Genesis 13
13
Abraham Lot ratherr amentant-atherr alheyel
1Abram Sarai atherr alhek apmer arlpaw Canaan-ampeny-warl, Lot ra ikwer-atherr-angkwarr alhek arrpemarl. 2Abram ampwal akngerr-akert alhek, pwelek-rnem-then, yep-yep-rnem-then, nanikwet-rnem-then, thilp-then, gold-then.
3Abram ra apmer arrpanenhel aneynenh, apmer arlpaw antekerr-ampeny-itwek. Ayerrer-anem ra alpek, Bethel tawen-warl. Kalikw-anem rap ampepek artey-alhek, apmer ikwerenh. Ayntey-alhek tawen Ai-they ampepel, Bethel tawen-they angath. 4Apey-alpek antekerr-they, ra aynteynek apwert ilperr-ilperr-akert ikwer-itwel, irrkatyel arrpemarl. Ra kalikw akely-anem artek. Ra kwenirremel Akngeyek-anem angkek inkwerelhemel.
5Lot-el akngerr arrpemarl atnyenek, yep-yep-rnem-then, nanikwet-rnem-then, pwelek-rnem-then, warrkenh ikwerenh-rnem-then. 6-7Apmeran akely inngarl ayntenh atnwenth-rnem-then ingwerek-rnem-then. Atherrkarl atnwenth ingkerrenhel arlkwenh. Abram-kenh warrkenh-rnem-then Lot-kenh warrkenh-rnem-then atnwenth arntarnt-arey-angker-rnem rernem apmer-they ahel-anem ilterrenh.
8Abram angkek Lot-ek, “Aylakan mwerrant-atherrarl anetyek. Aylekakenh-rneman mwerrant-arey arrpemarl anetyek, ilterrey-angenh. Aylak arrer nthakenh ilterrey-angenh. Artwa aylekakenh ilterrey-angenh anetyek. 9Ahern arlpawel nhan! Aylak amentant atherr alhey. Ngarl altwerl alhem-kety, ayengan akngerrakwarl alhey. Ngarl akngerrakw alhem, ayeng altwerlarl alhey.”
10Ikwer-they, Lot alhek arrwekel-antey. Kwaty akngerr ra arey-alhek Jordan Ilpay-itwek. Aleth-antey ra Ilpay atherrkeny aynteynenh ikwer-angkwarr apmer Zoar-ek-atwety. 11Jordan Ilpay ingkerrenh ikwer-tangkwel rlwanek akngerrakw-ampeny. Rarl akngerrakw alhek, Abram amentant atherr ratherr irrek, arlperrtyirremel. 12-13Abram anek apmer Canaan-ampenyel. Lot alhek tawen Sodom arrerenty, wak-rnem artey-alhek, artwa apmwernem arrerenty-itwek, rernem INGKARTek irrpelthirrenh. 14INGKARTel Abram renh ilek, “Apmer ingkerrenh-angkwarr ara! 15Atha ngenh anthey, nga intem-antey anayntetyek, apmer arrpanenh ilenhek, ngkwenh-rnem-akert. 16Atha ngkwenh-rnem akngerram-akngerrileyenh, arrantherr akngerr-anem ahern nhel anetyek. Ngkwenh-rnem akngerrirreyenh ahern akely akngerr aynteyel-apeny. 17Nga angkepelarreng apmer nhel alhaynta, atharl ngenh anthetyek.”
18Wak kalikw akely-rnem lhelherl-alhek akngeynemel apmer arwerl arnenty-akert ikwer-itwek aney-alhek apmer Mamre-arrangarr, Hebron-itwek. Apmer ikwer-itwek apwert ilperr-ilperr tyenkerrek-arelh ra arrernek, Akngey ikwer inkwerelhemel kwenirrek.
Zur Zeit ausgewählt:
Genesis 13: aly
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
