತ್ ಬೋಲುಸ್‌ಕತೊ, ಮೋಶೆನಿ ಧರ್ಮಶಾಸ್ತ್ರ ಶಿಕಾಡವಾಳು ಪಂಡಿಥ್ಥಿಬಿ ಅಜು಼ ಫರಿಸಾಯರ್‌ನಿ ನೀತಿಥೀಬಿ ತುಮಾರಿ ನೀತಿ ಜಾ಼ಖ್ಹತ್ ನಾ ಹುಯಿರ‍್ಹೀಕತೊ, ತುಮೆ ಸೊರ್ಗ ರಾಜ್ಯಮ ಜಾ಼ಶುಕೊಯ್ನಿ.
ಖೀಜ಼್‌ನಿ ಬಾರೇಮ
(ಲೂಕ 12:57-59)
21“ಅದ್ಮಿನ ಖೂನಿ ನಾ ಕರ್ನು, ಇಮ್‌ ಖೂನಿಕರವಾಳನ ನ್ಯಾವ್‍ನಿ ತೀರ್ಪ್‌ನ ಭೀರಾಕ್‌ಶೆ’ ಕರಿ ತುಮಾರು ಶಾಣುಖ್ಹಾರು ಬೋಲಿರಾಖ್ಯುಸ್ತೆ ತುಮೆ ಖ್ಹಮ್‌ಜಿರಾಖ್ಯಾಸ್‌. 22ಕತೋಬಿ ಮೇ ತುಮೂನ ಶಾತ್ ಬೋಲಸ್‍ಕತೊ, ತುಮೆ ತುಮಾರ ಭೈಪರ್ ಖೀಜ಼್ ಖಾವಾಳೊ ಹರೇಕ್ ಜ಼ಣೋಬಿ ತುಮೆ ನ್ಯಾವ್‍ನಿ ತೀರ್ಪ್‌ಮ ಪಡ್‍ಶು, ಅಜು಼ ತುಮೆ ತುಮಾರ ಭೈನ, ‘ಏ ಬಿಣ್‍ಅಕ್ಲಿ’ ಕರಿ ಬೋಲ್ಯಾತೊ, ತುಮೂನ ನ್ಯಾವ್‍ನಿ ಸಭೆನಖ್ಹಾಮ್ಣೆ ಭೀರಾಕ್‌ಶೆ, ಅಜು಼, ‘ಏ ಫಾಲ್ತು’ ಕರಿ ಬೋಲವಾಳೊ, ನರಕ್‌ನಿ ಆಗ್‌ಮ ಪಡ್‌ಶೆ. 23ಇನಖ್ಹಾಜೇಸ್ ತೂ ತಾರಿ ಕಾಣ್ಕೆನ ಚಾ಼ಚ಼ರ್‌ನ ಖ್ಹಾಮ್ಣೆ ಲಾಯೊತೆ, ತಾರ ಭೈನ ದಿಲ್ಮ ತಾರಪರ್ ಶಾತ್ತೋಬಿ ವಹೇರ್‌ ಛಾ಼ ಕರಿ ತಾರಿ ಯಾದ್ಮ ಆಯುತೊ, 24ತು ತಾರಿ ಕಾಣ್ಕೆನ ಚಾ಼ಚ಼ರ್‌ನ ಖ್ಹಾಮ್ಣೆಸ್ ಮ್ಹೆಂದಿನ್, ಪಹಿಲೆ ಜೈ಼ನ್‌, ತಾರ ಭೈನ ಜೋ಼ಡೆ ಏಕ್‌ಹೂ. ಇನ ಬಾದ್‌ಮ ಐನ್, ತಾರಿ ಕಾಣ್ಕೆನ ದೇವ್ನ ದೇ.
25“ತಾರೊ ವಿರೋದಿ ತುನ ನ್ಯಾವ್ನಖ್ಹಾಜೆ ನ್ಯಾಯದೀಶಕನ ಖೇಚಿಲೀಜಾ಼ವನ ಅಗಾಡಿಸ್ ತೂ ವಾಟ್‌ಪರಸ್ ಹೇಳ್‍ಮೇಳ್‍ ಹುಯಿಜಾ಼. ನತರ್‌ಕಿ ತಾರೊ ವಿರೋದಿ ತುನ ನೈಯಾಕನ ಖೇಚಿಲಿಜಾ಼ಶೆ. ಯೋ ನಯ್ಯೊ ಜೇಲ್‌ನ ಶಿಪಾಯಿನ ಹಾತ್ಮ ದಿಶೆ ಅಜು಼ ತೂ ಜೇಲ್‌ಮ ಫೆಕೈಜೀಶ್. 26ತೂ ಏಕ್ ಕಾಖ್ಹ್‌ಬಿ ಬಚೈಶ್‍ಕೊಂತೆ ತಾರಾಮ ಛಾ಼ತೆ ಅಖ್ಖು ಪೈಶು ಫೇಡಾವಲಗೂಬಿ ಹಿಜ್ಜಾ಼ಥೊ ಆವಾನ ಉಶೇಸ್‍ ಕೊಯ್ನಿ ಕರಿ ಮೇ ಖ್ಹಾಚಮಾಬಿ ಬೋಲುಸ್.
ವ್ಯಬಿಚಾರ‍್ನಿ ಬಾರೇಮ
27“ವ್ಯಬಿಚಾರ್‌ ನಾ ಕರ್ನು’ ಕರಿ ಬೋಲಾಸ್ತೆ ಇನ ತುಮೆ ಖ್ಹಮ್‌ಜಿರಾಖ್ಯಾಸ್‌. 28ಕತೋಬಿ ಮೇ ತುಮೂನ ಬೋಲುಸ್ಕಿ, ಕೋಣ್‌ತೋಬಿ ಬಿಜಿ ತಯೇಡಾನ ದೇಖಿನ್‌, ಇನಾಪರ್ ಆಖ್ಹ್ ಕರ‍್ಯೋತೊ, ಯೋ ತದ್ದೇಸ್ ಇನ ಮನ್‌ಮ ಯೋ ತಯೇಡಾನಿ ಜೋ಼ಡೆ ವ್ಯಬಿಚಾರ್‌ ಕರಾವಾಳೊ ಹುಯಿರ‍್ಹೋಸ್. 29ತಾರೊ ಖಾವೊ ಡೋಳೊ ತುನ ಪಾಪ್‌ಮ ಖ್ಹಪ್‌ಡವಾನು ಉಶೇತೊ, ಇನ ಕಚ಼್‌ಕೋರಿ ಫೇಕಿದೆ, ತಾರು ಹಿಡೀ ಶರೀರ್ ನರಕ್ಮ ಪಡಾಥೀಬಿ, ತಾರು ಶರೀರ್ನು ಏಕ್ ಭಾಗ್‌ ನಾ ರ‍್ಹಯುತೋಬಿ ತುನ ಅಛ್ಛು಼ ಕಾಹೆಕಿ ಶು. 30ತಾರೊ ಖಾವೊ ಹಾತ್ ತುನ ಪಾಪ್‌ಮ ಖ್ಹಪ್‌ಡವಾನು ರ‍್ಹಿಯುತೊ, ಇನ ಕತ್ರೀನ್ ಫೇಕಿದೆ! ತಾರು ಹಿಡಿ ಶರೀರ್ ನರಕ್ಮ ಪಡಾಥೀಬಿ, ತಾರು ಶರೀರ್ನು ಏಕ್ ಭಾಗ್‌ ನಿಕ್ಳಿಜಾ಼ವಾನುಸ್‌ ತುನ ಅಛ್ಛು಼ ಕಾಹೆಕಿ ಶು.
ತಲಾಕ್‌ನಿ ಬಾರೇಮ
(ಮತ್ತಾಯ 19:9; ಮಾರ್ಕ 10:11-12; ಲೂಕ 16:18)
31ಇನಿ ಬಾವಣ್ಣ ಮ್ಹೇಲಿದ್ಯವಾಳೊ, ಇನ ತಲಾಕ್‌ನು ಕಾಗತ್‌ ಲೀಖಿದೀನ್‌ ಮ್ಹೇಲ್ನು ಕರಿ ಬೋಲೈರ‍್ಹುಸ್ ಎತ್ರೇಸ್. 32ಕತೋಬಿ ಮೇ ತುಮೂನ ಬೋಲುಸ್ಕಿ, ವ್ಯಬಿಚಾರ‍್ನಿ ಕಾರಣ್‌ ಕೊಂತೆಸ್ ಇನಿ ಬಾವಣ್ಣ ಮ್ಹೇಲಿದ್ಯವಾಳೊ ಯೋಸ್ ಇನಿ ಬಾವಣ್ಣ ವ್ಯಬಿಚಾರ್‌ಮ ಪಡಾನ ಜಿಮ್ಮೇದಾರಿ ಉಶೆ. ನಾಹುಯಿನ್ ಬಾವ್ರಿ ಮ್ಹೇಲಿಹುಯಿನ ವ್ಯಹಾ ಕರಿಲ್ಯವಳೋಬಿ ವ್ಯಬಿಚಾರಿ ಹುಯಿಜಾ಼ಸ್.
ಆಣ್‌ನಿ ಬಾರೇಮ
33“ಝೂ಼ಟಿ ಆಣ್ ನಾ ಲೇವ್ಣು ; ಕತೋಬಿ ತುಮೆ ಪ್ರಭುಕನ ಬೋಲಿಲಿದೋತೆ ತಿಮ್ಮಸ್ ಚಾ಼ಲಿಲೇವ್ಣು ಕರಿ ಗಯೋತೆ ಜ಼ಮಾನಾನ ಅದ್ಮಿಯೇವ್ನ ಬೋಲ್ಯುತೆ ತುಮುನ ಮಾಲುಮಸ್ ಛಾ಼ನಿ. 34ಕತೋಬಿ ಮೇ ತುಮೂನ ಬೋಲಾನು ಶಾತ್ಕತೊ, ಆಣೆಸ್ ನಾಲೇವ್ಣು. ಆಬ್‍ಪರ್‌ ಆಣ್ ನಕೊ ಲೇವೊ; ಯೋ ದೇವ್‌ನು ಸಿಂಹಾಸನ್. 35ಧರ್ತಿಪರ್ ಆಣ್ ಕರೋನಕೊ ಯೋ ದೇವ್‌ನು ಗೋಡಾಮ್ಹೇಲಾನು ಕುಡ್‌ಶಿ’ ಯೆರೂಸಲೇಮ್‌ಪರ್ ಆಣ್ ನಾ ಕರ್ನು, ಶನಕತೊ ಯೆರೂಸಲೇಮ್‌ ಯೋ ಮಹಾನ್ ರಾಜಾ಼ನು ನಂಗರ್ ಹುಯಿರ್ಹುಸ್. 36ತಾರ ಮಾಥಪರ್‌ಬಿ ಆಣ್ ನಾ ಲೇವ್ಣು; ಶನಕತೊ, ಏಕ್ ಕೇಖ್ಹ್‌ನ ಜಿನ್‌ಕುಬಿ ಧೋಳು ರ‍್ಹವೊ, ನತರ್‌ಕಿ ಕಾಳು ರ‍್ಹವೊ ಕರಾನ ತುನ ಕೊವುಶೇನಿ. 37ಕತೋಬಿ ತುಮಾರಿ ವಾತೆ ಹೋ ಕತೊ ಹೋ, ಕೊಯ್ನಿಕತೊ, ಕೊಯ್ನಿ ಕರಿ ರ‍್ಹೇವಾದೆ. ಅನೇಥಿ ಜಾ಼ಖ್ಹತ್ ಬೋಲ್ಯಾತೊ, ಯೋ ಶೈತಾನ್‌ಥಿ ಆಯುಹುಯು ಕರಿ.
ಬದ್‌ಲಾ ಲ್ಯಾವಾನಿ ಬಾರೇಮ
(ಲೂಕ 6:29-30)
38“ಡೋಳಾನ ಬದಲ್ ಡೋಳೊ, ದಾತ್ನ ಬದಲ್ ದಾತ್‌’ ಕಡಾವ್ಣು ಕರಿ ಬೋಲಿರಾಖ್ಯುಸ್ತೆ ಇನ ತುಮೆ ಖ್ಹಮ್‌ಜಿರಾಖ್ಯಾಸ್‌ ಎತ್ರೇಸ್. 39ಕತೋಬಿ ಮೇ ತುಮೂನ ಬೋಲಾನು ಶಾತ್ಕತೊ, ಕೋಣ್‌ತೋಬಿ ತುನ ಖರಾಬ್ ಕರ‍್ಯುತೊ, ಯೋ ಅದ್ಮಿನ ಬದ್‌ಲಾ ನಕೊ ಲೀಶ್‌. ಕೋಣ್‌ತೋಬಿ ಏಕ್‌ಜ಼ಣು ತಾರ ಖಾವಕಲ್ಲಪರ್ ಮಾರ‍್ಯುತೊ, ಇನ ಬಿಜೇಕ್ ಕಲ್ಲು ವತಾಳ್. 40ಅಜು಼ ಕೋಣ್‌ತೋಬಿ ತಾರ ಜೋ಼ಡೆ ಝಂಝಟ್‍ ಕರೀನ್, ತಾರ ಮಹಿನಲುಂಗ್ಡಾನ ಛೀನೈಲೇವ್ಣುಕರಿ ತೀರ್ಮಾನ್‌ ಕರವಾಳಾನ, ಉಪ್ಪರ್ ಪೇರ‍್ಹಿರಾಖ್ಯೋತೆ ಝ಼ಗ್ಗಾನಾಬಿ ಮ್ಹೆಂದೆ. 41ಏಕ್ ಜ಼ಣೊ ತುನ ಏಕ್ ಮೈಲ್ ದೂರ್ ಆವ್‌ಕರಿ ಜು಼ಲಮ್‌ ಕರ‍್ಯುತೊ ಇನಜೋ಼ಡೆ ಬೇ ಮೈಲ್ ದೂರ್ ಜಾ಼. 42ಕೋಣ್‌ತೋಬಿ ತಾರಕನ ಶಾತ್ತೋಬಿ ಮಾಂಗ್ಯುತೊ, ಇನ ದೇ; ತಾರಕನ ಕರಜ಼್ ಮಾಂಗವಾಳನ ಮ್ಹೋಡು ನಕೊ ಫರೈಲೀಶ್‌.
ದುಶ್‌ಮನ್ನ ಪ್ಯಾರ್ ಕರಾನಿಬಾರೇಮ
(ಲೂಕ 6:27-28,32-36)
43“ತಾರ ಭೀಡೆವಾಳಾನ ಪ್ಯಾರ್ ಕರ್‌ ಅಜು಼ ತಾರ ದುಶ್‌ಮನ್ನ ವಹೇರ್‌ ಕರ್ನು’ ಕರಿ ಬೋಲಿರಾಖ್ಯುಸ್ತೆ ಇನ ತುಮೆ ಖ್ಹಮ್‌ಜಿರಾಖ್ಯಾಸ್‌ ಎತ್ರೇಸ್. 44ಕತೋಬಿ ಮೇ ತುಮೂನ ಬೋಲಾನು ಶಾತ್ಕತೊ, ತುಮಾರ ದುಶ್‌ಮನ್ನ ಪ್ಯಾರ್ ಕರೊ; ತುಮೂನ ಖ್ಹತಾವವಾಳನಟೇಕೆ ದೇವ್ನ ಪ್ರಾರ್ಥನೆ ಕರೊ. 45ಅಮ್ ಕರ‍್ಯಾತೊ, ಪರ್‌ಲೋಕ್‌ಮ ಛಾ಼ತೆ ತುಮಾರ ಬಾನ ತುಮೆ ಲಡ್ಕಾಉಶು. ಯೋ ಖರಾಬ್ನ ಉಪ್ಪರ್‌ಬಿ ಅಛ್ಛಾ಼ನ ಉಪ್ಪರ್‌ಬಿ ಇನೊ ಚಾ಼ಂದ್ನು ಉಜಾ಼ಳು ಪಡಾನಿಘೋಣಿ ಕರಾಸ್, ನೀತಿವಾಳಾನ ಉಪ್ಪರ್‌ಬಿ ಅನೀತಿವಾಳಾನ ಉಪ್ಪರ್‌ಬಿ ಪಾಣಿ ವರ್ಖ್ಹಾವಸ್‌. 46ತುಮೂನ ಪ್ಯಾರ್ ಕರಾವಾಳನಾಸ್‌ ತುಮೆ ಪ್ಯಾರ್ ವತಾಳ್ಯಾತೊ ದೇವ್ ತುಮೂನ ಶನ ಇನಾಮ್ ದಿಶೆ? ಶುಂಕವಶೂಲ್‍ ಕರವಾಳುಬಿ ಅಮ್ಮಸ್ ಕರಾಸ್ನಿ! 47ತುಮೆ ಖಲಿ ತುಮಾರ ದೋಸ್ತಿ ಖ್ಹಾರಾನಾಸ್ ಮಾನ್-ಮರ‍್ಯಾದಿ ವತಾಳ್ಯಾತೊ, ಇನಾಮ ಶಾತ್ ಬಡೈಮಾರಿಲೆವಾನು ಛಾ಼? ದೇವ್ನ ಪರ್‌ಖ್ಯುಕೊಂತೆ ಅದ್ಮಿ ಖ್ಹಾರುಬಿ ಇಮ್ಮಸ್ ಕರಾಸ್ನಿ! 48ಇನಖ್ಹಾಜೇಸ್, ಪರಲೋಕ್‍ಮ ಛಾ಼ತೆ ತುಮಾರೊ ಬಾ ಖೆವಿಸ್ ಗಲ್ತಿಕೊಂತೆ ಛಾ಼ತೆ ಇಮ್‌, ತುಮೇಬಿ ಗಲ್ತಿಕೊಂತೆ ಇಮ್‌ ರ‍್ಹವೊ.
Zur Zeit ausgewählt:
ಮತ್ತಾಯ 5: NTWVe23
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The New Testament in Waghri Language © The Word for the World International and Waghri Translation Samiti, Karnataka, 2023.
