માથ્થી 9

લકવાવાળાલા ઈસુ બેસ કરના

(માર્ક 2:1-12; લુક. 5:17-26)

1ઈસુ હોડીમા બીસીની માગ જ તેને પદરને સાહારલા ગે. 2તઠ ઝોળીમા પડેલ એક લકવાવાળા માનુસલા થોડાક લોકા ઈસુ પાસી લયનાત, તેહના વીસવાસ હેરીની ઈસુની તે લકવાવાળા માનુસલા સાંગહ કા, “પોસા, હિંમત રાખ તુના પાપ માફ હુયનાહાત.” 3તાહા સાસતરી લોકા ઈસા ઈચાર કર હતાત કા, “યો ત દેવની ટીકા કરહ.” 4તે કાય ઈચારતાહા તી જાનીની ઈસુની તેહાલા સાંગા તુમી પદરને મનમા કજ વેટ ઈચાર કરતાહાસ? 5વદારે સોહપા કના આહા, તુને પાપની તુલા માફી મીળનીહી ઈસા સાંગુલા કા, ઉઠ અન ઘર ધાવ? 6ઘરતીવર માનુસના પોસાલા દુને વર પાપની માફી દેવલા સતા આહા, તી તુમી જાના તે સાટી લકવાવાળાલા ઈસુ સાંગહ, “મા તુલા સાંગાહા, ઉઠ, તુની ઝોળી ઉચલી ન તુને ઘર ધાવ.” 7તો લેગજ ઉઠના, અન ઝોળી ઉચલી ન, અખેસે દેખત તે ઘર માસુન બેસ હુયી નીંગી ગે. 8તી હેરીની લોકા સાહલા નવાય લાગના, તે ઈચારમા પડીની દેવના આભાર માનતા, દેવની ઈસા અધિકાર દીદાહા ઈસા સાંગીની તે દેવલા વાનનાત.

ઈસુ માથ્થીલા બોલવના

(માર્ક 2:13-17; લુક. 5:27-32)

9ઈસુ તઠુન નીંગીની જા હતા, તાહા કર લેનાર કારકુનની એક ચવકી વર બીસેલ માથ્થી નાવને એક માનુસલા હેરા. ઈસુની તેલા સાંગા કા, માને પાઠીમાગ યે અન માના ચેલા બન અન તો ઉઠી ન ઈસુને માગ ગે.

10માગુન ઈસા હુયના કા, ઈસુ લેવીને ઘરમા ખાવલા બીસના અન તેને હારી થોડાક કર લેનાર, પાપી ગનાયજત તે અન તેના ચેલા હારી ખાવલા બીસલા. 11તાહા ફરોસી લોકાસી યી હેરીની, તેને ચેલા સાહલા સાંગા, કા “ઈસુ કર લેનાર લોકા અન પાપીસે હારી કજ ખાહા?” 12ઈસુ તી આયકીની તેહાલા સાંગા, “જે બેસ આહાત તેહાલા વખદ દેનારની જરુર નીહી આહા. પન જે અજેરી આહાત તેહાલા આહા. 13સાસતરમા લીખેલ આહા કા બલિદાન ચડવુલા કરતા તુમી દુસરેવર દયે કરા તીજ માલા ગમહ યેના અરથ કાય તી તુમી જાયની સીકી લીજા મા સતી માનસા સાહલા નીહી પન પાપી માનસા સાહલા જ બોલવુલા આનાહાવ.”

ઉપાસ બારામા સવાલ

(માર્ક 2:18-22; લુક. 5:33-39)

14માગુન યોહાનના ચેલા યીની ઈસુલા સોદા “આમી અન ફરોસી લોકા પકા ઉપાસ કરજહન, પન તુના ચેલા ત ઉપાસ નીહી જ કરત, તેના કારન કાય આહા” 15તાહા ઈસુની તેહાલા સાંગા, “જદવ પાવત નવરા હારી આહા, કાય પેનવાળા શોક કરી સકતીલ? પન તે દિસ યેતીલ, જદવ નવરા તેહને પાસુન લી લેવાયજીલ, તદવ તે દિસ પાસુન ઉપાસ કરતીલ. 16કોની પન જુને કપડાલા નવે કપડાના ઠીગળ નીહી લાવ. અન જો ઠીગળ લાવીલ ત નવા જોડેલ કપડા જુને કપડાલા વદારે ફાડી ટાકીલ, અન તેના સીડકા ખુબ મોઠા હુયી જાયીલ. 17નવા દારીકાના રસ જુની કાતડાની ઠેલીમા કોની નીહી ભરી ઠેવ. અન જો ભરી ઠેવહ તો નવા દારીકાના રસ કાતડાની ઠેલી સાહલા ફોડી ટાકહ અન દારીકાના રસ ઈખરાયજી જાહા તાહા કાતડાની ઠેલી ન દારીકાના રસ દોનીસા નાશ હુયહ. પન નવા દારીકાના રસ નવે કાતડાને ઠેલે સાહમા ભરુલા પડ તાહા દોની બચી જાતી.”

અધિકારીને પોસીલા અન પગરવાળી બાયકોલા ઈસુ બેસ કરનેલ

(માર્ક 5:21-43; લુક. 8:40-56)

18ઈસુ તેહાલા ઈસી ગોઠ સાંગ હતા તોડેકમા યાઈર નાવના અધિકારી તઠ આના અન ઈસુને પાયે પડીની તેની વિનંતી કરી સાંગા કા, માની પોસી મરી ગય હવી પન તુ યીની તીવર હાત ઠવસીલ તાહા તી જીતી હુયીલ. 19ઈસુ ઉઠી ન તેને હારી ગે, અન તેના ચેલા બી તેને માગ ગેત. 20તાવ ત એક બાયકો હતી, જી બારા વરીસ પાસુન પગરની અજેરીમા હતી તી ઈસુને પાઠીમાગ આંગડાલા હાત લાવની. 21કાહાકા તી મનમા ઈચાર હતી કા, “મા ઈસુને આંગડાલા હાત લાવીન ત મા બચી જાયીન.” 22તાહા ઈસુની માગ ફીરી હેરીની તીલા સાંગા, બુયુ હિંમત રાખ, તુય માવર ભરોસા ઠેવાહાસ યે ગોઠની તુના તારન કરાહા, તેજ સમયમા તી બાયકો બેસ હુયની. 23માગુન ઈસુ તે પ્રાર્થના ઘરના આગેવાનના ઘરમા આના, તાહા તે ઘરમા ઠાળી લાવત તેહાલા અન કકાસ કરત તે લોકા સાહલા તો હેરના. 24તેની તેહાલા સાંગા બાહેર નીંગી જા, પોસી મરી નીહી ગયેલ, પન તી ત નીજહ. તાહા તે તેવર હસુલા લાગનાત. 25પન લોકા સાહલા બાહેર કાડા તાહા ઈસુ મજાર ગે, તેહાલા સાંગના અન પોસીને હાતલા ધરના તાહા પોસી ઉઠી બીસની. 26તી ગોઠ તેહને તે અખે વિસ્તારમા પસરી ગય.

ઈસુ આંદળા સાહલા બેસ કરનેલ

27ઈસુ તઠુન નીંગીની જા તાહા, દોન આંદળા તેને માગુન જાયની ઈસા આરડત કા, દાવુદ રાજાને વંશના પોસા આમાવર દયા કર. 28તો ઘરમા ગે તાહા દોની આંદળા તે પાસી આનાત. ઈસુની તેહાલા સોદા, “કાય તુમાલા વીસવાસ આહા, કા મા તુમાલા બેસ કરી સકીન?” તેહી ઈસા સાંગા, “હા પ્રભુ, આમાલા વીસવાસ આહા કા આમાલા બેસ કરી સકહસ.” 29તાહા ઈસુની ડોળાવર હાત થવીની સાંગા, તુમના વીસવાસ પરમાને તુમાલા હુયુદે. 30તે આંદળા દેખતા હુયનાત અન માગુન ઈસુની તેહાલા બરાબર સાંગા, યી ગોઠ કોનાલા માહીત નીહી પડુલા પડ. 31પન તે તઠુન નીંગનાત તે વિસ્તારને અખે જાગામા ઈસુના મહિમા પસરવી દીનાત.

મુકાલા ઈસુ બોલતા કરનેલ

32દોન આંદળા માનસા બાહેર નીંગનાત તાહા થોડાક લોકસી ભૂત લાગેલ એક મુકાલા ઈસુ પાસી લયા. 33જદવ ઈસુની ભૂતલા બાહેર કાડા, તાહા તો મુકા બોલુલા લાગના, ત લોકા સાહલા પકા નવાય લાગના અન તે સાંગત. ઈસરાયેલ દેશમા પુડ પન આમી ઈસા હેરેલ જ નીહી. 34ફરોસી લોકાસી સાંગા, “તો ભૂતાસે સરદાર સૈતાનને મદતકન ભૂતા સાહલા કાડહ.”

લોકા સાહવર ઈસુની દયે

35ઈસુ અન તેના ચેલાસે હારી જાયની યહૂદીસે પ્રાર્થના ઘરમા જાયી ન દેવને રાજની બેસ ગોઠના પરચાર કરના અન પકા જાતના રોગના દુઃખે સાહલા બેસ કરના, પકા સાહારમા ની ગાવાસાહમા ગે. 36પકા લોકા સાહલા હેરી ની તેહવર તેલા પકી દયા આની કાહાકા તે તે મેંડાસે ગત હતાત, જેહના કોની બાળદી નીહી આહા. 37તાહા તેની તેને ચેલા સાહલા સાંગા, “જીસા ખેત સાહમા પકા પીક યેહે, ઈસા પકા લોકા દેવની ગોઠ આયકુલા તયાર આહાત. પન દેવને રાજને બારામા સાંગુલા સાટી લોકા વાય આહાત. 38તે સાટી ખેતને માલીક પાસી પ્રાર્થના કરા કા કાપુલા સાટી મજુર સાહલા દવાડ.”

Zur Zeit ausgewählt:

માથ્થી 9: DHNNT

Markierung

Kopieren