यूहन्ना 18
18
येशूह पक्रलक
मत्ती २६:४७-५६; मर्कूस १४:४३-५०; लूका २२:४७-५३
1यी प्रार्थना कैक सेक्ल त येशू आपन चेलन्हकसँग किद्रोन कैजिना गञ्ज्रीक उपार गैल। उहाँ एकठो फुलर्या रह। येशू आपन चेलन्हकसँग उहँ गैल।
2उहाँह पक्रादेहुइया यहूदा फे उ ठाउँ चिनरख्लहा, काकरकि येशू आपन चेलन्हकसँग उ ठाउँम धेरजसिन जैना करँट्। 3उ ब्याला कुछ सिपाहीन लेक, ओ फरिसी ओ मुख्य पूजारीन्हक पठाइल द्वरपालेन लेक यहूदा उह ठाउँम आइल। हुँक्र दिया, ज्वाँजा ओ हातहतियार लेल्हरलह।
4आपनम परिअइना सब बात येशूह थाहाँ रलहन। उहओर्से उहाँ आघ आक हुँकन कल, “टुह्र केहीह ख्वाजटो?”
5हुँक्र उहाँह कल, “नासरतक येशूह।”
येशू हुँकन कल, “मै उह हुइटुँ।” उहाँह पक्रादेहुइया यहूदा फे हुँकन्हकसँग ठह्र्याइल रह। 6उहाँ हुँकन “मै उह हुइटुँ” कल त हुँक्र पाछ हट्ल ओ भूइँयम गिरगैल।
7उहाँ हुँकन फेदोस्र पुछ्ल, “टुह्र केहीह ख्वाजटो?”
हुँक्र कल, “नासरतक येशूह।”
8येशू जवाफ देल, “मै टुँहन, मै उह हुइटुँ कैक कनु जे। यदि टुह्र जाट्टीसे महीह जो ख्वाजटो कलसे, हिँकन भर जाइदेओ।” 9“अप्न म्वार जिम्मम देहल मनैमध्ये एकठो फे मै नैगुमैनु” कना उहाँक ब्वालल् वचन पूरा ह्वाए कैक यी हुइल्।
10सिमोन पत्रुस आपनठे रहल तरवाल झिँक्क प्रधान पूजारीक कमारह झम्कैल, त वाकर कान च्वाट्टसे काट्गैलस। उ कमारक नाउँ माल्खस रलहस।
11येशू पत्रुसह कल, “आपन तरवाल दापम ढरो! का बाबा म्वार लाग तयार पारल दुःखक घुट्का मै नैपिउँ?”#मत्ती २६:३९; मर्क १४:३६; लूक २२:४२
येशू हन्नासकठे लैजागैलक
12तबदोस्र सिपाहीहुँक्र, हुँकन्हक कप्तान, ओ मन्दिरक द्वरपालेन येशूह पक्रल, ओ उहाँह बहन्ल। 13पैल्ह हुँक्र उहाँह हन्नासकठे लैगिल। हन्नास उ सालक प्रधान पूजारी कैयाफक राउट रलह। 14यिह कैयाफा “जनतन्हक लाग एकठो मनैया मुना जो ठीक हो” कैक यहूदी अगुवन सल्लाह देरख्लह।#यूह ११:४९-५०
पत्रुसक पैल्ह इन्कार
मत्ती २६:६९-७०; मर्कूस १४:६६-६८; लूका २२:५५-५७
15सिमोन पत्रुस ओ और एकठो चेला येशूक पाछ-पाछ लग्ल। उ और चेलकजुन प्रधान पूजारीसे मजा चिनजान रलहन। उहओर्से ऊ येशूकसँग प्रधान पूजारीक अङ्ग्नम गैल। 16तर पत्रुस गेटक बाहर ठह्याइल रलह। प्रधान पूजारीसे चिनजान रहल उ और चेला बाहर निकर्क गेटम रना कमारीह कैक पत्रुसह भित्तर अन्ल।
17पत्रुस भित्तर जाइबेर गेटम रना कमारी हुँकहीन कहल, “टुँ उ मनैयक चेलामध्ये एक जन नैहुइटो का?”
ऊ कल, “नाहीँ, मै नैहुइटुँ!”
18जार हुइलक कारण नोकरचाकरहुँक्र ओ द्वरपालेन ठह्र्याक आगी तापटलह। तब पत्रुस फे हुँकन्हकसँग ठह्र्याक आगी तापलग्ल।
प्रधान पूजारीद्वारा येशूक छानबिन
मत्ती २६:५९-६६; मर्कूस १४:५५-६४; लूका २२:६६-७१
19यिह बीचम प्रधान पूजारी येशूह उहाँक चेलावँ ओ उहाँक शिक्षा सम्बन्धम सोधपुछ कर्ल।
20येशू हुँकहीन जवाफ देल, “मै सबजन्हक सामुन्नेम सबजन सुन्नागरी खुल्लमखुल्ला बोलुँ। मै आपन शिक्षा सब यहूदीहुँक्र जम्मा हुइना सभाघर ओ मन्दिरम दिउँ। मै गुपचुपम कुछु फे नैसिखैलहुइटुँ। 21अप्न काजे महीह पुछटी? म्वार शिक्षा सुनुइयन पुछी। मै का सिखैनु कना बात हुँकन थाहाँ बाटन।”
22येशू जवाफ देहबेर ओठे ठह्र्याइल द्वरपालेनमध्ये एक जन येशूह थाप्पर लगाइल ओ कहल, “टैँ प्रधान पूजारीक सामुन्नेम फे असिक मुहमुह लग्ठ्या?”
23येशू ओहीह कल, “मै कुछु गल्ती कैरख्नु कलसे, गल्ती देखादेओ, तर ठीक बोलरख्नु कलसे, बेकसूरम काजे ठोक्ठो?” 24तबदोस्र हन्नास येशूह बहन्ल अवस्थम प्रधान पूजारी कैयाफकठे पठादेल।
पत्रुसक द्वासर ओ तीसर इन्कार
मत्ती २६:७१-७५; मर्कूस १४:६९-७२; लूका २२:५८-६२
25सिमोन पत्रुस ठह्र्याक आगी तप्टीरलह। हुँक्र हुँकहीन कल, “टुँ उ मनैयक चेलामध्ये एक जन नैहुइटो का?”
ऊ कल, “नाहीँ, मै नैहुइटुँ!”
26पत्रुस कान काटल कमारक नाता पर्ना मनैया फे ओठे रह। ऊ फे प्रधान पूजारीक कमारा रह। ऊ पत्रुसह कहल, “का मै टुँहीन फुलर्यम उ मनैयक बगालिम नैदेख्नहुँ नि?” 27पत्रुस फेदोस्र मै नैहुइटुँ कैक इन्कार कर्ल। तबहेँ मुर्घा बासल।
पिलातसक सामुन्नेम येशू
मत्ती २७:१-२,११-१८,२१; मर्कूस १५:१-१०; लूका २३:१-५,१३-२५
28तब यहूदीहुँक्र येशूह कैयाफक घरमसे रोमी बडाहाकिम पिलातसक दरबारम लैगिल। उ ब्याला बिहान हुइटह। हुँक्र दरबारभित्तर नैगैल काकरकि गैरयहूदीक दरबारभित्तर गैलसे हम्र अशुद्ध हुइबी ओ मुक्ति-दिवस टिहारक खाना खाए नैपैबी कैक हुँकन डर लागरलहन। 29उहओर्से पिलातस हुँकन्हकठे बाहर निकर्क कल, “यी मनैयक विरोधम टुह्र का दोष लगाइटो?”
30हुँक्र हुँकहीन कल, “यदि यी मनैया अपराधी नैरहट् कलसे, हम्र यहीह अप्नकठे अन्नेनैरलही।”
31पिलातस हुँकन कल, “टुह्र यी मनैयह लैजाओ, ओ टुन्हक आपन व्यवस्था अनुसार याकर इन्साफ करो।”
यहूदीहुँक्र उहाँह कल, “हमन त किहुह मृत्युदण्ड देना अधिकार नैहो।” 32#यूह ३:१४; १२:३२येशू अप्न कौन तरिकाले मुवपरी कना सम्बन्धम उहाँक कहल बात पूरा हुइक लाग यी हुइल हो।#१८:३२ येशू कल, “मै पृथ्वीमसे मनैद्वारा उप्पर उठाजैम” (यूहन्ना ३:१४; १२:३२)। उहाँ यी बात कैक अप्न क्रूसम मुवपरी कना सम्बन्धम पैल्हहेँ संकेत देरख्लह। यहूदीहुँक्र आपन व्यवस्था अनुसार अपराधीन पत्थ्रले मार्क मुवाइँट, तर रोमीहुँक्र अपराधीन क्रूसम कील्ला ठोक्क मुवाइँट्, ओ हुँक्र किहुह फे ओसिक मुवैना अधिकार यहूदीन नैदेलरलह।
33पिलातस फेदोस्र दरबारम गैल, ओ येशूह बलाक कल, “का टुँ यहूदीन्हक राजा हुइटो?”
34येशू जवाफ देल, “यी प्रश्न अप्न आपन हिसाबले पुछ्ली, कि म्वार बारेम अप्नह और कुई कलह?”
35पिलातस जवाफ देल, “का मै यहूदी हुइटुँ? टुँहार आपन जातिक मनै ओ मुख्य पूजारीहुँक्र टुँहीन म्वार हाँठम सुम्पलह। टुँ कौन अपराध कर्लो?”
36येशू कल, “म्वार राज्य यी संसारक नैहो। यदि म्वार राज्य यी संसारक रहट् कलसे, म्वार पाछ लगुइयन म्वार लाग लड्नेरलह, ओ मै यहूदीन्हक हाँठम पर्नेनैरनहुँ। तर म्वार राज्य यी संसारक नैहो।”
37पिलातस येशूह पुछ्ल, “याकर मतलब, टुँ जाट्टीसे राजा जो हुइटो त?”
येशू जवाफ देल, “मै राजा हुइटुँ कैक अप्न अपन्हे कहटी। मै मनैन सत्य बात कहक लाग जो जन्मनहुँ, यिह बातक लाग यी संसारम अइनहुँ। सत्य मन परैना मनै म्वार बात सुन्ठ।”
38पिलातस उहाँह पुछ्ल, “सत्य का हो त?” ऊ अत्रा कल ओ निकर्क यहूदीन्हकठे गैल, ओ हुँकन कल, “मै यी मनैयकम कुछु दोष नैभेटैनु। 39मुक्ति-दिवसक उपलक्ष्यम हरेक साल मै टुन्हक लाग एकठो कैदीह छुट्कारा देना टुन्हक चलन बा। उहओर्से का मै उ यहूदीन्हक राजा कैजिना मनैयह छोरदिऊँ?”
40तर हुँक्र कर्रसे कल, “ओहीह नाहीँ! बारब्बह छोरदी!” बारब्बाजुन डाँका रह।
Zur Zeit ausgewählt:
यूहन्ना 18: thl
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
