Juan 13

II. BAMATANCËXA JESUCRISTO BAISQUIA (13-21)

Jesusan aín ꞌunánmicë unicama tachuca

1Pascua anun carnero ꞌati nëtëa ꞌicëma pan ꞌain ca Jesusan ꞌunáncëxa, anúan ënë menuax aín Papanu cuanti nëtë ca ꞌuramatia quixun. Jesusan ca ënë menuxuan aín bana cuacë unicama camabi nëtën upí oquin nuibacëxa. Usa ꞌain ca Jesús ax an atu nuibacë cupí bamaia aín unicaman —asérabi nu an nuibati ca usai bamaia —quixun ꞌunánti nëtë ꞌuramacëxa.

2ꞌUramacëbëtan ca ñunshin ꞌatimanën ꞌapun Judas Iscariote, Simonan bëchicë, a Jesús uni ꞌinánti sinánmiacëxa. Usoquian sinánmicë ꞌain ca a ñantan Jesusan aín ꞌunánmicë unicamabëtan piacëxa. 3Piquin ca —ꞌën Papan camabi ñu ꞌibuamianan ënë nëtënu xuá ꞌaish cana anuribi cuantëcënti ꞌai —quixun sináncëxa. 4Usaquin sinani ca pitancëx niruacëxa. Niruxun aín cutun pëxun nantancëx ca anun ratërëmë́ti chupan tsitëcërëquiacëxa. 5Usai ꞌitancëxun ca ꞌunpax manë xapanu ꞌaruxun aín ꞌunánmicë uni achúshi achúshi tachucatancëxun anun ratërëmë́ti chupan tatërëancëxa.

6Tatërëntancëxa aribishi tachucati aia ca Simón Pedronën Jesús cacëxa:

—¿Min caramina ꞌë tachucati ꞌain?

7Cacëxun ca Jesusan cacëxa:

—Uisa cupí carana ꞌën ësoquin mitsu ꞌai quixun camina bërí ꞌunaniman. Nëtë itsin cuni camina ꞌunánti ꞌain.

8Cacëxun ca Pedronën cacëxa:

—ꞌËx mi meuira ꞌicë camina uisa nëtë́nbi min ꞌë tachucatima ꞌain.

Ësoquian cacëxun ca Jesusan catëcëancëxa:

—ꞌËn mi chucacëma ꞌaish camina ꞌënan ꞌitima ꞌai —quixun.

9Cacëxun ca Simón Pedronën:

—Usa ꞌain ca ꞌën taëishi ꞌaxunma ꞌën mëcën rabë́ ꞌimainun ꞌën maxcáribi chucat —quixun cacëxa.

10Cacëxunbi ca Jesusan amiribishi cacëxa:

—Nashicë́xa aín namicama upí ꞌain ca unin nashitëcënquinma aín taëishi anun nicë́xa chuaia chucati ꞌicën. Usaribiti camina micamax nashicësa ꞌaish, nuitu upíñu ꞌain, ꞌaíshbi camina micama achúshinëxëshi min nuitu upíma ꞌain.

11Uin cara a uni ꞌinánti ꞌicë quixun ꞌunánquin ca —micama achúshinëxëshi camina min nuitu upíma ꞌai —quixun cacëxa.

12Ësoquin caquin atu tachucatancëxun aín cutun bixun pañuax mesa rapasu tsóbutëcëntancëxun ca amiribishi catëcëancëxa:

—¿Uisa cupí carana ꞌën ësoquin mitsu ꞌa quixun caramina ꞌunanin? 13Mitsun camina ꞌëx isana mitsun ꞌIbu ꞌianan an mitsu ꞌunánmicë a ꞌai quixun ꞌë cain. Asérabi cana ꞌëx usa ꞌain. 14ꞌËx mitsun ꞌIbu ꞌianan an mitsu ꞌunánmicë ꞌixunbi cana mitsu tachucan. Usaribiti camina micamax bëtsibë bëtsibë tachucananti ꞌain. 15Ënëx ca a tanquinmi usaribi oquin ꞌacanun ꞌën mitsu ꞌacë ꞌicën. 16Asérabi cana ꞌën mitsu cain, “an uni ñu mëëxuncë uni an ca an a ñu mëëmicë uni inuíma”. Usaribiti ca a xucë uni, ax an xucë abë sënë́nma ꞌicën. 17Ënë banacama ꞌunánquin a bana quicësabi oquin ꞌai camina chuámarua tani cuëëncanti ꞌain. 18Mitsux camina cuëënti ꞌai quibi cana camabi mitsu ñui quiman. Ama. ꞌËn caíscë unicama, mitsux caramina uisa uni ꞌai quixun cana ꞌunanin. ꞌËn ꞌunáncësabi oi ca Nucën Papa Diosan bana cuënëo, ësai quicësabi oi, ꞌiti ꞌicën: “An ꞌëbëtan pán picë uni ax ca ꞌëmi ꞌiaxa”. 19A unían aín sináncë ñu ꞌacëma pan ꞌain cana mitsu can. Usaquin mitsu catancëx, ꞌëx usai ꞌicëbëtan, camina asérabi carana ꞌëx ui ꞌai quixun ꞌunánuxun ꞌacanin. 20Asérabi cana mitsu cain, uin cara ꞌën bana ñuixunun ꞌën xucë uni aín bana cuatia an ca ꞌën banaribi cuatia. Usaribi oquin ca ui unin cara ꞌën bana cuatia an Nucën Papa Dios, an ꞌë xuá, aín banaribi cuatia.

Judasnën a uni ꞌinántia Jesús ñuia bana

(Mt 26.20-25; Mr 14.17-21; Lc 22.21-23)

21Usoquin catancëx masá nuituquin ca Jesusan upí oquin atun cuaisabi oquin atu cacëxa:

—Asérabi cana ꞌën mitsu cain, mitsu achúshinën ca an ꞌatimonun uni ꞌë ꞌinánti ꞌicën.

22Cacë́xbi ca aín ꞌunánmicë unicama ui ñui cara quia quixun ꞌunanima sináncasmai isanancëxa. 23Usa ꞌain ca aín ꞌunánmicë uni achúshi, aira Jesusan nuibacë, ax Jesús rapasu ꞌiacëxa. 24Usa ꞌicë ca Simon Pedronën, ui ñui cara quia ñucánun quixun sanánquin mëtúnquin cacëxa. 25Cacëxun ca axa a rapasu ꞌicë an Jesús cacëxa:

—¿Nucën ꞌIbu, ui uni cara ax ꞌic?

26Cacëxun ca Jesusan pán chamara bixun cacëxa:

—A ꞌën pán chamara ënë chabóxun ꞌináncë uni, ax ca a ꞌicën.

Caxun ca pán chamaratsu chabóxun Simonan bëchicë, Judas Iscariote, a ꞌináncëxa. 27ꞌInáncëxuan bitsiashi ca ñunshin ꞌatimanën ꞌapu, Satanásnën Judas bënë́nquinshi sinánmiacëxa. Usaquian sinánmia ca Jesusan Judas cacëxa:

—Añu caramina ꞌacasi ca bënë́nquinshi ꞌat.

28Usaquin caia ca mesa rapasu ꞌicë unicaman uisoti cara Jesusan usaquin Judas caia quixun sináncasmaquin cuama ꞌicën. 29Judas ax ca anu curíqui puruti ñusuti a niquincë uni ꞌiacëxa. Usa ꞌain ca raírinën, Jesusan sapi isa Pascua nëtën piti ñu marutanun canan, ñuñuma uni ñu ꞌinántanun caxa quixun sináncëxa. 30Usa ꞌain ca pán chamaratsu bixun pitancëx sënë́nquiani Judas imë́ cuancëxa.

Axa quicësabi oi ꞌiti bana ió

31Chiquíquiania Judas cuancëbëtan ca Jesusan aín ꞌunánmicë uni raíri cacëxa:

—Bërí, bamatancëx, ꞌëx baísquicëbëtan ca unin ꞌunánti ꞌicën, ꞌëx cana asérabi Nucën Papa Diosan xuá a ꞌai quixun. ꞌUnánan ca uisaira cushi cara Nucën Papa Dios ꞌicë quixun ꞌunánti ꞌicëen piti ñu marutanun canan, ñn. 32Uisaira cushiñu cara ax ꞌicë quixun ꞌunánquian unin a rabinun ca Nucën Papa Diosan uni ꞌinux anuax uá ꞌicë, ꞌë baísquimiti ꞌicën. Usocëbëtan ca ꞌëx cana asérabi aín Bëchicë ꞌai quixun ꞌunánquin unin ꞌëribi rabiti ꞌicën. Bëríbi ca usai ꞌiti ꞌicën. 33Xënibutíma cana bënëtishi mitsubë ꞌiti ꞌain. Mitsubë ꞌitancëx cuancë camina ꞌë barinuxun ꞌain. Usa ꞌain cana ꞌën judíos unicama cacësabi oquin bërí mitsuribi cain, anu ꞌëx cuancë anu camina mitsux cuantima ꞌain. 34Mitsun ꞌunáncëma bana ió ënëribi cana axa quicësabi oími ꞌinun mitsu cain, mitsúxbi camina bëtsibë bëtsibë nuibananti ꞌain. ꞌËn mitsu nuibacësaribi oi camina micamax bëtsibë bëtsibë upiti nuibananti ꞌain. 35Micamaxmi bëtsibë nuibanania isquin ca camabi unin, ënë unicamax ca asérabi Jesusan ꞌunánmicë ꞌicë quixun ꞌunánti ꞌicën.

Pedronën a ñuiquin uni paránti Jesusan ñuia

(Mt 26.31-35; Mr 14.27-31; Lc 22.31-34)

36Usaquian cacëxun ca Simón Pedronën Jesús cacëxa:

—¿Uinu caramina cuanin?

Cacëxun ca Jesusan cacëxa:

—Anu ꞌëx cuanti, anu camina bërí ꞌëbë cuantima ꞌain. Anúnmi cuanti nëtë sënë́ncëbë camina cuanti ꞌain.

37Cacëxun ca Pedronën cacëxa:

—¿Uisa cupí carana bëríbi mibë cuantima ꞌain? Unían ꞌë ꞌanúnbi cana mibë cuanti ꞌain.

38Cacëxun ca Jesusan cacëxa:

—¿Asérabi caramina unin mi ꞌacascëxbi ꞌëbë cuanti ꞌain? Asérabi cana ꞌën mi cain, ꞌatapa banatisama pan ꞌain camina —ꞌën cana a uni ꞌunanima —quixun ꞌë ñuiquin rabë́ ꞌimainun achúshi oquin uni cati ꞌain.

Zur Zeit ausgewählt:

Juan 13: cbrPB

Markierung

Kopieren