Luku 19

Zisas Ghe Zakiusi

1Zisas neke haghele Zeriko, neke ghahe fuludu ghu gilio ka malau fafaana ianimu. 2Kaike mane, babaolonana Zakiusi, neke auna aianimu. Manei mu neke mane kenuna ka ia pukuna dike hio takisiro, neke puina taghotagho ghu. 3Manei neke kabai fini va vehai Zisas, ghe vununa neke mane ponoena fuludu, neke deo ghu boka fini kalahurira ira varigharadi noni aianimu. 4Purudu kenu lao tuna ge la vona ghu ka ia heke sikamo, gheremena ia hangana ge la mato ghu aianimu, neke ghua, vununa Zisas neke ghahe vai lao aianimu mo.

5Ne la dufu ghu Zisas aianimu, manei neke mato vona ka Zakiusi, ghe neke kudoi nga ia babaolona. “!Zakiusi!” neke ghua manei. “!Magali hinae meha! Vununa ara a toraina age au ka sugauo agho ravata ini.”

6Magali ma neke hinae meha ghu Zakiusi, neke hio laoi ghu Zisas ka suganao ka ia va manemane nia va ghazaghaza. 7Ghe ira noni haroharo dike fininio dike muko vanadi, dike ngunungunu ghu. “Manei mu ta la mahai ini ka ia sugana ia mane ta kurui sasake,” dike ghua ghini.

8Ghe Zakiusi neke tetu vona, ghe neke kahe ghua nga iahi ka ia Lod, “Lod, ara a fotai ia taghotagho ka ara ghatu, a vanadi ghu ira ta kuma. Nia nato ke hio takisi va fuludu lao la seborira ira noni, ara a ke vanadi leghu rodana fafata tehi fuludu laorina nake hio tadiro.”

9Zisas neke ungene tughui, “Ia vari hio va doli ka God neto meha ka suga iahi ghatunaina, vununa mane iahi neto va podoli taghonai ta tuunamanena Ebarahamu. 10Ara ia Tuuna Noni mu, nake meha mala haduri nia hio va doliri ira noni ta ghahe va zea, taghe mane iahi la.”

Zisas Ne Tuturi Ghini Ia Ungene Talevara Ghidi Ira Tazo Noniriva

11Ia varigharana noni dike va melongo lao ngama ka ira vari va kakahei Zisas, neke to turi vanadi ghu manei kaike ungene talevara. Vununa manei neke to namoi Zerusalemu, neke turi ghini ghu kaike tuturi mala va lotorina ia ngangana ka ira noni ghini ia Ravutu ka God mu, to podolo ma ghatunaina lama, ia ta ghua. 12Neke kahe ghua ghu iahi manei, “Kaike manefaa neke lao ka kaike soloso varihau, mala meha mane ginitaukelana, ghe geke leghu nga. 13Ghe neke ghahe nga manei, neke kudo varighara ghidi ira tazo noniriva neke sopai vanadi rongo ghu, ta mala va tehirira ka ia fafata ta ghahe manei.#19:13Ta vananina kaike noniriva mu, kaike kunegele ta golu ta va kudo ghini mina. Iahi mu e varifata ka tabarana lito hihile.

14“Ghe ira noni ka ia soloso manei dike konokono ghini, dike va ghahe lao nonomoho ghu ka ia soloso varihau, mala la kaheina, ‘Ghai na pake ghini ghemai mane iahi ta mala meha nomai mane ginitaukelana,’ ta ghuana.

15“Neke ghua mo ianimu ghe, maneri dike soni va tetu mane ginitaukelai mo, nia ke leghu tuna ka malaunao neke ghua. Ianimu tuna ghe neke kudori nga tuna ira noniriva neke vanadiro ira rongo. Manei neke kabai hadu kavei heve dike la va riva ghidira maneri ira rongo, nia taghe niha ghu dike la va podolorira, e ghua.

16“Ia noniriva ta kenu neke la turi ghua iahi, ‘!Manefaa agho, ka ia rongo noke vanaguo agho, ara nake hiori keha tazoni!’

17“‘!Toraina veha kalasu!’ neke ghua ia mane ginitaukela. ‘Agho mu kaike noniriva ta veha. Vununa agho no riva ghini va veha ia birusuna rongo nake va posi ghinighono ara, a vananigho ghu ia papala ta mala babatu ghidi agho ira noni ka giliodi tazo malau leghaha.’

18“Ia va paluna noniriva neke la turi ghua molamo iahi, ‘Manefaa agho, ka ia rongo noke vanaguo agho, ara nake hiori keha gahauni.’

19“Ia mane ginitaukela neke kahe ghua iahi, ‘!Agho haro no puina riva va veha! Ara a vananigho ghu ia papala ta mala kopuna ghidi ira noni ka giliodi gaha malau leghaha.’

20“Ianimu tuna ghe neke la kahe ghua nga iahi ia va litona noniriva, ‘Manefaa agho, iahi ia nou rongo. Ara nake va piha ghini rekuna poko nake poika va vehai ghu,’ neke ghua. 21‘Ara nake maughinigho ghegu, vununa agho mu kaike mane ta mamarutana, ta hiori ira taka nou ghu taghou, nia ta hio ghidi veha ira noke deoro go numa ghidi ghu, e ghua.’

22“‘!Agho noniriva ta muko!’ neke ghua ia mane ginitaukela. ‘Ara a fateigho ka nou ngengene nira taghou. ?Agho noke avohi mo ta mane mamarutanaguna ara ka ira puhigu, ta hiorira ghu ara ira taka nogu ghu taghogughi, nia ta hio ghanona ara ka ira nake deoro gake numa ghidi ghu e ghua, ina? 23?Heve agho ghe, noka la nakai hagheleri nga nogu rongo nira ka ia banga, ge la tehi ghu maneri, ghe ga meha hiori nga ara?’

24“Ianimu tuna ghe neke fihiki lao nga ia mane ginitaukela ka ira keha noni dike tetu namoro, neke va kahe ghidi ghu, ‘Hio kai tana rongo nira noniriva iahi, o vanani lao ghu noni neke va podolo tazo kunegele nia,’ neke ghua ghidi.

25“ ‘!Ghe Faghina agho, manei mu to kusu hiori ngama tazo kunegele!’ dike ghua ghini.

26“Ia mane ginitaukela neke ungene tughuri, ‘Ta va kahe ghini ghauna ara mu, heiri haro ira ta kururi mu, tehi laoni take vanadira. Nga ka heiri ira ta deori mu, geta ghua ghu ira birusudi teri ta auri maneri ghe, e ke age hio kai tadi soni mo ghatu. 27Nga ghidira ira ta kana ghinagu ara dike pake ghinaguro mala nodi mane ginitaukelana mu, o hio haghele mehari aiahi gilio, o atunguri ghu ka torai ta au ini ara.’ ”

Ia Haghele Va Manemane Ka Zisas Aianihi Zerusalemu

Matiu 21:1-9; Maki 11:1-10; Zone 12:12-19

28Leghuna turi ghinina tuturi iahi, Zisas neke ghahe vai lao Zerusalemu kenudi ira nona mane ta nonofoi. 29Di meha ghu maneri ka ira palu malau Betifeizi nia Betani ka ia Vuhukuna Olivi, Zisas neke tuhu kenu laori palu mane ta nonofoi. 30“O lao ka malau ianihi kenu mo. Noto haghele lao la, ghatu o la finini kaike rekahana dongiki ta sugori, ta deo nga ge haghei ghu. Fudahi, o hio mehai ghu aiahi. 31Neto notoho ghau la hei noni, ghini heve ghe no fudahi nga ta ghuana, ‘Ia Lod ne kabai ghinina,’ o ghua ghini ma.”

32Di lao ghu maneri palu, dike la finini dongiki ani taghe neke kaheio lama Zisas. 33Di la fudahi ngama ia dongiki, dike to notohori ghu ira ta kutamana, “?Ne heve ghe, no meha fudahi nga nomai dongiki nia?” dike ghua.

34“Ia Lod ne kabai ghinina,” di ghua ira palu mane nonofoi. 35Ianimu tuna ghe, dike hio vanani lao nga Zisas ia dongiki, dike toufi ghu ia taghuruna ka ira nodi koti, mala haghe laona ka manei.

36Ka ia haghe ta ghahe ta lao ghu manei, ira noni dike kifari ia hangana ka ira nodi koti ka kenuna Zisas. 37Di dufu ghu ka ia Vuhukuna Olivi ka ia ta tataniga ghahe vai hinae ia hangana, ira noni haroharo ta nonofoi Zisas, dike tatanigai kudo nia koze va ghazaghaza dike lao ghu, helahela ghinina God, ghidira ira leghu hahaima ta namanama nga dike finiriro.

38“!Va beani ia Mane Ginitaukela ta meha ka ia babaolona ia Lod!#19:38 Samu 118:26

!Bule ka malauo God fate,

nia heluhelu ghini God ia ta varanga sughavona ka malaunao fate!”

39Ghe keha Farisira ka ia varigharana noni, dike kahe ghua iahi, “Mane Vari Va Kakahei Agho, o buruari nou noni ta nonofoigho nira kaherira kokolodi leghutau iramu!” dike ghua ghini.

40Ghe ungene tughuna ka Zisas neke ghua iahi, “Dito vanemoho ghini la maneri, ira ghahipa edi age tatanigai kudo ghatu!” neke ghua ghidi.

Zisas Ne Muko Hihingo Ghini Zerusalemu Ne Nakele Ghu

41Ka ia dike to meha namoio maneri Zerusalemu, dike fini kenu laoio ghu, Zisas neke age tatanigai nakele, 42neke kahe ghua ghu iahi “Geta ghua ghu ka ravata iahi ghe, ara na lao hihingo ghinigho, ta fini avohina agho ia hanganana bule. Ghe ghatunaina mu to age fuludu, vununa ia bule to age poika ka ira hibau agho. 43E deo ge sepa ghu, edi va tetu ghini ghau hidi mala pauku ghu ira ta kana ghini ghau, meha tetu liloho ghau ta age va takolo ghauna ghu ka ira leghu pelodi nga. 44Maneri edi toraina age va mugoro ghau, nia ira nomu noni ta au taremehamu, e ghua. Ira ta kana ghini ghau edi toraina age huara kai kamoti ghatu ia malau leghaha ka ghau, vununa ghau deo goke fini avohi ghu ia fafata neke meha mala hio va doli ghauno God!”

Zisas Ne Va Kalasi Ia Sugana God

Matiu 21:12-13; Maki 11:15-17

45Ianimu tuna ghe neke haghele nga Zisas ka kaike galahena ka giliona ia Sugana God, neke tataniga la bozo kaveri ghu ira tehi noni dike maketero ka ira nodi sapera. 46Va kahe ghidi tuna neke ghua Zisas, “Ta kaheina ka ira Kakangava Ta Maduana mu ne ghua iahi, ‘Nogu Suga iahi mu, geala e suga mala tarai,’#19:46 Aesaea 56:7 ghe ghau noto fihikini ka malau mala poika ira ta sisiko,”#19:46 Zeremaea 7:11 neke ghua ghidi.

47Leghuna ianimu, manei neke vari va kakahei leleghu ravata ka giliona ia Sugana God, ghe ira hiama ta kenu nia ira ta vari va kakahe ghini ia vetula beana, nia ira keha noni babatu ka ira noni e ghua, dike to age tatanigai va puhipuhi ghini ta mala atungina Zisas. 48Ghe e deo ma hae ta boka va dedekena maneri, vununa ira noni haroharo dike toraina kabai nomoho va huhugunari haro leghu ngengene nga ka Zisas.

Zur Zeit ausgewählt:

Luku 19: kji

Markierung

Kopieren