लूका 15
15
हराईना की भेड़ को उदारण
(मत्ती 18:12-14)
1सब चुंगी लिनवाला और गैर-यहूदी जिनून लोग पापी समझ छ्या, उन यीशुका पास उपदेश सुणन खिन उछ्या। 2यो देखिभेरन फरीसी लोग और मूसा का नियम सिखून वाला लोग कुड़कुड़ान भेरन कुन लाग्यान, “यो पापिन का दगाड़ मेल-जोल राखछो और उनार दगाड़ खानो ले खाछो!”
3तब यीशु ले उनुस यो कहानी सुणाछ, 4“तुमून में भटे को इसो आदिमी छै, जैक पास सौ भेड़ हुन, और उनूनमें भटे एक हरै जौ। तब उ निरानबे भेडून क्या जंगल में छोड़िभेरन, उ हराईना का भेड़स जब तलक उ मिल नै जौ उ बखत तलक खोजलो?” 5जब उ मिल जाछी, तब उ भौत खुश है भेरन ऊस अपून कान में बैठाभेरन ल्यूछो। 6और अपून घर जाभेरन अपून दगड़ियान और पड़ोसिन बुलाभेरन उनार दगाड़ खुशी मनालो, क्याखिनकि ऊस उक हराईना को भेड़ मिली ग्यो। 7मैं तुमूनथैं कुछूँ, कि इसीकैं एक पश्चताप करूनवाला पापी का बारिमें ले स्वर्ग में इतुकै खुशी हुछी, जदुक की निरानबे इसा धर्मीन का बारिमें नै हुनी, जिनून पश्चताप करना की जरूरत नाहतिन।
हराईना को सिक्का को उदारण
8यीशु ले एक और उदारण क्योछ, को इसी स्यैनि होलि, जैक पास चाँदी का दस सिक्का हुन, और उनूनमें भटे एक हरै जौ; तब उ दीया जलाभेरन और घर की सफाई करभेरन जब तलक मिल नै जौ, मन लगाभेरन खोजनि नी रौ? 9और जब उ मिल जालो, तब उ अपून दगड़ियान और पड़ोसिन बुलाभेरन कौलि, म्यार दगाड़ खुशी मनाओ! क्याखिनकि मैले उ हराईना को सिक्कास पा है। 10यीशु ले फिर क्योछ, “मैं तुमूनथैं सच्ची कुछूँ, इसीकैं एक पश्चताप करूनवाला पापी का बारिमें परमेश्वरा का स्वर्गदूतून का सामुनि भौत खुशी मनाई जाछी।”
उड़ाऊ च्याला को उदारण
11यीशु ले दुबारा फिर उदारण दीभेरन क्योछ, एक आदिमी का द्वी च्याला छ्या। 12उमें भटे नान वाला च्याला ले अपून बबा थैं क्योछ, “बाब, जमीन-जैदाद में भटे म्योर हिस्सा अब मैंस दी दीया।” बबा ले द्वीवै च्यालान जमीन-जैजाद बाणि दीछ। 13थ्वाड़ा दिनून का बाद नान वाला च्योलो अपूनो हिस्सा की जमीन-जैजाद बेचिभेरन दूर देश न्हैग्यो, और वाँ बुरो कामून में अपूनी सब धन-दौलत बरबाद करि दीछ। 14जब उले सब धन खर्च करि चुकछ, तब उ देश में भौत अकाल पड़छो, और उक पास के नै बच्यो, और उ भुखो मरून लागछ्य। 15येक कारण उले उ देशा का एक नागरिक आदिमी का घर में काम करूँ लागछ, और उले ऊस अपून गाड़ान में सुंअर चरून खिन भेजछ्य। 16उ इदुक ज्यादा भुखो छ्यो कि उ खानास ले खान खिन खुश छ्यो जिनून सुंअर खाँछ्या, ऊस खाभेरन अपून पेट भरौ, लेकिन ऊस कोई के नै दीछ्या। 17जब ऊस समझ आछ, त सोचून लागछो, म्यार बबा का घर में कतुक मजदूर काम करनान और उनून पेट भर खानो मिलछो, और मैं याँ भुखो मरून मरयूँ। 18पर मैं अपून बबा का पास जूंलो, और उनूनथैं कुंलो, बबा, मैंले परमेश्वरा का खिलाफ त्यारा नजरून में पाप करछ्य। 19अब मैं तुमोरो च्योलो कुन लायक न्हैतिनू, तुम मैंस अपूनो एक मजदूर बनाभेरन राँख ले।
20तब उ ऊ देश स छोड़भेरन अपून बबा का पास वापस जान खिन निकल पड़छो। जब उ दूरई छ्यो, उक बबा ले ऊस देखिभेरन तरस खाछ, और दौड़भेरन अपून नान च्याला स गाला लगाभेरन ऊस प्रेम करछ्य। 21च्याला ले बबा थैं क्योछ, “बबा, मैंले परमेश्वरा का खिलाफ और तुमार नजरून में पाप कर रैछ; और मैं तुमोरो च्योलो कुन लायक न्हैतिनू।” 22लेकिन उक बबा ले अपून दासून बुलाभेरन क्योछ, जल्दी बड़िया-बड़िया कपाड़ा ल्याभेरन येस पैना, येक आंगुलान में मुनेणि, और खुटान में जुत्ता पैना, 23और इसी दावत को इंतजाम करा, ताकि हम सब खुशी मनूला। 24क्याखिनकि मैंले सोचछै कि म्यार यो च्योलो मरि ग्योछ, उ मर्यो को नी छ्यो, लेकिन यो हरै ग्योछ, जो अब मिली ग्योछ। और उन सब उकी मिलना की खुशी मनून लाग्यान।
25जब यो सब हो र्यो छ्यो, त उ बखत उक ठूलो च्योलो गाड़ में छ्यो। जब उ घर वापस आछ, तब उले घरा का भितर पुजभेरन, त उले गान-बजाना की आवाज सुणछ्य। 26तब उले एक दास स बुलाभेरन उथैं पुछ्छै, “यो सब कि हो रैछ?” 27उ दासले क्योछ, तेरो नानो भाई वापस आग्योछ, और तुमार बबा ले उक उना में भौत ठूली दावत इन्तजाम कर रैछ। क्याखिनकि उ ऊस सही सलामत मिल छै।
28यो सुणिभेरन ठूलो च्याला स भौत गुस्सा हो भेरन भितर नी जान चाँन मरछ्यो। त उक बबा भ्यार आभेरन ऊस घरा का भितर उन खिन बिनती करून लागछ। 29लेकिन उले अपून बबा थैं क्योछ, देख, मैं इदुक सालून भटे तुमेरि सेवा करछूँ, और कभै तुमोरो हुकुम नै टालनू, फिर लै तुमूले मैं खिन कभै इदुक बड़िया दावत को इन्तजाम नै कर्यो, कि मैं अपून मित्ररून दगाड़ खुशी मना सकू। 30लेकिन जब यो तुमोरो नानो च्योलो, जेले सब धन-दौलत बेश्यान में उड़ाभेरन आ रियोछ, त तुमूले उ खिन भौत ठूली दावत को इन्तजाम कर रैछ। 31बबा ले अपून ठूला च्याला थैं क्योछ, हे म्यारा च्योला, तैं त हमेशा म्यार दगाड़ रूछै; और जो कुछ ले म्येरो छै उ सब त्यारोई त छै। 32लेकिन अब हमून खुशी मनून चैंछी, क्याखिनकि मैंले यो सोचछ्य की म्येरो नानो च्योलो मर ग्योछ, उ मरिना को नी छ्यो, लेकिन हरै ग्योछ, अब मिली ग्यो
Zur Zeit ausgewählt:
लूका 15: SORNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
