От Иоанна 16

1«Уңипа̄тамси тама̄кын ӣлъқаюфқа̄фси писқылъюси амью̄ткыхкаңиси. 2Югыт иқитыслъықӣси синагогамыхның. А̄а, пилъыҳқақ тагиңӯқ, китум алңунак туқускумиси сюмыҳтаӷаӷьяҳқа̄гуқ қыпҳа̄тңунилюку Кияӷнық. 3Таўатын пияҳқақӣси қаюҳлъяк лӣсимаңилъкаңинкуң Атакулъҳӣгни. 4Уңипа̄тамси тама̄кын ма̄тын пилъыҳқақ ка̄скан нықамикысқылъюки а̄пқанка. Уңипа̄симаңитамси тама̄кын пӣнлиӷьюхўа̄лъыӷми малихся̄ҳтыңуҳтақңафси қаюҳлъяк лъпысинилңӯңа».

Қыпҳалъҳа Аглыӷналӷӣм Таӷныӷам

5«Ма̄тын утыӷниӷнақңӯңа Каяхтистымнун; иўырңа налиҳпыси а̄пныӷитаҳпысиңа хўатын: “Навык пинақсин?” 6Қивӷуҳлъягӯси қаюҳлъяк уңипа̄скымси тама̄кын. 7Иўырңа уңипа̄нъақамси ипапигмың: пиниӷатаӷаӷьяҳқа̄гуси аӷуляқыхкума, қаюҳлъяк каяхфикылъықамси Каюткаҳқагның. Аӷуляқынӷилъкума Каюткаҳқак тагина̄нӷитук лъпысинун. 8Каютык тагикумык лӣгилъӣҳқылъықӣ нунам юги сыӷлыҳқылъыӷмың, ылъқуӷутңалъыӷмың, нанқихтилъыӷмың. 9Лӣгикыслъықӣ сыӷлыҳқыстыңутаңи, қаюҳлъяк хўаңа ухпықигалъкаңатңа. 10Лӣгикыслъықа̄ ылъқуӷутңалъық, қаюҳлъяк агляӷнақылӷӣңа Атамун ынка̄м ысҳаӷнаниҳлъықаҳпысиңа. 11Лӣгикыслъықа̄ нанқихтылъық, қаюҳлъяк иглыӷутистыңа нунам ӯм нанқихтылъыңўа̄ӷлюни аюқуқ аӷью̄ӷьяҳқа̄люни.

12Паниның апыӷьяҳқаҳлъягӯңа лъпысинун иўырңа сялин лӣгикыпагниңитаси. 13Иўырңа Таӷныӷак апыҳтуӷилӷӣк Кияӷныӷым ипапилъҳаның, тагикуми маӷьяҳқуҳлъықӣси ипапилъыпырыгўа̄ӷмун. Акузиткынъа̄нӷитӣ лъми катам акузитни, иўырңа акузилъықуқ нагақуқаҳӣнаӷминың. Ынка̄м уңипа̄лъықӣси сяңўа̄ сяяҳқа̄таңа та̄кўаниңани. 14Қӯлваҳлъықа̄ңа қаюҳлъяк тугуклъиӷлюки хўаңа акузитынка апыҳлъықӣ лъпысинун. 15Қамахтыңъўа̄ӷлюку Атам пӣңа хўаңа пикақа̄. Тама̄кын апалъюқлъюку пӣңа, Таӷныӷам тугуклъиӷлюки тӯныхканка апыҳлъықӣ лъпысинун».

Қивӷулъық Қуялъҳуҳсяҳқақ

16«Қантаӷақун ысҳаӷнаниҳлъықаҳпысиңа иўырңа мулюхпынаси ысҳанқихлъықаҳпысиңа». 17Иляңита малихся̄ҳтыт илятың а̄птыкӣт: «Сямың пӣлъю Иисусым хўатын пилъыӷмикун: “Қантаӷақун ысҳаӷнаниҳлъықаҳпысиңа иўырңа мулюхпынаси ысҳанқихлъықаҳпысиңа”? Та̄налъю сяңа̄ўа хўатын пилъҳа: “Қаюҳлъяк агляӷнақуңа Атамун”?» 18Пикат: «Сямың пӣ таўатын пилъыӷмикун: “Қантаӷақун”? Налъюкаҳпут сямың писӣтаңа». 19Иисусым лӣсимакыхкаңи а̄псюкаңат ынка̄м пикӣ: «Лъпысиның а̄пқуӷўа̄ӷусиқыстыхӯ сямың пикатка хўатын пилъымкун: “Қантаӷақун ысҳаӷнаниҳлъықаҳпысиңа иўырңа мулюхпынаси ысҳанқихлъықаҳпысиңа?” 20Ипа уңипа̄тамси, қияяҳқа̄гусилъю қивӷуяҳқа̄гусилъю иўырңа нунам юги қуяяҳқа̄гут. Лъпыси қивӷуяҳқа̄гуси иўырңа қивӷулъыси қуялъҳуҳсяҳқа̄гут. 21Аӷнақ иӷниюныӷмини икфиқақуқ, қаюҳлъяк иӷнилъыҳқа̄ ка̄лъҳӣ. Иўырңа иӷниями пуйга̄ икфиқылъыни, қаюҳлъяк қуякыхкаңа таӷнуҳақ алъхылӷӣ нунамун. 22Қивӷуңӯси ма̄тын иўырңа ысҳаҳлъықамси алъямың ынка̄м қуялъықуси. Китум алңунак иқинъа̄нӷита̄ қуялъыҳси.

23Таўани аӷныӷми а̄пна̄нӷитаҳпысиңа сямың алңунак. Ипа уңипа̄тамси, Атама тӯнылъықӣси сямың алңунак а̄птыкуфси Атымкун. 24Хўавымун кынляңа а̄псигатуси сямың алңунак Атымкун. А̄птык алъхыӷулъықуси ынка̄м қуялъыҳси ӣӷўиҳлъықуқ».

Кая̄лъқӣлъық

25«Уңипа̄ткақамси тама̄куның уңипаӷа̄тытхун. Иўырңа уңипаӷа̄тның атуқнанилъыҳқақа ка̄лъықуқ ынка̄м хўатыҳлъюўа̄қ апыӷьягулъықақа Ата лъпысинун. 26Та̄на пилъыҳқақ ка̄скан лъпысиның катам а̄плъыҳа̄си Атымкун. Ынка̄м уңипа̄тамси хўаңа а̄птунъаниҳлъықамси Атамун, 27қаюҳлъяк Атам лъңаның катам пиниқӣси. Пиниқӣси қаюҳлъяк пиниқыхкыфсиңа, ухпықыхкысилъю Атамың тагика̄тка. 28Атамың тагика̄гуңа нунамун. Ма̄тын унилъюку нуна агляӷнақуңа Атамун».

29Малихся̄ҳтыңита пика̄т Иисус: «Та̄ўа алыҳқуӷаҳпыкут хўатыҳлъюўа̄қ атуқыхпынаки уңипаӷа̄тыт! 30Хўа̄ лӣтамкын сяңўа̄ тамаҳа̄н лӣсимакыфтан. Лӣсимакақатын югым а̄псяҳқӣ талўа а̄птыстыхпынаки ынка̄ңам китум алңунак а̄пныӷитыӷңа̄ӷмитын сямың алңунак аюқутын. Тама̄кын апалъюқлъюку ухпықамкын Кияӷныӷмың тагика̄тын». 31Иисусым пикӣ: «Қынўатлъю ухпыӷыстык? 32Миңитылъыҳқаҳси ка̄сяҳтуҳтуқ, талўа хўа̄ ка̄лъюни аюқуқ. Қамахлъюси ныхпысинун агляҳтӯлъықуси, унилъықаҳпысиңа лъңинаҳаӷма. Иўырңа паниның лъңинаҳа̄на̄нӷитуңа қаюҳлъяк Ата хўаңамнилңуқ. 33Уңипа̄тамси тама̄кын ныкыхмылъылгусқылъюси хўаңамкун. Нунами хўани сыӷлылӣҳлъықуси иўырңа илютулюси қаюҳлъяк кая̄лъқыхкақақа нуна».

Zur Zeit ausgewählt:

От Иоанна 16: ess2

Markierung

Kopieren