Juan 6
6
Jesusan ꞌitsa uni páncëñun tsatsa pimia
(Mt 14.13-21; Mr 6.30-44; Lc 9.10-17)
1Usatancëx ca Jesús parúnpapa, Galilea canan Tiberíadesribi cacë, a ꞌucë manan cuancëxa. 2Cuancëbë ca an uni itsían ꞌacëma ñu ꞌanan uni ꞌinsíncë pëxcuia iscë unicama Jesús nuibiani cuancëxa. 3Usa ꞌain ca anuax matánu mapëracëtancëx aín ꞌunánmicë unicamabë Jesús tsóbuacëxa. 4Pascua anúan judíos unicaman carnero ꞌati nëtë ꞌurama ꞌain ca Jesús ꞌimainun aín ꞌunánmicë unicama matánu ꞌiacëxa. 5Anuxun ꞌaisamaira uníxa a nuibëtsini aia isquin ca Jesusan Felipe cacëxa:
—¿Uinua caranuna a ënë unicama pimiti pán biti ꞌain?
6An uisoquin cara ꞌati ꞌicë quixun ꞌunánquinbi ca Jesusan uisai cara quia cuacatsi quixun usaquin Felipe cacëxa. 7Cacëxun ca Felipenën cacëxa:
—Doscientos curíqui cupí bicëxbi ca pán achúshi achúshi camabi uni ꞌináncëx sënë́ntima ꞌicën.
8Caia ca aín ꞌunánmicë uni itsi, Simón Pedronën xucën, Andrés cacë, an Jesús cacëxa: 9—Ënu ca xu achúshi ꞌicën. Ax ca cebada ꞌacë pán mëcën achúshi ꞌimainun rabë́ tsatsañu ꞌicën. ꞌAíshbi ca ënëx ꞌitsaira uni pimitisama ꞌicën.
10Quixuan cacëxun ca Jesusan, anua basi ꞌitsaira ꞌain, aín ꞌunánmicë unicama cacëxa:
—Unicama tsóbunun ca cat.
Usaquian Jesusan cacëxuan aín ꞌunánmicë unicaman cacëx ca ꞌaisamaira uni, cinco mil unisa ꞌaish, tsóbuacëxa. 11Tsóbuan ca Jesusan pán bixun, Nucën Papa Dios pain —asábi ca —catancëxun aín ꞌunánmicë unicama an unicama ꞌinánun quixun ꞌináncëxa. ꞌInáncëxun ca axa tsócë unicama pán mëtícaquin ꞌináncëxa. ꞌInánan ca tsatsaribi usai ꞌiisa ꞌaínmabia anu ꞌicë pucháquian pinun unicama ꞌináncëxa. 12ꞌInáncëxun piia camabi uni puchácëbëtan ca Jesusan aín ꞌunánmicë unicama cacëxa:
—Pán tëocëcëñun ca tsatsa tëocëcama bit, masóxunma.
13Cacëxun ca mëcën achúshi ꞌicëbia unin piquin tëocë cebada ꞌacë pán a mëcën rabë ꞌimainun rabë́ caquí buácaquin biacëxa. 14Usaquian Jesusan ꞌaia isi ca anu ꞌicë unicamax quiacëxa:
—Asérabi ca ënë uni axa Nucën Papa Dios quicë bana uni ñuixuni utinu nun caíncë, a ꞌicën.
15Usai quiquian atun a ꞌapu ꞌiminuxun biisa tancëxun ꞌunani ca Jesús axëshi unicama ëbiani matánu cuantëcëancëxa.
Jesús parúnpapa camánanën nia
(Mt 14.22-27; Mr 6.45-52)
16Matánua Jesús cuan ca bari atsíncëbëa bëánquicëbë aín ꞌunánmicë unicama parúnpapa cuëbi cuancëxa. 17Cuantancëx ca nuntinu cëñúruquiani, ꞌucë manan ꞌicë Capernaúmnu cuani cuancëxa. Bari cuabúcëbë bëánquicëbëbia Jesús aiama obiani ca aín ꞌunánmicë unicamax cuancëxa. 18Cuancëbëtanbi ca ꞌaisamairai bëquiquin suñúanën baca bëchúancëxa. 19Usocëbëbi parúnpapa cuëbínuax cuani cinco kilómetrosa ꞌixun ca aín ꞌunánmicë unicaman parúnpapanubi nicuatsinia aia Jesús isacëxa. Isi ca racuë́ira racuë́acëxa. 20Racuëtiabi ca Jesusan cacëxa:
—Racuë́axma ca ꞌit. ꞌË cana ꞌain.
21Usaquian cacëx cuëënquin, nuntinu Jesús ꞌarubiani cuanx ca anu cuanti sinánbiania cuancë parúnpapa ꞌucë manan bënëtishi bëbacëxa.
Unicaman Jesús baria
22Jesusan ꞌunánmicë unicama parúnpapa ꞌucë manan cuan ca an pán picë unicama anubi ꞌiacëxa. Usa ꞌixun ca pëcaratancëxun sináncëxa: Achúshi nuntishi ca ënu ꞌiónxa, ꞌimainun ca aín ꞌunánmicë unicamaxa a nuntinu ꞌirucëbëbi Jesús nuntinu ꞌiruima ꞌiónxa. 23Usaquian sinánmainun ca Tiberias ëmanuax uni raíriribi manë nunti raírinën cuanx, anuxuan Jesusan Nucën Papa Dios —asabi ca —catancëxun pán uni pimioncë, a ꞌurama bëbacëxa. 24Usa ꞌain ca axa anu bërúcë unicama an bariquinbi Jesúscëñun aín ꞌunánmicë unicamaribi ꞌaímocëxa. ꞌAímobiani ca axa Tiberiasnuax ucë manë nunticamanu cëñúruquiani Capernaúm ëmanuribi Jesús bari cuancëxa.
Aín unicamax ca ami catamëcë ꞌaish Jesúsbë ꞌia quicë bana
25Usa ꞌain ca ꞌucë manan cuanxun bariquin mëraquin Jesús cacëxa:
—¿Uinsaran caramina ënu uan?
26Cacëxun ca Jesusan cacëxa:
—Asérabi cana ꞌën mitsu cain, ꞌën pán pimicëx puchonx camina a sinánbëtsini ꞌë bari uan. Ui carana ꞌëx ꞌai quixunmi mitsun ꞌunánun, uni itsían ꞌacëma ñu ꞌën ꞌacë a isunbi camina ui carana ꞌëx ꞌai quixun sinaniman. 27Axa chëquiti piti binuxuinshi camina ñu ꞌatima ꞌain. Usa ꞌain camina ainan ꞌaish Nucën Papa Diosbë nëtë́timoi ꞌinuxun ꞌëmi catamëquin axa cuëëncësabi oquin ꞌati ꞌain. Usaími ꞌinun mitsu ꞌiminun ca ꞌëx uni ꞌinux anuax uá, Nucën Papa Dios, an ꞌë ꞌimiacëxa.
28Cacëxun ca a cacë unicaman cacëxa:
—¿A ꞌacëbëa Nucën Papa Dios cuëënun caranuna añu ꞌati ꞌain?
29Cacëxun ca Jesusan cacëxa:
—Nucën Papa Dios ca cuëënia, mitsúxmi an ënu unun xuá ꞌaínmi ꞌëmi catamënun.
30Cacëxun ca cacëxa:
—¿Nuxnu mimi sinánun caramina añu nun isnun ꞌati ꞌain? ¿Añu caramina ꞌati ꞌain? 31Nucën raracaman ca anu uni ꞌicëma menuxun pánsa piti, maná cacë, piacëxa, cuënëo bana ësai quicësa oquin: “Nucën Papa Diosan ca naínua ꞌibúmiquin unicaman pinun, pán ꞌináncëxa”.
32Cacëxun ca Jesusan cacëxa:
—ꞌËn cana asérabi mitsu cain, an naínua ꞌibúmiquin unicama pán ꞌinan ax ca Moisésma Nucën Papa Dios ꞌiacëxa. An a pán ꞌinan ꞌaínbi ca Ñucën Papa Diosan bërí ꞌináncë ax ca anúan uni asérabi upiti tsóti a ꞌicën. 33Nucën Papa Diosan uni ꞌinan piti ax ca axa naínuax uá ꞌë ꞌicën. Usa ꞌaish cana ꞌëx an ainan ꞌaísha Nucën Papa Diosbë ꞌinun ënë nëtënu ꞌicë unicama ꞌimiti a ꞌain.
34Cacëxun ca unicaman cacëxa:
—A piti camina camabi nëtën nu ꞌinánti ꞌain.
35Cacëxun ca Jesusan atu cacëxa:
—ꞌËx cana anúan uni asérabi upiti tsóti a ꞌain. Panánxun piisa tanan shimaxun ꞌunpax ꞌaisa tania uni bënë́cë, usaribitia ax Nucën Papa Diosbë upí ꞌiisa tani bënë́cë uni, ax ca ꞌëmi catamëti amiribishi bënë́tëcëntima ꞌicën. 36Axa ꞌëmi catamëcë uníxa usa ꞌaínbi cana ꞌën mitsu cacë usaribi oquin mitsu catëcënin, mitsun ꞌën ñu ꞌaia isquinbi camina ui carana ꞌëx ꞌai quixun sinaniman. 37-38ꞌËx cuëëncësabi oquin ꞌai cana uáma ꞌain. An ꞌë xucë, axa cuëëncësabi oquinshi ꞌai cana uacën. Usa ꞌain ca ui unicama cara Nucën Papa Diosan ꞌënan ꞌinun sinánmia acamax ca ꞌëmi catamëti ꞌicën. Axa ꞌëmi catamëcë uni, a cana —camina ꞌënan ꞌitima ꞌai —quixun catima ꞌain. 39An ꞌë xuá ꞌën Papa, ax ca an ꞌënan ꞌinun sinánmicë unicamaxa abë ꞌiti cuëëni, achúshira uníxbia abë ꞌima ꞌiti cuëënima. Usa ꞌaish ca an ꞌëmi sinánmicë unicama bërúantancëxun, ënë nëtë cëñúcëbëtan ꞌën baísquimiti cuëënia. 40An ꞌë xuá ax ca cuëënia, aín Bëchicë, ꞌëmi catamëcë unicamax nëtë́timoi abë ꞌiti. A unicama cana ꞌën ënë nëtë cëñúcëbëtan abë ꞌinun baísquimiti ꞌain.
41—ꞌËx cana Nucën Papa Diosan naínua ꞌibúmiquin uni ꞌinan piti, a ꞌai —quiáxa Jesús quicëbë ca judíos unicamax ami nishi Jesús ñui 42quicancëxa:
—¿Josénën bëchicë, Jesús, ama cara ënëx ꞌic? Nun cananuna aín tita ꞌimainun aín papa ꞌunan. ¿Uisacatsi cara —ꞌëx cana naínuax uan —quiax quin?
43Usaía quia ca Jesusan cacëxa:
—Usai banaxma ca ꞌit. 44Uinu ꞌicë uníxbi ca axbi ꞌënan ꞌinux ꞌëmi catamëtima ꞌicën. ꞌËn Papa, an ꞌë xuá, an sinánmicëx cuni ca uni ꞌëmi sinani ꞌënan ꞌinux ꞌëmi catamëti ꞌicën. ꞌËmia catamëcë ꞌicë cana ënë nëtëa cëñúcëbëtan baísquimiti ꞌain. 45An Nucën Papa Dios quicë bana uni ñuixuncë unicama achúshinën ca ësaquin cuënëocëxa: “Nucën Papa Diosan ca camabi uni ꞌunánmiti ꞌicën”. A unían cuënëosabi oi ca ui unicaman cara Nucën Papa Diosan sinánmicëxun ꞌunania, acamax ca ꞌëmi catamëtia.
46Uinu ꞌicë unínbi ca Nucën Papa Dios iscëma ꞌicën. Axa anuax uá ꞌëinshi cana a isacën. 47Asérabi cana ꞌën mitsu cain, axa ꞌëmi sinani ꞌëmi catamëcë unicamax ca ainan ꞌaish xënibua ꞌaínbi Nucën Papa Diosbë ꞌia. 48ꞌËx cana anúan uni Nucën Papa Diosbë upí ꞌiti a ꞌain. 49Mitsun raracamax ca anu uni ꞌicëma menuxun Nucën Papa Diosan ꞌináncë maná cacë ñu pibi bamatimoi tsoóma ꞌicën. 50Usa ꞌaínbi cana ꞌëxribi naínuax ucë pán unin piá usaribi ꞌain. Aín nami cushi ꞌaish upí ꞌinuxun ca unin ñu piia, usaribiti ca uni upí ꞌaish xënibua ꞌaínbi Nucën Papa Diosbë ꞌinux ꞌëmi catamëti ꞌicën. 51ꞌËx cana naínuax uá ꞌaish anúan uni Nucën Papa Diosbë ꞌiti a ꞌain. Usa ꞌain ca axa ꞌëmi catamëcë uni ax ainan ꞌaish xënibua ꞌaínbi Nucën Papa Diosbë ꞌia. Uníxa ainan ꞌaish xënibua ꞌaínbi Nucën Papa Diosbë ꞌinun cana ꞌëx bamatsianxmabi bamati ꞌain.
52Quixuan cacëx ca judíos unicama ñucacanani quiacëxa:
—¿Uisa ꞌixun cara ënë unin anu nun pinun nu pimiti ꞌic?
53Usai canania ꞌunánquin ca Jesusan cacëxa:
—Asérabi cana ꞌën mitsu cain, uni ꞌinux anuax uá ꞌain, ꞌëmi catamëquinma ꞌën nami picëmasa ꞌianan ꞌën imiribi xëacëmasa ꞌaish camina asérabi xënibua ꞌaínbi Nucën Papa Diosnan ꞌitima ꞌain. 54ꞌËx bamacë cupí ꞌëmi catamëti ca uni xënibua ꞌaínbi Nucën Papa Diosnan ꞌiti ꞌicën. 55Usa unicama cana ꞌën ënë nëtë cëñúcëbëtan baísquimiti ꞌain. Axa asérabi ꞌëmi catamëcë uni ax ca ꞌën nami picësa ꞌianan ꞌën imi xëacësa ꞌicën. ꞌËn imi ꞌapati ꞌëx bamacë cupí ca usai ꞌiti ꞌicën. 56Ui unix cara ꞌëmi catamëti ꞌën nami pianan ꞌën imi xëacësa ꞌicë, ax ca ꞌëbë ꞌicën, ꞌëxribi cana abë ꞌain. 57Nucën Papa Dios, an ꞌë xuá, ax ca bamatimoi tsotia. Ax ꞌëbë ꞌain cana an ꞌimicëx ꞌëxribi tsotin. Usaribiti ca ꞌëmi catamëquian an ꞌë picësa uni axribi ꞌën ꞌimicëx ꞌëbë ꞌaish ꞌëx ꞌicësaribiti tsóti ꞌicën. 58ꞌËx cana naínuaxa uá pitisa ꞌai quiax cana ꞌëx quin. ꞌËx cana mitsun raracaman piá manásama ꞌain. Mitsun raracamax ca maná cacë ñu pibi bamatimoi tsoóma ꞌicën. Usa ꞌaínbi ca an ꞌëmi catamëquin ꞌë picësa uni ax ainan ꞌaish xënibua ꞌaínbi Nucën Papa Diosbë ꞌiti ꞌicën.
59Capernaúm ëmanuxun ca Jesusan anua judíos unicama timë́ti xubunuxun usai quiquin a banacama ñuixuancëxa.
Anúan uni xënibua ꞌaínbi Nucën Papa Diosnan ꞌiti bana
60Usa ꞌain ca an Jesusan bana ñuia cuacë unicama ꞌaisamaira ꞌain raírinëx quiacëxa:
—Axa usai quicë bana ax ca cuaisama ꞌicën. ¿Uin cara a cuati ꞌic?
61Usaía canania ꞌunánquin ca Jesusan cacëxa:
—¿Mitsúnmi cuacëx cara ënë bana cuaisama ꞌic? 62¿Ënë bana cuaquinma caramina uisaxun mitsun ꞌëx anuax uá anu cuantëcënia isquin sinánti ꞌain? 63ꞌËx ënë menu ꞌaish uni ꞌicë cupíshima ꞌëx bamatancëx baísquiti cupí camina ainan ꞌaish xënibua ꞌaínbi Nucën Papa Diosbë ꞌiti ꞌain. ꞌËn a ñuiquin mitsu cacë ñucama ax ca anúnmi ꞌëmi catamëti ꞌën sinánsaribi ꞌaish xënibua ꞌaínbi Nucën Papa Diosbë ꞌiti, a ꞌicën. 64Usa ꞌaínbi camina micama raírinëx asérabi ꞌëmi sinani ëmi catamëcëma ꞌain.
Ësaquin ca Jesusan bana ñuixunquin an cuacë unicama cacëxa, uicamax cara ami catamëtima quixun ꞌunánan uin cara a uni ꞌinánti ꞌicë quixun bëráma ꞌunáncë ꞌixun. 65Catancënxun ca ësaquinribi Jesusan cacëxa:
—Usa ꞌain cana mitsu can, Nucën Papa Diosan sinánmicëxma ca uinu ꞌicë uníxbi ꞌëmi sinani ꞌëmi catamëtima ꞌicën.
66Usaquian cacëx ca an abë niquin aín bana cuacë unicama ꞌaisamaira ꞌaíshbi raírinëxa tiquimainun raírinëxribi Jesús ëbiani abë nitëcënima cuancëxa. 67Usa ꞌain ca atúxa cuan Jesusan mëcën rabë́ ꞌimainun rabë́ aín ꞌunánmicë unicama a cacëxa:
—¿Mitsúxribi caramina cuainsa tanin?
68Quixuan cacëxun ca Pedronën cacëxa:
—¿Ui uninu caranuna aín bana cuanux cuanti ꞌain? Minshi camina anun nu Nucën Papa Diosbë nëtë́timoi ꞌiti bana nu ñuixunin. 69Nux mimi catamëquin cananuna ꞌunan, mix camina axa uti nun caíncë, Cristo, Nucën Papa Dios, axa bamatimoi tsócë, aín Bëchicë a ꞌain.
70Cacëxun ca Jesusan cacëxa:
—¿ꞌËn carana ꞌën ꞌunánmicë uni ꞌinun micama mëcën rabë́ ꞌimainun rabë́ caísama ꞌain? Usai ꞌinun caísa ꞌaíshbi camina micama achúshinëx ñunshin ꞌatimanën ꞌapun sinánmicë ꞌain. 71Usai ca Simonan bëchicë, Judas Iscariote, an aín ꞌunánmicë unicama achúshi ꞌixunbi a uni ꞌinánti, a ñui Jesús quiacëxa.
Zur Zeit ausgewählt:
Juan 6: cbrPB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 1978, 1995, 2008, 2022 Wycliffe Bible Translators, Inc. All rights reserved.
