Gênesis 1
1
Ptowru Potuko Yinuwakle Piranapni
1Hyinuwakle Hoyakalu hiyakotlu tenhohne, tshiji koxa.
2Tshiji hi hwapa, male rixapa mapchahalu tsonu hima honha tenohalu hichyatlu tshiji. Waneyakni Hoyakalu hchinikanu honha hohwaka hyapjeta.
3Waneya wane htshina Hoyakalu:
— Katalu hwanu. Waneya rakanhatka katalu.
4Waneya Hoyakalu hetlu katalu hikamtutkalu. Waneya hkotspalatlu katalu, mapchahaluyma.
5Waneya Hoyakalu katalu rutakhiwakata hohi htshinru, mapchahalu hoyetshno htshinru. Waneya kayi sreta hiyrunu yetshpotukawa sreta walekni mitshikananu hohne tshinkatka.
6Waneya Hoyakalu wan-tshina:
— Rawanu malehohnephawaka honha kanipretatshripa.
7Waneya Hoyakalu kamhalu malehohnewaka. Waneya psoji honha malehohnewaka hpuko rutaka, psojha wane rohowaka rutaka. Hiyáhoni rakanhatka.
8Waneya Hoyakalu hiwakatlu tenhohne, tenhohne htshinru. Waneya kayi sreta hiyrunu yetshpotukawa sreta walekni hepi hohne rixinritka.
9Waneya wane htshin-koxa Hoyakalu:
— Honha tenhohne hpuko hapatjehaxini wane tsonu rawhatanu. Popriwaka hiphujewnanu. Hiyáhoni rakanhatka.
10Hoyakalu tshiji tshinru popriwaka. Rapatjehaxyawaka honha hhiwakatlu mar powha. Waneya Hoyakalu hetlu kihle rixyawakatka.
11Waneya wane htshina Hoyakalu:
— Hocha hiptshekanu tshij-hohoya, ptowru hixatshri hitaklu hitataji hiptshejini, hiyrunu wale neru pixkayakako, hixatshri hahmuna hisahi hiptshejikatshri hiyrun-koxa wale neru pixkayakako hixatshri hiptshekanu. Hiyáhoni rakanhatka.
12Waneya ruptshekatka tshij-hohoya ptowru hixatshri hitaklu hitataji hiptshejikatshri hiyrunu wale nerukni, hiyrun-koxa ptowru hixatshri hahmuna hisahi hiptshejikatshri hiyrun-koxa wale nerkaka hiptshekatka tshij-hohoya. Waneya Hoyakalu hetlu kihle rixyawakatka.
13Waneya kayi yetshpotukawa hiknohatka map-hohne rixinritkani.
14Waneya wane htshin-koxa Hoyakalu:
— Katalune hakanhanu tenhohneya, hkotspalaxyawakaplu hohi hoyetshno, hmarkaxyawakaplu kapapkolu rixyawakapa, hohi, hihwalapu,
15katalupni tenhohne tshiji rataxyawakapa. Waneya wane rixa.
16Waneya Hoyakalu hepi katalu hkamha. Tkatshi hohohne hatatatshripa, ksuru hoyetshno hatatatshripa. Hkamhakoxlo katahiri.
17Waneya rutaklu katalu tenhohne tshiji hatatatshripa,
18hyokanaxyawakaplu hohi, hoyetshno koxa, hkotspalaxyawakaplu hohi, hoyetshno. Waneya Hoyakalu hetlu hikamtutkalu.
19Waneya kayi yetshpotukawa hiknohatka quatro hohne rixinritkani.
20Waneya wane htshina Hoyakalu:
— Ptowru hixatshri honha hajeru tsepotanru honha hiyrunu tenhohne ptowru hixatshri kamejirune tsepotanu.
21Waneya Hoyakalu kamhalu tsrur-potuko honha hajeru, ptowru hixatshri honha hajeru hiyrunu wale klopichapakni, ptowru hixatshri kamejiru hiyrunu wale klopichapakni. Waneya Hoyakalu hetlu hikamtutkalu.
22Waneya Hoyakalu kihlewaka htshinanwakatna wane htshinna:
— Honha hwatshri hwuhenewatanu htsepoxyawakaplu honha, kamejirune hixolewniywakap-koxa.
23Waneya kayi yetshpotukawa hiknohatka cinco hohne rixinritkani.
24Waneya wane htshin-koxa Hoyakalu:
— Ptowru hixatshri hiwekatshri tshiji hajeru hiyrunu wale neruko hakanhanu. Ptowru hixatshri kammanruru, ptowru hixatshri kmatsyiru hocha hajeru, ptowru hixatshri yosrolotatshri, mtserutu, tsrur-koxa hiyrun-koxa wale neruko hakanhanu. Wane rix-hakanhaleta.
25Hiyáhoni Hoyakalu wane hix-kamhaletlu ptowru hixatshri kmatsyiru hocha hajeru, ptowru hixatshri kammanruru, hiyrunu ptowru hixatshri yosrolotatshri mtserutu, tsrur-koxa satkaka waleko hinerupni. Waneya Hoyakalu hetlu kihle rixyawakatka ptowruka.
26Hiyrun-koxa wane htshina Hoyakalu:
— Xawakni yineru wkamhanu, wyáholu wkamhinru hixa pixka rixanu. Yineru towutanro chima, kamejiru koxa, ptowruka pantshi hajeru, ptowru hixatshri hocha hajeru, ptowru hixatshri yosrolotatshri, mtserutu, tsrur-koxa, ptowru hixatshri htowutanu psoltshijyako.
27Hiyáhoni Hoyakalu kamhalu yineru waleko hyáholuya. Wanna hkamha jeji, suxo.
28Waneya Hoyakalu kihlewaka htshinanwakatna yine, waneya wane htshina:
— Kwuhenpatkahi, hixolewnanu htsepoxyawakaplu tshiji, tsru hixikatshinepwahi tshiji. Yine tshinanu twa chima mar powha hwatshri hixanupa, kamejiru teno hajeru hixanupa hiyrun-koxa ptowru hixatshri hiwekatshri tshiji yanatshri hixanupa htowuxyawakaplu.
29Waneya Hoyakalu wan-tshinna yine:
— Nenekatkahi ptowru hixatshri hitaklu hitataji hiptshejikatshri hiyrunu ptowru hixatshri hejnuji hisahi hiptshejikatshri, nikkalurupa.
30Peklo hiyrunu ptowru hixatshri hocha ptshe hakanhikatshri nenekatkalu ptowru hocha hajeru, ptowru kamejiru, ptowru yosrolotatshri, tsruru, mtserut-koxa niklerupa. Waneya wane rix-hakanhaleta.
31Waneya Hoyakalu hetlu ptowruka hkamhaleru, retlu ptowruka kihler-potuko. Waneya kayi, yetshpotukawa hiknohatka seis hohne rixinritkani.
Zur Zeit ausgewählt:
Gênesis 1: mpdBiblia
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
