Matana Enjil 12
12
Bag. 12.
1Man ugros samtena ugros esum. Yesu ilena bareged nogbusum. Tenna hiranigon origbusan. Tir wide ilena sorni werigi kedika jigdos akalsan. 2Farisichi nalosir Yesugi wetirsan: „Ahan enna hirani aawran samter hilemeningi.“ 3Ter widegirtidirsum: „Iri geryekomnun Dawud awsingi, origbusinna wattigi, wide tekkodon daligon? 4Mine artina kar to jurgi kal gendibulgi kalsan, tekki hiletirmenilgi wala tekkodon daligi kallangi, fegiri agudeg anmenkin. 5Walagon geryekomnun sheriar, mine fegiri jamagi samter anejiserangi, won tiri sewachi erangon? 6Ama irgi wetidirrin, indo dan jamandogor dul wer. 7Ir on weregi fehmekokrun: ‚Ai rahmagi awerisrin gojirdogor,’ ir sewachin dogor bihugmekomnun. 8Zolna tod samten tirti teran.“
9Teddoton talosirgi tinna jamar tosum. 10Teddogon zol i sowibulkol wer dasum. Tir wide tekki isigsan: „Gengirkane samten tur hilena?“ Tekki shekeru an in weregi wesan. 11Ter tirgi wetidirsum: „Nina zol iddeton, doirkol wer, tenna doir on samten ugrosir digirkin dolin tu werro, lehdayen asokosmen? 12Won zol saï kottekked doirdogor genmen? Serena awar hilen samten tur.“ 13Ter wide zolgi wetirsum: „Enna igi farte!“ 14Ter fartengad owitti nawre adelansum. Farisichi bolosirgi urki tendogor digirsan, tekki beru an.
15Yesu iyirosirgi mandoton nogossum. Jemachi digrichi weri tekki tebaesan. Tekkon malegi gengirirsum. 16Ter wide weseirsum tekki shehremenw an. 17Ingon were Ishayaged webulgi timer an: 18„Ahan anna tod azeb, ai tekki barsim. Anna dolida, annewerti tekked guresin. Aigon annewertigi tendogor bikujurrin. Tekkon umachigi alegi bikurkidirin. Ter bikarsigmunum, wala bilagajemnum. 19Wala zol wer tenna hisigi darbir bigijirmunum. Agena sha fachibulgi barbirmunum. 20Wala ul gusuttibulgi bibemnum, ale eskirardogor belinbokon. 21Tenn erirgon umachina birgar bikujtakkin.“
22Tekki wide attatirsan doshanbul dugranbul wide mumud wekki. Ter wide gengrosingad mumud bainsum wide nalsum.
23Jema ajibe wesum: „In aba Dawudna tod termunu?“ 24Ama Farisichi gijred wesan: „In newertichi milichigi aosin Balazabul, shetanina dulged.“
25Yesu tinna ergir dalgi iyiros wide wetidirsum: „Mulki nutin tennewertin dogor bagbul bikewidmunum. Wide medine nutin wala ka wer, tennewertin dogor bagbul, bikewidmunum. 26Shetan on shetangi aoskin, ter tennewertin dogor bag tebosum. Won mine tenna memlaka bitebin? 27Won ai on Balazabulged shetanigi aoskirin, inna toni niged aosran? Inin joro tiri irgi bigadyekandan. 28Won ai on artina newertiged shetanigi aoskirin, artina mulki irg abidi bidasum! 29Wala mine wer eskergi gudrakol werna kar magiry an biton, ter on koyalgi gudrakolgi ketifosmenkin? Manin aharro kagi bimagin.“
30„Aigodonmenil aig abidum. Aigodon jamegirmeml ter agulin. 31Inin joro irgi wetidirrin, zenbi wer nutin wide jedifad wer nutin zoligi bigafretakkitidirin. Ama newertin dogor jedifad kidir zoligi bigafretakkitidirkanmunum. 32Wer on were wekki zolna toddogor wekin, tekki bigafretakkitirin. Ama wer on newerti gadisebuldogor wekin, kidir bigafirtakkitirmunum, wala in alamir, wala bitallo.“
33„Jowi adel, tenna betti adelum. Jowi uskon, tenna betti usum. Mine bettirton jowigi aïyirran. 34Wo wisi dugurna affichi, mine iri usi erungon eskergi adelgi biwerua? Ana eyegrarroton teran agil abainin. 35Tenna hazin adelloton teran ogij adel haja adelgi atolosin. Tenna hazin usirton teran ogij us haja uski atolosin. 36Ama ai irgi awetidirrin, were us male, tekked zoli abaindan, tekked aharro bihasibtakkikandan dinadna ugrosir. 37Mine er enna wereged biberirekanin, wide enna weregedgon bidinetakkikanin.“
38Teri wattigi abajilirton weri wide Farisichirton rude wesan: „Wo tirti, ar ennaiton aya wekki awerisrun.“ 39Ter rude wetidirsum: „Wo jil mili wide soros, aya wekki awerisna? Aya wekkon bitirtakkitirmunum, Yunan nebina ayag anmenkin. 40Mine Yunan karen tur ugros toskigi wide ugu toskigi dabusin nawre, ikkegon biturubkanin zolna todted. Aridna tur bikewdin ugros toskigi wide ugu toskigi. 41Ogji Niniwandichi dinadna ugroski bimbelkandan in jilg abidi, wide tirgi bidinekandan. Mine tir tuberangad Yunanna beshiradted. Elekengon ahan Yunandogor dul wer inna misichin togor dan. 42Dinadna ugrosir ungona en or bimbelkanin in jilg abidi, wide tirgi bidinekanin. Mine in en or esheyin kelloton takosum, Solumna hegmagi gijirri an. Elekengon ahan inna misichin togor Solumdogor dul wekki.“
43„Newerti nijis wer id werroton boloskin, agari sowodiged nog taka weleserarki akashin. Ama weleserarki aelmunum. 44Ter wide tennewertir awen: ‚Anna ka ai belsindotongir biwiderin.’ Wide ter targi sud engon, kalibungon, sayidibungongi eled, 45mani wattigi ju, newerti kolodti, tendogor milichi werigi, tekkodon aredir kan tur toros, teddo akewidran. Man idna ahar owoldogor bikosanin. Ikke biturbin in jil miligodon.“
46Jemachigodon elgon abainingon tinengon wide timbesigon bochiged uwetirsan, tekkodon baindu an. 47Wer tekki wetirsum: „Ahan inengon wide imbesigon bochiged tebos ekkodon bainarki awerisran.“ 48Ter rude wetirsum: „Ni terre indi? Wide nigu terre ambesi?“ 49Ter wide tenna igi tenna hiranig abidi midergi wesum: „Ahan indigon wide ambesigon. 50Mine abo simechir dal awersingi awil, ter ambes teran, anisi teran, wide indi teran.“
Zur Zeit ausgewählt:
Matana Enjil 12: XNZ1912
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Published by the British and Foreign Bible Society in 1912.
