Kejadian 1

Allah bikin langit deng bumi smua

1:1—2:3

1Waktu pertama skali, Allah bikin langit deng bumi ni smua. 2Waktu itu, bumi ni masi trada bentuk, trada apapa ada air saja, baru smua glap. Roh Allah ada mlayang-mlayang di atas air situ.

3Trus begini Allah bilang, “Sa mau ada trang skarang!” Langsung trang de jadi. 4Allah liat kalo trang ni de bagus. Baru trang deng glap ni, Allah kas pisa dorang. 5Allah kas nama trang tu ‘siang’ baru glap tu ‘malam.’ Suda, malam su lewat trus pagi muncul.#1:5 Suda, malam su lewat trus pagi muncul ‒ Untuk orang Israel dorang, dong pu hari tu mulai dari malam, trus slesai di malam besok. Begitu suda, hari pertama de jadi.

6Habis itu, Allah bilang begini, “Sa mau ada batas di tenga-tenga air skarang! Supaya air di bagian atas deng air di bagian bawa tapisa.” 7Jadi, Allah bikin batas itu trus kas pisa air jadi dua, satu di atas batas itu, trus satu lagi di bawa batas itu. Suda, de jadi begitu. 8Allah kas nama batas itu ‘langit.’ Trus malam su lewat, pagi muncul lagi. Begitu suda, hari kedua de jadi.

9Habis itu, Allah bilang begini, “Sa mau, smua air yang ada di bawa langit kumpul di satu tempat, trus ada tempat yang kring juga.” Suda, de jadi begitu. 10Allah kas nama tempat kring tu ‘darat.’ Baru tempat yang air ada kumpul tu, Allah kas nama ‘laut.’ Allah liat kalo smua ni su bagus.

11Trus, Allah bilang lagi, “Sa mau tana kas tumbu macam-macam tanaman skarang! Dari tanaman biji sampe pohon-pohon yang ada bua.” Suda, de jadi begitu. 12Langsung tana kas tumbu macam-macam tanaman. Dari tanaman biji sampe pohon-pohon yang ada bua. Allah liat kalo smua ni su bagus. 13Trus malam su lewat, pagi muncul lagi. Begitu suda, hari ketiga de jadi.

14Habis itu, Allah bilang begini, “Sa mau, ada barang trang di langit! Supaya dong kas pisa siang dari malam. Nanti barang trang ini yang kasi tanda untuk musim-musim, hari-hari, deng taun-taun. 15Trus, barang trang di langit ni yang nanti kas trang bumi.” Suda, de jadi begitu. 16Jadi Allah bikin dua barang trang yang besar untuk kas trang bumi. Yang paling besar, de urus siang. Baru yang satu lagi, de urus malam. Allah juga bikin bintang-bintang. 17Allah taru dong smua di langit situ, untuk kas trang ke bumi. 18Juga supaya dong bisa urus siang deng malam, trus untuk kas pisa trang dari glap. Allah liat kalo smua ni su bagus. 19Trus malam su lewat, pagi muncul lagi. Begitu suda, hari keempat de jadi.

20Habis itu, Allah bilang begini, “Sa mau ada banyak yang hidup dalam air skarang! Sa juga mau, ada burung-burung yang terbang di atas bumi, terbang di langit situ.” 21Jadi, Allah bikin binatang-binatang laut yang besar. Allah juga bikin macam-macam binatang lain yang hidup deng jalan-jalan di air. Allah juga bikin macam-macam burung. Allah liat kalo smua ni su bagus.

22Trus Allah kas berkat smua yang De su bikin itu, Allah bilang, “Kas lahir kam pu anana cucu, trus tamba banyak supaya bisa bikin air dalam laut ni penu deng kam. Burung-burung, kam juga tamba banyak!” 23Trus malam su lewat, pagi muncul lagi. Begitu suda, hari kelima de jadi.

24Habis itu, Allah bilang lagi begini, “Sa mau tana kas tumbu macam-macam binatang yang hidup di tana skarang! Binatang piara, binatang yang mrayap, deng macam-macam binatang liar.” Suda, de jadi begitu. 25Begitu suda, Allah bikin macam-macam binatang liar deng macam-macam binatang piara, sama macam-macam binatang yang mrayap. Allah liat kalo smua ni su bagus.

26Trus Allah bilang begini, “Skarang, mari Tong bikin manusia yang sperti Kitong!#1:26 Kitong ‒ Mungkin skali kata ‘Kitong’ ini kas tunjuk ke Allah sendiri deng De pu anana bua yang tinggal di surga, macam malaikat ato makluk lain. Kalo begini, bukan brarti kalo makluk-makluk surga ini dong sama-sama deng Allah yang bikin manusia, tapi dong ikut deng cara yang lain. Sa mau, dong yang pu kuasa untuk atur ikan-ikan smua, burung-burung smua, deng smua binatang piara sama binatang-binatang yang mrayap smua, trus dong yang atur bumi ni smua.”

27Jadi begitu suda, Allah bikin manusia yang sperti Allah sendiri.

Allah bikin laki-laki deng prempuan sperti Allah sendiri.

28Habis itu, Allah kas berkat dong dua begini, “Kas lahir anana deng cucu-cucu trus tamba banyak! Kas penu bumi trus pegang kuasa untuk atur bumi. Atur ikan-ikan smua, burung-burung smua, deng smua binatang yang hidup di darat.”

29Trus Allah bilang lagi, “Liat! Smua dari tanaman biji sampe pohon-pohon yang ada bua, Sa kasi dong smua untuk jadi kam pu makanan. 30Trus untuk smua binatang yang di darat deng smua burung yang di udara deng smua yang mrayap, smua yang hidup, Sa kasi tanaman-tanaman smua untuk jadi dong pu makanan.” Suda, smua itu jadi begitu. 31Habis itu, Allah liat smua yang De su bikin ni, memang su bagus skali. Trus malam su lewat, pagi muncul lagi. Begitu suda, hari keenam de jadi.

Zur Zeit ausgewählt:

Kejadian 1: MPapua

Markierung

Kopieren