लूका 23

पिलातुस मड़ंग रे ईसु

(मत्ती 27:1-2,11-14; मरकुस 15:1-5; एहुन्‍ना 18:28-38)

1हेना वरी सभा रेनकू सींड़ होड़कू रिमकेनते, ईसु पिलातुस थरे कू इदी तेडिया। 2हेना वरी हेंकू न याःते कहनी केतेकू दोसीय दोहो एनुः “नेय होड़कुय बहको दोहो एनु। अवुर कयसर लगड मलगुजारी अलोपे एमेय मेनतेय मँदा कू दोहो एनु, अवुर खुद अनानेज मसीहा, मियाँहोड़ राजा मेनतेय कहनीः दोहो एनु, नआँ सींड़ अले अँजोम केडा।”

3हेना वरी पिलातुस होंबोर तेडिया, “अम एहूदिकू रेनिय राजा हवे किदो?” हेना वरी ईसु पिलातुस थरेय जबाब तेडा, “अनम कहनी गोत्तेडा।” 4तहाँ पिलातुस बड बडे आजककू अवुर होड़कू थरेय कहनी तेडा, “इंञ नेय होड़ थरे कनर दोस मेनेंञ ञँमगाडा।”

5लेकिन होड़कू अवुर जिदहाय तेकू कहनी तेडा, “नेय गलील जिला वरी नआँ एरुसलेम सहर अँगम सींड़ एहूदी देस रेनकू होड़कू सिक्छा एम एम तेय भड़को यडकुआ।” 6हेना वरी नआँ अँजोम केते पिलातुस होंबोर तेडा, “सही मेते नेय होड़ गलील जिला रेनिय हवे?” 7गलील जिला हेरोदेस राः हाँथ गाँथ रेआ मेनाआँ पपाड़ी केनते, ईसु हेरोदेस राजा थरेय कुलतेडिया। हेंय हेना तोलोग हेन एरुसलेम सहर रेय दोहो एना।

हेरोदेस मड़ंग रे ईसु

8हेरोदेस राजा ईसु ञेंलके ते अखीरिय खुसी एना। हेंय ईसु राः बिसेय तेय अँजोम तडा ते अखीर दिन वरी ञेंलेय मेनतेय पसींद तडा। ईसु ती वरी चमत्कार काम ञेंल गिसन तडिया। 9हेंय अखीर टेबोईय होंबोरिय दोहो एनु, लेकिन ईसु कनर मेनते मेनेय मिड़ाः गडिया। 10बड बडे आजककू अवुर एहूदी नियम चेचेडकू चड़ाँ केनते जिदहाय तेकू दोसीय दोहो एनु। 11हेना वरी हेरोदेस राजा अनेज रेनकू सिपाहिकू सुदा ईसु मजाक कू उड़ो तेडिया, अवुर मजाक कू उड़ोविय लगड चमकोआ कपड़ा तुसींञ केडिय ते पिलातुस थरे कू मिड़ाः अकतेडिया 12नआँ वरी पहील ते पिलातुस अवुर हेरोदेस मुदेयकू घयते कींञ ञेंल ओड़ेंग दोहो एनु; लेकिन हेन चेका वरी हेंकींञ दोस्ती कींञ बनो यनु।

पिलातुस ईसु मिरतू दंडिय ओवाडिया

(मत्ती 27:15-26; मरकुस 15:6-15; एहुन्‍ना 18:39—19:16)

13पिलातुस बड बडे आजककू अवुर अधिकारिकू अवुर होड़कू हो मियाँ तेय राःतेड कुआ 14अवुरिय कहनी तेडा, “नेय होड़ अपे एटाः होड़कुय बहको यडा मेनते दोस केडिय ते इंञ थरे पे अगकेडिया। अवुर अँजोम पे, इंञ अनापे मड़ंग रेंञ होंबोर तेडिया। जे टेबोः रे अपे नेय पे दोस यडा हेना टेबोः राः बिसेय ते नेय थरे इंञ कनर गलती बेगारिंञ ञाँमा। 15अवुर हेरोदेस राजा हो कनर गलती बेगारिय ञाँमा। हेनाते सजा मेनेय एमगाडिया, अवुर इंञ थरेय मिड़ाः गोत्तेडिया। अवुर अँजोम पे, नेय कनर बेगारिय गलतीआ हेनाते नेय मिरतू दंड एरो ञँमेना। 16इंञ नेय कोड़ा तेंञ एर ञेंड केयतेंञ बगी वया।”

17[पिलातुस परब राः समय रे मियाँहोड़ बंधवा होड़ अड़ागिय राः नियम दोहो एना।]#23:17 अवुराः हस्तलेख रे नआँ कड़ी मेने ञँमुआँ 18तहाँ सींड़ होड़कू मियाँ तेकू हल्ला एना, “नेय होड़ पे ञेंड गोज गोत्तेयू, अवुर अले लगड बरअब्बा पे अड़ाः गोत्ते।” 19बरअब्बा अखीर होड़कू उरयली केते एरुसलेम रेय लड़ाई एना। अवुर होड़कुय ञेंड गोजतेडा, हेना राः चलते ते हेंय जेहेल रेकू डलो तेडिया। 20लेकिन पिलातुस ईसु बगिवय राः मन दोहो एना, कहेकि होड़कू फे-रिय समझो तेडकुआ। 21तहाँ होड़कू हल्ला केनतेकू कहनी तेडा, “नेय कुरूस रेपे ठोकोवियू।” 22हेना वरी हेंय तीसरा बार हेंकुय होंबोर तेडा, “नेय होड़ चीय गलती केडा? इंञ मेय थरे मिरतू दंड ओवय लायिक कनर गलती बेगारिंञ ञाँमा। हेनाते इंञ नेय कोड़ा ते एर ञेंड केयतेंञ बगी वया।”

23लेकिन होड़कू कुरूस रेम रकाबियू मेनते अनावुर कू हल्लाऊ, अवुर हेंकू जेयसे कू हल्ला एना हेन घयते होया एना। 24तहाँ पिलातुस मेनेन कुराः अरजी घयते होयाऊ मेनतेय हुकूम तेडा। 25हेना वरी बरअब्बा होड़कुय ञेंड गोजतड दोहो एनु, हेना चलते ते जेहेल रेय दोहो एना। होड़कू ने-नी कू असी दोहो एनु, तहाँ पिलातुस नेनीय अड़ाः तेडा, अवुर जेयसे मरजी तेयसे कू करोवे लगड ईसु हेंकू ती रेय जिमा तेडिया।

ईसु कुरूस रेकू ठोको तेडिया

(मत्ती 27:32-44; मरकुस 15:21-32; एहुन्‍ना 19:17-19)

26सिपाहिकू ईसु कू गोः तोलोग कुरेनी सहर रेनिय सिमोन, गाँव वरी एरुसलेम हनतेय मेजुः दोहो एनु। ईसु तयोम तयोम ते कुरूस गोः लगड सबके डियते खँदीत रे कुरूस कू लदगो तेडा। 27अखीर होड़कू हेंय तयोम तेकू से-ने दोहो एनु, अवुर हेना रे कोड़ी कुहो अखीर कू दोहो एना, अवुर अखीर खोंट केनतेकू ईयाम दोहो एनु। 28ईसु हेंकू हन मुँहियों केनतेय कहनी वडकू, “ओ एरुसलेम रेनकू बेहिनकू, इंञ लगड अलोपे ईयामू, अनापे अवुर चोंडिजकू लगड, मेजुः तना दुख बिपेत वरी बंचोः लगड पे ईयामू। 29कहेकि अँजोम पे, एयसा दिन मेजुः तना, हेना तोलोग होड़कू कहनियाँ, ‘जे बँजी गिआकू अवुर चोंडिजकू मेने कू जनम गड हेंकू अवुर दुदू मेने कू पियो गडकुआ, हेंकू कोड़िकू आसीस कू ञँमकेडा।’ 30#दरसन 6:16हेना तोलोग होड़कू बुरू कू कहनी वआ, ‘अले थरे लोजोरुऊ,’ अवुर घुटरी कू कहनी वआ, ‘अले थरे लोजोर कोःते तेपेड गोज गोत्तेले’ मेनते। 31हेंकू होड़कू हरियारा दुबी सुदा नआँ घयतेकू करो यड रेदो, लोहोड़ा दुबी सुदा ची हालत होयआ?”

32बा होड़ कसूर तडकींञ हेंकींञ हो हेंकू ईसु सुदा ञेंड गोजकींञ लगड कू गोःतेड किञाँ। 33हेना वरी खोपड़ी मेनते कू कहनी वआ, हेना जघा कू तयाः तेडा, तहाँ हेंकू ईसु अवुर बा होड़ कसूर तड हेंकींञ हो कुरूस रेकू रकब तेडकिञाँ, मियाँहोड़ जोम गतर रे अवुर मियाँहोड़ कोंञ हन गतर रेकू रकब तेडिया। 34तहाँ ईसु कहनी तेडा, “अपा अम नेकुम माफीम ओवाकू, कहेकि नेकू ची ले बनो यडा मेनाआँ मेने कू पपाड़ी तना।” तहाँ सिपाहिकू चुटका कू डलो केते जे राः ञुमू ते चुटका उडूंग एना, हे-नी ईसु राः अँगय अँगेर तेडा।

35होड़कू चड़ाँ केनतेकू ञेंल हड़ीवय दोहो एनु, अवुर अधिकारिकू हो ठट्ठा उड़ो केय तेकू कहनिय दोहो एनु, “नेय एटाः कुय बंचो तेडा, सही मेते नेय भगवान होपोन मसीहा हवे रेदो, अवुर भगवान चुनो केडिय रेदो अनानेजिय बंचो।”

36सिपाहिकू हो बँदेत रे सेनकेन ते सिरका#23:36 सिरका अखीर जोजीः हेना अंगूर रस। नआँ कम पेयसा ते ञँमुआँ कू एम सोवाडिया, अवुर ठट्ठा उड़ो केय तेकू कहनी वय दोहो एनु 37“सही मेते अम एहूदिकू रेनिय राजा हवे रेदो अनाम बंचोऊ।” 38अवुर हेंय भोःतू अगस हँडे दमभराआ पटरा रे दोस तेडिय हेना लिखो केतेकू ठोको तडा, “नेय एहूदिकू रेनिय राजा हवे।”

मन तयिय बदलो हेनी अपराधी

39बा होड़ ईसु राः धरी कगर ते कुरूस रेकू रकब तडकींञ हेंकींञ कसूर तडकींञ मेंडे मियाँहोड़ निन्दाय लगाडिय कहनी तेडा, “अम सही मेते मसीहा हवे रेदो? अनाम अवुर अलिंञ होम बंचोलिञूँ।” 40नआँ अँजोम केते एनेटागी केटेज अहा तेय कहनी वडियू, “अम भगवान मेनेम बोरो वयतन किदो? मेय सजाय ञँमयड हेना सजा अम होताम ञँमियाडा, 41अवुर अलंग गलती केडा ते सजा लंग ञँमियाडा, लेकिन मेय कनर बेगर अलत गलत रे घलि सजा ञँमुः तना।”

42हेना वरी हेंय ईसु थरेय कहनी तेडा, “ओ ईसु, अम राजे लगड मी मेजुः रे, उहयर केंञते इंञ थरेम दयाऊ।” 43हेना वरी ईसु हेंय थरेय कहनी तेडा, “इंञ अम थरे सही मेतेंञ कहनी यडा, तेनेसिंञ अम इंञ सुदा सरग रेम दोहोना।”

ईसु साँसिय अड़ाः तेडा

(मत्ती 27:32-44; मरकुस 15:21-32; एहुन्‍ना 19:17-19)

44लगभग बारह बजे वरी तीन बजे अँगम सींड़ देस अंधरा यनु, 45मरसल तड हेना अंधरा यनु, अवुर मँडिल राः अखीर पवितर अस्थान राः मड़ंग रे लगो तड हेना परदा#23:45 पवितर अस्थान अवुर अखीर पवितर अस्थान अलग लगड कू लगो तडा। माँजे माँज ते ओड़ेज यनु। 46ईसु बडे आवाज ते हाक केनतेय कहनी तेडा, “ओ अपा, ईञाः आत्मा अम थरेंञ जिमा यडा।” नेन याःते कहनी केते साँसिय अड़ाः गोत्तेडू।

47हेना वरी रोमि सिपाहिकू रेनिय दरोगा जो कुछ होया तना ञेंलकेते भगवान रअय बड़हाई तेडा, अवुरिय कहनी तेडा, “सही मेते नेय होड़ कनर मेनेय गलती गडा।” 48अवुर ञेंञेंल कू जवर तन हेंकू न घटना ञेंलके ते कुड़ाम तुकू कू गील गील तेकू मिड़ाः चलो एना। 49#लूका 8:2,3अवुर ईसु कू चिन्हों तड हेंकू कुछ होड़कू गलील जिला वरी कू मेजताना। हेंकू सुदा कोड़ीकू होकू दोहो एना, नेकू सींड़कू बीच रे चड़ाँ केनतेकू ञेंल एनेज दोहो एनु।

ईसु मरघटी रेकू दोहो तेडिया

(मत्ती 27:32-44; मरकुस 15:21-32; एहुन्‍ना 19:17-19)

50हेना रे उसुफ बढ़ियाँ अवुर धरमी होड़ दोहो एना, हेंय एहूदिकू राः दरबार रेनिय सदस्य दोहो एना। 51एहूदी सपायँड़कू ईसु मिरतू दंड ओवाय लगड कू गुट तेड हेना काम मेनेय बेस गडा। हेंय एहूदी देस अरमतियाह सहर रेनिय दोहो एना, अवुर हेंय भगवान राः राज मेजुआ मेनतेय असरा तना। 52हेना वरी हेंय पिलातुस थरे सेनकेनते ईसु राः लास अगड़ू केते जतानिय लगड आदेसिय असी तेडा। 53हेना वरी हेंकू ईसु राः लास अगड़ू केडते मोलामा चादर तेकू गुरघेट तेडा। एटाःकू राः लास दोहो लगड मियाँटंग चटाँड़ी कू खोदियार केते मरघटी कू बनो तडा, हेना रे कनय मेने कू दोहो गडा, हें-डे इदी केडिय ते ईसु कू दोहो अटु तेडिया। 54हेना चेका सुक दिन दोहो एना। मड़ाँगआ दिन लगड एक दिन राः पहील ते सींड़ चीज तयार केतेकू दोहोता दोहो एनु, कहेकि सब्द राः दिन सुरुः दोहो एनु।

55गलील जिला वरी ईसु सुदा कू मेजताना हेंकू कोड़िकू, लास कू गोः तोलोग तयोम तयोम ते सेनकेनते हेना मरघटी कू ञेंलतेडा, अवुर काःते लास कू दोहोकेड हेना होकू ञेंलतेडा। 56तहाँ हेंकू कोड़िकू मिड़ाः केनते ईसु थरे लगोवे लगड सोंओंः हेना चीज अवुर सोंओं सुनूम कू तयार तेडा। हेंकू सब्द राः दिन रे लुड़ूः राः नियम दोहो एना, अवुर हेंकू हेना चेका कू लुड़ू एना।

Zur Zeit ausgewählt:

लूका 23: ksz

Markierung

Kopieren