Ester 6
6
Mordekhai nataratte' raja
6:1-14
1Ia joo bongi te'da lalo nakullei mamma' matanna raja. Iamo joo na massua nadialan sura' to dinii nnuki' sininna to apa jaji lan karajaan, nadibacan. 2Den diuki' lan joo sura', tonna mpaui Mordekhai lako raja kumua, ia topangjaga babangan istana disanga Bigtan sola Teresh mangngatta la mpatei raja. 3Mekutanai raja nakua, “Apamora to mangka dibalaranni Mordekhai?” Mebalii to todisua nakua, “Te'da bangpa ia nadibalah.” 4Na mekutana omi raja nakua, “Indara joo tau jio rante istana?” Sirumpai mentama rante istana Haman la meta'da lako raja na ditoke' Mordekhai jao ariri tokesan to mangka nagaraga. 5Mebalii to todisua nakua, “Saleanni rante istana Haman, madoangngi la mangngolo lako Kita'.” Nakua raja, “Suai namentama jio mai.” 6Ia tonna mentamamo Haman nakuamo raja, “Den tau la kuangga' majao. Apara la kupugauk lako kalena?” Nasangai Haman kumua kalena, nakua lan penawanna, “Indara joo la naangga' raja? Nang la aku'mo!” 7-8Iamo joo namebali Haman nakua, “Melo ke dipapakeanni pakean kamala'biran to biasa napake raja. Nadipasadian too nyarang to biasa nasakei raja na diballo-balloi talikka' bulawan. 9La den mesa' tomapangka' jio mai torroan tomatonggo la mpapakei pakean joo to la nataratte' raja. Dipupessakei jao nyarang to mangka diballo-balloi, nadisolan dipannola jio lalan maroah. Ia joo tomapangka' ssolanni, la joloi lako lumingka nametamba-tamba kumua, ‘Susimi tee to tau ke naangga' majaoi raja!’ ” 10Sitarruhna mangkadai raja lako Haman nakua, “Madoi'ko nnalai joo pakean sola nyarang, mupugaukki lako Mordekhai susi to mupau nena'. Mordekhai, iamo to to-Yahudi tuli cumadokko jio babangan istana. Danggi' lalo naden tangmupugauk na ia to mangkanna mupau.” 11Naalami Haman to pakean sola nyarang, napapakeii pakean to Mordekhai. Ia tonna messakemo Mordekhai jao nyarang, nasolanmi Haman napannola jioi lalan maroah, najolo lako metamba-tamba nakua, “Kitai, susimi tee to tau naangga' majao raja!”
12Mangkai joo too, polemi Mordekhai lako babangan istana. Apa ia joo Haman naparri-parri pole lako bolana. Cia'mi nakita tau, nasaba' gaja siri'i, iamo joo nasamboii to lindona. 13Nacuritanni bainena sola soba'na to apa mangka naperasai. Mangkai joo too, ia to bainena sola to soba'na Haman to tomapahang, mangkada nakua, “Mangpamulamoko natalo Mordekhai, te'damo mukullei la nnewai, nasaba' to-Yahudi ia. Nang nataloimoko.” 14Sipangkada-kada unapi Haman sola solana, naratu to tonasua raja parri-parri la ssolan Haman lako kasidurukan to napaden Datu Ester.
Zur Zeit ausgewählt:
Ester 6: mvpAD
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Wycliffe Bible Translators, Inc. All rights reserved.