Lucas 24
24
Jesus Hiwejyawakatnaka Piranapni
1Waneya hyinuwakle seman-hohne, yetshpotukawa yomletshi nwaka hyana. Raniklona phamluhalo hkamhahnapuxyaluna.
2Seyni retluna rerutkatka sotlu yomletshi hajeru.
3Hjihlokyomletluna. Seyni hi rukchikmanetluna Tsru Hixikatshriwa Jesus-ni mane.
4Hiyáhoni hkojwakahchinikanutna. Chinpotukawa hepi jejine katajiru mkatshri hitakatshine hakanhayehitna wannastsi hyopkakna.
5Hpikatkana suxone. Tshiji hyohimhojitna. Waneya jejine mkatshri katajiru hitakatshine, wan-tshinna:
— Klu tshinanhe hipnatshri hwawakle hijhiylu hiwekatshri?
6Hi hewitkalu seyni riwekatnaka halikaka. Hichinkapanru runkajyapiranhi mitshikananu Galileia tshijne rawakanaxiniwa.
7Wla htshinatkahi mitshikananu: “Jeji Whene tshinkaluru hijhalu renejikowakapa hektune myoya. Rujhalu ruylaxikowakapa cruz-ya. Waneya map-hohne rixinri rujhalu riwejyawakatnaka.”
8Waneya suxone hichinkaplu Jesus tokanu.
9Hiyáhoni yomletshi nwaka ruchpajyatkana. Xye pirana ptowruka runkakmakna onze Jesus hasruklene, pimrin-koxamka.
10Suxone wannani Maria Madalena, Joana, tshinkalune hiyrun-koxa Maria tshinkaluro, Tiago tshinkaluru hinro. Nyi suxone, pimron-koxa wannaymalune xye pirana ptowruka runkakletna, onze jejine Jesus nurrene.
11Seyni nyi onze suxone yanumsalecha pixka rixa jemletluna. Hiyáhoni hi ralixatkana.
12Waneya Pedro palna, rasukanwakatlu yomletshi. Rujnoka. Retlu mkatshri sama tsonutka. Waneya hipji hsatokatka. Rimyekahchinikanuta xye pirana tshinanu.
Jesus, Hepi Rasruklene Yehi Rakanhiywakatnaka Piranapni
13Waneyatnaka wale hohneko hepi pa poktshi nwaka yamtatshine, doze quilômetro pchinru Jerusalém poktshi, Emaús tshinikowaka.
14Riynumsakakakananumtna ptowruka xye hiknohatshri pirana.
15Waneya riynumsakakakananumxiniwana, repomsakakamxiniwana, Jesus hapokastsitna. Wannayma mnutkalu.
16Rasruklene hetmaklu seyni kluneru tshinanukta hi rimathetluna katuktani.
17Waneya Jesus hepomhana:
— Klu pirana htshinkakakananumta hixkakluko hyanakananumxyawaka? Waneya rutuk-yanretatkana wamonuwhojitatshineko.
18Waneya satu, Cleopas tshinkaluru wan-tshinru:
— Jerusalém poktshi hajermakyi, seyni pixa tsonu hetko hi himatlu klu rixanatka Jerusalém poktshiya xye hohnekaka.
19Waneya wale wan-tshinna:
— Kluneru pirana?
Waneya wanna wla tshinna:
— Jesus-ni Nazaré poktshi hajerni pirana. Walenixkani jejni Hoyakalu tokanu hinkakletatshrini. Hiyrun-koxa ptowrunek-yine hetanuya kpixkonuru hkamrureya, htokanuy-koxa.
20Tsru hixikatshinwa sacerdote-ne, hiyrun-koxa wutsrukatene heneklu ruylaxikowakapa. Ruylatluna cruz-ya.
21Seyni hixa kahwakmaklu walepnikni israel-nerune hepixatshripni hkamnitjeneya. Waneya xawakni, map-hohne pnutetkani wan-rixinrinatka.
22Waneya xawakni pimrone suxon-koxa, hixaymalone himyekakahchinikanutwu. Yetshpotukawa yomletshi hyana.
23Seyni hi rukchikmanetluna. Waneya hsatokna. Hiwejikalune Hoyakalu towrene tenhohne hajen-hima retna. Runkakhimatkanna Jesus hima hiwekatnaka.
24Wane hyapna pimrin-koxa hixaymalune yomletsh-yehi. Htshinakanaxyawak-potukna suxone rixa hetletkoxna wanna. Seyni Jesus potuko hi retna.
25Waneya Jesus wan-tshinna:
— Ha, mimatjemkanhi. Hi kahchinikanhi halixhapkaxyawaka ptowru potuko pirana Hoyakalu tokanu hinkakletatshine tshinjekanaxyawakhi!
26Hi he rujhalu Messias tshinkaluru hsalewniywakapa waneya hyoptoxyawakaplu tsru pixkontshi walenuko?
27Waneya hyinuwaka hinkakletna Hoyakalu tokanu yonatkaluru pirana, Moisés yonreru hiyrun-koxa Hoyakalu tokanu hinkakletatshine yonrekananuko runkakna wane htshinakanaxyawakna waleko hipirana.
28Waneya rapokastsitluna poktshi hyamxyawakna. Walemka pnute yapirata.
29Seyni wanna tshipetlu. Wla htshinruna:
— Hewipyitshi. Kayitkani, hoyetshnopatkani. Hiyáhoni Jesus jihlokapjitna. Wanna yehi rutukatka.
30Waneya nikawakakwa htuplata. Pão hkochtsheka waneya hpoyahnutlu Hoyakalu pão tshinanu. Waneya hjiknajrotlu pão. Waneya reneksatna.
31Waneya hyopukhatatkana hiyáhoni rimathetluna. Seyni wale hamhamtatka. Hi retluna.
32Waneya wane htshinkakna wannakakluko:
— Hi he hamhajitaknawu riynumsakanaxinixkawu hatnu hapoya, runkakakanaxinixkawu Hoyakalu tokanu yonatkaluru tshinpiraxyawaka pirana?
33Waneya hpalnahapkatna. Hsatokanwakatluna Jerusalém poktshi nwaka. Wane hyoptoxyaluna Jesus rasruklene onze, wannaymalun-koxa rimapatjejekanatanune.
34Wane htshinjekanaxyawakna:
— Hehe, halikakni, Tsru Hixikatshriwa Jesus hiwekatnaka! Simão tshinkaluru hetlu!
35Waneya wanna hepi jejine koxa hinkakletlu riknohjerna pirana hatnu hapoya. Runkakletkoxluna Jesus pão hjiknajroxiniklunutka rimathetluna Tsru Hixikatshriwa Jesus-ni.
Jesus Rasruklene Hakanhayehixyawaka Piranapni
36Waneya wane htshinakanatawana, xye piranaya, Jesus wanna hanikajite hyopkakatka. Waneya wane htshinna:
— Kihle hchinikanuphi.
37Seyni wanna himyekpotuta. Hpikpotutatkana. Wanna kahwakatkalu samentshi rexyawakna.
38Seyni wale wan-tshinna:
— Klu tshinanhe hkojwakahchinikanuta? Kluneru tshinan-koxhe wan-hixahchinikanhajita?
39Hetamyotanno hiyrun-koxa nojixi. Hitakni. Hkamrukanno, himathexyawakapno. Klu tshinanu samentshi hi kahitlu, hi kahaplu. Hixa hi hetno wane nixyawaka.
40Rali wan-tshinretatka, rekhitna himyo, hijix-koxa.
41Seyni hi ralixluna tsru hpoyikowle tshinanna, hiyrun-koxa rimyekahchinikanre tshinanna. Hiyáhoni Jesus hepomhana, wla htshina:
— Hi he waneyhi pa hixanu nikkaluru?
42Waneya wanna heneklu psoji chima jimkaluro.
43Jesus yoptotlo waneya wanna hetanuko hniklo.
Hoyakalu Tokanu Ruphujexyawaka Jesus Piranapni
44Waneya Jesus wan-tshinna:
— Nimwakanaxiniwahi nunkakatkahi raluk-hakanhaleta ptowru potuko hita pirana yonatkaluru, Moisés yonreruya, Hoyakalu tokanu hinkakletatshine yonreya hiyrun-koxa Salmos-mta yonatkaluruya hita pirana.
45Waneya hkotpukahchinikanutna rumukata himatjemletluna Hoyakalu tokanu yonatkaluru.
46Waneya wane htshina:
— Hyonpiranatka Messias tshinkaluru haluka salewnaleta seyni map-hohne rixinripa riwekanutnaka hipnatshine tskalaya.
47Hiyrun-koxa ptowru tshijneko runkaklexikotka hehchinikanru pirana hektuntshi hiknojikowaka pirana, wale hiwakaya. Jerusalém poktshi hyinuwaka hinkaklewlexini.
48Hixakni xye pirana hiphujetatshinephi.
49Hiyrun-koxa hitakni yokananwakatanhi Nuru hinkaklexyahi. Seyni hewitshi poktshi hitukanu pixkontshi klu papko hapojini, tenhohne hichpajikatshri, hixa nwaka hapokatshripa.
Jesus Tenhohne Yinri Piranapni
50Jesus hanikatkana Jerusalém poktshi kahnete Betânia poktshistsi potuko ranikatkana. Waneya hyotukamyota. Ruhlewahchinikanyehitna.
51Waneya wan-rixakanatawa, ruhlehchinikanyehitka pchinikna, wanna yehi hkochtshejikatka. Tenhohne ranikkatka.
52Rimalwutluna waneya hsatokna Jerusalém poktshi nwaka tsru poyikowluyma.
53Ptowru hohneko Hoyakalupji rawna. Hoyakalu rimalwutna. Hpoyahnutluna.
Zur Zeit ausgewählt:
Lucas 24: mpdBiblia
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
