मत्ती 14
14
बप्तिस्मा देहुइया यूहन्नक मृत्यु
मर्कूस ६:१४-२९; लूका ९:७-९
1उ समयम गालील क्षेत्रम राज्य कर्ना हेरोद येशूक करल कामक बारेम सुन्ल। 2तबदोस्र ऊ आपन दरबारक कर्मचारीन कल, “ऊ त बप्तिस्मा देहुइया यूहन्ना हो। ऊ मुवलमसे जीगैल्। उहओर्से त ऊ असिन शक्तिशाली काम कर्ठा।”
3पैल्ह का हुइल कलसे, आपन भैया फिलिपक गोसिन्या हेरोदियासक कारणले हेरोद यूहन्नह पकर्क झ्यालखानम डाररख्लह।#लूक ३:१९-२० 4काकरकि यूहन्ना घरीघरी हेरोदह असिक कैरख्लह, “अप्न आपन भैयक गोसिन्यह लेना ठीक नैहो।”#लेवी १८:१६; २०:२१ 5असिक कलकओर्से हेरोद हुँकहीन मुवाइक लाग रलह, तर ऊ मनैनसे डरैल, काकरकि मनै यूहन्नह अगमवक्ता हुइट कैक कहँट्।
6हेरोद राजक जन्म दिनिक उपलक्ष्यम हेरोदियासक छाई सबजन्हक आघ नाचल। यी देख्क हेरोद मोहित हुइल। 7तबदोस्र ऊ किर्या खाक आपन छाईह कल, “टुँ ज्या मङ्ग्बो, उह टुँहीन देहम।” 8तर वाकर डाई ओहीह सिखाइल अनुसार ऊ कहल, “बप्तिस्मा देहुइया यूहन्नक मुन्टा टठ्यम दी।” 9यी सुन्क राजा हेरोद एकदम दुःखीत हुइल। तर ओत्रा धेर पहुनन्हक आघ किर्या खैलकओर्से ऊ वाकर माग पूरा कर्ना हुकुम देल। 10ऊ झ्यालखानम यूहन्नक मुन्टा काट लगैल। 11कट्ना मनैया हुँकहार मुन्टा टठ्यम आन्क उ केटीह देहल। केटीजुन लैजाक आपन डाईह देहल। 12तबदोस्र यूहन्नक चेलन आक हुँकहार मुवल शरीर लैजाक गर्ल, ओ जाक येशूह यी खबर देल।
पाँच हजार मनैन खवैलक
मर्कूस ६:३०-४४; लूका ९:१०-१७; यूहन्ना ६:१-१४
13जब येशू यी बात सुन्ल, उहाँ लाऊम चिहुर्क एकान्त ठाउँम गैल। मनै येशू गैल कना बात थाहाँ पैल त, हुँक्र सहर-सहरसे निकर्क उहाँक पाछ लग्ल। 14येशू लाऊमसे उत्रबेर त मनैन्हक भीड उहाँह अश्या लागटलह। हुँकन देख्क उहाँह स्वाग लग्लन, ओ उ ठाउँम आइल बेरम्हेन चोखादेल।
15सन्झ्या हुइल् त चेलाहुँक्र उहाँकठे आक कल, “यिहाँ त कुछु फे नैहो, सन्झ्या होस्याकल। यी मनैन बिदा दी ओ हिँक्र गाउँम जाक खैना चिज किन्क खाइ सेकहीँ।”
16येशू हुँकन कल, “हुँकन कहोँ जाइ नैपरहीन, टुह्रहे हुँकन खाइक लाग देओ।”
17चेलन कल, “हमारठे त पाँचठो रोटी ओ दुइठो मच्छी केल बा।”
18तब येशू कल, “खै रोटी ओ मच्छी? म्वारठे आनो।” 19येशू मनैन दुबाहा ठाउँम बैठ लगैल, ओ पाँचठो रोटी ओ दुइठो मच्छी लेक स्वर्गओर हेर्टी परमेश्वरह धन्यवाद देल। तबदोस्र उहाँ रोटी खन्टा-खन्टा चेलन देल, चेलाहुँक्र मनैन देल। 20हुँक्र सबजन अघाअघा खैल, ओ उब्रल टुक्रिटुक्रा उठैल त बाह्र छिट्वा हुइल्। 21महिलाहुँक्र ओ लर्कापर्का छोर्क, रोटी खउइया पुरुषहुँक्र केल पाँच हजार रलह।
येशू समुद्रक उप्रउप्र नेङ्ग्लक
मर्कूस ६:४५-५६; यूहन्ना ६:१५-२१
22यी काम कैक सेक्ल त येशू आपन चेलन “लाऊम चिहुर्क महीसे आघ उपार जाजैहो” कैक अह्रैल। अप्नजुन मनैन विदावारी कैक पठैल। 23भीडक मनैन बिदा कैक सेक्ल त उहाँ अकल्हे प्रार्थना करक लाग पर्वत्वम गैल। रात हुइलम फे येशू अकल्हे उहँ पलरलह। 24उ ब्याला लाऊ किनारसे बरे दूर पुगरलहा। बतास उल्टाओर्से चल्लकओर्से छल्का लाऊह डगमगादेहटह।
25बिहान्नी तीन बजेओर येशू समुद्रम पानीक उप्रउप्र नेङ्ग्टी चेलन्हकठे गैल। 26उहाँह पानीक उप्रउप्र न्याङ्गट् देख्क हुँक्र डराक, “यी त भूत्वा हो!” कटी चिच्यैल।
27तबहेँ येशू हुँकन असिक कल, “साँसा जिन छोरो, मै हुइटुँ जिन डराओ।”
28यी सुन्क पत्रुस कल, “प्रभु, अप्न हुइटी कलसे, महीह फे पानीक उप्रउप्र नेङ्ग्टी अप्नकठे अइना आज्ञा दी।”
29येशू कल, “आओ ना त!”
पत्रुस लाऊमसे उत्रल, ओ पानीक उप्रउप्र नेङ्ग्टी येशूकठे जाइलग्ल। 30तर बतास जोरसे चलट् देख्क ऊ डरागैल, ओ पानीम बुर लग्ल त डरले, “प्रभु, महीह बचाई!” कटी चिल्लैल।
31येशू झट्ट हुँकहीन पकर्टी कल, “खै टुँहार विश्वास, काजे शङ्का कर्लो?”
32उहाँहुँक्र लाऊम चिहुर्ल त बतास फे ठम्हल। 33लाऊम रहुइयन सब चेलन उहाँक पाउ पर्टी कल, “अप्न त जाट्टीसे परमेश्वरक छावा हुइटी।”
34उहाँहुँक्र उपार गनेसरेत कना ठाउँम गैल। 35जब उ ठाउँक मनै उहाँह चिह्न्ल, तब आञ्जरपाञ्जर इलाकक् मनैन खबर पठैल, ओ मनैजुन सब बेरम्हेन येशूकठे अन्ल। 36ओ हुँक्र उहाँक लुगक टुप्प केल हुइलसे फे छुव पाइ कैक बिन्ती कर्ल, ओ जत्रा जन छुल, हुँक्र सबजन चोखागैल।
Zur Zeit ausgewählt:
मत्ती 14: thl
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
