एहुन्‍ना 12

मान मरजादिय लगड मरियोम ईसु कटा रे सोंओं सुनूमिय ओजाः तेडा

(मत्ती 26:6-13; मरकुस 14:3-9)

1तहाँ ईसु पस्का परब राः छो दिन पहील ते चेला कुतय सुदा बयतानियाह गाँव रेय सेनेना। लाजर हेन गाँव रेनिय दोहो एना, ईसु गोजतन वरी ने-निय जियो तेडा। 2हेना रे ईसु मान मरजाद लगड बियाड़ी कू ईसीन तेडा। अवुर लाजर हो हेंकू सुदा जोमुः लगाडिय दुड़ूब तना। हेना तोलोग मरथा बियाड़िय परोस वकू दोहो एनु। 3#लूका 7:37,38हेना वरी मरियोम लगभग अद्हा लीटर#12:3 327 गराम मेनमोट जटामाँसी#12:3 नआँ सुनूम जटामाँसी काठ राः जड़ी वरी कू बनो वेआ। राः सोंओं सुनूम अगकेते ईसु कटा रेय दुलतेडा, अवुर उबतू ते कटातिय जोडतेडा। हेना अखीर किमतिआ सुनूम दोहो एना, अवुर हेनाते सींड़ ओड़ाः भिनो यनु।

4लेकिन हेंकू चेला कुतय मेंडे रे एहूदा इस्करयोती#12:4 इस्करयोत गाँव रेनिय होड़ अवुर अपत ञुमू सिमोन हवे मेनते कू कहनी वया, हेंय चेला हो हेना रेय दोहो एना। हें-नी तयोम होर रे मुदेय कुराः हाथ रे ईसु एर पपकड़ोअय दोहो एना। 5“नआँ सुनूम तीन सव दीनार ते केजा केते पेयसत गरीब कुकू ओवा मेन दो कोवानू।” 6हेंय नआँ टेबोः गरिबकू रअय सोचो तेडा ते मेनेय कहनी गडा, बल्कि नेय चोरहाय दोहो एना। अवुर नेय थरे पेयसा बटू दोहोन दोहो एनु, हेना बटू रे जे-नाकू दोहो तआ, हेना वरी अनेज लगाडिय दोहो चोरा जोम दोहो एनु, हेना तेय कहनी तेडा। 7हेना वरी ईसु कहनी तेडा, “मेय एने वय मी, मेय ईञाः देंह हारे वरी मड़ंग ते नआँ सुनूम ईञाः देंह रे दुलके तेय तयार केडा। 8कहेकि गरिबकू हमेसा अपे सुदा कू दोहोना, लेकिन इंञ अपे सुदा हमेसा एरोंञ दोहो एना।”

एहूदी मुख मुखकू लाजर ञेंड गोज मेनते कू सलाह एना

9ईसु बयतनियाह गाँव रेया मेनाआँ, अखीर एहूदिकू पपाड़ियानू, हेनाते हेंकू ञेंञेंल लगड बयतनियाह गाँव कू सेनेना। हेंकू ईसु ञेंल भर मेने, बल्कि लाजर गोजतन वरी ईसु जियो तेडिया, हेंय ञेंल होकू सेनेना। 10तहाँ बड बडे आजककू लाजर हो ञेंड गोजेय लगड कू सलाह एना। 11कहेकि हेंय राः चलते ते अखीर एहूदिकू अकू रेनकू बड बडे एहूदिकू रेनकू मुख मुख कुकू बगी वते ईसु हनतेकू चलो एना, अवुर हेंय थरे कू बिसवास तेडा।

एरुसलेम रे ईसु कू आदर इजेत तेडा

(मत्ती 21:1-11; मरकुस 11:1-11; लूका 19:28-40)

12हेना ञींदावत पस्का परब मनो लगड मेजतन हेंकू, ईसु एरूसलेमिय मेज तना मेनते कू अँजोम तेडा। 13तहाँ होड़कू खजूर डाँड़ सबकेते दरामिय लगड कू सेनेना। अवुर कू हल्ला एना, “होसान्ना#12:13 इब्रानी भासा राः सब्द हवे, न राः मतलोब हवे अलेम बंचो ! परभु राः ञुमू तेय मेजुः तन हेनी, इसराएलिकू रेनिय राजा, आसीसिय ञँमकेडा।”#सिरिंग 118:25-26

14हेना वरी ईसु मियाँटंग गदही होपोनिय ञँवानू, तहाँ हेंय थरे घोड़ा केनते एरुसलेम हनतेय चलो एना। अवुर भगवान राः कागद रे लिखल टेबोः पूरा होया एना। हेना टेबोः नआँ घयतेआ,

15“ओ सियोन कोड़ी होपोन#12:15 मतलोब एरूसलेम रे दोहोनकू अलोम बो-रू;

ञेंलेय मी, अमाअय

राजा गदही होपोन थरे घोड़ा केनते अम हनतेय मेजुः तना।”#जकरिया 9:9

16नआँ टेबोः चेला कुतय कनर मेने कू जेर गडा; लेकिन गोजतन वरी ईसु जियो रिमकेनते अपत हनते सरागिय चलो एना, हेंडे हेंकू उहयर केतेकू जेर तेडा, कि नआँ टेबोः ने-नी राः बारे तेकू लिखो तडा। नेन घयते होड़कू भगवान राः कागद रे लिखो तना टेबोः कू पूरा तेडा।

17तहाँ ईसु मरघटरी वरी हाक केनते लाजारिय जियो तोलोग कू ञेंलवाडिया, हेंकू लाजर राः बारे ते एटाः कुकू लायवा दोहो एनु। 18हेंकू ईसु चमत्कार कामिय काम केडा मेनाअकू अँजोम केते, अखीर होड़कू ईसु सुदा जुमोः लगड कू मेजेना। 19हेना वरी फरीसिकू अकू अकू कहनी ओड़ेंग एना, “अबू कनर मेने बू बनो सकोः तना। ञेंल कू पे मेय हनते अखीर होड़कू चलोः तना।”

उनानिकू ईसु कू छपा तेडा

20नआँ पस्का परब रे गोटाचार उनानिकू हो भगवान कू आराधना लगड कू मेजताना। 21तहाँ हेंकू गलील जिला राः बयेतसदा गाँव रेनिय फिलिपुस थरे मेजकेन तेकू अरजी एना, “ए साहेब, अले ईसु सुदा जुमो गिसन यडलेआ।” 22हेना वरी फिलिपुस सेनकेनते अन्दिरयास थरेय कहनी तेडा, तहाँ बना होड़ ईसु थरे सेनकेन तेकींञ कहनी तेडा। 23हेना वरी ईसु हेंकू थरेय कहनी तेडा, “इंञ होड़ होपोन तीमिन बडेआ गिआञूँ, हेना भगवान तीबेआयू, हेना समय मेजियाना। 24इंञ अपे थरे सही सही तेंञ कहनी यडा, गोहोम दाना ओतेत रे लोजोर कोःते अनायिन सोयाः मेन दिन मिनियेंटंग ते दोहोना, लेकिन हेना सोया कोःते ओमोनुः रेदो, अखीर ते फल आगा। #12:24 नेन घयते इंञ होंञ गोजुआ, तहाँ अखीर होड़कू भगवान सुदा हमेसा दोहोन हेना जीवन कू ञाँमा। 25#मत्ती 10:39; 16:25; मरकुस 8:35; लूका 9:24; 17:33कनय हो अनेज राः जीवितिय मोंहवा रेदो हेंय गँवों वेअयू, लेकिन नआँ दुनिया रे अनेज राः जीव वरी बगरा ते ईञिय परेम रेदो, हेंय अनन्त जीवानिय ञाँमा। 26अगर कनय ईञिय सेवा रेदो, हेंय इंञ तयोम तेय से-ने, कहेकि जे जघा रे इंञ इदाना, हेना रे ईञाअय सेवेखिया#12:26 भगवान राः सींड़ हुकूम मनो केते ईसु मसीह सुदा बगरा परेम ते दोहोनकू। होय दोहोना। अगर कनय ईञिय सेवा रेदो, हेंय भगवान अपुंञ मान मरजादिया।”

ईसु अनेज राः मिरतू राः बारे तेय लायेआ

27ईञाः जीव अलमलोः तना। ची मेनतेंञ कहनिया, मेनेंञ बुझोः तना, “ओ अपा, नआँ दुख राः समय रेम बंचोविञूँ मेनतेंञ कहनिया किदो? कहेकि ने-ना दुख सहो लगड इंञ नआँ दुनिया रेंञ मेजकेना। 28ओ अपा, अम तीमिन बडे गिआमू, हेना होड़कुम तिःवा।” तहाँ होड़कू अगस वरी नआँ याःते आवाज मेजेन हेना कू अँजो वडा, “इंञ तीमिन बडे गिआञूँ हेना पहील तेहोंञ तिबकेडा, अवुर हेंडे रेहोंञ तीबेआ।” 29तहाँ हेना रे चड़ाँ तनकू अँजोमे दोहो एनकू, हेंकू कहनी तेडा, “हदुड़ एना।” अवुराःकू कहनी तेडा, “मेय सुदा कनय सरगदूत टेबोः एना।” 30हेना वरी ईसु कहनी तेडा, “नआँ आवाज अपे राः फयदा लगड मेजेना, इंञ लगड मेने। 31अब नआँ दुनिया रेनकू होड़कू राः भगवान न्यायेः राः समय मेजियाना। अवुर नआँ दुनिया रे राजेअय सयतान भगवान हरोविया। 32अवुर इंञ ञेंड गोजेंञ लगड ओतेत वरी कुरूस रेकू रकाबिञाँ, तहाँ इंञ थरे कू बिसवासे लगड सींड़कू ईनिंञ हनतेंञ ओरकुआ।” 33ईसु काः घयतेय गोजुआ हेना लाय लगड हेंय न याःतेय कहनी तेडा। 34हेना वरी होड़कू हेंय थरे कू कहनी तेडा, “भगवान राः कागद रे नआँ टेबोः ले अँजोम केडा कि मसीहा कबोह एरोय गोजेना, अम काःतेम कहनी यडा कि होड़ होपोन ञेंड गोजेय लगड कुरूस रे रकाबिय लगड जरूरी इदाना मेनते? हेंडे दो नेय मनवाँ होपोन ईया हवे?” 35हेना वरी ईसु हेंकू थरेय कहनी तेडा, “इंञ अपे लगड इंजोत हवे, अवुर कुछ समय अँगम अपे राः मँझर रेंञ दोहोना। हेना वरी अपे अंधरा ओत ते से-नेः कुपे बनोआँ। अवुर अंधरा ओत तेय से-नेः हेनी का हनतेय से-नेआँ हेना मेनेय पपाड़िआ। हेनाते अपे सुदांञ दोहोन मेन दिन इंजोत ते से-नेः कुपे बनोऊ। 36अपे सुदा इंजोत घयते इदानिंञ मेन दिन इंञ थरे पे बिसवासे, ताकि अपे इंजोत रे जियोः कुपे बनोऊ।”

होड़कू ईसु थरे मेने कू बिसवास गडा

नआँ टेबोः कहनी केते ईसु चलो यनु, अवुर हेंकू राः नँजेर रे मेनेय टिपा गना।

37हेंय हेंकू मड़ंग रे निमीन चमत्कारिय तिब तेडा, हेंडे रेहो मेने कू बिसवास गडा; 38ताकि एसायाह भविस्यवक्ता ना याःतेय कहनी तेड हेना टेबोः उतरोः लगड ना घयते होया एना, हेना टेबोः ना घयते दोहो एनाः

“ए परभु, अले राः खभेर रे कनाय मेने बिसवास गडा, अवुर परभु राः सक्‍ति ईया थरे देखर एना?” #एसा 53:1

39ने-ना राः चलते ते मेने कू बिसवास गडा, कहेकि एसायाह न याःते होय कहनी केडा,

40“भगवान हेंकू राः मेडतू कुय अंद्हा गोत्तेडा;

अवुर हेंकू राः जीविय केटेज गोत्तेडा,

ताकि हेंकू मेडतू कुते अलोकू ञेंल सकोऊ अवुर बुद्ही ते अलोकू समझो सकोऊ

अवुर इंञ चिकन कू लगड इंञ हनते अलोकू मिड़ाऊ।”#एसा 6:10

41एसायाह मसीहा तीमिन बडेआ गिआयू, हेना ञेंलतेडा तेय कहनी तेडा, अवुर हेंय राः बारे तेय टेबोः तेडा। 42हेंडे रेहो एहूदिकू रेनकू मुख मुखकू मेंडे अखीर होड़कू हेंय थरे कू बिसवास तेडा, लेकिन आराधना ओड़ाः वरी अलोकू उडूंग कू लगड फरीसिकू राः बोर ते, ईसु थरे कू बिसवास तेड हेना, कनय मेने लाय गडा। 43कहेकि भगवान हनवरी मान मरजाद ञँमुः हेना वरी हो, होड़कू हनवरी मान मरजाद ञँमुः हेना बेस वकू दोहो एनु।

ईसु राः टेबोः न्याय राः आधार

44ईसु अच्छा तेय कहनी तेडा, “जे इंञ थरेय बिसवासेः हेनी, इंञ थरे भर मेने, लेकिन ईञिय कुलकेड हेंय थरेय बिसवास यडा। 45अवुर जे ईञिय ञेंलियाडा हेंय, ईञिय कुलकेडा हेंयिय ञेंलियाडा। 46इंञ नआँ दुनिया रे इंजोत बनो केनतेंञ मेजकेना। ताकि इंञ थरे बिसवासेः हेंकू, अंधरा ओत रे कबोह अलोकू दोहोनू।

47अगर कनय ईञाः टेबोः अँजोम केते मेनेय मनोवे रेदो, इंञ हेंय थरे दोस मेनेंञ लगो यडा, कहेकि इंञ दुनिया रेनकू होड़कू थरे दोस लगो लगड मेने, लेकिन दुनिया रेनकू होड़कू उबर लगाडिंञ मेजकेना। 48जे ईञिय मेरंगवाः हेनी अवुर ईञाः टेबोः नहकारायू, हेंय राः न्यायेअय मियाँहोड़ इदानिया, जे टेबोः इंञ कहनी केडा, हे-ना टेबोः हेंय अखरी दिन रे दोसीया। 49कहेकि इंञ ईनिञाँः मन ते बेगारिंञ टेबोआ; ची चिंञ लाया, अवुर ची चिंञ चेडकुआ हेना, ईञिय कुलकेडा हे-नी अपुंञ हुकूम वडिञाँ। 50इंञ पपाड़िआ भगवान राः हुकूम अनन्त जीवन हवे। हेनाते इंञ जे-जेंञ टेबोः यडा, जेयसे अपुंञ कहनी वडिञाँ, हेन घयतेंञ कहनी यडा।”

Zur Zeit ausgewählt:

एहुन्‍ना 12: ksz

Markierung

Kopieren