Luka 10

İsa karı dano hawtay teleban

1Nay dıma, İsay hawtay teleban daa karı dê cı. Her sukı u cayanê kı wastenê sêro, xo ra raver ni teleban ra dıdı dıdı rusnay. 2İnan rê nia vat: “Hêgay restê, feqet iyê kı hêgan bıçinerê senıkê. Hêgay ê Heqiê; iy rê mınetı bıkerê kı êrğat bırusno kı ni hêgan bıçinerê. 3Nıka sêrê! Ez sıma zê verekan rusnenan wertê vergan. 4Nı perı, nı turık, nı ki çarıxan megerê lê xo. Ray de sılam mederê kesi kı raya sıma derg mebêro. 5Key kı sıma kunê zerrê kêyi, sıftı nay vacerê, ‘Ni kêyi rê sılametı bıbo!’ 6Ekı kê de keso kı sılametiye ra hez keno esto, sılametiya sıma iy sero bımano. Ekı hini niyo, va sılametiya sıma ancia agêro sıma. 7Kêyo kı kunê cı, i kêyi de bımanê. Ni kêyi de kı sıma rê çık anê, iy borê, bısımerê. Çıkı kamo kı gurino, emegê xo heq keno. Kê bı kê meserê.

8“Key kı sıma şi jü sukı, mıletê ucay kı sıma wertê zerrêweşiyê de qebul keno, çık kı anê sıma ver, iy borê. 9Nêwesanê ucay wes kerê, mıletê ucay rê vacerê, ‘Hukumdariya Heqi ame nejdiyê sıma.’ 10Key kı sıma şi jü sukı, mıletê ucay kı sıma qebul nêkeno, veciyê rayanê sukı, nia vacerê: 11‘Tozê suka sımao kı bınê nınganê ma de mando, iy bilı sanım ra kı sıma rê alametı bo! Ancia ki nay bızanerê Hukumdariya Heqi ame nejdi.’ 12Sıma rê nay vaceri: Roca Hesabi de, halê mıletê na sukı halê mıletê Sodomi#10:12 Sodom: Na suka de gunakarı biye, ay ra Heqi asmên ra adır kılı varna, mıletê a sukı pêro qırr kerdo. ra daa çetın beno.

13“Wey halê sıma mıletê Xorazini! Wey halê sıma mıletê Beytsayda! Kırametê kı mabênê sıma de amay bi kerdenı, ekı Sur bı Sayda#10:13 Sur bı Sayda: Ni suki İsrail de nêbi, ay ra mıletê ni sukan nêşkiyay bi qesanê İsay bıeşiyo pê. de biamenê kerdenı, mıletê i cayan rew ra tobı kerdi bi, cılık anti bi xo, wertê wela adıri de nisti bi ro. 14Feqet Roca Hesabi de, halê sıma, halê mıletê Sur bı Sayday ra daa beno çetın. 15Kefernahum, to gênê asmên? Nê, to anê diyarê merdan!

16“Telebê mın, kam kı sıma say keno, mın say keno. Kam kı sıma qebul nêkeno, mın qebul nêkeno. Kam kı mın qebul nêkeno, Heqo kı ez rusnan, iy ki qebul nêkeno.”

17Hawtay telebê İsay bı kêf'a peyser amay. İnan İsay rê vat: “Wayir, key kı ma namê to vat, cıni bilı wertê mordeman ra veciyenê.”

18İsay inan rê nia vat: “Mın di kı Seytan zê buluski asmên ra gına waro. 19Mın qewetı dê sıma kı sıma maran u thırbestıkan bınê nınganê xo de phan kerê u bı dısmen'a bas bıkerê. Qe çiyê nêşkino sıma rê thaba bıkero. 20Feqet sıma kêf mekerê kı cınan sıma say kerdê; kêf bıkerê kı namê sıma asmên de ama nustenı.”

İsa Piyo kı Asmên de iy rê düan keno

21A sırı, Rowo Bımbareki İsa bı kêf'a kerd pırr u İsay nia vat: “Piyê mın, Wayirê herd u asmêni, to rê şukır kenan. Çıkı to ni çiy mordemanê hekmetınan u baqılan ra dardi we, domananê qıckekan rê kerdi ya. Ya Bao, wastena to na biye. 22Piyê mıno kı asmên de her çi amanatê mın kerd. Pi ra zobina, kes nêzano Lac kamo. Kes nêzano Pi kamo, teyna Lac zano, u Lac kami kı wazeno bızanerê, jü ki i zanê.”

23Key kı İsay bı telebanê xo'a teyna mandi, İsay inan rê nia vat: “Ğeji bê i çıman kı çiyê kı çımê sıma diyê, inan vênenê! 24Sıma rê nay vaceri: Zaf pêxemberan u zaf qıralan wast kı iyê kı sıma diyê, inan bıvênerê feqet nêşkiyay bıvênerê. İnan wast kı iyê kı sıma eşiyê pê, inan bıeşiyê pê, feqet nêşkiyay bıeşiyê pê.”

Mesela ciranê rındi

25Jü ilimdarê itıqati wast kı İsay imtan bıkero, ay ra vest ra, İsay ra nia pers kerd: “Malım, ez se bıkeri kı bıresi weşiya bêaxıriye?”

26İsay vat: “Qanunê Heqi de çık amo vatenı? Owo kı to uca de wanıto, iy ra çık fam kenay?”

27Mêrıki ki vat: “Bı zerri u canê xo pêro'a, bı qewet u aqlê xo pêro'a Heqi ra hez bıkerê. Xo ra kı senên hez kenê, ciranê xo ra ki hini hez bıkerê.”

28İsay vat: “To rast vat, ekı nia kenay, resenay weşiya bêaxıriye.”

29Mêrıki wast kı bıxo nêheq meveciyo, ay ra perso de bin pers kerd, vat: “Ma, ciranê mın kamo?”

30İsay nia vat: “Jü mêrık key kı suka Yeruşalimi ra şiyenê Eriha, kuno dızdan dest. Ni dızdi kıncanê mêrıki vecenê, danê pıro. Waxto kı bımıro, mêrıki ca verdanê, sonê. 31A sırı ki, uca ra jü rayib vêreno ra, rastê mêrıki êno, feqet vêreno ra boverê ray, sono. 32Na rey, jü mêrık lêwı ra vêreno ra, no mêrık ezbeta Levi#10:32 Ezbeta Levi: Levi, İsrail de jü aşirı biye. Ni pêro rayibi bi. ra biyo. No kı mêrıki vêneno, o ki vêreno ra, sono. 33Na rey, jü mêrıkê Samirye#10:33 Yahudiyan u mıletê Samirye jübini rê dısmen bi. uca ra sono. No kı mêrıki vêneno, zerria xo zan dana. 34Sono lê mêrıki, ronê zeytıni bı şerabı rısneno dırbetanê mêrıki ser, piseno. Bado ki mêrıki nisneno hera xo, beno xanı, uca de qaytê mêrıki beno. 35Roca binı, dı peranê siman veceno, dano wayirê xanı, vano, ‘Rınd qaytê ni mêrıki bı. Perıo kı mın do to, ekı iy ra zêdı zay kenay, ez kı peyser aman, danan to.’ ”

36İsay ilimdarê itıqati ra nia pers kerd: “Gorê to, ni hirê mêrıkan ra kamcini, o mêrıko kı kuti bi dızdan dest, iy rê ciraninı kerda?”

37İlimdarê itıqati nia vat: “Owo kı cı rê zerria xo zan do, yardım kerdo, o.”

İsay ki nia vat: “A waxt, tı ki so, zê iy bıkı.”

İsa kê Marta u Meyremı dero

38İsay bı telebanê xo'a, raya xo rê dewam kerdi, şi jü dewı. Uca de jü cinıkı ni kê xo de kerdi meyman. Namê na cinıkı Marta bi. 39Jü wua nay esti biye, namê ay ki Meyremı bi. Meyremı bınê nınganê İsay de nisti bi ro, gos nenê İsay ser. 40Xeylê guriyê kêyi esti bi, ay ra Marta nêşkiyenê gos bıdero qesanê İsay. Marta ame lê İsay, iy rê nia vat: “Wayir, tiyay vênenay, wua mın guri ca verdo mın ser. Cı rê vacı, mı rê yardım kero.”

41Nay ser, İsay Marta rê vat: “Marta, Marta, tı her çi xo rê zaf kenay qısawetı, 42feqet teyna çiyê lazımo. Meyremı owo kı rındo, o çinıt we, no ki cı ra nêno gırotenı.”

Zur Zeit ausgewählt:

Luka 10: kiu

Markierung

Kopieren