मत्ती 13

बेज़ा बाहणु आल़ै रा उदाहरण

1तेही ध्याड़ै न यीशु तेई घौर छ़ौड़िआ उपदेश देणै री तैंईंयैं समुन्द्रा रै बौढ़ा ज़ाइआ बेठा। 2ज़ैबै तेइरै च़ोहू पासै सारै लोकै री बोहू भीड़ कठा हुई ता सौ एकी किश्ती पैंधै च़ढ़िया तिन्हां बै सिखाणै री तैंईंयैं बेठा होर लोकै री भीड़ कनारै पैंधै खड़ी रौही। 3तेइयै तिन्हां बै उदाहरण देइया बोहू सारी गैला दैसी: “एक बेज़ै बाँहणु आल़ा बेज़ै बाँहदा निकता। 4ज़ैबै सौ बेज़ै बाँहदा लागा ती ता किछ़ बेज़ा बौतै रै कनारै न पौड़ू होर सौ च़िड़ूऐ च़ुगू। 5किछ़ बेज़ा रड़खड़ी ज़मीना न पौड़ू माटा नी मिलणै री बजहा सौ बेज़ा छ़ेकै निकता। 6पर ज़ैबै धुपा आऊ ता ते झ़ोट शुकै किबैकि तिन्हरै ज़लाड़ै पैक्कै नी ती ऑथि। 7किछ़ बेज़ा कौन्डै रै झ़ौकड़ा ज़ोंदरै पौड़ू, झ़ौकड़ बढ़दा रौहू होर ते दबाऐ। 8पर किछ़ बेज़ा शोभली ज़मीना न पौड़ू होर शोभली फ़सल त्यार हुई। ज़ेतरा बाहू ती तेथा न तीह गुणा, शौठ गुणा होर शौऊ गुणा। 9अगर तुसै समझ़णा चाहा सी ता, ज़ो मैं बोलू सा, तेथा बै ध्याना सैंघै शुणित्।”

उदाहरणा रा उदेश्य

10तैबै च़ेले यीशु हागै एज़िया पुछ़ू, “तू लोका सैंघै उदाहरणा न किबै गैला केरा सा?”

11यीशुऐ तिन्हां बै बोलू, “स्वर्ग राज्य रै भेद ज़ाणनै रा समझ सिर्फ़ तुसाबै धिनी सा तिन्हां बै नी।” 12किबैकि ज़ुणी हागै थोड़ा सा तिन्हां बै होर देणा होर तिन्हां हागै बोहू होंणा। पर ज़ुणी हागै किछ़ बी नी ऑथि तिन्हां हागै न सौ बी वापस मुँगिणा ज़ो तिन्हां हागै सा। 13एसा बजहा न हांऊँ तिन्हां सैंघै उदाहरणा न गैला केरा सा,

“किबैकि ते हेरिया भी नी हेरदै;

होर शुणिया भी नी शुणदै; होर न समझ़दै।

14 ऐण्ढै तैरहै तिन्हां पैंधै यशायाह भविष्यवक्तै री भविष्यवाणी पूरी होआ सा,

“ ‘तुसा कोनै लाइया ता शुणना, पर तुसरी समझ़ा न किछ़ नी ऐणा;

होर तुसा औछियै ता हेरना, पर तुसाबै किछ़ पता नी च़लणा।

15 किबैकि इन्हां लोका रा मन मोटा हुआ सा,

ते कोनै लाइया उथड़ा शुणा सी,

होर तिन्हैं आपणी औछ़ी बन्द केरी सा,

कोइँछ़ै ऐण्ढा नी लोड़ी हुआ कि ते औछियै लाइया हेरलै,

कोनै लाइया शुणलै होर मनै लाइया समझ़लै,

होर पाप केरना छ़ौड़िआ मूँ धिराबै फिरलै,

होर हांऊँ तिन्हरा उद्धार केरनु।’

16 “पर धन्य सी तुसरी औछ़ी, कि ते हेरा सी, होर कोन ते शुणा सी। 17हांऊँ तुसाबै सच़ बोला सा, बोहू सारै भविष्यवक्तै होर धर्मी लोकै ऐ गैला हेरनी चाही, पर नी हेरी सकै होर शुणनी चाही, पर नी शुणी सकै।

बेज़ा बाहणु आल़ै रै उदाहरणा री व्याख्या

18 “ऐबै तुसै बेज़ै बाहणु आल़ै उदाहरणा रा मतलब शुणा; 19ज़ो परमेश्वरा रा वचन शुणा ता सा पर समझ़दा नी, ज़ो तेइरै मना न सा तेथा बै शैतान एज़िया नेआ सा। ऐ सौ बेज़ा सा ज़ो बौतै रै बौढ़ा पौड़ू ती। 20रड़खड़ी ज़मीना न पौड़ूदा बेज़ा सौ सा ज़ो वचन शुणिया खुशी सैंघै मना सा। 21पर आपणै मना न वचनै री जड़ पक्की नी होंणै देंदा होर सौ थोड़ै रोज़ा तक रौहा सा। ज़ैबै वचना री बजहा न दु:ख क्लेश एज़ा सा ता सौ फट पिछ़ै हटा सा। 22होर झ़ौकड़ा न औल़ूदा बेज़ा सौ सा, ज़ुणियै वचन शुणू, होर दुनिया री चिंता, ढैबुऐ रा धोखा होर हर किस्मै री चीज़ा रा लालच तिन्हरै मना न भौरूइया वचना बै दबा सा होर ते फलदै नी। 23शोभली ज़मीना रा बेज़ा सौ सा, ज़ुणा वचना बै शुणिया ग्रहण केरा सी होर फ़ौल़ा सी, कोई तीह गुणा, कोई शौठ गुणा, कोई शौऊ गुणा।”

जंगली बेज़ै रा उदाहरण

24 यीशुऐ तिन्हां बै एक होर उदाहरण दसु, “स्वर्ग रा राज्य तेई किसाना सांही सा ज़ुणियै आपणै छेता न शोभला बेज़ा बाहू। 25पर ज़ैबै लोका सोंदै लागै ती ता तेइरै बैरियै एज़िया गेहूँ रै बीच़ा न जंगली बेज़ा बाहू होर नौठा। 26ज़ैबै गेहूँ रा बेज़ा लगा होर तेथा न सिला लागै ता गेहूँ रै बिच़ा न जंगली बेज़ै रै झ़ोटड़ू बी हेरिदै लागै।

27 “तैबै छेतै रै मालकै रै नोकरै एज़िया तेइबै बोलू, हे मालिक, तुसै ता छेता न शोभला बै ज़ा बाहू ती? तैबै ऐ जंगली बेज़ै रै झ़ोटड़ू कौखै न लागै? 28तेइयै तेइबै बोलू, ‘ऐ कौसी बैरी रा कोम सा।’ तेइरै नोकरै पुछ़ू, ‘तू कि चाहा सा, कि आसै ज़ाइआ जंगली बेज़ै रै झ़ोटड़ू बै पेच़ाऊँ?’ 29छेतै रै मालकै बोलू, ‘नैंई ऐण्ढा मता केरा, किबैकि ज़ैबै तुसै झ़ौकड़ पेचलै तैबै तेथा सैंघै गेहूँ भी पेचणै। 30फसला पौकणै ढौई दुही बै सैंघै-सैंघै बढ़नै दैआ, होर ज़ैबै फसल काटणै रा बौगत एला ता मूँ काटणू आल़ै बै बोलणा; कि तुसै पैहलै जंगली बेज़ै रै झ़ोटै रै पूल़ै बणाईया तिन्हां बै फूका, होर गेहूँ बै कठा केरिया मेरै नाज़ गौदामा न रखा।’”

राई रै बेज़ै रा उदाहरण

31यीशुऐ तिन्हां बै एक होर उदाहरण दसु, “स्वर्ग राज्य राई रै दाणै सांही सा; ज़ैबै तेइबै ज़मीना न बाहा सी। 32ऐ ज़मीना रै सैभी बेज़ै मौंझ़ै न होछ़ा होआ सा। पर ज़ैबै बेज़ा बाहिया, उगा सा ता सैभी सागपाता न बड़ा होआ सा; ऐ ऐतरा बड़ा बैणा सा कि सर्गा न उड़नू आल़ै च़ीड़ू एथै री शांणी पैंधै रौहा सी।”

मलेड़े रा उदाहरण

33यीशुऐ तिन्हां बै एक होर उदाहरण दसु, “स्वर्ग रा राज्य तेई मलेड़े सांही सा ज़ो कौसी बेटड़ियै लेईया बीह किलो न ज़ादा पिठै न मलाऊ होर होंदै-होंदै सौ सारा पिठा मलेड़ुआ, ऐण्ढी तैरहा किछ़ लोकै रै ज़रियै परमेश्वरा रा राज पूरी दुनिया न फैला सा।”

उदाहरणा रा इस्तेमाल

34ऐ सैभ गैला यीशुऐ लोका बै उदाहरणा न दसी, होर बिना उदाहरण सौ तिन्हां बै किछ़ नैंई बोल्दा ती। 35ऐ एथै री तैंईंयैं हुआ कि परमेश्वरै भविष्यवक्तै रै द्वारा ज़ो बोलू ती, सौ पूरा होला,

“मूँ उदाहरण बोलणै री तैंईंयैं आपणा मुँह खोलणा,

दुनिया बैणनै न लेइया औज़ा तैंईंयैं ज़ो गैला गुप्त रौही तै मूँ प्रकट केरनी।”

जंगली बेज़ै रा उदाहरण

36तैबै यीशु भीड़ा बै विदा केरिया घौरा बै आऊ। तैबै तेइरै च़ेले एज़िया तेइबै बोलू, “आसाबै जंगली बेज़ै रै उदाहरणा रा मतलब समझ़ा।”

37यीशुऐ बोलू, “शोभलै बेज़ै बाहणु आल़ा मांहणु रा बेटा मतलब हांऊँ सा। 38ऐ छेत दुनिया रै लोका सी, शोभला बेज़ा तै लोका सी ज़ुणी पैंधै परमेश्वर राज्य केरनै न खुश सा होर जंगली बेज़ा सौ सा ज़ो शैताना रा हुक्म मनिया कोम केरा सी। 39ज़ुणी बैरियै सौ बेज़ा बाहू सौ शैतान सा, फसल काटणा दुनिया रा आखरी सा होर काटणू आल़ै स्वर्गदूत सी।

40 “ज़ैण्ढै जंगली बेज़ा झ़ोट कठा केरिया फूकै दुनिया रै आखरी न बी ऐण्ढा होंणा। 41हांऊँ मांहणु रै बेटै आपणै स्वर्गदूत भेज़णै होर तै तिन्हां रै राज्य मौंझ़ै न सारै ठोकर देणु आल़ै होर पाप केरनु आल़ै कठा केरनै। 42होर तै औगी रै कुण्डा न पाणै ज़ौखै कि तिन्हां बै बोहू दु:ख होर कष्ट होंणा। 43तेई बौगतै धर्मी परमेश्वरै रै राज्य न सूरज़ा सांही च़मकणा। अगर तुसै समझ़णा चाहा सी ता, ज़ो मैं बोलू सा तेथा बै ध्याना सैंघै शुणित्।

गोजुऐंदै खजानै रा उदाहरण

44 “स्वर्ग राज्य छेता न गज़िहाउदै धना सांही सा ज़ो कौसी मांहणु बै मिलू होर तेइयै सौ तौखै पौथू होर सौ ऐतरा खुश हुआ कि तेइयै ज़ाइआ आपणा सैभ किछ़ बैच़ू होर सौ छेत कीमतियै लेऊ।

कीमती मोती रा उदाहरण

45 “स्वर्ग रा राज्य समान लेणू आल़ै व्यापारी सांही सा ज़ो शोभलै मोती तोपदा लागा ती। 46ज़ैबै तेइबै कीमती मोती मिलै ता तेइयै आपणा सैभ किछ़ बैच़ू होर ते मोती लेऐ।”

जाला रा उदाहरण

47 “फिरी स्वर्गा रा राज्य तेई बड़ै ज़ाला सांही सा ज़ो समुन्द्रा न पाऊ, होर हर किस्मै री मैच्छ़ी कठा केरी। 48ज़ैबै पाणी भौरूआ ता मैच्छ़ी ढौकणु आल़ै ज़ाल खींच़ू होर बैशिया शोभली-शोभली मैच्छ़ी आपणै भाण्डै न कठा केरी होर माड़ी-माड़ी मैच्छ़ी फ़ेटै शेटी। 49दुनिया रै आखरी न ऐण्ढा होंणा। स्वर्गदूता एज़िया दुष्ट धर्मी न अलग केरनै, 50होर स्वर्गदूतै दुष्ट लोका औगी रै कुण्डा न पाणै ज़ौखै कि तिन्हां बै बोहू दु:ख होर कष्ट होंणा।”

पराणी होर नोंऊँई शिक्षा

51यीशुऐ बोलू, “तुसै ऐ सारी गैला समझ़ी?” तिन्हैं बोलू, “हाँ।”

52यीशुऐ तिन्हां बै बोलू, “हर एक शास्त्री ज़ो स्वर्ग राज्य रा च़ेला बैणू सा सौ तेई गृहस्ती मांहणु सांही सा ज़ो आपणै भण्डारा न नोऊँई होर पराणी चीज़ा खोला सा।”

नासरता न यीशु रा आदर नैंई केरू

53ज़ैबै यीशुऐ सैभ किछ़ उदाहरणा न बोलू ती, सौ तौखै न च़लू, 54होर आपणै नासरत नगरा बै वापस आऊ। तैबै तेइयै यहूदी री आराधनालय न उपदेश देणा शुरू केरू। तैबै हर कोई हैरान होईया बोलदा लागा, “ऐईबै ऐण्ढी बुद्धि री गैला कौखै न मिली होर ऐण्ढी चमत्कारी शक्ति कौखै न मिली? 55कि ऐ सौहै लकड़ी रै कोमा केरनु आल़ा (मिस्त्री) नी ऑथि? कि ऐईरी आमा रा नाँ मरियम नी ऑथि? याकूब, यूसुफ, शमौन होर यहूदा ऐईरी भाई ता सी। 56कि ऐईरी सारी बैहणी आसा बिच़ै नी ऑथि? ता ऐईबै ऐ सैभ किछ़ कौखै न मिलू?”

57तिन्हैं यीशु स्वीकार नी केरू। तैबै यीशुऐ तिन्हां बै बोलू, “एक भविष्यवाणी केरनु आल़ै रा आपणै देश, आपणै परिवार होर आपणै घौरा छ़ौड़िआ हर ज़ैगा आदर होआ सा।”

58तिन्हरै कम बशाह होंणै री बजहा न यीशुऐ तौखै बोहू च़मत्कार नी केरै।

Zur Zeit ausgewählt:

मत्ती 13: KFX-NT

Markierung

Kopieren