Génesis 12
12
Abramta Dios Yaya prometinqan
1Juk junaqmi Abramta Dios Yaya nirqan: <<Markaykita y aylluykikunata dëjaskir rikätsinaqpaq sitiuman aywakuy.#Hech. 7.2-3; Heb. 11.8.
2<<Qampita miraqkunatam alli rikäshaq maytsikaman mirar jatun nación kayänanpaq.
Qamman bendicionnïta churamuptïmi pïmaypis respitayäshunki.
Qam kaynikipam wakin kaq runakunapis bendicionta chaskiyanqa.
3Bendisishuqnikikunatam bendisishaq.
Maldicionäshuqnikikunatam maldicionäshaq.
Qam raykum kay patsachö llapan casta runakunapis bendicionnïta chaskiyanqa>>.#Hech. 3.25; Gál. 3.8.
4 Dios Yaya tsaynö niptinmi sobrinun Lotwan Abram aywakurqan. Haránpita yarqunqan witsaymi Abram kaykarqan qanchis chunka pitsqa (75) watayuqna. 5Canaánman aywakurmi warmin Saraita, sobrinun Lotta y Haránchö tarinqan llapan serviqninkunata pusharqan. Tsaynöllam wätankunata qatikurkur y llapan imaykankunatapis apakurkur aywakurqan.
Canaánman chaykurnam 6Siquem marka cercanyaq aywar Moripa sagrädu encina jachan lädunchö Abram täkurqan. Tsay sitiuchöqa atska cananeo runakunam täkuyarqan. 7Tsaychö täkuykäyaptinmi Dios Yaya yuripurnin Abramta nirqan: <<Qampita miraqkunatam kay entëru jallqakunata y raqrakunata entregashaq>>.#Hech. 7.5.
Tsaychö yuripunqanpitam altarta Abram perqarqan Dios Yayata mañakur adorananpaq.
8Tsaypitanam rupay yarqamunan kaqlä Bet-elpa tsimpan jallqakunaman aywakurqan. Tsaychömi carpan sharkatsir täkurqan. Tsaychöpis juk altarta perqarkurmi Dios Yayata mañakur adorarqan. Täkunqanpita rupay jeqanan kaq läduchömi Bet-el marka karqan. Hai markanam karqan rupay yarqamunan kaq läduchö. 9Tsaypitapis cercaman cercaman witirmi Neguev kinraypa aywarqan.
Egiptuchö Abram täkunqan
10Täkunqan kaqchö alläpa muchuy kaptinmi Egipto nacionman Abram aywakurqan tsaychöna täkunanpaq. 11Egiptuman chaykarnam warmin Saraita nirqan: <<Qamqa kuyakuypaq shumaq warmim kanki. 12Egipto runakunam warmï kanqaykita musyaykur wañuskatsiyämar apakuyäshunki. 13Mana wañutsiyämänanpaq paykunata ninki panï kanqaykillata>>.#Gén. 20.2; 26.7.
14Egiptuman Abram chaykuptinmi tsaychö täkuq runakuna Sarai kuyakuypaq kaptin rikapäyarqan. 15Egiptuchö Faraónpa mandäsiqnin runakunapis Sarai kuyakuypaq kaptinmi rikapäyarqan. Tsaynö kuyakuypaq kanqanta willayaptinmi Faraónqa pushatsirqan palaciunman. 16Saraita palaciuman apanqanpitam Abramta qararqan üshakunata, cabrakunata, wäkakunata, ashnukunata y camëllukunatapis. Tsaynöllam Abrampa serviqninkuna kayänanpaq ollquta warmitapis entregarqan.
17Tsaynö kaykaptinpis Saraita apanqanpitam Faraónta llapan castankunatawan mantsaypaq qeshyaywan Dios Yaya castigarqan. 18Tsaymi Abramta qayaskatsir Faraón nirqan: <<¿Imanirtan kayta ruramashkanki? Sarai warmiki kaykaptin ¿imanirtan willamarqaykitsu? 19¿Imanirtan <panïmi> nimarqayki? Tsaynö nimaptiki warmïpaq apaykarqa talvezchi puñuskïmanpis karqan. Kanan warmikita apakurkur kaypita sas aywakuyay>>.
20Tsaynö nirmi Faraón runankunata mandarqan Egiptupita Abramta qarquyänanpaq. Tsaymi Abram Egiptupita aywakurqan warmintawan imaykankunata apakurkur.
Zur Zeit ausgewählt:
Génesis 12: qxn
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.
