ᒐᓂᓯᔅ 28
28
1ᐊᑯ ᐊᐃᓯᒃ ᐊᑎᓴᐛᑦ ᐊᐛᔪᐛ ᒐ ᐎᑎᒧᐛᐎᔨᒋ ᒐᒋ ᓂᑐᐛᐱᒥᑯᑦ ᒐᑭᐸ᙮ ᐃᔅᐱ ᐸᒐᔨᒋ ᒐᑭᐸ ᐅᐱᒍᐎᔭᓂᒋᐛᐱᒡ᙮ ᐊᐃᓯᒃ ᒋ ᐊᑎᒥᔅᑯᐛᐤ ᑭᔭ ᒂ ᐃᑕᑦ, “ᐊᑲᐎᔭ ᒋᑭ ᐎᒋᒪᐤ ᐃᔎᐤ ᑲᐃᓇᓐ ᐊᔅᒋᒡ ᐅᒡ᙮ 2ᒥᔅᑯᒡ ᐸᑕᓐ ᐊᕋᒻ ᐃᑐᑕ, ᐸᑎᐅᓪ ᒋᒧᓱᒻ ᐅᑦ ᐃᑕᐅᓂᒡ ᑭᔭ ᐸᐃᒄ ᐊᓐᑕ ᐅᔅᒋᓂᒋᔎᔅ ᒐ ᐎᒋᒥᑦ, ᐸᐃᒄ ᐅᑕᓂᓴ ᓚᐸᓐ ᒍᐧᑯᒥᔅ᙮” 3ᒂ ᐃᑕᑦ ᐊᐃᓯᒃ, “ᑭᒪ ᒋᓴᒪᓂᑐᐤ ᐊᓐ ᒥᓯᐛ ᐊᓯ ᓱᐧᑲᑎᓯᑦ, ᐃᑐᑕᐧᒃ ᒐᒋ ᐃᔅᐱᔪᑦ ᒥᔪ ᒐᒂᓂᔪᐤ᙮ ᑭᒪ ᒥᒐᑦ ᐊᐛᓴ ᒥᔨᔅᒃ ᑭᔭ ᒥᒐᑎᒡ ᒋᑦ ᐊᓂᔅᑯᑕᐸᓐᒡ ᐊᑯ ᒪᒃ ᒐ ᒥᒐᑐᔅᑲᓇᓯᒡ᙮ 4ᑭᒪ ᒋᓴᒪᓂᑐᐤ ᒥᔨᔅᒃ ᑭᔭ ᒋᑦ ᐊᓂᔅᑯᑕᐸᓇ ᐊᓂᔭ ᐊᔅᒋᔪᐤ ᒋᒧᓱᒪ ᐊᑉᕋᐊᒪ ᑲ ᐊᓱᑎᒧᐛᑦ᙮ ᐊᑯ ᒪᒃ ᒐ ᑎᐸᔨᑎᒥᓐ ᐅ ᐊᔅᒋᔾ ᐊᓐᑕ ᐊᓄᒡ ᐛᒋᔨᓐ ᒧᔭᒻ ᒪᓐᑕᐤ᙮” 5ᑲᒋ ᐛᒋᔭᒪᑦ ᐊᐃᓯᒃ, ᐸᑕᓐ ᐊᕋᒻ ᒋ ᐃᑎᓴᐛᐤ ᒐᑭᐸ, ᐊᓐᑕ ᓚᐸᓇ ᐎᒋᔨᒡ ᐅᑲᐎᔭ ᐅᔅᑕᓯᔪᐛ᙮ ᐸᑎᐅᓚ ᒋ ᐅᑯᓯᑕᑯᐤ ᓚᐸᓐ, ᐊᕋᒻ ᐃᔪᐤ ᑲ ᐃᓯᓂᐧᑲᑕᑭᓄᐅᑦ ᐸᐃᒄ ᐃᔪᐤ᙮
ᐃᓴᐅ ᐎᒋᒥᒪᐤ ᐃᔅᒪᐃᓚ ᐅᑕᓂᓯᔪᐛ
6ᐃᓴᐅ ᒋ ᐎᑎᒪᑯ ᐊᐛᔪᐛ ᒐᒂᓂᔪᐤ ᐊᐃᓯᒃ ᑲ ᐃᑕᑦ ᒐᑭᐸ᙮ ᐊᐅᑯᔪᐤ ᐅᔭ ᑲ ᐅᒋ ᒋᔅᒐᔨᑕᐧᒃ ᐅᑕᐎᔭ ᐊᑲ ᐅᒋ ᓂᑐᐛᔨᒪᔨᒋ ᒐᑭᐸ ᒐᒋ ᐎᒋᒪᔨᒋ ᑲᐃᓇᓐ ᐃᔎᐛ ᒧᔭᒻ ᐎᔾ ᑲ ᑐᑕᐧᒃ᙮ 7ᒋ ᐸᑎᒻ ᐃᔭᐱᒡ ᒐᑭᐸ ᑲ ᑕᑈᑐᐛᔨᒋ ᐅᓂᒋᐃᑯᔪᐛ ᑭᔭ ᓴᔅ ᑲ ᐃᑐᑕᔨᒋ ᐊᓐᑕ ᐸᑕᓐ ᐊᕋᒻ᙮ 8ᒂ ᓂᔅᑐᑕᑎᓱᑦ ᐃᓴᐅ ᐊᓂᔭ ᐅᑕᐎᔭ ᐊᐃᓯᑲ ᐊᑲ ᒥᔽᔨᑕᔨᒋ ᑲᐃᓇᓐ ᐃᔎᐛ 9ᐊᑯ ᓇᑐᐛᐱᒪᑦ ᐃᔅᒪᐃᓚ ᐊᑉᕋᐊᒪ ᐅᑯᓯᔪᐛ ᑭᔭ ᓇᐳᐅᐛᑦ ᐅᑕᓂᓯᔪᐛ ᒪᐊᓚᑕ, ᐊᓂᔭ ᓇᐸᐃᐅᑕ ᐅᓯᒥᔪᐛ᙮
ᒐᑭᑉ ᑲ ᐳᐛᒧᑦ ᐊᓐᑕ ᐸᑕᓪ
Genesis 28.10-19a (Proper-11 Year A)
10ᐃᔅᐱ ᒐᑭᑉ ᑲ ᓂᑭᑕᐧᒃ ᐱᕐ-ᓯᐸ, ᐦᐊᕋᓐ ᐃᑕᒐ ᒋ ᐃᑐᑕᐤ᙮ 11ᒋ ᐅᑎᑐᒻ ᐸᐃᒄ ᐃᑕᐅᓂᔪᐤ ᑭᔭ ᒂ ᑕᑦ ᐊᓐᑕ ᑕᐱᔅᑲᔨᒡ, ᐛᔅ ᒋ ᐸᒋᓯᒧᔪᐛ ᐱᓯᒺ᙮ ᒋ ᐅᑎᓇᐤ ᐊᓐᑕ ᐸᐃᒄ ᐊᓯᓂᔭ, ᒋ ᐊᔭᐤ ᒪᒃ ᒐᒋ ᐊᔎᓯᒧᑦ᙮ ᐊᑯᑕ ᒪᒃ ᓂᐊᐃᓯᐧᒃ ᒐᒋ ᓂᐸᑦ᙮ 12ᒋ ᐳᐛᒧᐤ, ᒋ ᐛᐸᑎᒻ ᑕᑕᐧᑯᔅᑲᓇᓇ ᐊ ᐃᔨᑭᔅᑲᔨᒋ ᐊᔅᒋᒡ ᐅᒋ ᐃᔅᐱᒥᒡ ᒋᒋᒋᓯᑯᒡ ᐃᔅ ᐊᑎᒧᐃᒡ᙮ ᒋ ᐛᐱᒪᐤ ᒋᓴᒪᓂᑐᐛ ᐅᑦ ᐊᓐᒋᓂᒥᔪᐛ ᐊ ᓂᑎᒋᐛᔨᒋ ᑭᔭ ᐊ ᓴᑭᒋᐛᔨᒋ ᐊᓐᑕ ᑕᑕᑯᔅᑲᓇᓂᒡ᙮ 13ᑎᐸᔨᒋᒐᓱᐤ ᐃᔅᐱᒥᒡ ᒋ ᓂᐳᐤ ᑭᔭ ᒋ ᐃᑕᐤ, “ᓂᔾ ᐊᐅᒄ ᑎᐸᔨᒋᒐᓱᐤ, ᒍᑕᐎᔾ ᐊᑉᕋᐊᒻ ᐅᒋᓴᒪᓂᑐᒪ ᑭᔭ ᐊᐃᓯᒃ ᐅᒋᓴᒪᓂᑐᒪ, ᒋᑭ ᒥᔨᑎᓐ ᐅ ᐊᔅᒋᔾ ᐊᓐᑕ ᐸᒥᓯᓂᔨᓐ, ᒋᔾ ᒋᑭ ᑎᐱᔨᐛᐅᓯᓐ ᑭᔭ ᒋᑦ ᐊᓂᔅᑯᑕᐸᓐᒡ᙮ 14ᓂᑭ ᒥᒐᑐᐛᐅᒡ ᒋᑦ ᐊᓂᔅᑯᑕᐸᓐᒡ ᒐ ᐊᑲ ᐊᐛᓐ ᒋᒋᒪᑦ, ᒋᑭ ᒥᓯᑕᐱᔪᐅᒡ ᐊᑎᒪᐱᓯᒧᒡ ᑭᔭ ᐛᐱᓄᑕᒡ ᐃᔅ, ᒋᐛᑎᓄᒡ ᑭᔭ ᐱᓯᒧᑕᒡ ᐃᔅ᙮ ᒋᔾ ᐅᒋ ᑭᔭ ᒋᑦ ᐊᓂᔅᑯᑕᐸᓐᒡ ᓂᑭ ᒥᔪᑐᑐᐛᐅᒡ ᒥᓯᐛ ᐊ ᑕᑐᔅᑲᓇᓯᒡ ᐅᑕ ᐊᔅᒋᒡ᙮ 15ᐛᐸᑕ ᓂᑦ ᐊᓱᑎᒪᒐᓐ ᒐ ᐎᒐᐅᑕᓐ ᑭᔭ ᒐ ᑭᓄᐛᔨᒥᑕᓐ ᒥᒄ ᐊᓐᑕ ᐊ ᐃᑐᑕᔨᓐ ᑭᔭ ᑲᐤ ᒋᑭ ᐸᓱᐅᑎᓐ ᐅᑕ ᐊᔅᒋᒡ᙮ ᓇᒪ ᒋᑭ ᒋ ᓂᑭᑎᑎᓐ ᐸᑎᒪ ᒋ ᐃᑐᑎᒪᓇ ᒥᓯᐛ ᐊᓐ ᑲ ᐊᓱᑎᒪᑕᓐ᙮”
16ᒋ ᐸᑯᐱᔪᐤ ᒐᑭᑉ ᑭᔭ ᒂ ᐃᔅᒋᔄᑦ, “ᑕᐤ ᐅᑕ ᑎᐸᔨᒋᒐᓱᐤ᙮ ᑕᐤ ᐅᑕ ᐃᑕᐅᓂᒡ, ᑭᔭ ᓇᒪ ᓂ ᐅᒋ ᒋᔅᒐᔨᑕᓐ᙮” 17ᒋ ᑯᔅᑕᒍᐤ ᑭᔭ ᒂ ᐃᔅᒋᔄᑦ, “ᒋᒋᐛ ᓂ ᑯᔅᑕᒋᓐ ᐊ ᑕᔭᓐ ᐅᑕ ᐃᑕᐅᓂᒡ, ᐊᐎᒐ ᐅᔭ ᐎᒡ ᒋᓴᒪᓂᑐᐤ ᑭᔭ ᐊᐅᑯᐤ ᒋᒋᒋᓯᒄ ᐃᔎᑕᒻ᙮”
18ᐎᐱᒡ ᒐᒋᓴᐸ ᒋ ᐅᓂᔪᐤ ᒐᑭᑉ, ᒋ ᐅᑎᓇᐤ ᐊᓂᔭ ᐊᓯᓂᔭ ᑲᔎᓯᒧᑦ ᑭᔭ ᒂᒋ ᒥᔭᑦ ᒐᒋ ᒋᔅᒋᓄᐛᒋᑕᑦ ᒧᔭᒻ ᑲ ᓄᑯᓯᔅᑕᑯᑦ ᒋᓴᒪᓂᑐᐛ ᐊᓐᑕ ᐃᑕᐅᓂᒡ, ᒂ ᐳᓇᐧᒃ ᐱᒥᔪᐤ ᐊᓐᑕ ᑕᐧᑯᒡ ᐊᓯᓂᒡ᙮ 19ᐸᑕᓪ ᒋ ᐃᓯᓂᐧᑲᑎᒻ ᐊᓂᔭ ᐃᑕᐅᓂᔪᐤ, ᒋᓴᒪᓂᑐᐤ ᐎᒡ ᐊ ᐃᑥᒥᑲᒡ᙮ (ᓗᔅ ᐅᔅᑭᒡ ᒋ ᐃᓯᓂᐧᑲᑕᐤ ᒥᒋᒪ ᑲ ᑎᒂᒡ ᐊᓐᑕ ᐅᑕᓇᐤ᙮)
20ᒂ ᐊᓱᑎᒪᒐᑦ ᒐᑭᑉ, ᐊ ᐃᔅᒋᔄᑦ, “ᐎᒐᐅᒐ ᒋᓴᒪᓂᑐᐤ ᑭᔭ ᓇᑭᑐᐛᔨᒥᒐ ᐊ ᐱᐸᒧᑕᐅᒡ ᑭᔭ ᒥᔨᒐ ᒥᒋᒥᔪᐤ ᒐ ᒥᒍᐅᒡ ᑭᔭ ᐊᐱᒋᑕᐅᓇ ᒐ ᒋᔅᑭᒧᒡ 21ᑭᔭ ᒥᓐ ᑲᐤ ᒥᔪ ᑎᑯᓯᓂᔭᓇ ᐊᓐᑕ ᐛᒋᑦ ᓄᑕᐎᔾ, ᐊᑯ ᒪᒃ ᒐ ᐅᒋᓴᒪᓂᑐᒥᔭᓐ ᐅᑎᐸᔨᒋᒐᐤ᙮ 22ᐅ ᐊᓯᓂᔾ ᑲ ᒋᒥᑕᔭᓐ, ᐊᑯᑕ ᐅᑕ ᐃᑕᐅᓐ ᒐ ᐊᔭᒥᐊᔅᑕᑯᔨᓐ ᑭᔭ ᓂᑦ ᐊᓱᑎᒪᒐᓐ ᐸᐃᑯᔪᐤ ᑕᑐᐤ ᒪᐃᔨᓐ ᒐᒂᓂᔪᐛ ᑲᐤ ᐸᐃᒄ ᒋᑭ ᒥᔨᑎᓐ᙮”
Zur Zeit ausgewählt:
ᒐᓂᓯᔅ 28: ᓇᔅᑲᐱ
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
