लूका 12

सहचाँ होड़कू वरी बच बच तेपे दोहोनू

1 # मत्ती 16:6; मरकुस 8:15 हेनेन तोलोग हजारों होड़कू राः भीड़ होया एना, तहाँ कू ठेला ओड़ेंगू, हेना वरी ईसु पहील ते अनेज रेनकू चेलाकू थरेय कहनी तेडा, “अपे फरीसिकू राः कपट रूपी खमीर वरी सँवचेती तेपे दोहोनू। 2#मरकुस 4:22; लूका 8:17नआँ घियाः दिन मेजुः तना, मेने ञेंलुआ हेना सींड़ टिपाआ, अवुर दलंग राः सींड़ कुकू ञें-लेआ। 3कनारा टेबोः अंधरा ओत रेकू टेबोः केडा, हेना टेबोः मरसल रेकू लायेआ। अवुर ओड़ाः दलंग रे लोटोः केनतेकू टेबोः केडा, हेना सींड़ टेबोः सड़ीम अगस वरी चड़ाँ कोःतेकू परचारेआ।”

ईया पे बोरोवा?

(मत्ती 10:28-31)

4“अपे इंञ गतिकू हवे इंञ लाय वपे तना, हेंकू जान सेयते कू ञेंड गोज पेआ। हेंकू तयोम ते कनार एरो कू बनो तेडा, हेंकू अलोपे बो-रू वकू। 5इंञ अपेंञ लाय वताना ईया पे बोरोवा, जे ञेंडके कुते नरक रे डलोकू राः सक्‍ति इदाना, हें-नी पे बोरोवा। 6पाँच गोटंग गोरेलाकू दु पेयसा वरी बगरा ते मेनेकू केजाआ, तबो लेहो भगवान हेंकू मेंडे रे मियाँटंग हो मेनेय लीड़िंञ कुआ। 7अपे भोःपे राः सींड़ ऊब पे होय लेखा केडा, हेनाते अलोपे बो-रू, अपे गोरेलाकू वरी हो अखीर किमती गिआपे।”

ईसु अपनो वियू चहे अलो अपनो वियू

(मत्ती 10:32,33; 12:32; 10:19,20)

8“इंञ अपे थरेंञ कहनी यडा, कनय हो होड़कू मड़ंग रे ईञिय अपनो रेदो, होड़ होपोन हो हेंय भगवान रेनकू सरगदूतकू मड़ंग रेय अपनो विया। 9लेकिन होड़कू मड़ंग रे ईञिंय नहकारा, हेंय इंञ हो भगवान रेनकू सरगदूतकू मड़ंग रेंञ नहकारिया।” 10#मत्ती 12:32; मरकुस 3:29कनय होड़ हो भगवान होपोन राः बिरोध रे कनर टेबोः कू टेबोः रेदो, हेंकू राः माफी ञँमुआँ, लेकिन जे पवितर आत्मा राः बिरोध रे निन्दा टेबोईय टेबोः रे, हेनी राः माफी एरो ञँमेना।

11 # मत्ती 10:19,20; मरकुस 13:11; लूका 21:14,15 “अपे कनय राज चलोकू थरे अवुर दरबार रे अवुर बड बडे अधिकारिकू थरे कू इदी पेरे ची ले कहनिआँ मेनते पसींद पसींद ते अलोपे फिकीरुऊ। 12कहेकि पवितर आत्मा ची पे कहनिआँ, हेना हेनेन तोलोगिय लाय वपेआ।”

मियाँहोड़ बोया धनमान राः टेबोः

13हेना वरी फेर भीड़ वरी मियाँहोड़ कहनी तेडा, “ए गुरू, मगंञ थरेम कहनियूँ अपुंञ राः हिसा बंटाय हटींग वञूँ।” 14तहाँ ईसु हेंय थरेय कहनी तेडा, “ए होड़, हहाटींगय अवुर न्यायी ईया चुनो केडिञाँ?” 15अवुर ईसु हेंकू थरेय कहनी तेडा, “अपे सँवचेती तेपे दोहोनू, जे-निरीता लोभ वरी अपन आप पे बंचो। कहेकि कनय थरे तेनेमेन सम्पति भले दोहोनू, हेना सम्पति हेंय राः जीवन एरो बंचो सको एना।”

16हेना वरी ईसु हेंकू थरे मियाँटंग उदाहरड़िय लाय तेडा, “मियाँहोड़ धनमान राः खेत रे अखीर उपज होया एना। 17हेंय नआँ याःते अनेज मन रेय पसींद तेडा, ‘न मेनमोट कमय इंञ थरे इदान हेना चिंञ बनोआँ, दोहोय लगड जघा हो कोवाआ। 18कोठी टोविज केते बडे तेंञ बनो वेआ, हेना रे सींड़ अन्‍न अवुर सम्पत्ति तँञिंञ दोहोआ। 19अवुर इंञ ईनीञिंञ कहनी वआ, अखीर बरिस लगड अम थरे सम्पत्ति इदाना, जोमुः चरोः मी अवुर खुसीम मनो।’ 20लेकिन भगवान हेंय थरेय कहनी तेडा, ‘ए बोया! तेनेसिंञ ञींद अमाः जीविंञ गो-गे रेदो, नअँम जवार केड हेना सम्पत्ति, ईया राः होयाआ?’ 21नेन घयते न संसार रे सम्पत्ति जवार हेंकू होड़कू भगवान राः नँजेर रे धनी कोवा कुआ।”

अलोपे पसींदे

(मत्ती 6:25-34; 19:21)

22हेना वरी ईसु अनेज रेनकू चेलाकू थरेय कहनी तेडा, “जियोः लगड ची ले जो-मा, अवुर ची ले तुसिञाँ मेनते, देंह लगड अलोपे फिकीरुऊ। 23कहेकि जोमुः चरोः अवुर कपड़ा लता वरी हो, अपे राः जीव अखीर किमती गिआ। 24कहू कुपे तियागु; हेंकू मेने कू मे-रेआ; न हेंकू कोठी रेकू दोहोया, तबो लेहो भगवान हेंकुय असुल कुआ। अपे तितीजकू वरी हो अखीर किमती गिआपे। 25अपे मेंडे ईया इदाना, फिकीर कोःते अनेज राः उमेर मियाँ घड़ी होय बड़हो सकोआ? 26नआँ घियाः मियाँटंग होडीञाँ काम घलि मेने पे करो सकोआ, दो अवुर एटाः एटाः चीज लगड ची पे फिकीर वताना? 27जंगल राः बहा पे तियागू, हेना काःते बडेआ, न कपड़ा तुसिञाँ, न बुताआ, तबो लेहो इंञ अपेंञ लाय वताना, निमीन बडेअय सुलेमान राजा घलि धनमान रह ते बहा वरी हो हेंय राः कपड़ा बढ़ियाँः मेने दोहो गना। 28भगवान डाँड राः बीर घलि तेसींञ इदाना, हेना अवुर एटाः चेका कू तुयाँगेआ, हेना घलि बढ़ियाँ तेय सींगारेआ, दो ए कमजोर बिसवासिकू, भगवान अपे एरोय धियान तेडपेआ किदो? 29अवुर अपे ची ले जोमुः चरोः मेनाआँ खोज रे अलोपे दोहोनू, न पे फिकीरुऊ। 30कहेकि दुनिया रेनकू होड़कू नआँ सींड़ चीज राः खोज रेकू दोहोना, अवुर अपे राः ची जरूरत इदाना, हेना अपे रेनिय भगवान अपा पपाड़ी तना। 31भगवान राः राज राः खोज रेपे दोहोन रेदो, नआँ सींड़ चीज अपे हेंय ओवा पेआ।”

सरग राः धन

(मत्ती 6:19-21)

32ईञाःकू चेलाकू ठुवा गिरे हो अलोपे बो-रू, कहेकि भगवान अपा अपे सरग राज ओवापे लगड अखीर खुस इदानियाँ। 33अपे थरे जे चीज इदाना, हेना केजा केते जे राः जरूरत इदान हेनी होड़ दान तेपे ओवायू। अवुर अनापे लगड एयसाआ बटू पे बनो जोकि कबोह मेने मरिआ। सरग रे धन पे जवर रेदो, कबोह एरो अधियों एना, अवुर हेना ञिंदीरकू हो एरो कू जोम सको एना, अवुर चोरहाकू हो एरो कू चोरा सको एना। 34कहेकि जहाँ रे अपे राः धन दोहोना, हें-डे अपे राः मन हो दोहोना।

जाग जाग तेपे दोहोनू

(मत्ती 24:42-51)

35 # मत्ती 25:1-13 “भगवान राः काम लगड तयार पे दोहोनू, अवुर अपे जो काम करेक इदाना, हेना पे काम हताड़े। 36#मरकुस 13:34-36मालिक तबू बियाह वरी तिमीसिय मिड़ाः मेनते कू तँगिया। अवुर हेंय मेजकोः ते दुवारिय खटखटो सी तुरेत्तेकू जिजवाया। हेनकू नोकरकू घयते अपे होपे बनोऊ। 37जगो हतड़ कोः तोलोग मालिक मेज ञँम कुआ, हेंकू नोकरकू आसीस कू ञँमकेडा। इंञ अपे थरे सही मेतेंञ कहनी यडा, खुदे मालिक तयार कोःते हेंकू जोमुः लगाडिय दुड़ूब कुआ, अवुर मेजकोःते हेन कुय सेवाआ। 38अगर अदहा रात चहे भींसारीय मेजकोःते हेंकू जगल तेय ञँम कुआ, हेंकू नोकरकू आसीस कू ञँमकेडा। 39#मत्ती 24:43,44अपे नआँ टेबोः पपाड़ी कोःपे, चोर तीमिन जुवारिय मेजुआ मेनाआँ ओड़ाः मुँवर पपाड़ी एन रेदो, जगालिय दोहोएन मेनू, अवुर ओड़ाः तुरे एरोय एनेम बुचाःवड मेनू। 40हेनाते अपे हो तयार पे दोहोनू, कहेकि जे घनी अपे मेन पे पसींदेआ, हेनेन घनी होड़ होपोन मेजुआ।”

ईमानदार अवुर अल ढेलियाअय हरवाह

(मत्ती 24:45-51)

41हेना वरी पतरस होंबोर तेडा, “ए परभु, नआँ उदाहरड़ सीरिफ अले लगड हवे किदो, सींड़कू लगड मी कहनी यडा?” 42हेना वरी ईसु जबाब तेडा, “बुधमान अवुर ईमानदार बराहील ईया इदाना? जे गिरहत ओड़ाः राः देख रेख लगड अवुर सही समय रे हरवाह चरवाहकू हिसत कुय खियो हताड़ा। 43आसीसिय ञाँमा हेंय हरवाह, जे गिरहत तू नेन घयते काम हतारे तोलोगिय मेज ञँमेया। 44इंञ अपे थरे सही मेतेंञ कहनी यडा, हेंय अनेज राः सींड़ अन धन राः हँकदारिय बनोविया। 45लेकिन इंञाअय गिरहत मेजुईय देरी यडा मेनतेय पसींदेआ, हेंय बराहील हरवाह हरवाहिन कुय ञेंड बेड़ा कू, अवुरिय जोमुः चरोऊ अवुरिय मतवाड़िऊ, 46हेंय हरवाह गिरहत मेनेय तँगी घनी अवुर मेनेय पपाड़ी तोलोग अचाकातेय मेजुआ। अवुर मालिक हेंय अखीर सजा एम केय ते, जे ईमानदार कोवा कुआ हेंकू सुदाय कुलेया। 47जे मालिक राः मरजिय पपाड़ी दोहो एनु, हेंडे रेहो हेंय जिमा वडिया, हेना बढ़ियाँ ते मेनेय कामे रेदो, हेंय हरवाह बगरा सजाय ञाँमा। 48लेकिन अनजान ते गलती काम कू काम हेंकू, बगरा सजा एरो कू ञँमतेडा। बगराय ओवड कुआ, हेंकू वरी बगराय असिया, अवुर अखीर बगराय जिमा वडकुआ, हेंकू वरी बनगरा तेय असिया।”

ईसु मेजुः रे नतिजा

(मत्ती 10:34-36)

49“इंञ धरती रे सेंगेल सलगो लगाडिंञ मेजकेना, ईञाः इच्छा इदाना कि हेना नीनिहों जबेनू! 50#मरकुस 10:38हेना वरी पहील ते इंञ मियाँटंग बतिस्मा#12:50 अखीर तकलीफ सहो केतेय गोजेन हेना, बतिस्मा मेनतेय कहनी वडा। ते खँडाः जरूरी इदाना, नआँ अनायिन पुरोः मेन दिन इंञ थरे अखीर तकलीफ इदाना! 51अपे अड़ींग तना, इंञ धरती रे मेल मिलाप लगाडिंञ मेजकेना मेनते? मेने, इंञ अपेंञ लाय वताना, अपे अलग तलग लगाडिंञ मेजकेना। 52कहेकि पाँच झन अब वरी मियाँ ओड़ाः रेनकू बिरोध ओड़ेंगा, पेय होड़ बा होड़ सुदा, बा होड़ पेय होड़ सुदा। 53अपत कोड़ा होपोन तू सुदा, अवुर कोड़ा होपोन तू अपत सुदा कींञ बिरोध ओड़ेंगा, इंगत कोड़ी होपोन तू सुदा, अवुर कोड़ी होपोन तू इंगत सुदा, हनहार तू किमीन तू सुदा अवुर किमीन तू हनहार तू सुदा कींञ बिरोध ओड़ेंगा।”

समय राः भेद

(मत्ती 16:2-3)

54ईसु भीड़ रेनकू थरेय कहनी तेडा, “अपे पछु हनवरी लिंबिर रकब तहाँ तुरेत्ते पे कहनियाँ, दाः उयुगेआ मेनते, अवुर हेनेन घयते होयाआ; 55अवुर देखीन हँडाः होय चलोः रेदो पे कहनियाँ एएलगाँ मेनते, अवुर हेनेन घयते होयाआ। 56ए कपटिकू, अपे धरती अवुर अगस राः चिन्ह ञेंलके तेपे परथींञ गोत्तेआ, लेकिन नआँ समय रे जो कुछ होयाः तना हेना ञेंलकेते ची लगड मेने पे परथींञ सकोः तना?”

अपन मुदेयकू सुदा पे मेरवन कोऊ

(मत्ती 5:25-26)

57“सही ची हवे मेनाआँ अनापे ची लगड मेने पे न्याय यडा? 58अम अमाअय मुदेय सुदा न्याये लगड अधिकारिकू थरे सेनुः तोलोग होनोर रे हेंय सुदा मेरवानुः मी, नहीं तदो हेंय न्यायी थरेय ओर इदी मिआँ, अवुर हेंय पुलूस कुय जिमा वआ, अवुर हेंकू जेहेल रेकू डलो मिआँ। 59इंञ अपे थरेंञ कहनी यडा, एगो एगो अनायिन पे भरोवे मेन दिन हेना वरी एरो पे उडूंग एना।”

Zur Zeit ausgewählt:

लूका 12: ksz

Markierung

Kopieren