Ester 9
9
To-Yahudi mangngatta la nnewa ewana
9:1-19
1Katampakanna, nadete'mi to tanggala' sangpulo tallu bulan sangpulo dua disanga bulan Adar, iamo to allo dipattantu la dinii mpugaukki to parentana raja lako bangsa Yahudi. Iamo joo allo natajanmo ewana bangsa Yahudi, la nanii ngkuasaii joo bangsa. Apa sibalikanna to-Yahudira ntaloii to ewana. 2Sirempunni to to-Yahudi jio simesa'-mesa' kota lan sininna propinsi, na mesa' penawa narari ngasanni to togaja' akkattana. Sininna bangsa la umbo-umbo nanii menjaji malaja' lako to-Yahudi, aranni moi mesa' tau te'da nabarani nnewai. 3Sibalikanna sininna to tomajao pangka'na lan propinsi, susinna gubernur, bupati sola to kapala laen ntulung to-Yahudi, nasaba' malaja'i lako Mordekhai. 4Naissen ngasan tau lan karajaan kumua gaja dikalaja' to Mordekhai na samakuasa-kuasanna too lan istana. 5Susimi joo to to-Yahudi ntaloi ewana, nararii samosona napatei mpake pa'dang. 6Lan manda benteng Susan na lima ratuh tau napatei to-Yahudi. 7-10Ia joo tomate lima ratuh, den sangpulo anakkana Haman muane, ba'tu ampona Hamedata. (Ia to Haman ewa la'da'na to-Yahudi). Ia to anakkana Haman dipatei disanga Parsandata, Dalfon, Aspata, Porata, Adalya, Aridata, Parmasta, Arisai, Aridai na Waizata. Apa ia to to-Yahudi, te'da ia namangrampa. 11Allo ia bang unamo joo, naparatui tau lako raja to kumua budannamo ia tau dipatei jio benteng Susan. 12Nakua raja lako Datu Ester, “Jio bang una benteng Susan namangkami to to-Yahudi mpatei tau lima ratuh solamo to anakkana Haman sangpulo. Tangdipaumo to lako propinsi! Tantu la'bih buda tau to napatei jio. Apapira to mupeta'da tee too? Pau bangmi, nang la kubenko!” 13Mebalii Ester nakua, “Ia ke tapuelohhi, ia to to-Yahudi to torro inde' kota Susan ke wa'dingngi nadieloranpa masawa mpugauk pole'pi, to mangka napugauk tee allo. Na ia to batang rabukkuna anakkana Haman, ditoke' todai jao ariri tokesan.” 14Mangkai joo too napangparentanni raja nadipugauk to peta'danna Datu Ester, dipasun to sura' parenta lako kota Susan, na ditoke' to sangpulo batang rabukkuna anakkana Haman. 15Jaji ia tonna tanggala' sangpulo a'pa' bulan Adar sirempun pole'i to to-Yahudi na mbunoi pole' tau talluratuhpa jio kota Susan. Na te'da bang una namangrampa. 16Sirempun toomi to to-Yahudi to torro lan propinsi, namangngewa. Ntaloi ewana napatei pitungpulo lima sa'bu to tongkaba'cii. Apa tatta'i te'da namangrampa. 17Ia joo jaji tonna tanggala' sangpulo tallu bulan Adar. Ia tonna masawannamo tanggala' sangpulo a'pa' te'damo nampatei tau, apa mangmaroah-roahmira masannang mario.
18-19Iamo joo na ia to to-Yahudi torro jio kampong, tanggala' sangpulo a'pa' bulan Adar nanii mpengngingarannii susi allo mala'bih ba'tu allo mangmaroah-roah, sisulle siben kande. Apa ia to to-Yahudi torro jio kota Susan, tanggala' sangpulo lima ia to nanii mangmaroah-roah, nasaba' tanggala' sangpulo tallu sola sangpulo a'pa' nanii mbunoi ewana, nasoro' tonna tanggala' sangpulo lima.
Pangmaroasan Purim
9:20-23
20Mangkai joo too, nauki' ngasanmi Mordekhai to sininna apa mangka jaji, nakiringan ngasanni sura' to to-Yahudi lan sininna kaparentanna Raja Ahasweros, la ia to mambelanna, la ia to mandoppi'na. 21Ia to diuki' lan joo sura', iamo to mpakala'bihhi to allo tanggala' sangpulo a'pa' sola tanggala' sangpulo lima bulan Adar ke taun oi. 22Nasaba' iamo joo duang allo nanii mangka ntaloi ewana, aranni ia to kamassean penawanna na pa'dik penawanna messullean namenjaji kamarioan na kamasannangan. Iamo joo ia to to-Yahudi la tatta' mpakala'bihhi joo duang allo namangmaroah-roah kumande-mande nasisulle siben kande, na massudakka lako tokaasi-asi. 23Gaja naturu' to-Yahudi joo parentana Mordekhai, susimi joo na ia joo allo mangka napakala'bih menjaji ada' to-Yahudi, natuli mpugaukki ke taun oi.
Bondi'na curita
9:24-32
24Ia to Haman anakkana Hamedata bati'na Agag, ewa la'da'na to-Yahudi, mangkamo mangloterei to mpattantui to allo la dinii ncappu' dipatei to to-Yahudi. (Lan basa Persia mangloterei susi joo disanga “purim”.) 25Apa mangngoloi Ester lako raja napangparentanni raja nadiuki' to sura' anna te'da najaji to akkatta gaja'na Haman lako to-Yahudi, kannora ia na polei aranni ditoke' jao ariri tokesan sola anakkana. 26Jaji ia joo duang allo, den pangramean mala'bih disangai Purim situru' joo kada “purim” lan basa Persia. Ia to sura'na Mordekhai, na sininna to apa mangka naperasai to-Yahudi 27napusaba'i nampadenan mesa' atoran kalena sola bati'na na sininna to tomadoang menjaji to-Yahudi. Situru' joo atoran ia ke taun oi, nang la napakala'bih joo duang allo to mangkamo napattantu Mordekhai. 28Dipattantu too to kumua nang la tarruh-tarruh joo allo Purim napakala'bih simesa'-mesa' repok to-Yahudi jio mai mangpapa'-papa' bati' jio simesa'-mesa' kota lan sininna propinsi.
29Datu Ester, anakkana Abihail, nnuki' sura' sola Mordekhai napemawatangngii joo bungahna sura' to mangka nauki' Mordekhai mpaui joo allo Purim. 30Na ia to pangpalembahna joo sura' dikiringan sininna to-Yahudi lako saratuh duangpulo pitu propinsi lan kaparentanna Raja Ahasweros. Diuki'i lan sura' anna salama' natatta' matappa' to-Yahudi. 31Dipattantui na ia to to-Yahudi sola bati'na la mpakala'bihhi joo allo Purim ke nadete' omi wattunna ke taun oi. Mangka napamanassa to-Yahudi ba'tu pira-pira allo mattantu to nanii puasa sola mbating mpengngingaranni tonna masussa. Na ia tee wattu la mangpamula sininna to-Yahudi mpakala'bih tooi to allo Purim. Susimi joo to mangka napangparentan Mordekhai to-Yahudi sola Datu Ester. 32Susimi joo parentana Datu Ester to mpattantui to atoran mpengngingaranni Purim nadiuki' lan Sura' Lompo.
Zur Zeit ausgewählt:
Ester 9: mvpAD
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Wycliffe Bible Translators, Inc. All rights reserved.