Jn 3

Jesus din se Nikodemus ka lòó ɛ́ bii wel kefɛɛ

1Wel əblee nè lô se lu nɛ ɛ́ toŋte ge Nikodemus, nɛ lu chɛɛ wele Juus, gese nɛ lu wele kenone Falisee. 2Nɛy se lu nɛ̀ ntəke kechii kelee, əb ndu se Jesus è suuy ge: Ndinte, ghɛs ke ge wɛ̀ lu ndinte nɛ tum Feyin bek ge ghɛs ke ge lòó wel jia yɛ nɛɛye əbnəə əbchio əbyúméné wɛ wɛ̀ nɛɛyen vin buu ge Feyine lu ghene wen.

3Jesus suuy se wen ge: Mɛ suuy əbluuy se wɛ̀ ge, lòó wel jia yɛn ɛysake Feyin buu ge ɛ́ kase bii wen kefɛɛ.

4Nikodemus bif ge: Lòó ɛ́ kase bii lɛɛy wel nɛ əb kuymen? Lɛ lòó wel kase lii ɛ no ə wen əblɛɛ é əb bii wen kefɛɛ-a?

5Jesus fise ge: Mɛ suuy əbluuy se wɛ̀ ge lòó wel jia lii se ɛysak nə Feyine buu ge ɛ́ bii wen kefɛɛ nɛ̀ moome, gese nɛ̀ Keyioy ə Feyine. 6Kii dii kɛ biin wel lu kechak, nɛ kɛ biin Keyioy ə Feyin lu Keyioy. 7Ghàà yɛ lu nɛ̀ əbchíò əbyúméné bek ka mɛ kè suuyen ge ɛ́ lu se kase se bii ghɛn ɛ ɛybii ɛyfɛɛ. 8Əbfiɛfe lóó əb yɛ ndu ghaa əb koŋen, nɛ wel yio ka əb chian, dî ke wiy ghaa əb lòòn, kene ghaa əb nduun. Lu ghɛɛ-ghɛɛ ka ke luun se wel əbjim wɛ Keyioy ə Feyine biin kefɛɛ.

9Nikodemus me bif ge: Lòó kii nɛ̂ kine gan ɛ jii ɛykɛ?

10Jesus fise ge: Wɛ̀ lu ndinte ɛytaa Islael, è ghan lɛɛy se jia se yɛ ke əbnəə nɛ̂ vin? 11Mɛ suuy əbluuy se wɛ̀ ge: Ghɛse suuy əbnəə se ghɛn wɛ ghɛs keen gese fekte wɛ ghɛs yɛnenmen, dî nɛ ghɛn beeme wiy əbnəə wɛ ghɛse suuyen. 12Mɛ lɛ suuy əbnəə se ghɛn wɛ luun wɛ̂ ketuu ntiɛ nɛ ghɛn beeme wiy, é ghɛn nɛ̂y beeme lɛɛy wɛ luun wɛ̂ ɛyyio? 13Wel nè bɛɛy ghàà kok se ɛyyio chia kɛn Wanwel wɛ əb nè lòòn ɛ ɛyyio è səəke.

14Ka Moses nè losen yio ɛ fekak ɛ əbliy wɛ ghene nè luun ɛ əbkwak, lu ghɛɛ-ghɛɛ ka ɛ́ náà lose Wanwel, 15ka ghel ghɛ ɛ́ foon ɛytem se wene kiile ɛychii yɛ ɛy jia yî mɛy. 16Feyine nè lô koŋ mbi yin ɛ ŋaŋ è me fo wán ə wen wɛ əbmok ge fo naa ndɛ ɛytem se wen, é əb jia yî lɛy, dî è yɛ ki ɛychii yɛ ɛy jia yî mɛy. 17Feyine nè báà tinse wán ə wen ɛ mbi ge əb gwiy è sak ghel. Əb nè tinse ge əb gwiy è boyse ghel boysen.

18Feyine jia náà sak wel wɛ əb foon ɛytem se wan ə wen nɛ̂ vin, dî nɛ naa ndɛ wɛ əb báà fo ɛytem se wen lu nɛ Feyine sakmen wen bek ge əb báà fo ɛytem se mɛy-mɛy wan ə Feyin. 19Feyine sake mbi yin ɛ jii ghan ge: Ɛybane gwiymen se mbi, dî ghele se koŋe nɛ lu nfiine chia ɛyban bek ge ghene nɛɛy mbee. 20Wel wɛ əb nɛɛyen mbee bane ɛyban, nɛ̀ lòó əb jia fəy è gwiy ɛ ɛyban bek ge əb báà se koŋe ge ghele yɛ yɛne əbnəə əbbee wɛ əb nɛɛyen. 21Dî nɛ wel wɛ əb nɛɛyen əbnəə wɛ̂ əbluuye, fəy è gwiy ɛ ɛyban ka ɛybane yɛ din se ghele ge əb nɛɛy əbnəə nɛ lu wɛ wɛ̂ Feyine.

Ɛyfɛle Jesus liɛ kelik ɛyfɛl nə Joon Nfoo Moo

22Jesus ghene ghon-ɛyfɛl nə wene nɛy me ndu se ɛybee ɛylake Judea ɛylee, ghene ghene se chiite fo nɛ əb foo moo se ghele. 23Joon se foo sɛy moo ɛ ntɛke Aenon nɛ ɛy baksene se ntɛke Salim, bek ge jiose nè lu fo se ɛydio. Ghele se gwiye se wen nɛ̀ əb foo moo se ghene. 24Nè lu əbliy fo nɛ ɛ́ bɛɛy ghàà vii Joon se nchak.

25Ghon-ɛyfɛl nə Joon se beke mbek ghene ghe wele Juus əblee kum kensuu. 26Ghon-ɛyfɛl nə Joone ndu se wen è suuy ge: Ndinte, wɛ̀ lɛ bo kuume wel wɛ ghɛne wen nè luun ɛ njine jio Joldan, wɛ̀ se suŋnene kum wen-a? Əb vii di ka əb se fóon moo, nɛ wel əbjim se nduu kɛn nɛ lu se wen.

27Joon fise ge: Lòó wel jia yɛ ki kefaa buu ge fo Feyin se wen. 28Ghɛn se ghɛne ngeŋse lu ghel ɛyshiɛ ge mɛ nè lô suuy ge mɛ báà se lu Vi wɛ Feyine nè Yiosen, dî nɛ Feyine nè tum mɛ ge mɛ gwiy se mbiy nɛ əb geese yɛ gwiy. 29Wel wɛ əb kiilen jen lu lum jen ten, dî nɛ sun lum jen wɛ əb teem ɛ wen ɛybee lòó əb yɛ saŋle əbliy wɛ əb yion giɛ ə wen. Mɛ loote saŋle bek kii nɛ̂ kine. 30Kenəə ə wel nɛ̂ vi lu se yɛ nduu kɛn ɛ mbiy, nɛ kome fiile ɛybam.

Wel wɛ əb lòòn ɛ ɛyyio lu ɛ ketuu se əbjime

31Vi di wɛ əb lòòn ɛ ɛyyio lu ɛ ketuu nə əbjime, nɛ vi di wɛ əb lòòn ɛ ketuu ntiɛ lu wele ntiɛ, gese suŋnen nɛ lu əbnəə wɛ̂ ketuu ntiɛ. Vi di wɛ əb lòòn ɛ ɛyyio lu ketuu se əbjime. 32Əb fekte kenəə nɛ lu kɛ əb yɛnen è gese yio, dî nɛ wel beeme wiy kenəə kɛ əb fekten. 33Dî nɛ naa ndɛ fo ɛytem se kenəə kɛ əb fekten fene əb bééme nɛ̀ əbluuye ge kii dii kɛ Feyine nɛɛyen lu əbluuy. 34Ke lu dî bek ge vi di wɛ Feyine nè tumen fekte nɛ lu giɛse Feyin. Feyine foo Keyioy ə wen se wen, bɛɛse wiy kefaa. 35Baye koŋe wán ə wen, è me vii əbnəə əbjim ɛ wene keghoo. 36Naa ndɛ wɛ əb foon ɛytem se wan vin yî yɛ ki ɛychii yɛ ɛy jia yî mɛy, dî nɛ naa ndɛ wɛ əb tunsen wan vine jia yî yɛ ki ɛychii, è jia yî boy se ɛyyafse ɛytem nə Feyine.

Zur Zeit ausgewählt:

Jn 3: oku

Markierung

Kopieren