Pomulanya 3

Sarita Tempo I Adam Sira Dua Mangewa Porenta i mPue Yawe

1Wali tempo i Pue Yawe mampapowali samparia binatang, tempo etu re’e samba’a to pande kojo. Ia semo to pande-pande wo’u pei kasamparianya ngaya nu binatang to yusa. Wali to pande etu, etu semo ule. Wali yako etu re’e seo ule etu yau mangampago tau we’a ri raya nu bonde pei mangampogomboka ia. Ule etu rani mangantipu ia, see naka ia mampotanaka, “Wimba, bara monso pu’u i Pue Allah manganto’oka komi dua, ‘Samparia kaju ri bonde si’i ne’e kojo nukoni ngkomi wuanya?’”

2Wali tau we’a etu mangansono, ia manganto’o, “Si’a ewa see! Samparia wua ngkaju ri bonde si’i paka maya kami mangkoni, 3pei ojo kaju to ri tongonya kojo bonde si’i, to etu taa maya rakoni wuanya. Ane kaju to etu, i Pue Allah manganto’oka kami, ‘Ne’e mangkoni wua ngkaju to etu pasi ne’e seja mampotaka, see komi taa damate yau.’” Ewa wetu sono ntau we’a.

4Wali ule etu manganto’oka tau we’a, “Gete, taa monso! Komi taa damate. 5Kamonsonya naka pei i Pue Allah manganto’oka komi ewa wetu apa Ia mangansani ane komi mangkoni wua ngkaju to etu komi datidugang wo’u kapandemu. Wali komi damawali sewaju ewa Ia, batuanginya komi damangansani seja anu to matao pasi anu to maja’a.” Etu semo gombo to nato’o nu ule mangantipu tau we’a etu.

6Wali tau we’a etu mangalo’aka wua ngkaju etu pei mangkita wua ngkaju etu magaya kojo pasi matao rakoni. Pasi ia kaloo mampobuuka kapande to danarata ntau to mangkoni wua ngkaju etu. Wali see naka ia mangoko wua ngkaju etu pei mangkoni. Roo see ia mangawaika seja resi pa’a nu ananya to siwaka pei ia etu, panewa pa’a nu ananya etu mangkoni seja. 7Wali ojo karoonya sira dua mangkoni wua ngkaju etu, mansaka tiloka pampobuuka nsira. Wali tempo etu semo panewa sira mangepe mea apa lambe. Wali sira mangoko ira ngkaju ara pei mangajau, sira mangika ewa basa’u pasi rok to danapake mangabombong eanya.

8Wali yako etu, ojo karedenya eo, i Pue Yawe Ia re’e malinja ri raya nu bonde etu. Tempo Ia malinja etu, i Adam pasi indo nu ananya sira mangandonge looNya, see naka sira dua masaya ri oyo mpu’u ngkaju ri bonde etu see Ia taa damangkita sira. #Ayat 8 Naka pei sira mamposayaka i Pue Yawe apa tempo sira mangkoni wua ngkaju to sira taa rawaika mangkoni etu, tempo etu tonii nsira mate, batuanginya sira tamo masingkatao pei i Pue Yawe.

9Pei i Pue Yawe mampokio i Adam, Ia manganto’o, “Adam, imbamo korom?”

10Wali i Adam mangansono, ia manganto’o, “Aku mangandonge loo mbiti ngKomi tempo Komi malinja ri bonde si’i, wali aku meka rayangku see naka kami dua masaya yau apa saba kami lambe.”

11Wali ojo pangandonge i mPue Yawe sono i Adam etu, Ia mampotanaka i Adam, to’oNya, “Sema to nampaponsanika korom naka pei nunsani ngkorom komi lambe? Wimba, korom bara roomo mangkoni wua ngkaju to Kuto’oka korom ne’e rakoni?”

12Wali i Adam mangansono, ia manganto’o, “Iya, pei tau we’a to Komi nangawaika aku damawali yunungku, ia semo to nangawaika aku wua ngkaju etu, wali see naka aku mangkoni.”

13Wali i Pue Yawe mampotanaka wo’u resi tau we’a etu, to’oNya, “Kesaa sabanya naka pei korom mangika palaong to etu?”

Wali tau we’a manganto’o, “Ule to nangakal aku see naka aku mangkoni.”

Sarita Tempo i Pue Yawe Mangahuku Ule Pasi i Adam Sira Dua i Hawa

14Wali yako etu i Pue Yawe mampogomboka ule etu, Ia manganto’o, “Apa saba korom mangakal tau we’a etu, see naka Aku mangantanaa yau korom. Wali yako kasamparianya binatang to yole pasi binatang to maila, ojo korom semo to Aku mantanaa yau. Wali yako tempo si’i rataka ri tempo korom mate yau korom damamponjoyoka kompomu ri wawo ntana, pasi samparia anu to nukoni ngkorom dasigalo pei awu ntana. 15Pasi yako tempo si’i Aku damangika see korom tamo masingkatao pei tau we’a. Kasimbalinya yako etu komi dua damawali yau masibali. Pasi ewa see seja wiyaamu pei wiyaa to si ia. Wali korom damangantungku tompo ntodu mbiyaa ntau we’a si’i, pei wiyaanya etu damangabusak wo’omu.” #Ayat 15 Gombo si’i ligi mangkonong i Kerisitu Ia darapaku ri kaju pasape, panewa roo see Ia damanganangi i Kepala Measa. Wali etu semo gombo i mPue Yawe mangahuku ule etu.

16Panewa yako etu Ia mampogomboka wo’u tau we’a, Ia manganto’o, “Apa saba palaong to maja’a to nuika ngkorom etu, see naka datidugang kojo kasesa to danuepe ri tempo mangangkeni koro, pasi tidugang seja ntida to danurata ri tempo korom damoana. Pei nempo ewa see, korom tiroo damamporoe pa’a nu anamu pasi ia semo to damangkuasang korom.” Wali etu semo gombo i mPue Yawe mangahuku tau we’a.

17-19Panewa yako etu Ia mampogomboka wo’u i Adam, to’oNya, “Adam, korom roomo mangewa porentangKu, apa korom mangampalaika yau gombo nu indo nu anamu pei mangkoni wua ngkaju to Aku roomo manto’oka korom ne’e mangkoni. Wali apa saba korom mangewa porentangKu etu, see naka Aku mantanaa yau tana see yako ri tempo si’i datuwu junju to marui pasi paropo to marui ri wawo ntana. Wali rataka ri tempo korom mate yau, korom damasesa kojo mapalaong damangaliwu pangkoni. Mandasai kojo danuepe manawu pasi maputu panemu mampomuya pinumuya to damawali pangkonimu. Panewa tempo korom mate yau, tempo etu lemba ngkorom damawolili muni mawali tana, apa yako ri tana semo powalimu. Awu ntana semo to ipakengKu mangika korom seore, wali see naka korom damawolili muni mawali yau awu ntana.” Wali etu semo gombo i mPue Yawe mangahuku i Adam.

20Wali yako etu i Adam mangansangaka indo nu ananya etu i Hawa, batuanginya katuwu. Naka pei ia mangansangaka ia katuwu, apa samparia to lino to re’e paka yako wiyaa i Hawa semo.

21Wali i Pue Yawe mampopate yau binatang pei mangansisi pelanya panewa Ia mangangikaka sira dua pake yako ri pela nu binatang etu. Roo see panewa Ia mampaposunsuka sira pake to etu.

Sarita Tempo i Adam Sira Dua i Hawa Rarubak Yako ri Bonde ri Tana Eden

22Wali yako etu i Pue Yawe mampobuuka pasi manganto’o, “Lo’aja tau dua etu, sira dua nansanimo pasisalanya to matao pasi to maja’a sewaju ewa Kita. Wali taa matao ane sira mangoko wua ngkaju to ri tongo nu bonde si’i, etu semo kaju to mangawai katuwu. Apa ane sira dua mangkoni wua ngkaju etu sira datuwu singkasaenya.” #Ayat 22 Naka pei i Pue Allah taa rani sira tuwu singkasaenya ri lino si’i apa sira roomo mawali ewa watua nu dosa, wali masiasi kojo sira ane tuwu singkasaenya ewa wetu..

23Wali i Pue Yawe mangarubak yau i Adam sira dua yako ri bonde to re’e ri tana Eden naka ne’e sira mangkoni wua ngkaju etu. Ia manganto’oka sira mampasilonga tana damangarata pangkoni, apa sira raika yako ri tana etu semo. 24Wali ojo karoonya Ia mangarubak yau sira dua yako ri bonde ri tana Eden etu, i Pue Yawe mampapokampangika bara sawei mba’a pomakauNya to maroso kojo to rato’oka kerub nja’u sambali bonde ri tana Eden etu tondo mata nu eo. Pasi Ia mamposaka seja wada to mataja dua mbalia ri wombo njaya nu bonde etu. Wada etu titoro-toro mawea ewa apu mangajagai jaya to yau ri bonde to kare’e ngkaju to mangawai katuwu see tare to maya masua reria.

Zur Zeit ausgewählt:

Pomulanya 3: WNT

Markierung

Kopieren