एहुन्‍ना 3

ईसु नीकुदेमुसिय चे-डा

1नीकुदेमुस मेनते कू ञुमू तडिया, हेनी मियाँहोड़ होड़ दोहो एना, नेय फरीसिकू मधे दोहो एना, अवुर नेय एहूदिकू रेनकू मुखियाकू मेंडे मियाँहोड़ दोहो एना। 2एक दिन राः दिन रे नेय ञींद ईसु थरे मेजकेन तेय कहनी तेडा, “ए गुरू, भगवान चेचेड लगाडिय कुलकेड मिआँ हेना ले पपाड़िआ, कहेकि अम चमत्कार काम मी काम यडा, हेना घयते कनय एरो करो सको एना, लेकिन जे सुदा भगवान इदाना हें-नी करो सकोआ।” 3हेना वरी ईसु हेंय थरेय जबाब तेडा, “इंञ अम थरे सही सही तेंञ कहनी यडा, अगर कनय, अवुर मियाँ एस मेनेय जनामुः#3:3 भगवान वरी जनामुः रेदो, हेंय भगवान राः राज एरोय ञेंल सको एना।” 4हेना वरी नीकुदेमुस कहनी तेडा, “कनय सयाँहोड़ कोःरे हेंय काःते फे-रिय जनामुआँ, हेंय इंगत राः लाज रे बोलो कोःते, अवुर मियाँ एसिय जनामुआँ किदो?” 5तहाँ ईसु जबाब तेडा, “इंञ अम थरे सही सही तेंञ कहनी यडा, जे होड़ दाः अवुर पवितर आत्मा तेय जनामुआँ, हें-नी होड़ भगवान राः राज रेय सेन सकोआ। 6नेन घयते दो होड़ इंग आप वरिय जनामुआ; लेकिन कनय होड़ पवितर आत्मा तेय जनामुः रे, हेंय होड़ पवितर आत्मा राः कब्जा ते नवाँः जीवानिय चलो वेआ। 7‘अपे अवुर मियाँ एस जनामुः जरूरी इदाना’ मेनतेंञ कहनी तेड हेनाते, अलोपे अहचराजुऊ। 8मियाँटंग बातिंञ लाय वम तना, होय जहाँ मन तहाँ हनते होयो वआ, करा हनवरी मेजुआ अवुर करा हनते चलोआ हेना मेनेम पपाड़िआ, सडित भर मी अँजोमा। जे पवितर आत्मा तेय जनामुः हेनी हो नेन घयगी अयू। न हो कनय एरो पपाड़ी एना।” 9हेना वरी नीकुदेमुस कहनी तेडा, “न घयते काःते होयाआ?” 10न अँजोम केते ईसु हेंय थरेय कहनी तेडा, “अम इसराएलिकू रेनिय गुरू रेहो, नआँ टेबोः मेनेम जेर सकोः तना किदो? 11अम थरे सही सही तेंञ कहनी यडा कि अले जे-नले पपाड़िआ, हें-नले लाया, अवुर जे-ना अले ञेंलकेडा, हें-नराः बारे ते गोवाही ले ए-मा, अवुर अपे अले लाय वपेः हेना मेने पे सरी वआ। 12इंञ धरती रे होयाः हेना टेबोईंञ लाय वपे तना, हेना मेने पे बिसवास यडा, दो सरग राः टेबोईंञ लाय वपे रेदो, काःतेपे बिसवासेआ? 13सरग रे कनय बेगर रकाबा, सरग वरी अगड़ू केनय भर रकब केना, मतलोब इंञ सरग रेनिय हवे। होड़ होपोन भर सरग रे रकब केना, अवुर सरग वरी ईनिंञ भर अगड़ू केना, कहेकि इंञ सरग रेनिय हवे। 14जेयसे मूसा सुनहर ओत रे पितल राः बींञ बनो केते खुटा रेय टेंगवा तेडा, हेन घयते इंञ होड़ होपोन हो कुरूस रे जरूर कू रकाबिञाँ। 15ताकि कनय हो इंञ होड़ थरे बिसवासेःकू, अनन्त जीवन कू ञाँमू।”

16“कहेकि भगवान दुनिया रेनकू होड़कू एतनाय दुलर तेडकुआ कि मिनियें टंगाअय कोड़ा होपोन तुय एमतेडा, ताकि जे-ना हेंय थरेय बिसवासे, हेंय अलोय नासुऊ, बल्कि अनन्त जीवानिय ञाँमू। 17कहेकि दुनिया रेनकू होड़कू सजा ओवा लगड भगवान अनेज होपोन न दुनिया रे मेनेय कुलगाडिया, लेकिन हेंय राः दोवारा ते दुनिया रेनकू होड़कू बंचो लगाडिय कुलतेडिया। 18जे मिनियें टंगाअय भगवान होपोन थरेय बिसवासेआ, हेंय थरे दोस एरो लगो एना, अवुर हेंय सजा एरोय ञँमतेडा, लेकिन जे मिनियें टंगाअय भगवान होपोन थरे मेनेय बिसवासेआ, हेंय थरे दोस लगो यना। 19नआँ कारने ते सजा ञँमुआ कि न दुनिया रे भगवान होपोन इंजोत राः रूप तेय मेजेना, लेकिन होड़कू हेना इंजोत वरी बगरा अंधराकू बेस वडा, कहेकि हेंकू अखीर अलत गलत काम हेंकू दोहो एना। 20कहेकि जे अलत गलत काम कू काम हेंकू, इंजोतकू मेरंग वआ अवुर हेंकू अकू राः अलत गलत काम अलो देखारुः लगड इंजोत बँदे रे मेने कू मेजुआ। 21लेकिन भगवान राः सत तेकू से-नेआँ, हेंकू इंजोत रेकू मेजुआ, ताकि नेकू राः बढ़ियाँः काम सगोर होड़कू ञें-ले, अवुर होड़कू न घियाः काम भगवान राः सहेता तेकू करो वेआ मेनाआँकू पपाड़ी।”

बतिस्मा ए-मय एहुन्‍ना ईसु राः बारे तेय लायेआ

22कुछ दिन बितो केन रे ईसु अनेज रेनकू चेलाकू सुदा अहूदिया जिला कू सेनेना, अवुर हेंकू हेना रे दोहो केनते होड़कू बतिस्मा कू ओवाकू दोहो एनु। 23अवुर एहुन्‍ना हो सलेम सहर बँदे रे इदाना, एनोन गाँव रे बतिस्माय ओवाकू दोहो एनु, कहेकि हेना रे अखीर दाः दोहो एना, अवुर होड़कू हेना रे मेजकेन ते बतिस्मा कू तिला दोहो एनु। 24#मत्ती 14:3; मरकुस 6:17; लूका 3:19,20(हेना तोलोग एहुन्‍ना जेहेल रे अनायिन कू डलोविय दोहो एनु।) 25हेना रे एहुन्‍ना रेनकू चेलाकू मियाँहोड़ एहूदी सुदा सूधुः #3:25 देंह सुद्ध लगड न लगे, लेकिन भगवान कू अपनो राः सुद्ध हवे राः बारे तेकू अड़ा चवकी एना। 26हेना वरी चेलाकू मेजकेन ते एहुन्‍ना थरे कू कहनी तेडा, “ओ गुरू, अम जरदन जोड़ वरी मेना गतर रे होड़कू बतिस्माम ओवाकू तोलोग, हेना रे मियाँहोड़ होड़ अम सुदाय दोहो एना, अवुर अम हेंय राः बारे ते गोवाहिम एमतेडा कि ने-नी मसीहा हवे मेनते। हेंय निहों बतिस्माय ओवाकू तना, अवुर होड़कू हेंय थरे अखीर कू सेनुः तना।” 27तहाँ एहुन्‍ना जबाब वडकुआ, “नआँ बारे ते अपे अलोपे हिसकाऊ, कहेकि भगवान सरग वरी कनर मेनेय एम रेदो, कनय हो कनर एरो कू ञँमतेडा। 28#एहुन्‍ना 1:20‘इंञ दो मसीहा न लगे, बल्कि हेंय लगड हो-रिंञ सोझ साझ मेनते, भगवान मड़ंग तेय कुलकेडिञाँ।’#एहुन्‍ना 1:20 अवुर अपे नआँ टेबोः रेनकू गोवाहिकू हवे, कहेकि इंञ अपे थरे मड़ंग तेंञ लाय केडा। 29इंञ अपे मियाँटंग बातिंञ लाय वपे तना। कन्याँ, दुल्हा रेनिय दोहोना, अवुर दुल्हा गति चड़ाँ कोःते तँगिय महल रेय दोहोना, अवुर दुल्हा राः आवाजिय अँजोम तहाँ अखीरिय खुसीआ। हेन घयते जे राः बारे ते अपे लाय यडा, हेंय हो दुल्हा घयगिअयू, अवुर इंञ सहेता वयाय गतित घयगी अञूँ, अवुर हेंय राः बारे ते अपे वरी अँजोम केते इंञ हो अखीर खुस गिआञूँ। 30नआँ जरूरी इदाना कि हेंय बढ़होऊ अवुर इंञ घटोऊ।”

31“जे सरग वरिय मेजकेना हेंय सींड़कू वरिय बडे गिआ। अवुर नआँ धरती राः रीति बिधी तेकू जनामुआ, हेंकू धरती रेनकू हवे, अवुर नेकू ने-ना ते खाली धरती राः बारे तेकू टेबोआ। लेकिन जे सरग वरिय मेजकेना, हेंय सींड़कू वरिय बडे गिआ। 32अवुर हेंय सरग रेय ञेंलतेड अँजोम तेड हेना, टेबोईय लाय तेडा, लेकिन हेंय राः गोवाही कनय मेने कू अपनो गडा। 33अवुर जे होड़ हेंय लाय केडा टेबोईय अपनोआँ, हेंय भगवान राः दोवारा ते एमकेडा टेबोः सीरित गिआ मेनते गोवाहिय एमकेडा। 34कहेकि जे भगवान कुलकेडिया, हेंय भगवान राः टेबोईय टेबोआ, कहेकि भगवान राः आत्मा हेंय थरे दोहोना, अवुर भगवान अनेज राः आत्मा नपो नपो ते हेंय मेनेय ओवाया। 35#मत्ती 11:27; लूका 10:22अपत होपोन तुय दुलारा, अवुर हेंय सींड़ चीज राः हाँथ गाँथ होपोन तू राः ती रेय एम गोत्तेडा। 36जे होपोन तू थरेय बिसवासेआ, हें-नी होड़ अनन्त जीवानिय ञाँमा। लेकिन जे होपोन तू मेनेय मनोविया, हेंय अनन्त जीवन कभी एरोय ञँमतेडा। बल्कि भगवान हेंय थरेय खीस कोःते सजाय ओवाया।”

Zur Zeit ausgewählt:

एहुन्‍ना 3: ksz

Markierung

Kopieren