Zone 1

Va Kenuna Pagahaina: Zisas ia Tuunamane God ne meha noni 1:1-18

Ia Saorona Doli

1Ka ia tatanigaina mu ia Saoro neke to kusu au. Ia Saoro mu neke au taremehana God, nia ia Saoro mu neke God ma, e ghua. 2Manei neke au taremehana ma God ka ia tatanigaina. 3Ira vahina leghutau nga mu manei neke va vuharira. E deo kaike leghutau va vuha ghu, neke deona ge riva ghini ghu manei. 4Ka manei e au ia doli, nia doli ianimu tuna ge va meha fegala ghu ka ira noni haroharo, e ghua. 5Ia fegala ne pelara ka giliona ia nagoromo, toraina deona ia nagoromo ge boka paufi ghu.

6God neke tuhu mehai Zone ia nona mane mala hio nonomoho, 7ta mala meha tuturi ghinina ia fegala ka ira noni haroharo, mala maneri haroharo geala edi nomohi ghu ia nonomoho, nia va hohoghona tuna edi ghua ghu. 8Eka ghua mo taghonai Zone mu fegala ianimu, manei mu neke suna mala tuturi ghini ma ia fegala. 9Ia toraina fegala ta hohoghona ta vanadi fegala ira leghu noni nga mu, neke la mala meha ka giliona malau iahi peka.

10Ia Saoro mu neke au mo ka giliona malau iahi peka, ghe malau iahi peka deo geke fini avohi ghu manei, geta neke riva ghini mo God malau iahi peka taremehana manei. 11Manei neke meha ka nona soloso ini taghonai, ghe ira nona noni taghonai ira Ziu, e deo gedi ke hio namahi ghu. 12Ghe ka ira noni haroharo dike hio namahio manei dike va hohoghonao ghu ka manei mu, manei neke vanadi ia mana mala meha nona rekahana God. 13Maneri mu deo gedi ke meha nona rekaha ghu God leghuina ia uraha ka ia vilahi, ia ta doli meha ka mama ghe uke, ba ka ia lao hihingo ia tini. Taghonai God lama neke nodi Mamana maneri, neke vanadi doli foforu ghu.

14Ia Saoro mu neke meha noni neke meha au ghu aiahi ka malau iahi peka vari hoataida ghita. Ghai nato ke finini ia nona varanga, ia varanga ka ia tuuna kaikena neke sipa mehao ka ia Mama, foudina ia varisute ta vanada kakato nia hohoghona.

15Zone neke tuturi ghini manei kudo kave ghuana iahi, “Iahi lamu ia nake tuturi ghinio ara ka ia fafata kahe ghuagu iahi, ‘Manei ia ta meha leghugu ara mu e varanga fuludu laoau ara, vununa manei mu neke to kusu au, ghe nake uraha nga ara,’ ” nake ghua ghini ghauo.

16Vununa ka ia namaha ghini ghita fuludu manei ka ia hohoghona, neke vanada ghu ia kaikadolo ta veha sepao, nga ghatunaina mu neto ke vanada kaike foforuna kaikadolo, mala holarina ia sesepana. 17Ia sesepana va beana ka ia vetula God mu neke la meha ka ghita ka Mosese, nga ia foforuna va beana ka ia hohoghona nia ia varisute ta va meha kakatoi e ghua mu, neke la meha ka ghita ka Zisas Kraes. 18E deo nga hei neto ke fini fatina mu God. Ia kaikena Tuuna ia ta torai God haro taghona nia ia ta torai namo ka ia Mama e ghua lama neto ke va podolo vanadana God.

Va Paluna Pagahaina: God Ne Va Podoli Ia Tuuna Taghonai 1:19–4:54

Zone Ia Ta Vari Seselebeana Ne Va Podoli Kraes 1:19-34

Matiu 3:1-12; Maki 1:2-8; Luku 3:3-16

19Kaike fafata ira faghinadi ira Ziu ani Zerusalemu dike va ghahe laori keha hiama nia keha mane ta toka ghidi ira hiama e ghua, mala la notohina Zone hei mo mamu manei, ta ghuana. 20Manei deo heve neke va poika ghidina, nga neke kahe ghidi va lotoro lao ma, “Ara mu eka ghua ghu ia Mesaea” neke ghua ghidi.

21“?Neto ghua la, hei ghu mu agho? ?Agho mu Ilaiza, ia porofeti?” dike ghua notohina.#1:21 Ilaiza ia porofeti e deo geke leme ghu, nga God mo neke hio vonaina ka nona malauo fate. (Fini 2Ginitaukela 2) Ira noni Ziu dike va hohoghonai Ilaiza ia porofeti mu e ke la leghu meha mo ka malau iahi peka, dike ghua. Manei neke mala meha turi ghini kave ta deona ma ge sepa ghu, ta age noghana ghu malau iahi peka. Ia riva ka Zone ia Ta Rivai Sesele Beana mu neke haza ka ia riva Ilaiza, vununa Zone mu neke va podoli ia Tuuna God ka ira noni Ziu. Vununa neke ghua iahi ghe, neke kahei nga Zone taghonai mu eka ghua ghu Ilaiza ta ghuana. Ghe leghunana Zisas neke kahei Zone ia Ta Rivai Sesele Beana mu Ilaiza, neke ghua. (Fini Matiu 11:14; 17:10-13) Ghe neke kahe ghua nga Zisas mu, manei e deo geke turi ghini ghu keha leghutauna mo ka tuturi ari Zone. Neke kahe ghua nga iahi Zisas mu, Zone mu taghe Ilaiza neke ghua ma, vununa manei neke hio leghuri ira noni ka God. Iahi mu neke va ghuduvi heve neke kaheio Malakae ia porofeti ka giliona ia buka Malakae 4:5-6.

“Deo,” neke ghua ungene tughuna manei.

“?Agho lamu ia keha porofeti neke naiungene ghinio God e mala tuhu mehai, neke ghuao?”

“Deo” neke ghua ghidi.

22“?Hei ghu mu agho? O va kahe vanamai, a mala la turi vanadi ghu ira noni dike tuhu ghai meharo aiahi. ?Heve mu ta boka kaheina agho ghinighona taghou?”

23Zone neke ungene tughuri ka ira ngengene Aesaea ia porofeti, ta ghua iahi:

“Ara mu ia leo ta kudo ka ia malau koroghana ta karango,

‘!Riva ghini kaike hangana ta lotoro mala mehana ia Lod!’ ”#1:23 Aesaea 40:3

24Notohi tuna Zone dike ghua ira noni dike tuhu laoriro ira mane Farisi, 25“?Agho mu noto deo la ge ghua ghu ia Mesaea, ba Ilaiza, ba ia Porofeti, ne heve ghe no seselebeanari nga ira noni?”

26Zone neke ungene tughuri, “Ara mu a seselebeana ghau ka kolo, nga kaike ghu mu ta tetu iahi ka vari hoataimu ghau, ia ta deo go avohi ghu ghau. 27Manei lamu ia nake va tana vananio ara ia hangana, nia ara e deo ga fata ghu ta nohe neneki hinae, ta fudaha kairira ghu ira nona sadolo.”

28Leghu irahi nga mu dike dufu ka ia keha Betani,#1:28 Malau fafaana iahi Betani mu e haza ka ia malau tei Betani ia ta namo lao Zerusalemu, ta turi ghini ka Zone 11:1 nia ka Maki 11:1, e ghua. ia malau fafaana fateona mo ia ketuhu leghaha Zodani ka neke rivai seselebeanao Zone.

Zisas Ia Rekahana Sipisipi Ka God

Matiu 3:13-17; Maki 1:9-11; Luku 3:21-22

29Ia keha ravata Zone neke finini Zisas la ghahe vai mehana ka taghonai, neke kahe ghua ghu iahi, “!Fini! !Ianihi ia Rekahana Sipisipi ka God mala veala, ia ta hio kairi ira sasake ka malau iahi peka! 30Manei lamu nake turi ghinio ara ka ia fafata kahe ghuagu iahi, ‘Kaike mane e la meha leghugu ara, ghe manei e varanga fuludu laoau ara, vununa manei neke to kusu au, ghe nake doli nga ara’ nake ghuao. 31Ara taghoguna ghe, nake deona gake avohi ghu neke torai heina mamu manei. Nga fafahakanana ia meha rivai seselebeana ka kolo ara mu, mala ira noni Ziu, edi boka avohi ghu manei nake ghua.”

32-33Kahe ghua tuna iahi neke ghua Zone, “Ara e deo gake avohi ghu manei lamu iahi ta ghuana, ghe God neke tuhu mehauo ara ta mala rivai seselebeanana ka kolo neke va kahe ghinaguna iahi, ‘Noto finini la agho ia Tarunga Ta Maduana hinae meha ta auna ghu ka fatena kaike noni, manei lamu ta rivai seselebeanana ka ia Tarunga Ta Maduana,’ neke ghua ghinagu. Leghunana ara nake finini ia Tarunga Ta Maduana la hinae meha taghe kaike babahulu bora ta ghuana ka kolangana fate, neke meha nohe ghu ka fatena manei. 34A va kahe ghini ghau ghu ta toraina Tuunana mamu God manei, vununa ara nake torai finini neke dufuna iahi ka Zisas”

God Ne Va Podoli Kraes Ka Ira Mane Ta Nonofoi Zone Ia Ta Vari Seselebeana 1:35-51

Ira Kusu Noni Ta Nonofoi Zisas

35Ka ia keha ravata Zone neke tetuni aianimu taremehadi ira palu nona mane ta nonofoi. 36Ne finini ghu Zone ta ghahe fuluduna Zisas, manei neke kahe ghua iahi, “!Fini! !Ianihi ia Rekahana Sipisipi ka God!” neke ghua. 37Ira palu mane ta nonofoi, dike nomohi ta kahe ghuana ianimu manei, dike to fihiki lao ma ghu leghuina Zisas.

38Ka ia mato liloho ta finiri ghu ira palu mane leghuina taghona, Zisas neke notohori, “?Heve no kabai ghinina?” neke ghua ghidi.

“?Rabae, hae mu ta auna agho?” dike ghua ghini. (Fafahakanana “Rabae” mu “Mane Vari Va Kakahei” e ghua.)

39“Meha o age fini ghu,” neke ghua ungene tughurina. Taghe fatana nakele rodana ghu leghuna ia hoatai ravata mu leghu taremehana laona palu mane idi ka malau ani, dike la au ma ghu aianimu va hokotina ia ravata.

40Kaike ghu ka ira palu mane dike nomohio heve neke kaheino Zone, dike leghuio ghu Zisas mu, Aduru ia tahina mane Saemoni Pita. 41Ka fafata ianimu lama, neke lao ghu Aduru la dufuina Saemoni ia tahina mane taghonai, neke la kahe ghua ghu iahi ka manei, “Ghai nato ke dufui ia Mesaea,” neke la ghua ghini (fafahakanana mu “Kraes” e ghua). 42Hioi tuna Saemoni ge lao ghu ka Zisas neke ghua Aduru.

Zisas neke mato laoi manei, ghe neke kahei nga, “Agho mu Saemoni, ia tuunamane Zone, ghe agho mu Sifasi e ghua take age va kudo ghinighona ghatunaina.” (Iahi mu varifata ma ka “Pita,” fafahakanana mu “ghahipa toghunai” e ghua).

Zisas Ne Kudori Filipi Ghe Nafaneli

43Ia keha ravata Zisas neke nai hihingona ta mala laona ka ia Babarana Galili. Manei neke la dufui Filipi neke la kahe ghini ghu, “O meha leghuau,” neke ghua ghini. 44Filipi mu tanina Betiseida, ka ia malau fafaana dike auro Aduru ghe Pita.

45Filipi neke la dufui Nafaneli neke va kahe ghini ghu, “Ghai nato ke dufui ia neke kakangava ghinio Mosese nia ira porofeti e ghua, ka ira Kakangava Ta Maduana. Manei mu Zisas na Nazareti ia tuuna Zosepu.”

46“?E boka la meha mo keha leghutau ta veha aianihi Nazareti?” neke ghua Nafaneli notohonana.

“O meha ma o age fini ghu taghou,” neke ghua Filipi.

47Ne finini ghu Zisas neke ghahe vai laona Nafaneli ka taghonai, manei neke kahe ghua iahi, “!Ta meha iahi ia torai noni tanina Isiraeli, e deo sesebo ta auna ka manei!”

48“?Heve ghe no avohoau nga ara mu agho?” neke ghua notohona Nafaneli.

“Ara nake finigho ka ia fafata au agho ka ia pekana heke figi, ghe neke age kudoighono nga Filipi.”

49“Mane Vari Va Kakahei Agho, agho mu ia Tuuna God, ia Mane Ginitaukelana Isiraeli,” neke ghua ungene tughuna Nafaneli.

50Kahe ghua tuna iahi neke ghua Zisas, “?Ta va hohoghona ini agho mu heve, vununa ara nake kahei, ta finighona ara ka ia pekana heke figi? Agho o age finiri ghatu ira leghutau ta fefereana fuludu laoini ianimu.” 51Ke kahe ghua tuna iahi neke ghua Zisas, “A va kahe ghini ghau ghu ka ia hohoghona, ghau o age finini ia malau ka God fate ta tobehena, ta vona hinaena ghu ira engizeli ka God ka ia Tuuna ia noni.”#1:51 Ka 28:10-17 ka ia buka Tatanigaina mu e ghini ia tuturina Zekopu nia ia rangana ta vona lao ka malauo God fate, e ghua. Ka Zone 1:51 Zisas ne kahei taghonai mu e varanga fuludi Zekopu, ia faadi ira Ziu ne ghua, vununa heve neke dufuna ka Zekopu sepao laoni mu neke mala age dufu haro molamo ka Zisas.

Zur Zeit ausgewählt:

Zone 1: kji

Markierung

Kopieren